San Juan 11

Ya ku̱u tá ndi̱xiꞌi ra Lázaro

1Ta ñuu Betania ndi̱xiyo iin ra nani Lázaro, saa ki̱ꞌin kueꞌe ra ndée ni ndóꞌo ra. Ta kuꞌva yá María xiꞌin yá Marta ku ra. 2(Ta yá María, kuꞌva ra, ku yá ndi̱koyo ndee ndiꞌi nduta tami xaꞌan xaꞌa Jesús, ta saa ndi̱yakun yá xaꞌa ra xiꞌin ixi xini yá.) 3Saa ti̱ꞌvi ná kuꞌva ra chiñu kuaꞌan nuu Jesús káꞌan ná xiꞌin ra, káchi ná saa:

―Tata, ndee ni ndóꞌo ra kúꞌvi ni ini un xíni un ―káchi ná.

4Tá xi̱ni soꞌo Jesús tuꞌun ikán ta ndi̱kaꞌan ra, káchi ra saa:

―Kueꞌe ndóꞌo ra, ta süvi ya kuvi ra xiꞌin kua. Ya ndikunuu vaꞌa toꞌo Ndioxi va kua, chi kuni naꞌa ta saa xaa kaꞌnu na Ndioxi, saa xaa toꞌo na yeꞌe ra kúu Seꞌe Ndioxi ―káchi ra.

5Ta kúꞌvi ni ini Jesús xíni ra yá Marta xiꞌin kuꞌvi yá tin ra Lázaro kuꞌva yá. 6Tá ku̱ndaa ini Jesús ya kúꞌvi ra Lázaro, ta ndi̱ndoo ra soo uvi ka kivi nuu íyo ra. 7Sindiꞌi saa ndi̱kaꞌan ra xiꞌin nda ítaꞌan xiꞌin ra, káchi ra saa:

―Vitin kana koo yo kuꞌun tuku yo estado Judea ―káchi ra xiꞌin nda.

8Saa ndi̱kaꞌan nda ítaꞌan xiꞌin ra, káchi nda saa:

―Tata Rabí, sikan ndi̱yaꞌa uvi ndaa kivi, tá ku̱ni na ñuu ikán kaꞌni na yóꞌo̱ xiꞌin yu̱ú ¿ta ndachu kúni tuku un ndi̱ko koo un? ―káchi nda xiꞌin ra.

9Saa ndi̱kuiin Jesús, káꞌan ra:

―Uxi uvi hora kúu mií iin kivi. Ta iin na xíka nduvi ta käkiꞌi xaꞌa na nduva na, chi nduvi kua xíka na ta túvi nuu na xiꞌin ya yéꞌe̱ ñuu ivi yóꞌó. 10Sundi na xíka ñǔu ta kákiꞌi xaꞌa na chi köo ñu̱ꞌu̱ túun kúu mií na nuu xíka na ―káchi Jesús.

11Ta saa ndi̱kaꞌan ka ra, káchi ra saa:

―Ra kíxi va ku ra migo yo Lázaro yakan kuꞌun i sindikoo i ra ―káchi Jesús.

12Saa ndi̱kuiin nda ítaꞌan xiꞌin ra, káchi nda saa:

―Tata, tá tu ra kíxi ku ra ta nduvaꞌa va ra ―káchi nda xiꞌin ra.

13Ndi̱kaꞌan nda saa chi köo ndi̱kundaa ini nda ya ndi̱kaꞌan Jesús xaꞌa ra Lázaro ya ndi̱xiꞌi ra. Ra kíxi va ku ra ndíkundee ra, káꞌán nda.

14Saa ndi̱kaꞌan teꞌe Jesús xiꞌin nda, káchi ra saa:

―Ra ndi̱xiꞌi ku ra Lázaro. 15Ta yeꞌe kúsini i xaꞌa ya köo i ndi̱xiyo ikán tá ndi̱xiꞌi ra. Chi ya ndo̱ꞌo ra ta ya vaꞌa xaꞌa ndóꞌo̱ kua, ya ná kandixa ndo yeꞌe. Ta vaꞌa ná koꞌo yo koto yo ra ―káchi Jesús xiꞌin nda.

