Matayo 21

Yesu êngirira mwa musi we'Yerusalemu

(Mar 11:1-11; Luk 19:28-40; Yow 12:12-19)

1Mango Yesu ne'banafunzi* bai bábaa bera bàli ofu ne'musi we'Yerusalemu, bera kuika mwa we'Betefake, ofu ne'ndulungu ye'Miseituni. Yesu era kutuma banafunzi* babiri, 2era kubabura mbu: «Muyáa mwa musi ùli era muhondo senyu. Mango mungáika'mo, unao-unao mungábuana ndokomu nguma ne'chana chai bìminyirirwe ala'uma. Esi ndokomu, mubóola'si, chasinda mwánanyiretera'si. 3Na kúkaba mundu ola ungábabusa mwasi era luulu se'si ndokomu, mwánamwǎkula mbu Enawetu éte bweera bwasi. Unao-unao, oyu mundu angábareka muénde nasi.»

4Ebyera byábaa bacha, chasiya cha chinwa chibérere cha Enawetu átetaa kurengera emurebi* mbu:

5«Mubúraa besha mwa musi we'Sayuni mbu:

‹Mulólaa, emwami wenyu àbahire ene mwenyu.

Àli mulomvu, kanji ékese kwa ndokomu.

Ne'i ndokomu, chichíri chana.›»#21:5 Somaa Sakariya 9:9.

6Abu banafunzi* bai babiri, bera kuchiuma na báira ngo'kwa Yesu ánababuraa. 7Bera kunareta ei ndokomu ala'uma ne'chana chai. Bera kuhashika kwe'makochi mabo, chasinda Yesu era kwire ekala kui. 8Bandu banene busese bera kuhashikanga enjimba sabo mwa njira, ne'banji bera kuishanga emangarara bera kumahashikanga mwa njira. 9Ebandu ba bábaa bahóndorere Yesu ne'banji ba bábaa bamúkulikire, bera kutangirisa báteta na murenge munene mbu:

«Hosana, #21:9 hosana Mwa Chieburaniya, hosana kukuteta mbu wíraa wátununula. Somaa Saburi 86:2, Yeremiya 31:7.

Mwenyi Tauti!

Ongo aáhanyiraa ono wěshire kwe'sina lyai! #21:9 Somaa Saburi 118:26.

Ongo atóngwe kwa nguba!»

10Mango Yesu ábaa era engíriraa mwa musi we'Yerusalemu, oyu musi woshi era kuba mu'lwayo lunene. Ebandu bera kutangirisa bábusanya mbu: «Ewashe! I'nde ono?» 11Eluamba lwe'bandu ba bábaa bàli na Yesu bera kwǎkula mbu: «Onola, i'Yesu, murebi* wo'mwa musi we'Nasareti, mwa chio che'Kalilaya.»

Yesu ákolokanya ebachimbusi mwa Luhu lwa Ongo

(Mar 11:15-19; Luk 19:45-48; Yow 2:13-22)

12Chasinda, Yesu era kwîngira mwa chibuwa che'Luhu lwa Ongo*. Áikire'mo, era kubuana ebandu ba bábaa báusa, ne'banji báula. Abu boshi, era kubakolokanya. Ba bábaa báinganyanga ebuteya, era kubindulanga emesa mabo, era kubindulanga ne'bifumbi bye'bandu ba bábaa báusa ebiruka. 13Chasinda, era kubabura mbu: «eMaanjiko Mabuya-buya màtechire mbu: ‹Enyumba yanyi ikénde yérikibwa mbu nyumba ya memo.› Si mwabo, mwaíhubise nyumba ya bihumusi!#21:13 Somaa Yeremiya 7:11; Isaya 56:7. »

14Mwa chibuwa cho'lu Luhu, bauta bauma na birema, bera kuikira Yesu. Nai, era kubalamya. 15Si ebakulu-kulu be'bakuhanyi, ne'bakangirisi be'Mwaso* mango bálolaa bacha, bera kuaya busese mwa kulola kwa bisomerano bya Yesu áiraa, no'mwa kûmva kwa bana báteta na murenge munene mwa Luhu lwa Ongo* mbu: «Hosana Mwenyi Tauti!» 16Bushi no'ku, bera kubusa Yesu mbu: «Ewashe, ei myasi ebana báteta ùtayûmvire?»

