Mariko 2

Yesu álamya emundu ola urémere

(Mat 9:1-8; Luk 5:17-26)

1Era nyuma sa suku burebe, Yesu era kuika kanji mwa musi we'Kaperinaumu. Mango ebandu bômvaa mbu àli mwa nyumba, 2banene mubo bera kuya kuchilunda'mo, kuikira echihangi ala àngěkala unji mundu kwa chiso, nao era kunaína. Abu boshi, Yesu ábaa ábakangirisa eChinwa cha Ongo.

3Mwo'lu, bandu bane bera kuretera Yesu mundu muuma ola wábaa urémere. 4Si bushi ne'bwingi bwe'bandu, chiro bákaala kumuísa era muhondo sa Yesu. Bushi no'ku, bera kwire bátula kwa butala-tala bwe'nyumba,#2:4 Bayuta bauma, béndee báhakala enyumba sabo mwa kutambika kwe'makombomoya. Chasinda bánabarata'mo kwe'sheke, na básiya kwe'butaka. kwa lima ala Yesu ábaa análi. Na mwe'chi chiture mu bárenzesaa echipoyo cha oyu mundu ábaa àli'ko. 5Mango Yesu álolaa kwa bwemeresi bwa'bu bandu, era kwire ábura ola wábaa urémere mbu: «E mwana wanyi! Ebibi byao byàbabalirwe.»

6Mwe'i nyumba mwábaa mùli bakangirisi bauma be'mwaso*. Bera kutangirisa báchibusa mwa michima yabo mbu: 7«Ono mundu, si kukamba ku akámbire Ongo! Bushi kutáli ola ùngaala kubabalira ebibi, kureka Ongo yeine!» 8Rero, ebi bábaa báchibusa mwa michima yabo, unao-unao Yesu kuna kubiményerera. Bushi no'ku, era kwire ábabusa mbu: «Ewashe! Chi chátuma mwáchibusa bacha mwa michima yenyu? 9Munyiburaa! Chiye chi chibófuire kuteta mwe'ne myasi ebiri: eri ekubura ono mundu mbu ebibi byai byàbabalirwe, nesi ekumubura mbu ěmangaa atóle echipoyo chai anáende! 10Rero, náhonda muménye kwa nyono nyi Mwana we'Mundu nyéte ebuashi bwe'kubabalira ebibi muno butala.»

Yesu kukwera kubura ola wábaa urémere mbu: 11«Nyínatechire, woyo wěmangaa, utóle ne'chipoyo chao, unáfuluke no'kwa wao!»

12Unao-unao, ola mundu kuna kwêmanga, kuna kutola echipoyo chai, na áya era butala mwánameho mabo.

Boshi bera kusanwa busese. Chasinda, bera kutangirisa batonga Ongo mbu: «Tùtafuraa kulola ku'biri bacha chiro ne'uma!»

Yesu ábura Lawi mbu àmukulikiraa

(Mat 9:9-13; Luk 5:27-32)

13Era nyuma se'bi, Yesu era kuya kanji kwa musike se'nyanja ye'Kalilaya. Eluamba loshi lwe'bandu lwera kumuíkira, na átangirisa ábakangirisa.

14Mango ábaa àli mwa luendo, era kulola ku mundu muuma mbu i'Lawi, #2:14 Lawi kanji i'Matayo. Somaa Matayo 9:9. mwenyi Alufayo. Oyu Lawi ábaa ékese mwa chisiki cha béndee báfuchisisa mwe'mbarata. Yesu era kumubura mbu: «Unyíkulikiraa!» Lawi kuna kubatuka na ámukulikira.

15Chasinda, Yesu era kuya kulya kwa biryo mwa mwa Lawi. Na mwe'i nyumba, mwábaa mùli na bafuchisi banene ba mbarata na banji bandu ba bábaa batúsa ngulu ibi. Abu boshi, bábaa bálya ala'uma na Yesu ne'banafunzi* bai, bushi banene mwa ba bàli nga'bo, bu béndee bámukulikira.

16Mango ebakangirisi be'Mwaso* bo'mwa chikembe che'Bafarisayo* bálolaa kwa Yesu álya ne'bafuchisi be'mbarata ne'banji bandu ba bábaa batúsa ngulu ibi, bera kwire bábusa ebanafunzi* bai mbu: «Era! Chi chìngatuma eMukangirisi wenyu álya ne'bafuchisi be'mbarata ne'banji bandu ba batúsa ngulu ibi?»