16Saa ndi̱kaꞌan ra náni Tomás, ta káꞌan tu na xiꞌin ra náni ra Dídimo va, ndi̱kaꞌan ra xiꞌin nda ítaꞌan xiꞌin ra, káchi ra saa:

―Ná koꞌo yo kuvi tu yoo va xiꞌin ra ―káchi ra.

Jesús ku ra kúu mií ichí sitaku ra naꞌa, ta kúu mií ra ichí taxi ra kutaku na

17Tá ndi̱xaa Jesús ñuu ikán ta ku̱ndaa ini ra, xa íyo kumi kivi si̱nduxin na ra Lázaro. 18Ta yati kíndoo ñuu Betania xiꞌin ñuu Jerusalén, ta iin kuꞌva uni kilómetro kua kíndoo ya xiꞌin taꞌan ya. 19Ta kuaꞌa ni na judío, ndi̱xaa síndiko na ini ná xaꞌa ya ndi̱xiꞌi kuꞌva ná. 20Saa tá ku̱ndaa ini yá Marta, ya xa kúyati Jesús xaa ra veꞌe ná, ta ke̱ta yá kuaꞌan yá ndikiꞌin yá ra. Ta inka yá María ndi̱ndoo veꞌe. 21Saa ndi̱xaa yá Marta ndi̱kaꞌan yá xiꞌin Jesús, káchi yá saa:

―Tata, tá tu ndíxiyo un yóꞌó ta küvi kuꞌva i, ndikuu. 22Ta saa ni vitin, xíni i tá ndá ñaꞌa ndúku un nuu Ndioxi, ta taxi ra ya ndaꞌa un ―káchi yá xiꞌin ra.

23Saa ndi̱kaꞌan Jesús xiꞌin yá káchi ra saa:

―Nditaku va kuꞌva un ―káchi ra xiꞌin yá.

24Saa ndi̱kuiin yá Marta, káꞌan yá:

―Xa xíni i nditaku ra tá ná ndiꞌi xaꞌa ñuu ivi, kivi ná nditaku na xa ndi̱xiꞌi yachi ―káchi yá xiꞌin ra.

25Saa ndi̱kaꞌan Jesús xiꞌin yá, káchi ra saa:

―Yeꞌe ku ra sínditaku naꞌa, ta yeꞌe ku ra táxi kutaku na. Ndiꞌi na kándixa yeꞌe vani xa ndi̱xiꞌi na, ta taxi i kutaku na. 26Tá kúu ndiꞌi na táku, tá tu kándixa na yeꞌe ta nda iin kivi ndïꞌi xaꞌa na. ¿Án kándixa un ya káꞌan i xiꞌin un? ―káchi Jesús xiꞌin yá.

27Saa ndi̱kuiin yá káꞌan yá:

―Kándixa i Tata, kándixa i yóꞌo̱ ku ra ku Cristo, ra kúu Seꞌe Ndioxi, ra xa íyo tuꞌun xaꞌa, ra ti̱ꞌvi Ndioxi vaxi ñuu ivi ku un ―káchi yá Marta xiꞌin ra.

Xáku Jesús nuu ndi̱nduxin ra Lázaro

28Sindiꞌi tá ndi̱kaꞌan yá saa, ta ndi̱xaꞌan yá ka̱na yá kuꞌvi yá, yá María ndi̱kaꞌan sěꞌe yá xiꞌin yá, káchi yá saa:

―Xa̱a ra Maestro yóꞌó, ta ndúku ra yóꞌo̱ ―káchi yá xiꞌin yá.

29Tá xi̱ni soꞌo kuꞌvi yá tuꞌun ikán, ta ndikun ndi̱kundichi yá ke̱ta yá kuaꞌan yá nuu Jesús. 30Ta täꞌan kiꞌvi Jesús ñuu Betania. Ndi̱ndoo ra íin ra nuu ñuu ñaꞌñu nuu ndi̱xaꞌan yá Marta ndi̱kitaꞌan yá xiꞌin ra. 31Saa tá xi̱ni na judío na ndi̱xaa síndiko ini ná ya kama ni ndi̱kundichi yá María kuaꞌan yá, ta ndi̱kundikun ndiꞌi na kuaꞌan na sata yá, saa chi va nuu ndi̱nduxin ra kuaꞌan yá kuaku yá, káꞌán na.

