Mariko 3

Yesu álamya emundu elusuku lwe'Sabato

(Mat 12:9-14; Luk 6:6-11)

1Era nyuma se'bi, Yesu era kwêngirira kanji mwa bushenge bwe'Bayuta*. Mwo'bu bushenge*, mwábaa mùli mundu muuma ola wábaa urémere emino. 2Ebandu ba bábaa bàli'mo, bera kusindera Yesu balóle akaba angámulamya elusuku lwe'Sabato*, babóne cha bàngemangira'ko bàmusitake.

3Yesu era kubura oyu mundu wábaa urémere emino mbu: «Èmangaa muno kachi-kachi ke'bandu.» 4Chasinda, Yesu era kubusa abu bandu mbu: «Chiye chi eMwaso* wetu atúla emérere mbu túndaa twáira elusuku lwe'Sabato*? Kuira emabuya nesi emabi? Kulamya emundu nesi kumwita?» Abu bandu, bera kuchisirira. 5Yesu era kubasindera na bute bunene. Ábaa àsibukire busese bushi bábaa bénjire báira emichima yabo kuba isibu. Era kwire ábura oyu mundu mbu: «Nánulaa emino yao.» Era kunanula'i, era mino kuna kulama.

6Unao-unao, eBafarisayo* kuna kutenga mwo'bu bushenge*, na báya kubuanana ne'bandu bo'mwa chikembe cha Heroti, baíre elwango lwe'kwîta Yesu.

Bandu banene báikiranga Yesu

7Yesu nai ala'uma ne'banafunzi* bai bera kutenga aola na báya kwa musike se'nyanja ye'Kalilaya. Bandu banene bera kumukulikira. Abu bandu bábaa bátengera mwa chio che'Kalilaya, ne'che'Yuteya, 8no'mwa musi we'Yerusalemu, no'mwa chio che'Itumeya, no'mwa bio byo'kwa nyinda se'lwishi lwe'Yorotani, no'mwa bimbi bye'musi we'Tiro ne'we'Sitona. Báikirangaa Yesu bacha, bushi bábaa bòmvire mira engulu ye'myasi yoshi era ábaa énjire áira.

9Yesu kukwera kubura ebanafunzi* bai mbu běkalaa bàmukunganyisise bwato bueke, olu luamba lwe'bandu lungesha kumufundéeresa. 10Átetaa bacha bushi ábaa énjire álamya bandu banene. Rero, ebalwala boshi bera kunde báfumirana chasiya baíke ala àli bamúume'ko. 11Ba bábaa basímbirwe ne'bihwasi nabo, mango béndee bámulola'ko, bera kunde báfukama era muhondo sai, ne'kunde bálakanga mbu: «Woyo u'Mwana wa Ongo!» 12Si Yesu era kunde ákaliira ebi bihwasi busese kwa bìtamukanganaa kwa bandu.

Yesu álondola endumwa ekumi ne'biri

(Mat 10:1-4; Luk 6:12-16)

13Chasinda, Yesu era kwérukira kwa ndulungu. Era kwâmaala bandu ba yeine ábaa ahónjire. Abu bandu, bera kunaya ala ábaa àli. 14Báikire'o, era kulondola ekumi na babiri mubo, era kuběrika mbu ndumwa*. Áiraa bacha, chasiya bábe nai, na kunde ábatuma kuya kuhubanganyisa ebandu eMwasi Mubuya-buya. 15Era kuberesa ne'buashi bwe'kunde bâmbula ebihwasi. 16Emasina me'si ndumwa* ekumi ne'biri mu mamano: Simoni ola Yesu ásulaa esina lya Petero, 17na Yakobo, na Yowani. Abu babiri, bábaa benyi Sebetayo kanji bu Yesu ásulaa esina lya Bowanereke kukuteta mbu: «Bana ba bète misi nga murasano.» 18Era kulondola na Andereya, na Firipo, na Baritolomayo, na Matayo, na Tomasi, na Yakobo mwenyi Alufayo, na Tateo, na Simoni wo'mwa chikembe che'Baseloti*, 19na Yuta Isikariyota, ola wárenganyaa Yesu.

Banyakabo Yesu báya kumutola

20Era nyuma se'bi, Yesu era kuhuba mwa nyumba. Luamba lwa bandu banene bera kuhuba kubuanana'mo kuikira echihangi Yesu ne'banafunzi* bai bera kuina kwa bàngalya. 21Mango banyakabo Yesu bômvaa kwe'i myasi, bera kuteta mbu: «Aaye! Ebwenge bwamúkongobanyire!» Bushi no'ku, bera kwire báya kumutola.

Ebakangirisi be'Mwaso bérika Yesu mbu i'Belisebuli

(Mat 12:22-32; Luk 11:14-23; 12:10)

22Ebakangirisi be'Mwaso* ba bátengeraa eYerusalemu, bábaa bénjire bábura ebandu mbu Yesu asímbirwe na Belisebuli #3:22 Belisebuli lìri linji esina lya Wamusimu. Kanji mbu oyu Belisebuli, i'utúla mukulu-kulu we'bihwasi, na kwa buashi bwai ku Yesu énjire âmbula'bi. 23Abu bakangirisi be'Mwaso*, Yesu era kwire âmaala'bo, era kubabura mwa mianyi mbu: «Kute Wamusimu àngachâmbula yeine? 24Akaba bandu ba bwami buuma bàngachibaanya, eri obu bwami bwàhandukere. 25Na akaba bandu ba ngumo nguma nabo, bàngabangana beine kwa beine, ei ngumo kuika nai ináhandukale. 26Rero Wamusimu nai, akaba àngachâmbula yeine, ne'bwami bwai akaba bùngalikana, nai àtangachiata misi. Chasinda, obu bwami bwai nabo eri bwàhandukere.

27«Kutali ola ùngaala kwêngirira mwa nyumba ye'mundu ola wète misi àmunyae ne'bindu byai akaba àtasa kumusalinga. Si mwa kuba era àmusalingaa, mu mango era àngamunyaa ebindu byai byoshi.

28«Kubinali, nábabura kwa ebandu bàngababalirwa ebibi byabo byoshi ne'ngambo sabo soshi sa bénde bákamba Ongo. 29Si ola ukáereresa ákamba eMuchima Mubuya-buya, oyola yeke atákababalirwe chiro na hicha, bushi ebi bibi byai bikánaendekera kuba'o esuku ne'mango.» 30Yesu ábaburaa bacha, bushi bátetaa mbu: «Àhwabirwe.»

Bande bu banyakabo Yesu

(Mat 12:46-50; Luk 8:19-21)

31Chasinda, balumuna ba Yesu ala'uma na nyina bera kuika, na bêmanga era butala. Ábere banáchiri bèmenze, bera kumutuma kwe'mundu mbu abáhaa. 32Mwe'i nyumba mwábaa mùli bandu banene ba bábaa bàsungwire Yesu. Bera kumubura mbu: «Ùmvaa! Nyoko na balumuna bao bàli era butala bákuhonda.»

33Yesu nai mbu: «Nde i'mali? Na bande bu balumuna banyi?» 34Chasinda, era kusungusa emeho mwa'ba bábaa bamúsungwire. Era kuteta mbu: «Banola bu bamali kanji bu na balumuna banyi. 35Bushi chira ola wénde wáira ekuhonda kwa Ongo, i'munyaketu, kanji i'mwali wetu, kanji i'namali.»

Currently Selected:

Mariko 3: tbt

Highlight

Copy