17Yesu ômvire bacha, era kwire ábabura mbu: «Ba bàhaalukire bàtahónda muhake, si ebalwala! Rero, nanyi ndábahire kwâmaala ba bàtungenene era muhondo sa Ongo, si ebandu be'mabi!»

Ememo ma ménde máirwa busira kulya

(Mat 9:14-17; Luk 5:33-39)

18Lusuku luuma, ebanafunzi* ba Yowani Mubatisayi ne'Bafarisayo*, bábaa bàli mwa memo ma ménde máirwa busira kulya. Bandu bauma bera kuikira Yesu, na bámubusa mbu: «Chi chitúma ebanafunzi* ba Yowani ne'Bafarisayo* báya mwa memo ma ménde máirwa busira kulya, si ebao beke ‹Pyo!›» 19Yesu nai mbu: «Mwáanyisa mbu ebandu ba bàlalikirwe kwa buya bàngachîma ebiryo mango muya mulume achíri ala'uma nabo? Nânga! Mango muya mulume achiri ala'uma nabo, bàtangaala kuchima ebiryo. 20Si oyu muya mulume, kukába lusuku lwa akákulibwa mwa kachi-kachi kabo. Rero mwo'lu lusuku, mu bakáya mwa memo ma ménde máirwa busira kulya.

21«Kutali ola ùngalanjira echiraka chiyayaya kwa chiramba. Akaba àngaira bacha, echi chiraka chiyayaya chánere cháberenga ala chalánjirirwe kwa chiramba. Aola, echi chiramba chánere chánatendukala.

22«Kanji kutáli ola ùngabika echibabe che'tifai mwa bikunguisa bye'hao se'nyuu.#2:22 Hao se'nyuu: eBayuta béndee bákunganya ehao mwa nyuu. Mwe'si hao, béndee bábika'mo emeshi, emata, etifai, ne'mafuta. Esi hao, mwa kuba sichíri siyayaya séndee sátanukala. Si mwa kuba sera sákunguwa, sánakoota, na bushi no'ku, sìtangachitanukala. Bushi akaba bàngaira bacha, echi chibabe kuika chináberenge esi hao. Mwo'lu, esi hao ne'chi chibabe byoshi byánakumba. Si echibabe, mwa hao se'nyuu sa sichíri siyayaya mu'bénde bábika'chi!»

Yesu i'Mukulu-kulu we'Sabato

(Mat 12:1-8; Luk 6:1-5)

23Lusuku luuma lwa Sabato*, Yesu ne'banafunzi* bai bábaa bárenga mu'mahwa ma bulo. Ebanafunzi* beke, bera kutangirisa báenda bápolola kwo'bu bulo. 24Ebafarisayo* bálolire bacha, bera kumubura mbu: «Ulólaa! Chi chìngatuma ebanafunzi* bao báíra bya Mwaso* wetu atúla ànanyise kuira elusuku lwe'Sabato*?»

25Yesu nai mbu: «Mùtafura kusoma chiro na hicha kwa mwami Tauti áiraa mango ábaa áhonda àbone ebiryo, bushi ne'businya bwa ábaa áfa ala'uma ne'bandu bai? 26Êngiriraa mwa Nyumba ya Ongo!#2:26 Nyumba ya Ongo: Mwa suku sa mwami Tauti, eLuhu lunene lwa Ongo lwábaa lùtasa kuimbwa eYerusalemu. Era kutola emikati era bandu bábaa bàtulire Ongo. Era kulya, chasinda era kwêresa banyawai ku'i, no'ku ei mikati ebakuhanyi* ba Ongo beine bu bábaa běmire kunde bálya'i. #2:26 Somaa 1 Samweri 21:3-7; Balawi 24:9. Áiraa ebyera mango Abiatari ábaa mukulu-kulu we'bakuhanyi*.»

27Yesu era kuhuba kubabura mbu: «Elusuku lwe'Sabato* lwáirwaa bushi ne'bandu. Si ebandu batáirwaa bushi nalo. 28Echera chi chitúmire mwěmire kumenyerera kwa elusuku lwe'Sabato* nalo, nyono nyi Mwana we'Mundu, nyi Ena'lo.»

Currently Selected:

Mariko 2: tbt

Highlight

Copy