Mariko 6

Besha mwa musi wabo Yesu bámukena

(Mat 13:53-58; Luk 4:16-30)

1Yesu ne'banafunzi* bai bera kutenga mwe'chi chisiki, na báya mwa musi wai we'kabutwa. 2Mango elusuku lwe'Sabato lwáikaa, era kutangirisa ákangirisa ebandu mwa bushenge bwe'Bayuta*. Mango ebandu bábaa bámumvirisa, banene mubo bera kusanwa busese. Bera kutangirisa bábusanya mbu: «Ono mundu, ngai u'àkulire ene myasi yoshi? No'buno bwenge nde iwàmwêresise'bo? Ne'bine bisomerano énjire áira, ngai u'àkulire ebuashi bwe'kuíra'bi? 3Si ola murenga we'kukola embao onola! Si Mariya i'nyina! Na Yakobo, na Yose, na Yuta, na Simoni bu balumuna! Na baliwabo, si ku tunátulanabo kuno!» Echera chera kutuma bátamwêmerera.

4Yesu kukwera kubabura mbu: «Emurebi* àtaina etunda mwa bisiki byoshi, si mwa musi wabo, na mu banyakabo, no'mwa mwai mu àtanêresibwa'li.»

5Yesu chiro ákáira chisomerano chisibya mwo'yu musi, si balwala baeke bu ánalamyaa mwa kubabika kwe'mino. 6Era kusanwa busese, bushi abu bandu bánanaa mbu bàtangemerera.

Yesu átuma endumwa sai ekumi ne'biri

(Mat 10:5-15; Luk 9:1-6)

Era nyuma se'bi, Yesu era kunde ásungula kwa misi áenda ákangirisa ebandu. 7Era kwâmaala endumwa* sai ekumi ne'biri, era kubatuma babiri-babiri na áberesa ebuashi bwe'kwâmbula ebihwasi. 8-9Era kubachichika mbu: «Mwa lubalamo lwenyu, mùtekaa chiro na kandu kasibya, nga mbamba, nesi hao, nesi luteya mwa mifuko yenyu, nesi lunji luchimba lwa kúinganya. Si ekachi ke'kuendera'ko keine oshâo ku mùnêkaa, mwánembala ne'birato.»

10Yesu era kuhuba kubabura mbu: «Na mango bangénde bábahuukasa mu nyumba irebe, muberaa'mo, kuikira emango mungátenga mwo'yu musi. 11Kanji akaba besha musi murebe bànganana kubahukasa nesi kubomvirisa, muténgaa'mo. Si mwa kutenga'mo, mukúngutaa emukungu ola ulí kwa bihando byenyu. Obola bungába bubei kwa'bu bandu.»

12Esi ndumwa* sera kwire sáchiuma sáenda sáhubanganyisa ebandu mbu babíndukaa baténge mwa bibi byabo. 13Sera kunde sâmbula na bihwasi binene, na kulamya balwala banene mwa kubakaba emafuta.

Heroti êchisa Yowani Mubatisayi

(Mat 14:1-12; Luk 9:7-9)

14Mwe'si suku, engulu ya Yesu yera kûmvikana busese mwa bandu boshi, kuikira kwa chihangi mwami Heroti nai era kunômva ku'i. Bandu bauma bera kunde báteta mbu: «Yowani Mubatisayi iwòmokire. Nechi, chi chitúmire áata ebuashi bwe'kuíra ebisomerano.» 15Si ebanji beke, bera kunde báteta mbu: «Oyola i'Eliya.» Ne'banji mbu: «Oyola àli murebi* kuuma ne'barebi bo'kwa mira.»

16Heroti nai mango ômvaa kwe'i myasi, era kuteta mbu: «Oyola àli Yowani Mubatisayi ola nàtetaa mbu baíshaa etwe, iwòmokire!»

17Heroti átetaa bacha, bushi yeine iwábaa wàbwirire ebandu mira mbu basímbaa Yowani bamúmine ne'mareure, bamuúme no'mwa buroko. Áiraa ebyera, bushi ábaa àtolire Herotiya muka Firipo na ámuhwera. No'ku oyu Firipo ábaa munyakabo Heroti. 18Yowani era kwire énde ábura Heroti mbu: «eMwaso wetu àtemerere mbu utólaa muka munyakenyu!»

