Matayo 17

Yesu ábindulwa ehuhe

(Mar 9:2-13; Luk 9:28-36)

1Mango kwábaa kwàrenga suku ndatu, Yesu era kutola Petero, na Yakobo, na Yowani, munyakabo Yakobo. Era kwérukira nabo ku ndulungu nguma irerere, bera kubera'ko beine. 2Ábere bera bàli kwe'i ndulungu, Yesu era kubindulwa ehuhe mwa meho mabo. Ebuso bwai, bwera kulangala nge'suba. Ne'njimba sai nasi, sera kwêngengenya busese nga bulangare.

3Unao-unao, ebanafunzi* bera kulola ku Musa na Eliya báhambala na Yesu.#17:3 Musa iwákulaa ebana be'Isiraeli mwa bucha bwe'Misiri, ábeka eKanana. Na Eliya, ábaa murebi ola wérusibwaa kwa nguba na Ongo. 4Bushi no'ku, Petero era kwire ábura Yesu mbu: «Enawetu! Kukomire tubére anola. Kanji akaba uhónjire, nyìngaimbire'o bitala bihatu: Chiuma chao, ne'chinji cha Musa, ne'chinji cha Eliya.»

5Mango Petero ábaa anáchiri áteta, unao-unao kwera kuulukira lumbumbu lwálangala, kuna kubasungula. Mwo'lu lumbumbu, mwera kuulukira murenge muuma ola wábaa wáteta mbu: «Onola i'Mwana wanyi musiirwa, i'utúla unyísimise. Mundaa mwámumvirisa!» 6Abu banafunzi* mango bômvaa bacha, bera kwôbaa busese, kuna kukumbaala kafuli-bwêmbe.

7Si Yesu era kuchifunda ofu nabo, era kubauma'ko na ábabura mbu: «Mùtobaa, mwǐmangaa!» 8Ábere bêmusa emeho, chiro bákachilola ku'unji mundu, kureka Yesu yeine oshâo.

9Mango Yesu ne'banafunzi* bai bábaa bera bândaala kwe'i ndulungu, era kubachichika mbu: «Ebi mwera kulola'ko, mùtaburaa'bi mundu asibya kuikira mango nyi Mwana we'Mundu nyingába nomwókire mira.»

10Chasinda, ebanafunzi* ba Yesu bera kumubusa mbu: «eWaliya! Chi chénjire chátuma ebakangirisi be'Mwaso* báteta mbu byěmire Eliya abáhe tanga?»#17:10 Eliya abáhe tanga: eBayuta béndee báanyisa mbu byěmire murebi Eliya abáhe tanga era muhondo se'kuika kwa Masiya. Somaa Malaki 4:5-6. 11Yesu era kubǎkula mbu: «Kubinali, byěmire Eliya abáhe tanga, àkunganye emyasi yoshi. 12Si rero nábabura kwa Eliya àikire mira, si ebandu bàtamumenyereraa. Bera kumuírira ngo'kwa babáa banáhonjire. Anabe nanyi nyi Mwana we'Mundu, ku bangánanyiribusa bacha.»

13Unao-unao, abu banafunzi* bai bera kwire bámenyerera kwa kasi Yesu, mwa kubahambalira era luulu sa Eliya, abáa áteta era luulu sa Yowani Mubatisayi.

Yesu âmbula echihwasi che'luungu kwa mwana

(Mar 9:14-29; Luk 9:37-43a)

14Yesu ne'banafunzi* bai bera kunaendekera ne'luendo na báika ala luamba lwe'bandu lwábaa lùli. Mundu muuma era kuchifunda ofu na Yesu, era kufukama era muhondo sai. 15Era kumubura mbu: «Enawetu, ufíraa emwana wanyi bonjo bushi atúsa bulwala bwa luungu. Obu bulwala, bwámulosise kwa kasibu. Énjire ákumbaaliranga mwa muliro, no'mwa meshi. 16Nàmureteraa ebanafunzi* bao mbu bàmulamye, si pyo!»

17Yesu era kubǎkula mbu: «Aaye! Mu bandu be'sine suku mùli babi, kanji mutéte na bwemeresi busibya! Nyikáendekera kuba nenyu, na kunde nômvirisa emyasi yenyu kuikira mango chi? Nyíreteraa oyu mwana anola!»

18Yesu era kukaliira echihwasi cha chábaa chìri kwo'yu mwana, na chámutenga'ko. Unao-unao kuna kulama.

19Chasinda, ebanafunzi* ba Yesu bera kuchifunda ala ábaa àli yeine, na bámubusa mbu: «eWaliya! Cha chihwasi, chi chàtumaa tubeke twáfundwa kwâmbula'chi?»

20Nai mbu: «Bushi ebwemeresi bwenyu bùli bueke. Kubinali, nábabura kwa chiro angaba mbu ebwemeresi bwenyu bùngaba bueke nga hya kafuma hieke busese, mùnganabura ene ndulungu mbu: ‹Tèngaa anola, úye kuchikoma wala›, nai ingánaya'o. Kutanganachiba kandu kasibya ka kàtangaalikana era mùli. [ 21Si echihwasi cha chìri nge'chi, chabáa chìtangambulwa busira memo ma ménde máirwa busira kulya.»]

Yesu áteta kanji era luulu se'kufa ne'kwômoka kwai

(Mar 9:30-32; Luk 9:43b-45)

22Lusuku luuma, mango ebanafunzi* bábaa babúananyire eKalilaya, Yesu era kubabura mbu: «Nyi Mwana we'Mundu nyingânyibwa mwa mino se'bandu. 23Na'bu bandu, bangányita, si elusuku lwa kahatu nyingômwoka.» Ebanafunzi* bai bômvire bacha, bera kuyongwa busese.

Yesu na Petero báfuta embarata ye'Luhu lwa Ongo

24Chasinda, Yesu ne'banafunzi* bai bera kuya mwa musi we'Kaperinaumu. Baíkire'mo, ebafuchisi be'mbarata ye'Luhu lwa Ongo*, bera kuikira Petero, na bámubusa mbu: «Ewashe, eri emukangirisi wenyu nai, énde áfuta embarata ye'Luhu lwa Ongo*?» #17:24 Mwa Bayuta, chira mulume ola wábaa wera ùkulire éndee áfuchisibwa buteya bubiri bwa bwěrikirwe mbu tarakima, bwa kukola mwa Luhu lwa Ongo*. Obu buteya, bwábaa bùngakorerwa mibisi ebiri, kanji bwéndee bwáfuchisibwa chira mwaka. 25Petero nai mbu: «Eee! Énde áfuta'i.» Petero mwa kunêngirira mwa nyumba, ábere àtanasa kuteta chiro na mwasi, Yesu era kumubusa mbu: «Ewashe Simoni, kute uséne? Ebami bobuno butala mango bénde báfuchisa embarata, eri bénde báfuchisa ebana be'chio, nesi ebaenyi?» 26Petero nai mbu: «Bénde báfuchisa ebaenyi oshâo.»

Yesu kukwera kumubura mbu: «Ebana be'chio batá bandu ba kunde báfuta mbarata. 27Si chiro bacha, tutáhonda kusibusa bano bandu. Bushi no'ku, uyáa kwa nyanja, wánauma endobi mwa meshi. Ne'fi era ungánatangira kusimba, uíboolaa ebunu, ungálola'mo ku'chikoroto cha buteya. Echi chikoroto, ubêresaa'chi kwa kufuta embarata yanyi ne'yao.»

Currently Selected:

Matayo 17: tbt

Highlight

Copy