Mariko 4

Emuanyi we'muinzi

(Mat 13:1-9; Luk 8:4-8)

1Yesu era kuya kanji kwa musike se'nyanja ye'Kalilaya na átangirisa ákangirisa ebandu. Bandu banene bera kumusungula. Bushi no'ku, era kwérukira mwa bwato bwa bwábaa bwèmenze kwa nyanja na ékala'mo. Ne'bandu bera kushiba kwa musike. 2Yesu era kubakangirisa myasi inene mwa mianyi.

Mwe'i mianyi, era kubabura mbu: 3«Mǔmvrisaa! Kwábaa muinzi muuma ola wáyaa kuhuira embuto mwe'hwa lyai. 4Ábere era áhuira'si, siuma sera kutowangiranga kwa musike se'njira. Emilonge yera kuika na yáchilira'si. 5Esinji sera kutowera mwa tukoi-koi, ala ábaa atáli lutaka lunene. Sera kumera fuba bushi elutaka lwábaa lùkeire. 6Si mango esuba lyákolaa, lyera kocha ei myaka na yôma, bushi emisi-misi yai yábaa ìtasimikire mwa chitaka. 7Esinji sera kutowera mwa mihoi-hoi. Ei mihoi-hoi, mango yámeraa yera kwîta'si, chiro síkacheka bifuma. 8Esinji sera kutowera mwa lutaka lwa lwète ebuinu. Esera seke, sera kumera. Mango sákulaa, siuma mu'si sera kwêka bifuma mahatu-mahatu, ne'sinji chiratu-chiratu, ne'sinji eyana-eyana.»

9Chasinda, Yesu kukwera kuteta mbu: «Rero, ola wète matwi me'kûmva, ǒmvaa!»

Cha chátumaa Yesu énde áteta mwa mianyi

(Mat 13:10-17; Luk 8:9-10)

10Mango Yesu ábaa era àli yeine, endumwa* sai ekumi ne'biri ala'uma ne'banji bandu ba bábaa bamúsungwire, bera kumubusa mbu: «eWaliya! Ei mianyi wera kuteta, ùtuánululiraa'i.» 11Yesu nai mbu: «Mwabo, mwálosibwe mira emyasi era ìbishirwe mwa Bwami bwa Ongo*. Si ebanji ba bàtatula mwa chikembe chenyu beke, mwa mianyi mu nénjire nábahambalira

12chasiya,

‹bénde bátumbikisa si bàtalolaa,

kanji bénde bômva, si bàtamenyereraa,

bushi akaba bangénjire bálola banaményerere,

bangaálukirire Ongo,

nai àngababalire'bo.› #4:12 Somaa Isaya 6:9-10. »

Yesu áanulula emuanyi we'muinzi

(Mat 13:18-23; Luk 8:11-15)

13Chasinda, Yesu era kubura ebandu mbu: «Akaba mùtomvire oyu muanyi, rero kute mungômva einji yoshi? 14Embuto sa muinzi áingaa, chìri eChinwa cha Ongo. 15Embuto sa sátoweraa kwa musike se'njira, sihúhanyisibwe ne'bandu ba bénde bômva eChinwa cha Ongo. Unao-unao, Wamusimu ánaika kukula'chi mwa michima yabo. 16Ne'sa sátoweraa mwa tukoi-koi, si sihúhanyisibwe ne'bandu ba bénde bômva eChinwa cha Ongo, ne'kwángirira'chi na lumoo. 17Si chìtasimika mwa michima yabo, bushi mango bénde bálola kwa malae nesi kwa malibuko bushi nachi, unao-unao bánareka ebwemeresi bwabo. Aola, bahúhanyisibwe ne'mbuto sa misi-misi yasi itásimikaa mwa chitaka. 18Ne'sa sátoweraa mwa mihoi-hoi, sihúhanyisibwe ne'bandu ba bénde bômva eChinwa cha Ongo, 19si emianyo yo'muno butala, ne'kusima ebuare, na inji myasi ye'buhuma-huma, byénde byáfunderesa echi Chinwa mwa michima yabo. Bushi no'ku, chìteka bifuma. 20Ne'sa sátoweraa mwa lutaka lwa lwète buinu, seke sihúhanyisibwe ne'bandu ba bénde bômva eChinwa cha Ongo ne'kwêmerera'chi, na kunálinda bêka ebifuma. Bauma bánêka bifuma mahatu-mahatu, ne'banji chiratu-chiratu, ne'banji eyana-eyana.»