19Bushi no'ku, Herotiya era kubikira Yowani mungo munene. Era kuhonda àmwîchise, si chiro ákaala, 20bushi Heroti ábaa énjire ôbaa Yowani. Kanji ábaa eshi kwa àli mundu ola ùtungenene era muhondo sa Ongo, kanji àli mubuya-buya. Bushi no'ku, era kunde ámulanga. Kanji ábaa atúla asímire kunde ômvirisa emyasi ya Yowani, chiro àngaba mbu yéndee yámusungulisa ebwenge.

21Lusuku luuma, Herotiya era kubona enjira ye'kwita Yowani. Olu lusuku, lwábaa lusuku lukulu lwe'kukengera ekubutwa kwa Heroti. Bushi no'ku, Heroti era kuira linye na álalika ebashamuka ala'uma ne'bakulu-kulu be'basula, na banji bakulu-kulu be'chio che'Kalilaya.

22Ábere bera banáli mwe'li linye, mwali wa Herotiya era kwêngirira mwa chai na átangirisa asina. Oku kusina kwai, kwera kusimisa mwami Heroti ne'bandu ba ábaa àlalikire. Bushi no'ku, era kwire ábura oyu munyere mbu: «Choshi cha unásimire chi unányěmaa, nyingánakweresa'chi.» 23Kanji era kulaisa mbu: «Choshi cha ungánanyěma nyingákweresa'chi, anabe chimbi che'bwami bwanyi.»

24Oyu munyere, kuna kuchiuma áya kwéma nyina eano mbu: «E mama! Chi nyěmaa?» Nyina nai mbu: «Etwe lya Yowani Mubatisayi li'unémaa.»

25Unao-unao, wamunyere kuna kuhuba malibita era mwa mwami. Era kumubura mbu: «Unano-unano náhonda unyêrese etwe lya Yowani Mubatisayi kwa mbare.»

26Mwami ômvire bacha, era kusibuka busese. Si bushi ne'kulaisa kwa ábaa àlaisise mira era muhondo se'bandu ba ábaa àlalikire, era kuina kute àngachinana oyu mwasi. 27Unao-unao, era kutuma musula wai muuma mbu ayáa kumuretera etwe lya Yowani Mubatisayi.

Oyu musula, kuna kuchiuma áya mwa buroko, era kuisha etwe lya Yowani. 28Chasinda, era kureta'li kwa mbare, na ángirisa'li ola munyere. Nai era kulyeresa nyina.

29Mango ebanafunzi* ba Yowani bômvaa kwo'yu utá na mwasi, bera kuika kutola echirunda chai na báya kutaba'chi.

Yesu êucha bandu byumbi bitano

(Mat 14:13-21; Luk 9:10-17; Yow 6:1-14)

30Mango endumwa* sa Yesu sáfulukiraa era ábaa àli, sera kutangirisa sámubalikisisa emyasi yoshi era sàiraa, na byoshi bya sakángirisa ebandu. 31Bandu banene bámuikirangaa ne'banji báfulukanga, kuikira echihangi Yesu ne'ndumwa* sai báinaa ne'chihangi che'kulya. Bushi no'ku, Yesu era kwire ábura endumwa* sai mbu: «Muíraa túye mu chetu chisiki tubeine, mutámuke hicha.» 32Bera kwire bêngirira mwa bwato na báya mu chabo chisiki beine.

33Si bandu banene bera kulola kwa báenda, na bámenyerera era baíre. Bera kutenganga mwa misi yoshi, na bálibichiranga'yi mwa maulu. Abu bandu bera kuba babere-bere kuika'yi era muhondo Yesu ne'ndumwa* sai baíke. 34Mango Yesu ábaa era átenga mwa bwato, era kulola kwo'lu luamba lwe'bandu. Era kubafira bonjo, bushi bábaa bàli nga mbuli sa saínyire mungere. Era kutangirisa ábakangirisa myasi inene.

35Ábere lwera luolo-olo, ebanafunzi* bai bera kuya kumubura mbu: «Enawetu, mwa buyeye* muno tùli, kanji ne'butufu bweríre. 36Rero, ùngarekire bano bandu báye mwa mahwa no'kwa misi era iri ofu, bàule bya bàngalya.» 37Yesu nai mbu: «Mubeine mubêresaa ebiryo!» Nabo mbu: «Si ebiryo bya bìngeucha bano bandu boshi bìngafa bikoroto maana mabiri ma buteya. #6:37 bikoroto maana mabiri ma buteya: bwábaa buteya bwa kwêmba emukosi ku myesi ìngaika ku erinda. Rero, wáhonda tutóle buteya bungana bucha, túye kubaulira ebiryo?»