Yesu nai mbu: «Nechi! Nyinômvire! Mubeke mùtafura kusoma kwa Maanjiko Mabuya-buya matúla màtechire mbu:

‹Kurengera ebunu bwe'bana batoto, ne'bwe'tubonjo-bonjo,

ku wénde wáhubanganyisa ebandu engulu yao.›#21:16 Somaa Saburi 8:2. »

17Chasinda, Yesu era kureka abu bandu, era kuya kuchionjirira mwa musi we'Betaniya.

Yesu átakira emuchi we'tini

(Mar 11:12-14, 20-24)

18Ábere mwe'i mishangya-shangya, mango Yesu ábaa era áhuba eYerusalemu, era kufa businya. 19Era kulola ku muchi muuma wa tini kwa musike se'njira, era kuchifunda ofu nao. Si chiro ákabuana ku chifuma chisibya, si ebihoho byeine oshâo. Bushi no'ku, era kwire átakira oyu muchi mbu: «Bushi si ùtanachekaa chifuma chisibya!» Unao-unao, ola muchi kuna kôma.

20Mango ebanafunzi* ba Yesu bálolaa kwe'bi, bera kusanwa busese. Bera kumubusa mbu: «Ewashe! Kute ku ono muchi we'tini era anáikaa ôma bacha?»

21Yesu nai mbu: «Kubinali! Nábabura kwa akaba mùtangahungwa-hungwa mwa bwemeresi bwenyu, nenyu mùnganaala kuira ngo'kuno nera kukorera ono muchi. Anabe ne'ne'ndulungu, mùnganabura'i mbu iyáa kuchikoma mwa nyanja, bingánaba'ko. 22Kanji akaba mùngaata ebwemeresi, choshi cha mungéma Ongo, angánaberesa'chi.»

Ebandu bábusa Yesu era luulu se'buashi bwai

(Mar 11:27-33; Luk 20:1-8)

23Era nyuma se'bi, Yesu era kuhuba kwêngirira mwa Luhu lwa Ongo* na átangirisa ákangirisa ebandu. Ebakulu-kulu be'bakuhanyi*, ne'bashamuka be'Bayuta bera kumuikira ne'kumubusa mbu: «Ewashe, bine wénjire wáira, wábiira ku loso luchiye? Na nde iwàkuwere'lo?»

24Yesu nai mbu: «Nanyi nábabusa chinwa chiuma, nenyu mukányǎkula, nyingábabura ku buashi buchiye ku nénjire náira ene myasi. 25Ebuashi bwa Yowani éndee ábatisa mwe'bandu, ngai yi bwátengeraa? Munyíburaa, akaba era mwa Ongo nesi kwa bandu!»

Bera kuya nama. Bera kuburana mbu: «Tukámwǎkula mbu bwátengaa kwa nguba, angátubusa mbu: ‹Rero, chi cheraa chátuma mútamwêmerera?› 26Na tukámwǎkula mbu kwa bandu, twôbaa bano bandu bachílunjire anola. Bushi boshi bábaa banêshi kanangana kwa Yowani ánabaa murebi*.»

27Bushi no'ku, bera kumwǎkula mbu: «Tùteshi!» Yesu nai mbu: «Nanyi, ndábabure ku buashi buchiye ku nénjire náira ene myasi.»

Emuanyi we'bana babiri

28Yesu era kuhuba kuteta mbu: «Kute musene kwo'no mwasi? Kwábaa mulume muuma ola wábaa wète bana bai babiri. Oyu mulume, era kubura efula yai mbu: ‹E mwana wanyi, lwarero uyáa kureerera wákola mwe'hwa lyetu lye'misabibu*.›» 29Nai mbu: «Ndáchiíkire'yi!» Si era nyuma, era kuhubya emuchima, na áya kukola.

