Mariko 5

Yesu âmbula ebihwasi kwa mundu

(Mat 8:28-34; Luk 8:26-39)

1Mango Yesu ne'banafunzi* bai bábaa bera bàhabukaa enyanja, bera kuika mwa chio che'Bakerasi.

2Ábere Yesu era átenga mwa bwato, unao-unao mundu muuma ola wábaa usímbirwe ne'bihwasi, kuna kupamukira era muhondo sai átengera kwa shinda. 3Oyu mundu, kwe'si shinda ku ábaa era anátula. Kanji kùtabaa chiro na mundu asibya ola wábaa ùngachiala chiro kumusalinga ne'mareure. 4Bushi chira mango ebandu béndee bámuminyira ebyuma mwa maulu, ne'mareure mwa mino, ebi byoshi era kunde ánabikonolanga. Kutábaa chiro na mundu asibya ola wábaa wète misi ye'kumuala. 5Oyu mundu, kusungula ku éndee ánasungula-sungala emushi ne'butufu kwe'si shinda no'mwa miruko. Kanji éndee áchilakangira ne'kuchikomanga ne'makoi.

6Ábere alóla ku Yesu marerere, era kumulibichira na ákoma emafi era muhondo sai. 7Era kulakanga busese mbu: «E u'Yesu Mwenyi Ongo ola utúla kwa nguba, chi wányihonda'ko? Nákwěma kwe'sina lya Ongo, ùtanyiribusaa!» 8Átetaa bacha bushi Yesu ábaa énjire ámukaliira mbu: «E u'chihwasi, tèngaa kwo'no mundu!» 9Chasinda, Yesu era kumubusa mbu: «Esina lyao, únde?» Nai mbu: «Esina lyanyi nyi Tùli bengi, bushi tutúla banene.» 10Oyu mundu, era kunaendekera éma Yesu busese mbu àtambuliraa ebi bihwasi mu chinji chio.

11Mwe'chi chisiki ofu ne'ndulungu, mwábaa mwálira buso bunene bwa ngulube. 12Ebi bihwasi, byera kwéma Yesu mbu: «Mwe'si ngulube mu utwêmereraa twěngirire.» 13Yesu era kwêmerera. Bya bihwasi kukwera kutenga kwo'la mundu na byáya kwêngirira mwe'sa ngulube. Obu buso boshi bwasi, kuna kwândaala na sáchirowanga mwa nyanja na sásikira'mo. Esi ngulube sábaa sìngaika ku byumbi bibiri.

14Chasinda, ebangere be'si ngulube bera kulibichira mwa musi no'mwa tumbara, báya kufulira ebandu kwa myasi era yàbere. Ebandu bera kunaika báya kuchilorera kwe'bya byàbere.

15Ábere baíka ala Yesu ábaa àli, bera kulola kwo'la mundu wábaa usímbirwe ne'bihwasi ékese, era àli muuma-uma, era ěmbese ne'njimba. Bushi no'ku, bera kwôbaa. 16Ba báchiloreraa kwa myasi yoshi era yáikiraa oyu mundu ne'ra yáikiraa esi ngulube, bera kubalira ba básindaa kuika kwe'i myasi. 17Bushi no'ku, bera kutangirisa béma Yesu busese mbu aténgaa mwa chio chabo.

18Ábere Yesu era érukira mwa bwato, oyu mundu wábaa usímbirwe ne'bihwasi era kumwěma mbu baéndaa ala'uma nai. 19Yesu chiro ákêmerera. Si era kumubura mbu: «Uhúbaa kwa wao, úye kubura bányakenyu emyasi yoshi era Enawenyu àkukorere, no'kwa àkufirire bonjo.»

20Chasinjire, oyu mundu era kwire áchiuma, na átangirisa ábalira ebandu bo'mwa chio che'Tekapoli,#5:20 Tekapoli: Kukuteta mbu chio cha misi ekumi. emyasi yoshi era Yesu àmukoreraa. Ebandu boshi ba bômvaa kwe'i myasi, bera kusanwa busese.