Emuanyi we'tara

(Luk 8:16-18)

21Kanji Yesu era kubabura mbu: «Ewashe! Emundu àngareta etara kanji àlifunyikire echitonga nesi abíke'li mwa buhanjingo? Nânga! Kwa kakondo ku ende ábika'li. 22Kuno'ku ku byoshi bya bìbishirwe bikábihulwa changanama. Na chira mwasi woshi ola ùbishirwe, nao akámenyeka changanama. 23Rero, ola wète ematwi me'kûmva, ǒmvaa!»

24Yesu era kuhuba kubabura mbu: «Ei myasi mòmvire, muiményereraa kubuya-buya! Bushi bya mwénde mwáirira ebanji, bi Ongo nai akánabaírira. Kanji yeke akánarengeresa. 25Bushi ola wète kandu, iwénde wánêresibwa ekanji, si ola utéte kandu yeke, akányaibwa ne'ka àchirembaa kuata.»

Emuanyi we'mbuto sa sáchimereraa

26Yesu era kuteta kanji mbu: «eBwami bwa Ongo*, tùngabuhuhanya na muanyi wa mundu muuma ola wáingaa embuto mwe'hwa lyai. 27Ei mbuto yera kumera yanálinda yákula emushi ne'butufu, mango ábaa énjire ába aséne nesi àonjire. Chiro ákamenyerera kute ku ei mbuto yámeraa. 28Muményereraa kwe'lutaka lweine, lu lwénde lwámesa emyaka: yénde yêka ebihoho tanga, yánêka emirimba chasinda etufuma mwa mirimba. 29Na mango otu tufuma twénde twába tweríre, mu mango emundu énde áshebula'to, bushi esuku se'kushebula sàikire.»

Emuanyi we'kafuma ke'aratali

(Mat 13:31-32, 34; Luk 13:18-19)

30Yesu era kuendekera áteta mbu: «eBwami bwa Ongo*, tùngabuhuhanya na chiye? Nesi tùngabuhambala'ko mu muanyi muchiye? 31Obu bwami, butúla buhúhanyisibwe ne'kafuma ke'aratali. Aku kafuma, ku katúla kaeke busese kurenza etunji tufuma toshi twa twénde twáingwa muno butala. 32Si mango kénde kába kàingirwe mira, kánamera, kánere katábaana kurenza einji myaka yoshi yo'mwe'hwa. Chasinda, kánaata matabi manenene, kuikira kwa chihangi emilonge ìnganáimba ematu mabo kwa'mu matabi.»

33Yesu ábaa énjire ákangirisa ebandu mu inji mianyi inene era ìri nge'i, kukulikana no'kwa bábaa bàngaala kûmva. 34Kutáli chinwa chisibya cha ábaburaa busira kuteta'chi mwa muanyi. Si mango éndee ába àli yeine ala'uma ne'banafunzi* bai, mu mango éndee ábaanululira emyasi yoshi.

Yesu ábanda kwa mulaba

(Mat 8:23-27; Luk 8:22-25)

35Mwo'lu lusuku lu'nolu, ábere lwera luolo-olo, Yesu era kubura ebanafunzi* bai mbu: «Tuhábukiraa kwa unji mushirirya we'nyanja.» 36Ebanafunzi* bera kureka eluamba lwe'bandu, bera kwêngirira mwa bwato bwa Yesu ábaa àli'mo, na báchiuma. Bera kuenzikanya na manji mato.

37Kwe'i nyanja, kwera kuulukira chusi chisibu. Bwa bwato, emulaba kuna kutangirisa áurutanganya'bo, kuikira echihangi emeshi mábaa máhonda kwêhula'mo. 38Mwe'chi chihangi, Yesu yeke ábaa àonjire kwa lunda lwe'ra nyuma se'bwato, àsheyamire.

Ebanafunzi* bai bera kumususa na kumubura mbu: «Mukangirisi! Eri ùtasene kwa kusika ku twásikira muno?»

39Yesu era kusuka, era kukaliira echi chusi na kubura enyanja mbu: «Òreraa, unásire!» Unao-unao, ola mulaba kuna kuorera. Ne'nyanja na yába pi!

40Chasinda, Yesu era kubusa ebanafunzi* bai mbu: «Chi chàtumaa mwôbaa bacha? Mùtanafuraa kuata bwemeresi?» 41Abu banafunzi* bera kôbaa busese.

Bushi no'ku, bera kutangirisa bábusanya mbu: «Ewashe! I'wera mundu muchiye ono, ola emulaba ne'nyanja nabi byámutunda!»

Currently Selected:

Mariko 4: tbt

Highlight

Copy