30«Chasinda, wamulume era kubura emutoto ngo'kwa ánaburaa efula. Oyu mutoto, era kwakula mbu: ‹Nechi tata, náya'yi!› Si chiro ákaya'yi.

31«Rero! Mwa bano bana babiri, nde iwáiraa ngo'kwa eshe ábaa áhonda?» Nabo mbu: «Efula.»

Bushi no'ku, Yesu era kuteta mbu: «Kubinali, nábabura kwa ebafuchisi be'mbarata ne'bihungukasi bu bangába babere-bere kwîngirira mwa Bwami bwa Ongo* era muhondo senyu. 32Bushi Yowani mango àbaikiraa chasiya àbalose bya bìtungenene era muhondo sa Ongo, mùtamwêmereraa. Si ebafuchisi be'mbarata ne'bihungukasi, beke bàmwêmereraa. Chiro angaba mbu mwalólaa kwe'i myasi yoshi, mùtachiayaa kwa bibi byenyu, kanji mùtanamwemereraa.»

Emuanyi we'bainzi babi

(Mar 12:1-12; Luk 20:9-19)

33Yesu era kuteta mbu: «Mǔmvirisaa kwo'no unji muanyi: kwábaa mulume muuma ola wáingaa ehwa lyai lya misabibu*. Eri hwa, era kulisungusa elusito, era kuchima na'la bangénde bákanjira etufuma twe'misabibu*. Era kuimbira ne'balanzi ba'li chitala cha chìtowamire busese. Chasinda, era kulibwesa bainzi bauma, na ábalama.

34«Ábere esuku se'kushebula saíka, era kutuma ebakosi bai era abu bainzi bàli, chasiya bàmwêrese ewai mwango kwa myaka. 35Si abu bainzi bera kusimba abu bakosi bai. Muuma, bera kumupunda busese, ne'unji bera kumwita, ne'wakahatu bera kumwita mwa kumuúmanga emakoi. 36Era nyuma se'bi, ene'hwa era kuhuba kutuma banji bakosi banene kurenza ba babere. Si nabo, abu bainzi bera kubakorera cha banákoreraa ba babere-bere.

37«Chasinjire, era kwire ábatumira muala wai, mwa kuanyisa mbu: ‹Ono muala wanyi, yeke bangámutunda.› 38Si ba bainzi bálolire kwo'yu muala, bera kuteta mbu: ‹Onola, i'ukalya emwandu we'she. Muíraa tumwîte, chasiya tuchíshibanyire'o.› 39Bushi no'ku, bera kumusímba, na bámukululira kwa musike se'hwa, chasinda bera kumwita.»

40Yesu kukwera kubusa mbu: «Rero, oyu ene'hwa mango akáfuluka, kute ku akáira abu bainzi?» 41Nabo mbu: «Abu bandu babi, akêta'bo busira kubafira bonjo. Ne'ri hwa lyai, ánere ábwesa'li banji bainzi ba bakénde bámweresa ewai mwango kwa myaka mwa kushebula.»

42Chasinda, Yesu era kubabusa mbu: «Mùtafuraa kusoma kwa Maanjiko Mabuya-buya matúla màtechire?

‹Ekoi lya báimbi bálangulaa,

li'lyáhubire ekoi linene lye'musingi.

Enawetu iwánaíraa bacha.

Ne'chi chìri chisomerano chinene ku tubano.›#21:42 Somaa Saburi 118:22-23.

43«Bushi no'ku, nábabura kwa mwabo Ongo angábanyaa eBwami bwai, ánere êresa'bo banji bandu ba bangénde báira ekuhonda kwai. [ 44Ne'ri koi, ola ukátowera kuli, akáfunyikanga. No'la likátowera, likámufungolanga.]»

45Mango ebakulu-kulu be'bakuhanyi, ne'Bafarisayo* bômvaa kwe'i mianyi ya Yesu, bera kwire bámenyerera kwa ábaa áteta era luulu sabo. 46Bushi no'ku, bera kuhonda njira ya kumusímba, si bera kwôbaa ebandu, bushi abu bandu bábaa bàtolire Yesu nga murebi*.

Currently Selected:

Matayo 21: tbt

Highlight

Copy