Yesu álamya mukasi muuma ômwola na mwali wa Yairo

(Mat 9:18-26; Luk 8:40-56)

21Era nyuma se'bi, Yesu era kuhabukira kwa unji mushirirya we'nyanja mwa bwato. Ábere era àli kwa musike se'i nyanja, bandu banene bera kumusungula. 22Mwo'lu, mukulu-kulu muuma wo'mwa bushenge bwe'Bayuta* mbu i'Yairo, era kuika aola. Oyu Yairo, mango álolaa ku Yesu, era kukoma emafi era muhondo sai. 23Era kumwěma busese mbu: «Mwali wanyi mutoto áhonda kutowa emuchima. Rero, nákwěma ubáhe umúbike kwe'mino aláme, ahúbe kuba muuma-uma.»

24Bushi no'ku, Yesu era kuenda nai. Lwa luamba lwe'bandu lwera kukulikira Yesu báenda bámufundeeresa.

25Mwa'bu bandu namo, mwábaa mùli mukasi muuma ola wábaa wamála myaka ekumi ne'biri éte bulwala bwa kutengwa ne'mikira. 26Oyu mukasi ábaa álibukire busese bushi ne'kuhakirirwa na báhake banene. Era kunálinda áesa ebikulo byai byoshi si chiro atálamaa. Obu bulwala bwai, kuendekera ku bwánaéndekeraa bwámusera. 27Rero, mango ômvaa kwa ngulu ya Yesu, era kwire êngirira mwa luamba lwe'bandu àli era nyuma sai. Chasinda, era kuùma kwa luchimba lwa Yesu, 28bushi ábaa énjire áenda áteta mbu: «Akaba nyìnganauma chiro kwa luchimba lwai, eri nanálamire!» 29Unao-unao, kuna kûmva kwa ebulwala bwai bwalámire.

30Yesu nai unao-unao, era kumenya kwa kuli misi era yamútengire'mo. Bushi no'ku, era kubinduka era nyuma mwa luamba, na ábusa mbu: «Nde iwàumire kwa luchimba lwanyi?» 31Ebanafunzi* bai nabo mbu: «eWaliya, si weine uséne kwa bandu bakúfundeeresise! Rero, kute kanji wera ùngatubusa mbu nde iwàkuumire'ko?»

32Si Yesu era kusungusa emeho mwa bandu ba bábaa bamúsungwire, chasiya àlole nde iwàirire bacha. 33Ola mukasi era kwôbaa, na átangirisa ákukumana bushi ábaa aményire mira byoshi bya byàmuikirire. Bushi no'ku, era kuya kuchihunda mwa maulu ma Yesu na ámubura emyasi yai yoshi kanangana. 34Yesu kukwera kumubura mbu: «Mwali wanyi, ebwemeresi bwao bwàkulamise! Ùchienderaa ne'bôlo. Obu bulwala bwao, bwalámire!»

35Ábere Yesu anáchiri áteta, kwera kuika ndumwa sa sábaa sátengera ala mwa Yairo. Esi ndumwa, sera kubura Yairo mbu: «Aaye waliya! Mwali wao era àtowaa emuchima. Ùtachitamyaa eMukangirisi!» 36Si Yesu chiro ákalaa kwe'bi. Era kubura Yairo mbu: «Ùtobaa, ebwemeresi bu unáataa!» 37Yesu atêmereraa mbu kubáa ola wáenda nai kureka Petero, na Yakobo, na Yowani munyakabo Yakobo.

38Báikire ala mwa Yairo, Yesu era kubuana'o lwayo lunene, bushi ebandu bábaa bálira ne'kuchilakangira busese. 39Era kwêngirira mwa nyumba na ábura ebandu mbu: «Chi chátuma mwáira elwayo ne'kulira bacha? Ono mwana àtafire, si kuonjira ku àonjire!» 40Abu bandu, bera kutangirisa bámushekera.

Si Yesu era kubaulusa boshi era butala. Era kushiba ne'banafunzi* bai bahatu, ne'basere bo'yu munyere. Era kwêngira mwa chumba cha chirunda che'mwana chábaa chìri. 41Era kumusímbira kwa mino na ámubura mbu: «Talita kumu!» Kukuteta mbu: «E u'munyere, nyínatechire mbu usúkaa!»

42Unao-unao, ola munyere kuna kubatuka na átangirisa áchěndera. Ábaa éte miaka ekumi ne'biri. Ba bandu bálolire bacha, bera kusanwa busese. 43Si Yesu era kubachichika busese kwa bàtabalira mundu asibya kwe'i myasi. Chasinda, era kuteta mbu běresaa oyu mwana kwa biryo.

Currently Selected:

Mariko 5: tbt

Highlight

Copy