32Saa ndi̱xaa yá María nuu íin Jesús, tá xi̱ni yá ra, ta si̱kusiti yá nuu ra, káꞌan yá xiꞌin ra, káchi yá saa:

―Tata, tá tu ndíxiyo un yóꞌó ta küvi kuꞌva i ndíkuu ―káchi yá xiꞌin ra.

33Saa tá xi̱ni ra xáku ni yá, ta saa tu na ndi̱xaa ndóo xiꞌin va yá, ta ku̱suchi ni ini ra xiꞌin yá saa ndi̱taꞌvi ni ini ra xi̱ni ra na. 34Ñaa ndi̱ndakan tuꞌun ñaꞌa ra káchi ra saa:

―¿Míí ndi̱xaꞌan ndo si̱nduxin ndo ra? ―káchi ra xiꞌin na.

Saa ndi̱kuiin na káꞌan na:

―Naꞌa koꞌo yo kuni un nuu ndi̱nduxin ra, Tata ―káchi na xiꞌin ra.

35Saa xa̱á Jesús xáku ra. 36Ñaa ndi̱kaꞌan na judío, káchi na saa:

―¡Koto ndo toon! ¡Kúꞌvi ni ini ra xíni ñaꞌa ra! ―káchi na.

37Ta sava tuku na káꞌan, káchi na saa:

―¿Án süvi ra yóꞌó ku ra xu̱na nuu na kuáa̱, ta ndachu köo ndi̱chindee ñaꞌa ra ya ná küvi ra, ndikuu? ―káchi na.

Ya ku̱u nuu ndi̱taku ra Lázaro

38Saa ta ku̱suchi ni ini Jesús. Ta ndi̱xaa ra yeꞌe kava nuu ndi̱nduxin ra Lázaro. Ta índuꞌu iin yu̱ú, yuꞌu kava ikán ndási ya. 39Saa ndi̱kaꞌan Jesús xiꞌin na, káchi ra saa:

―Sikutaꞌa ndo yu̱ú ñaa ―káchi ra xiꞌin na.

Saa ndi̱kuiin yá Marta kuꞌva ndìì ikán, káchi yá saa:

―Tata, xa xáꞌan táꞌi va ra, chi xa íyo kumi vi kivi kua ndi̱xiꞌi ra ―káchi yá.

40Saa ndi̱kaꞌan Jesús xiꞌin yá, káchi ra saa:

―¿Án su xa ndi̱kaꞌan i xiꞌin un, tá tu kándixa un, ta kuni un ya vaꞌa ikan Ndioxi, káchi i xiꞌin un? ―káchi ra xiꞌin yá.

41Saa si̱kutaꞌa na yu̱ú ya ndási yuꞌu kava nuu chi̱kaa na ra. Ta ndi̱koto Jesús nuu ndivi saa ndi̱kaꞌan ra, káchi ra saa:

―Tata Iva i, táxi i tixaꞌvi ndaꞌa un chi xi̱ni soꞌo un ya ndi̱kaꞌan i xiꞌin un. 42Xíni i ndiꞌi saa ichí xíni soꞌo un káꞌan i xiꞌin un. Sundi ndi̱kaꞌan i saa xiꞌin un xaꞌa ndiꞌi naꞌa chútu ni yóꞌó ya ná kuni soꞌo ndiꞌi na, ta saa kundaa ini na ya ti̱ꞌvi un yeꞌe vaxi i ―káchi Jesús.

43Tá sindiꞌi ndikaꞌan ra tuꞌun ikán, ta saa ndi̱ndaꞌi koꞌo ra, káchi ra saa:

―¡Lázaro, naꞌa keta un keꞌe! ―káchi ra.

44Saa ke̱ta ra ndi̱xiꞌi, núꞌni ndiꞌi ndaꞌa ra xiꞌin toto, ta saa tu xaꞌa va ra, ta súvi tuun toto nuu ra ke̱ta ra. Saa ndi̱kaꞌan Jesús xiꞌin na, káchi ra saa:

―Ndaxin ndo toto súvi ñaꞌa ta saña ndo ra kuꞌun ra ―káchi Jesús.

