Luk 20

Ataanɛv Ujus vɛ pine Jizɔs kɛ ana ana iyan

(Matiyo 21.23-27; Mak 11.27-33)

1Ihɔ igen mɔ Jizɔs aru ghi itɛsɛn iyɔr urɛhɛ usɛ kɔ itumbɛ Aonz, Ataanɛv kɔ apɛɛnɛv anav Aonz, ghɛ atɛsɛnɛv mɛnna Ujus, ghɛ ataanɛv iyɔr vɛ va hɔ ghu un. 2Vɛ pine Jizɔs na, “Ghi ihɛr hanamɔ ne ɔ ɛrɛn akaa angana? Kɛ ana ana iyana?”

3Jizɔs arumun na, “Mɛ kpa mpine un ukwagh. Ɔɔrum, 4iyan Jon ɔr minden iyɔr kɔ ijɔr Aonz ne ana un hini ki iyɔr ne ina unu?”

5Ne vɛ wa iyu ghɛ vɛ arend na, “Ɔ ɛn ghi kaa na Aonz ne ana, apine ɔs na, ‘Kine ɛr sɛ un nan Jon isima ibɛrɛn gha?’ 6Kpa ɔ ɛn ghi kaa na iyɔr ne vɛ ana un, iyɔr amem vɛ ta ɔs angon itiyo ikaa iyɔr vɛ fɔ na Jon ukɔng angwe ɔr uramen ɛchi Aonz.” 7Ne vɛ rumun un na, ghi fɔ hɔ iyan ingimɔ iva gha.

8Ne Jizɔs arumun na, “Mwe kpa mɛ ɔɔr un iyan ingin mɛ ɛrɛn akaa angan gha.”

Jizɔs atuwa ikan ghi iyɔr ikɔrɔv

(Matiyo 21.33-46; Mak 12.1-12)

9Ne Jizɔs atuwa iyɔr ikan ingin. “Ɔr ugen arɔ ikɔr ugrɛp#20.9 Ugrɛp Atam angan anga nɛɛnɛn angan iyɔr ujus amba ɛrɛn masɔrum manɛnɛn uvu. , ne ana iyɔr ikɔrɔv agenɛv ɛn vɛ ɛrɛyi hin vɛ ava bur ghu un ukpɛ uzɔrun, ne aza kɔ utar ugen aru ken kpem. 10Ghu ukpɛ uzɔrun, atind ɔr utom una kɔ ikɔrɔv na aza hin aza ɔz ukar una. Kpa iyɔr ikɔrɔv ambumɔ vɛ gbire ɔr utom hun, vɛ zenda un ayov wayi. 11Ne Uwun ikɔrɔ atind ɔr utom ugen, vɛ agbire un, vɛ ahoo un vɛ zenda un ayov wayi. 12Atind va ɔr utom utar, va vihi un iyɔr vɛ ker un kɔ uwen.

13“Ne uwun ikɔrɔ apine na, ‘Kine mɛ ɛr? Mtind uwan uwam, isima-isima. Ɛr ken ken vɛ tugh un.’

14“Mɔ iyɔr ikɔrɔv hun vɛ ɛnɛn ghu uwan una mɔ, vɛ ram ghɛ arend, ɛn uya usu una ne angwe ghi ivan mɔ. Van ghi wuwa un ɛn akaa ana ihir aas. 15Ne vɛ ker un kɔ uwen vɛ wuwa un.”

“Kine ɔ ɛn na uwun ikɔrɔ hun a ɛr ghɛ iyɔr ikɔrɔv ambumɔ? 16Ava wuwa iyɔr ikɔrɔv ambumɔ ana ikɔr hun kɔ iyɔr agenɛv.”

Mɔ vɛ mgban ikaan ingin, vɛ kaa na, “Aonz aka rumuniyi mɔ gha.”

17Jizɔs ɛn ghɛ avo apine na, “Kine mfɔ ukɔrun ghɛ awɛ kɔ ukwagh ungɛrɛn ungwen kɔ ukaa Aonz ungwen akaa?

“ ‘Ingon ingin iyɔr amanɛv vɛ venda

hanagen iyi ne ihir kas-kas ghɛ angon agen.’

18Hana umo ɔr ungwen agba ghi igon ingumɔ ahɛmb kpurkpur, hanamɔ ɔr ungwen igba ghɛ ana ikɔɔgh un.”

19Atɛsɛnɛv mɛnna Ujus ghɛ ataanɛv kɔ apɛɛnɛv anav Aonz vɛ ker ungwen vɛ kɔr un Kɛsmɛ, itiyo ikaa vɛ afɔ na atuwa ikaan ingimɔ kɛ ghɛ avo. Kpa vɛru ghu uchiyagh ghi iyɔr ingimɔ.

Vɛ pine Jizɔs ghu ukwagh unan Siza ukpanɛv

(Matiyo 22.15-22; Mak 12.13-17)

20Ne vɛ bɛrɛyi ase ghu ana shisha, vɛ tind iyɔr amban vɛ za kɔ ghu un utsun na amba asɛv. Vɛru ungwen vɛ kɔr Jizɔs ghɛ aram ana ɛnmɔ vɛ na un kɔ ihɛr ghɛ ikɔw Unom ikɔn ɔ Rom ɛn vɛ kɔr un. 21Vɛ pine na, “Ɔr utɛsɛn, ghi fɔ na uramen utɛsɛn akaa ghu ukɔng, ɔ ɛrɛn ghɛ amem ukwagh umɔm usangnɛn gha. Utɛsɛn iyɔr ihang Aonz ukɔng. 22Ɔɔr ɔs, akaa jing na ghi itaa Siza#20.22 Siza Unom utaan kɔ anom ungwen a ɛnɛn ghi ikɔw ghu Rom umuwem. ukpanɛv hini ghi ide?”

