Matayo 22

Emuanyi we'linye lye'buya

(Luk 14:15-24)

1Yesu era kunaendekera áteta na'bu bandu mwa mianyi. Era kubabura mbu: 2«eBwami bo'kwa nguba buhúhanyisibwe na mwami muuma ola wákunganyisaa muala wai elinye lye'buya. 3Oyu mwami, era kutuma ebaanda bai mbu bàyaa kwâmaala ebandu ba ábaa àlalikire kwa buya. Si abu bandu, chiro bákachiikira. 4Chasinda, era kutuma banji baanda. Era kubabura mbu: ‹Muyáa kubura ebandu ba nàlalikaa kwa buya mbu: "Nàtenjire engaafu sanyi mira, na sinji nyama sa sinunyire. Rero mubáhaa kwa buya, bushi ebindu byoshi byàkunganyisibwe mira!"› 5Si abu bálalikwaa, chiro bákalaa kwe'bi. Bera kuchiiranga mwa byabo: muuma era kuya mwe'hwa lyai, ne'unji mwa buchimbusi, 6ne'banji bera kutola abu baanda, bera kubapunda busese, chasinda bera kubeta.

7«Oyu mwami, era kufa bute bunene. Era kwire átuma ebasula bai mbu bayáa kusikya abu bêchi na kwócha emusi wabo. 8Era nyuma se'bi, era kubura ebaanda bai mbu: ‹Ebiryo bye'buya byaíre mira, si ebandu ba nàlalikaa atá bubálairwaa'bi. 9Bushi no'ku, mwiree mwáya mwa myêngere, ebandu boshi ba mungánabuana, mubáburaa babáhe kwa buya.› 10Abu baanda bera kunaya mwa myêngere, bera kubuanyanya ebandu boshi ba bábuanaa, ebabi ne'babuya. Enyumba ye'kulira mwe'linye yera kwêhula mwe'baenyi.

11«Oyu mwami, mango êngiriraa mwe'i nyumba chasiya àlole kwa baenyi, era kulola ku mundu muuma ola wábaa utěmbesi enjimba se'buya. 12Era kumubusa mbu: ‹E mwira wanyi, kute wengíriraa muno utěmbese ne'njimba se'buya?› Oyu mundu, chiro ákamwǎkula kandu. 13Bushi no'ku, mwami era kubura ebaanda bai mbu: ‹Ono mundu, mumúminaa emaboko ne'maulu, chasinda mwánamuuma era butala mwa musimya! Na mwo'yu musimya, mu angálirira na kulola kwa kasibu.› 14Chasinjire, Yesu era kuteta mbu: ‹Ebandu ba bálalikirwe bàli banene, si ba bálondolibwe, bàli baeke.›»

Ekufuta embarata ya mwami Kaisari

(Mar 12:13-17; Luk 20:20-26)

15Era nyuma se'bi, eBafarisayo* bera kuya kuira lwango lwa kuteya Yesu mwasi kurengera ebinwa byai. 16Bera kumutumira banafunzi* babo bauma ala'uma na banji bandu bo'mwa chikembe cha Heroti. Bera kuika kubusa Yesu mbu: «Mukangirisi, twìshi kwa wénde wáteta myasi ya kanangana, kanji wénde wákangirisa ebandu emyasi ya Ongo era běmire kunde bákulikira kwa biněmire. Kanji ùtobaa na mundu asibya, ùtanôbairisibwa na bukulu-kulu bwa mundu. 17Rero, utúburaa kute uséne kwo'no mwasi: Emwaso wetu atúla emérere nesi àtemerere kunde twáfuta embarata era mwa mwami Kaisari*?»

18Si Yesu bushi ábaa aményerere emianyisa yabo ibi, era kubǎkula mbu: «Emu batebanyi, chi chátuma mwányiteya bacha? 19Mùnyilosaa ebuteya bwa mwénde mwâna kwa kufuta embarata.»

Bera kumuretera chikoroto chiuma cha buteya. #22:19 Echi chikoroto chábaa cha buteya bwa tinari. 20Yesu era kubabusa mbu: «Ewashe! Chine chihuhanyi, ne'line sina bìri bya nde?» Nabo mbu: 21«Bìri bya mwami Kaisari*.»

