Luk 21

Ukwas itsɔrgur ana ghu unagh

(Mak 12.41-44)

1Mɔ Jizɔs aru kɔ itumbɛ Aonz, akond itogh isa a ɛn iyɔr ghu usu agenɛv mɔ vɛ wayi ghu unagh uvogh kɔ ghɛ akpa uwan unagh. 2Ne ashigh a ɛn ichan ukwas itsɔrgur ghi iwan usam inarigh irarɛv ahar.

3Jizɔs akaa, “Mɛ ɔɔr un ukɔng, ichan ukwas itsɔrgur ungumɔ ahɛmba ghi inan ghu agenɛv ambumɔ amem. 4Itiyo-ikaa, iyɔr amem amban vɛ na unagh vɛ na kɔ usu uvo; kpa ichan ukwas itsɔrgur ungumɔ kɔ ghi ichan ina awa akan aru ghɛ aka amem.”

Jizɔs atsinga ghi ikaan mbuu itumbɛ Aonz

(Matiyo 24.1,2; Mak 13.1,2)

5Ayɛghɛnɛv anav agenɛv mɔ vɛ ramayi mɔ vɛ tɔr itumbɛ Aonz ghu angon a uswɛn ghɛ unagh ukun vɛ na Aonz. Kpa Jizɔs akaa na, 6“Ghakaa ghi ivan ukpɛ ungwen akaa angan umbun ghi ɛnɛn aa amem vɛ abuu aa tsa-tsa. Ingon imɔm itɛma ghi igen gha!”

7Vɛ pine, “Ɔr utɛsɛn, kɛ hanamɔ ukpɛ akaa angan a ɛrɛ? Kine ikav itɛs ɔs na aka ghi ikuman akan akaa angan a ɛr?”

8Jizɔs arumun, “Ɔr aka tsuyi un gha, iyɔr tsɛng vɛ va itiye aam ukaan na, avo ne amba Ɔr tsɛghan. Ghɛ ukaan va na, ‘Ahɔ akpembere!’ Kpa ka nan avo isima ibɛrɛn gha. 9Ɔ ɛn umgban irɛhɛ itav ghɛ iyɔr ghi ihimban atoow uganyi, kachiyan gha. Akaa angan a ɛr kpɛɛ tegh-tegh, kpa mbɛɛ ava Kɛsmɛ gha.” 10Ne akaa ghɛ avo na, “Itar igen inɔng ghɛ itar igen, ator agen anɔng ghɛ ator agen. 11Ghɛru azuwa asɛnden akaren avo, ijon igba ghɛ awen atsɛrɛn ghu ahiye ahiye, ghɛ akaa a ɛrɛn angan atsɛrɛn ghɛ akav akondon iyɔr akaren avo kɔisa.

12“Tegh-tegh sɛ akaa angan a ɛr mɔ vɛ akɔr un, vɛ kishɛ un. Sɛ vɛ naa un kɔ ataanɛv kɔ atumbɛ izwangnɛn Ujus utunɛn un ghɛ vɛ wa un kɔ ugadi. Vɛ za ghu un kɔ ghɛ ator ghɛ anom iyɔro ghu ukwagh ungwen ɔ ɛrɛn gha, akaa angan amem a ɛr ghu un kɛna umbun ayɛghɛnɛv avav. 13Ku mɔ ne ukor ghi iyan ingin ghu ɔɔrun avo ukwagh uwam. 14Ne aka zayi un iyɔr kɔ asɛma mɔ urumunun avo tegh-tegh gha. 15Itiyo ikaa mɛ inga mɛ na un amuu ajing ghu mfɔ mɔ uzu ramen ɛn atsɔnonov un kas imu umɔm abe vɛ rumun zan vɛ kpɛra ghu un gha. 16Kas amaren avonov, anomgban, utsombur ghɛ akar un, vɛ tow un. Vɛ shigh vɛ wuwa un agenɛv. 17Iyɔr amem vɛ atsɔn un itiyo ikaa umbun ayɛghɛnɛv avav. 18Kpa kwa umɔm abe aper kas ugɛra ichiye uwon umɔm kɔ ghi itogh gha. 19Ɔ ɛn uru ghi isima iwan, ɔ arǝn umuwa uwow.