Kúni na kaꞌni na Jesús

(Mt. 26:1-5; Mr. 14:1-2; Lc. 22:1-2)

45Ta kuaꞌa ni mií na judío ndi̱xaa ndóo xiꞌin yá María xi̱ni ya i̱kan Jesús ta saa ka̱ndixa ñaꞌa na. 46Ta sava na ke̱e ndi̱xaꞌan na ndi̱tuꞌun na xiꞌin nda fariseo, ndi̱kaꞌan na xiꞌin nda xaꞌa ya i̱kan Jesús. 47Saa ndi̱kitaꞌan nda fariseo xiꞌin nda sutu naꞌnu, nda ndóso nuu sutu nda xáꞌnda chiñu nuu na judío, káchi nda saa:

―¿Unkua ikan yo vitin? Ra yóꞌó ta yaꞌa ni kuaꞌa yatuꞌun íkan ra. 48Tá tu ná sindoo ndaꞌa yo ra, ta ikan ra ya kúni mií ra, ta kuaꞌa ni na kandixa ñaꞌa. Ta saa ìyo ni sikaku ra kuachi xiꞌin gobierno na Roma ta kixi na ikán sindiꞌi xaꞌa na veꞌe ñuꞌu kaꞌnu yo tin ñuu yo ―káchi nda.

49Ta ra kúu sutu chee kuiya ikán ku ra náni Caifás, ta ndi̱kaꞌan ra ikán, káchi ra saa:

―¡Ndóꞌo̱ ta ni köo xíni mií vi ndo! 50Án köo xíni ndo vaꞌa ka kua ná kuvi iin taa xaꞌa ndiꞌi yo, ta süvi ka vi ya ndiꞌi xaꞌa ndiꞌi ñuu yo ―káchi ra.

51Ndi̱kaꞌan ra saa, ta süvi ya íyo xiní mií ra kua ndi̱kaꞌan ra. Chi Ndioxi ku ra si̱ndikaꞌán ini ra ndi̱kaꞌan ra xaꞌa ya kúu ra sutu ra ínuu nuu ndiꞌi nda sutu kua ndikaꞌan ra saa ya xíniñuꞌu Jesús kuvi ra xaꞌa ndiꞌi na ñuu judío. 52Ta süvi xaꞌa ndisaa na judío kua kuvi ra, sundi ndi̱kaꞌan ra saa ya ná ndikitaꞌan ndiꞌi ni kúu na nduu seꞌe Ndioxi, na ndi̱xita yava ñuu ivi. 53Ta nda kivi ikán xa̱á, chítaꞌan tuꞌun nda, ndá kuꞌva koo kaꞌni nda Jesús.

54Xaꞌa ya ikán kua köo ndi̱xika ndikuu ra tañu na judío. Ku̱xika ra nuu na ke̱ta ra kuaꞌan ra estado Judea ta ndi̱kiꞌin ra kuaꞌan ra yati iku yuyu iin ñuu náni Efraín. Ta ikán ndi̱ndoo ra xiꞌin nda ítaꞌan xiꞌin ra.

55Ta kúmani siloꞌo saa tindaa viko pascua ya xákin na judío. Ta kuaꞌa ni na íyo ñuu vali ke̱e na kuaꞌan na ñuu Jerusalén, yachi ka kuaꞌan na xaa súvi na xiꞌin mií na ta saa kuu mií na ichí kuyati na nuu Ndioxi xaa toꞌo na ra. 56Ta ndúku na Jesús, saa káꞌan xiꞌin taꞌan na, tá ndóo na veꞌe ñuꞌu, káchi na saa:

―¿Unkua ndíkani ini ndo? ¿Án kïxi ra viko pascua túvi ndo? ―káchi na.

57Ta nda fariseo xiꞌin nda sutu naꞌnu xa̱ꞌnda nda chiñu, tá ndá naꞌa xi̱ni ra ta kama ni ná taxi na chiñu ya kuꞌun na tiin ñaꞌa na nda mií nuu ndíkaa ra.

Currently Selected:

San Juan 11: xta

Highlight

Copy