Yesu era kwire ábabura mbu: «Rero, mundaa mwêresa Kaisari* bya bìri byai, mwánêresa na Ongo bya bìri byai.» 22Abu bandu bômvire bacha, bera kusanwa busese. Bera kumureka na báchiendera.

eBasandukayo babusa Yesu era luulu se'kwômoka

(Mar 12:18-27; Luk 20:27-40)

23Mwo'lu lusuku luno'lu, Basandukayo* bauma nabo bera kuikira Yesu. Abu Basandukayo* bu bénde báteta mbu ebafu batákômwoke. Bera kumubusa mbu: 24«Mukangirisi, Musa átetaa mbu: ‹Akaba emundu àngafa busira kureka mwana asibya, kwěmire mulumuna wai ěngire emuhumba-kasi wèshibire, chasiya abúchire mukulu wai ebana.›#22:24 Somaa Bukengere 25:5-6. 25Rero, mwa kachi-kachi ketu, mwábaa batabana balinda ba bula buuma. Efula yera kuhwera mukasi, yera kufa busira kubuta mwana. Mulumuna wai era kwêngira oyu muhumba-kasi. 26Oyu mulumuna nai, kuno'ku ku byánabaa. Byera kunába bacha, no'kwa wa kahatu kuikira kwa wa kalinda. 27Era nyuma se'kufa kwa'bu batabana boshi, ola muhumba-kasi nai, era kufa. 28Rero, elusuku lwa bafu bàkwômoka, oyu mukasi akére ába wande? Bushi abu batabana balinda boshi, bánamuhweraa!»

29Yesu era kubǎkula mbu: «Mwàuwirwe busese, bushi ne'kutamenya eMaanjiko Mabuya-buya, nesi ebuashi bwa Ongo. 30Bushi mango ebafu bakômwoka, ebalume ne'bakasi batákachihwerane, si bakába nga bamalaika* bo'kwa nguba! 31Kanji bushi ne'myasi ye'kwômoka kwe'bafu, mùtafura kusoma ene myasi Ongo ábaburaa mbu: 32‹Nyono nyi Ongo wa Aburahamu, na wa Isaka, na wa Yakobo.› #22:32 Somaa Kutenga 3:6. Yesu era kuhuba kuteta mbu: ‹Ongo àtatula Ongo we'bafu, si atúla Ongo we'bandu ba bàsene!›»

33Eluamba lwe'bandu lômvire bacha, lwera kusanwa busese bushi ne'myasi era Yesu ábaa ákangirisa.

Emuomba munene kurenza irikabo

(Mar 12:28-34; Luk 10:25-28)

34eBafarisayo* mango bômvaa kwa Yesu aímire abu Basandukayo*, bera kubuanana. 35Mukangirisi muuma we'mwaso mwa kachi-kachi kabo, era kuereka Yesu mbu: 36«Mukangirisi, mwa Mwaso woshi, muomba* muchiye i'munene kurenza irikabo?»

37Yesu nai mbu: «‹Usímaa Enawenyu Ongo mwa muchima wao woshi, no'mwa mianyisa yao yoshi, no'mwa bwenge bwao boshi.› #22:37 Somaa Bukengere 6:5. 38Oyu muomba* i'munene busese kanji i'mubere-bere. 39Ne'muomba* wakabiri nao análi ngo'yu mubere-bere na bacha ku atúla àtechire: ‹Usímaa mulikenyu ngo'kwa utúla uchísimire.›#22:39 Somaa Balawi 19:18. 40Ene miomba* ebiri, i'iminyire emyasi yoshi era itúla yǎnjikirwe mwa Mwaso wa Musa no'mwa bitabo bye'barebi.»

Kirisito àli mwenyi nde

(Mar 12:35-37; Luk 20:41-44)

41Mango abu Bafarisayo* bábaa banáchiri babúananyire, Yesu era kubabusa mbu: 42«Ewashe! Kute mwáanyisa era luulu sa Kirisito*? Oyu Kirisito*, àli mwenyi nde?» Nabo mbu: «Àli mwenyi mwami Tauti.» 43Yesu kukwera kubabusa kanji mbu: «Rero, kute ku Tauti éraa áteta mbu Kirisito* àli Enawabo, no'ku oyu Tauti ábaa ákoresibwa ne'Muchima Mubuya-buya? Bacha kwátetaa:

44‹Enawetu Ongo áburaa Enawetu mbu:

"Wǐkalaa kwa lunda lwanyi lwe'malyo,

kuikira nyibíke ebarenda bao

kuba chisimachiro chao."›#22:44 Somaa Saburi 110:1.

45«Akaba Tauti énde érika Kirisito* mbu: ‹Enawetu›, rero kute kwo'yu Kirisito* àngaba muala wai?»

46Mango Yesu ábaa era amálaa kuteta ei myasi, kutábaa mumdu asibya ola wáalaa kumwǎkula chiro na mwasi. Na kutengera mwe'si suku, kutábaa mundu asibya ola wáereresaa kanji kumubusa mwasi.

Currently Selected:

Matayo 22: tbt

Highlight

Copy