23Jizɔs afɔ na vɛru ghi kɛrɛn ghu utsun un akaa ghɛ avo na, 24“Tɛsɛm ghi inarigh Rom hun. Ishigh ghi itiye ina ana ingi ghi inarigh hunu?”

Vɛ kaa. “Ghi inagh Siza.”

25Ne akaa na, “Na sɛ Siza ukwagh ungwen angwe una Siza, ushigh unan Aonz ukwagh ungwen angwe una.”

26Ne vɛ ka fɔ ukwagh ungwen vɛ kɔr un ghɛ awɛ kɔ ghi ishigh iyɔro gha. Kpa ghɛ tser avo ghu mrumun una, vɛ seng swɛng.

Vɛ pine Jizɔs ukwagh mrɛr kɔ uku

(Matiyo 22.23-33; Mak 12.18-27)

27Mɔ Ɔsadusi agenɛv amban, vɛ kaa na mrɛr kɔ uku angwe gha, vɛ va ghɛ mpine kɔ ghɛ Jizɔs. 28Vɛ akaa na, “Ɔr tɛsɛn, Mosis angɛr mɛnna na ɔ ɛn ɔr akpo, avund ukwas sɛ aka mar myem gha, uwan-uvoo atɛng ukwas itsɔrgur hun ɛn amar uwan hin abɛr uwan-uvo. 29Ghɛru anomgban atsindar tsar umɔm. Ghu mahɛ uvo a ɔz ukwas amar uwan gha akpo. 30Ungwen uhar a ɔz ukwas itsɔrgur hun, ashi akpo amar uwan gha. 31Ne ungwen utar a ɔz ukwas itsɔrgur hun akpo amar uwan gha. Mɔ ne ghɛru ghɛ vɛ anomgbanɛv atsindar tsar umɔm vɛ akpo amem vɛ mar myem gha. 32Ghu mas itiyɔ, ukwas hun akpo. 33Hanagen kɔ mrɛr kɔ uku, ɔɔr sɛ ɔs kɔ avo amem kaa na ukwas ungumɔ aru una? Mɔ avo atsindar tsar umɔm vɛ ɔz un mɔ.”

34Jizɔs arumun, “Iyɔr amban han ghi inya amba ɔzun amba nan iva. 35Kpa, amban vɛ kuma urun kɔ utar mrɛr kɔ uku mɔ amba ɔzun gha, amba nan iva gha. 36Mɔ ambumɔ vɛ akpo va gha. Vɛru ken ɛn itomov anav Aonz. Amba myem Aonz ɛchine vɛ arɛr kɔ uku.

37“Kpa Mosis atɛs gbɛngang na akponov vɛ rɛr kɔ uku, kɔ ukwagh ungɛrɛn una ungwen ukon asan uhiyayi mɔ. Kɔ ukwagh ungɛrɛn hun ataa na Uwun Aonz, ‘Aonz una Abɛraham, Aonz una Azik ghɛ Aonz una Jakob.’ 38Mɔ un kɛ Aonz vɛ akponov gha, hɔ ghu ana iyɔr amem amba a umuwav.”

39Agenɛv atɛsɛnɛv mɛnna Ujus vɛ rumon un na, “Ɔr tsɛghan, uram jing” 40Ahiye hen vɛ aka aru ghu uchihi ungwen apine un ukwagh gha.

Jizɔs apine mpine ukwagh ghu Ɔr tsɛghan

(Matiyo 22.41-46; Mak 12.35-37)

41Ne Jizɔs ana amban vɛru ghi imgban un mpine, kine amba akaan na Ɔr tsɛghan una Aonz kɛ uwan una Dɛvid? 42Itiyo-ikaa Dɛvid ingiya angɛr kɔ ukaa Achama:

“ ‘Uwun Aonz akaa kɔ Uwun uwam:

“Tɛmam kan ghu uvogh ayanɛgh ukagh

43kpem mɛ gɛma atsɔnonov avov

ungwen vɛ hiru ukwagh uwow ubɛrɛn avor.” ’

44Dɛvid atah un ‘Uwun’, Ne aka nan sɛ Ɔr tsɛghan arun uwan una?”

Jizɔs atumbwɛ ayɛghɛnɛv anav utogh ghɛ atɛsɛnɛv Mɛnna

(Matiyo 23.1-36; Mak 12.38-40)

45Mɔ, isum iyɔro iru ghi imgban, Jizɔs akaa kɔ ayɛghɛnɛv anav na, 46“Kɔrun ayom ghu Atɛsɛnɛv mɛnna Ujus. Aka shiyan avo uzenden ghɛ akond angan atɛs na avo amba iyɔr Aonz, aka shiyan avo ɛn iyɔr hin akayi ghɛ avo kɔ ghu ukasuwa. Aka shiyan avo utɛman kɔ ikɔnuv unomov kɔ atumbɛ izwangnɛn Ujus, ghɛ ikɔnuv unomov kɔ ghɛ atungnun. 47Amba ahonzun usu akasɛv itsɔrgur, ta vɛ ram ghu Aonz kpemɛyi, ɛn iyɔr vɛ afɔ na avo amba iyɔr Aonz. Aonz ana avo ichan ihimban.”

Currently Selected:

Luk 20: UTA

Highlight

Copy