38Yesu era kubabusa mbu: «Mikati enga i'mwéte? Muyáa kuhona tanga.» Ábere bera bàhonaa, bera kumwǎkula mbu: «Mikati etano, ne'fi ebiri bi tunéte oshâo.»

39Yesu kukwera kubabura mbu běkasa ebandu boshi bikembe-bikembe kwa bichi. 40Abu bandu bera kwékalanga bikembe-bikembe: bye'yana-eyana, na bya matano-matano. 41Chasinda, era mikati etano ne'se'fi ebiri, Yesu era kubitola. Era kutumbikisa kwa nguba, na átonga Ongo. Era kuishanga mwa mikati ne'kuyeresa ebanafunzi* bai baábirange'i ebandu boshi. Efi nasi, era kusiábiranga abu bandu boshi. 42Ebandu boshi bera kulya na bêuta. 43Mango ebanafunzi* bátola-tolaa ebimbi-imbi bye'mikati ne'bye'fi bya byáshibaa, byoshi byera kwîhusa bitonga ekumi na bibiri. 44Ne'balume ba bályaa ebi biryo, bábaa bàli byumbi bitano.

Yesu álambaira kwa nyanja

(Mat 14:22-33; Yow 6:15-21)

45Era nyuma se'bi, Yesu era kubura ebanafunzi* bai mbu běrukiraa mwa bwato, bàmuhondorere kwa unji mushirirya we'nyanja, kwa lunda lwe'musi we'Betesaita. Nai era kushiba álaa olu luamba lwe'bandu. 46Mango ábaa era aláaa'bo, era kwérukira kwa ndulungu, áya kwéma Ongo.

47Ábere lwera luumbiriro, bwa bwato bwe'banafunzi* bwábaa bwera bùli mwa kachi-kachi ke'nyanja, si Yesu yeke ábaa achíri kwa musike se'nyanja yeine. 48Era kulola kwa banafunzi* bai bálibuka ne'kuruwa ebwato, bushi echusi chábaa chábangika.

Na mango bwábaa bwáhonda kucha, Yesu era kuika ala bábaa bàli áenda álambaira kwa nyanja. Era kuhonda kubahabuka. 49Mango ebanafunzi* bai bámulolaa'ko álambaira kwa nyanja, bera kuchichinga mbu àli musimu. Unao-unao, bera kutangirisa báchilakangira busese, 50bushi mango bámulolaa'ko boshi, ebuba bwera kubasimba busese.

Si unao-unao, Yesu era kubabura mbu: «Musésaa emuchima! Nyono onola! Mùtobaaa!» 51Chasinda, era kwérukira mwo'bu bwato, cha chusi kuna kúumba.

Ebanafunzi* bera kusanwa busese, 52bushi cha chisomerano che'mikati nachi, batámenyereraa kute ku chabáa chìtechire. Byábaa bacha, bushi emichima yabo yábaa ìri isibu.

Yesu álamya ebalwala mwa chio che'Kenasareti

(Mat 14:34-36)

53Mango Yesu ne'banafunzi* bai bábaa bera bàhabukaa enyanja, bera kuika mwa chio che'Kenasareti. Bera kuminyira ebwato bwabo kwa musike se'nyanja. 54Ábere bera bàtengaa'mo, unao-unao ebandu bera kumenyerera Yesu. 55Bushi no'ku, bera kulibichiranga mwe'chi chio choshi, chasiya bamúreterange ebalwala kwa bipoyo mu chira chisiki cha béndee bômva mbu àli'mo. 56Na chira chisiki cha Yesu éndee árenga'mo, ábe mwa misi inenene nesi kwa misi yeeke-eke, nesi mwa tumbara, ebandu bera kunde bábikanga ebalwala babo mwa nama, chasiya àbalamye. Abu balwala, nabo bera kunde bámwěma mbu abêmereraa baúme chiro kwa musike we'luchimba lwai oshâo. Na boshi ba béndee báluuma'ko, bera kunde bánalama.

Currently Selected:

Mariko 6: tbt

Highlight

Copy