20“Ɔ ɛn uwaiku agamber Jerusalɛm vɛ wa atɛ, fɔn na ahɔ avo asɛngnɛn uvor akpember. 21Mɔ tah amban kɔ Judiya vɛ yuz hin vɛ yov kɔ igo, amban kɔ ghu ahiye Jerusalɛm vɛ aduwe, amban kɔ vɛ hiye kɔ uwen mɔ vɛ kaa nɔrɔyi kɔ Jerusalɛm gha. 22Itiyo ikaa, ka ahɔ angan Aonz ana iyɔr Jerusalɛm ichan, Kɛ man ne amuu vɛ aramen ɛchi Aonz angan vɛ angɛr a ɛr. 23Ahɔ ungumɔ akasɛv amban vɛ wa uyav ghɛ amban vɛ ambɛn myem vɛru ghi ichan. Iyɔr vɛru ghi ichan shisha kɔ inya ingimɔ ghɛ ichan ina Aonz iru ghɛ avo. 24Ɛr vɛ wuwa agenɛv ghi isɔm agenɛv vɛ akɔr avo ikpan vɛ yov ghɛ avo kɔ itar igen. Ɔr amban amba Ujus gha vɛ abuu vɛ nyar Jerusalɛm kpem ahɔ angan Aonz ana avo abe.

25“Ghɛ akav atsɛrɛn atɛs kɔ ighang, uwoor ghɛ asan. Iyɔr utarev kɔ itar imem vɛ aka fɔ ukwagh ungwen amba ghɛ awɛ gha, ghɛ uchiyagh ghi ikumɛn ajɔr ataan. 26Iyɔr vɛ humɛ, ghu uchiyagh ghakaa angan anga ghi ivan kan utar, Ikɔw amban kɔisa ayɛghɛsɛyi. 27Ukpɛ ungumɔ iyɔr vɛ a ɛn Uwan Ɔro aru ghi ivan kɔ ghɛ akugh ghi ikɔw ghɛ utorov umbun ukar-avo. 28Ɔ ɛn akaa angan ahiye ghi ɛrɛn mɔ, mughun kondon itogh isa, itiyo ikaa arǝn iyon ikpember.”

29Ne atuwa avo ikan ingin: “Ɛn sɛ ukon ɔfig, ghɛ ikon igen. 30Ɔ ɛn ihiye ghi sɛghɛn ika, ugba ghi ifɔn na ufam ukpember. 31Ku mɔ ne, ɔ ɛn akaa angan a ɛr amem, gban ghi ifɔn na Utorov unav Aonz ukpember. 32Mɛ ɔɔr un ukɔng, ichend ingiyen ikar gha kpem akaa angan amem a ɛr. 33Kɔisa ghɛ kan ghi inya ghakar kɔ, ghi imu uwam umɔm akar gha.

34“Kɔr ayom, ka hɛmban ibɛrɛn isima ghu uyaa gha, ghɛ uman masɔrum ghɛ isaren utar. Ka ɛrɛyi ɛn ihɔ ingimɔ ikɔr uwɛ ghi imgbogh ɛn itambenɛv gha. 35Itiyo-ikaa ihɔ ingimɔ iva ghi iyɔr amem han ghu utar. 36Kɔr ayom kpem, ram ghu Aonz ɛn akaa angan anga ghi ivan mɔ abe apɛruw gha, ɛn ube itire kɔ ghi ishigh Uwan Ɔro.”

37Hanamɔ usov Jizɔs azayi kɔ itumbɛ Aonz utɛsɛn, ayɛkighɛ ahire aza tsa kɔ Ugo ungun ungu ghi Ikon ɔlivɛ. 38Isum iyɔr vɛ gamberayi kɔ itumbɛ Aonz utur-utur usov ghu usov umgban un.

Currently Selected:

Luk 21: UTA

Highlight

Copy