Matayo 18

Emukulu-kulu mwa Bwami bo'kwa nguba

(Mar 9:33-37; Luk 9:46-48)

1Mwe'chi chihangi, ebanafunzi* ba Yesu bera kumuikira na bámubusa mbu: «eWaliya! Nde i'mukulu-kulu ku balikabo mwa Bwami bo'kwa nguba?»

2Yesu era kwâmaala mwana mutoto muuma, era kumubika mwa kachi-kachi kabo. 3Era kuteta mbu: «Kubinali, nábabura kwa akaba mùtangabindula emyanya yenyu múbe nga bana batoto, mutákêngirire chiro na hicha mwa Bwami bo'kwa nguba. 4Rero, chira mundu ola ulí murembu ngo'no mwana mutoto, i'ukába mukulu-kulu mwa Bwami bo'kwa nguba. 5No'la wáhuukasa emwana mutoto ola ulí ngo'no kwe'sina lyanyi, eri nyono nyi ahúukasise.»

Ekuchilanga kwa mabi

(Mar 9:42-48; Luk 17:1-2)

6«Mwa bano bana batoto bànyêmerere, akaba mundu murebe àngatuma muuma mubo áya mwa bibi, Kùngabere kukulu kwo'yu mundu amínyirwe lusho lunene mwe'osi, aúmwe mwa nyanja.

7«Buanya kwa butala, bushi ne'myasi yèhwire'mo ye'kushíirisa ebandu mwa mabi! Ei myasi ìtanganaina, si buanya kwa mundu ola yátengera'ko!

8«Akaba ekuboko kwao nesi ekuulu kwao, bìngatuma wáira mabi, ubíishaa wánabiuma bure nao! Bushi kukomire wěngirire mwa kalamo ke'kunali wéte kuboko kuuma nesi kuulu kuuma, wàkuata maboko mabiri nesi maulu mabiri, chasinda uúmwe mwa muliro we'suku ne'mango. 9Na akaba eliho lyao nali lìngatuma wáira mabi, òmwolaa'li, wánaliuma bure nao! Bushi kukomire wěngirire mwa kalamo ke'kunali wéte liho liuma, wàkuata meho mabiri chasinda uúmwe mwa muliro we'suku ne'mango.»

Emuanyi we'mbuli era yáeraa

(Luk 15:3-7)

10«Muményaa, mungesha kunde mwákena muuma mwa'bano bana batoto, bushi nábabura kwe'bamalaika* babo, esuku soshi batúla bàli era muhondo sa Tata ola ulí kwa nguba. [ 11Muményaa kwa nyi Mwana we'Mundu náikaa muno butala, chasiya nyinúnule ba bábaa báerire.]

12«Kute musene? Akaba mundu murebe àngaba éte mbuli sai eyana, na mwe'si mbuli, nguma yánaera. Eri àtangareka tanga esi sinji chenda na mwenda kwa ndulungu, áye kuhonda ei nguma yàerire? 13Kubinali, nábabura kwa akaba àngabuula'i, àngamowera'i busese kurenza sa sinji chenda na mwenda sa sìtaeraa. 14Kuno'ku-kuno'ku, ku Eho wenyu nai ola ulí kwa nguba àtahonda mbu chiro na muuma mwa bano bana batoto aéraa.»

Eano bushi no'la wakúkorere emabi

15«Akaba munyakenyu àngakukorera mabi, ùmuenderaa weine chasiya ùmulose emabi mai mango mùli mu babiri oshâo. Ákakumvira, mwánahuba kuba mwa buuma. 16Si akaba ànganana kukumva, utólaa unji mundu muuma nesi babiri, wánaenda nabo chasiya chira chinwa chiményeke kanangana kwa bubei bwa bandu babiri nesi bahatu. #18:16 Somaa Bukengere 19:15. 17Abu bandu nabo, akaba ànganana kubomva, ufúliraa ebemeresi kwo'yu mwasi. Na akaba àtangomvira ebemeresi nabo, mwánere mwámutola nga mundu ola ùteshi Ongo, kanji nga mufuchisi wa mbarata.

18«Kubinali, nábabura kwa byoshi bya mukénde mwêmeresanya'ko muno butala, bikénde byêmererwa no'kwa nguba. Na byoshi bya mukénde mwánana muno butala, bikénde byánanyibwa no'kwa nguba.

19«Kubinali, nábabura kanji kwa muno butala, akaba bandu babiri mwa kachi-kachi kenyu bàngemeresanya kwa kwéma chindu chirebe, Tata ola ulí kwa nguba, angánaberesa'chi. 20Bushi ala bandu babiri nesi bahatu babúananyire kwe'sina lyanyi, eri nanyi nyìri mwa kachi-kachi kabo.»

Emuanyi we'mukosi ola wánanaa kubabalira mulikabo

21Era nyuma se'bi, Petero era kuchifunda ofu na Yesu, era kumubusa mbu: «Enawetu, akaba munyaketu énjire ányikorera mabi, kanga ku binyěmire kumubabalira? Eri kuikira ku kalinda?» 22Yesu nai mbu: «Nânga! Ndakúbwirire mbu umúbabaliraa kalinda oshâo, si kalinda kali malinda.

23«Bushi no'ku, eBwami bo'kwa nguba buhúhanyisibwe na mwami muuma ola wábaa wáhonda aménye emuanjo we'minda yai era bakosi bai bábaa běmire kumufua. 24Mwa kutangirisa oyu mulimo, bera kumuretera mukosi muuma ola wábaa ùli mu mwinda wai munene wa biumbi ekumi bya talanda.#18:24 Etalanda bùli buteya bwa Bayuta béndee bákoresa. Talanda nguma yábaa ìngaula ngafu etano. 25Rero, oyu mukosi bushi ábaa àtangaala kufuwa oyu mwinda, enawabo era kwire áteta mbu wamukosi àusibwaa nga kaungu, na mukai, ne'bana bai ala'uma ne'bindu byai byoshi, chasiya àmufuwe emwinda wai. 26Oyu mukosi era kufukama era muhondo se'nawabo, na kumwěma mbu: ‹Waliya, ùnyirinjiraa! Nyingákufuwa emwinda wao woshi.› 27Enawabo era kumufira bonjo, era kumubabalira kwo'yu mwinda, chasinda era kumureka àende.

28«Ábere wamukosi era àulukaa, era kubuanana na mukosi mulikabo ola wábaa ùli mu mwinda wai mueke wa bikoroto eyana. Unao-unao, kuna kumusimbira ala mate na ámubura mbu: ‹Nyífuwaa emwinda wanyi fuba!› 29Oyu mukosi mulikabo, era kufukama era muhondo sai, na kumwěma mbu: ‹Waliya, unyíbabaliraa! Nyingákufuwa emwinda wao.› 30Si era kunana, na áya kumuuma mwa buroko abére'mo kuikira emango angámufuwa emwinda wai.

31«Bakosi balikabo bálolire bacha, bera kuyongwa busese. Bera kuya kubura enawabo kwe'i myasi yoshi. 32Enawabo kukwera kutumisa ola mukosi, era kumubura mbu: ‹Woyo ùli mukosi mubi! Nyono nakúbabaliraa emwinda wao woshi, bushi wanyémaa ebonjo! 33Rero nao, chi chéraa chátuma útababalira mulikenyu ngo'kwa nanyi nakúbabaliraa?› 34Oyu enawabo era kufa bute bunene. Era kwire áteta mbu bàmuuma mwa buroko bàmulose kwa kasibu, kuikira mango angáfua oyu mwinda wai woshi.»

35Chasinjire, Yesu era kuteta mbu: «Nenyu, ku Tata ola ulí kwa nguba akánabaira bacha, akaba chira muuma mu mwabo atákende ábabalira munyakabo kwa muchima wai woshi.»

Currently Selected:

Matayo 18: tbt

Highlight

Copy