Yowani 9
9
Yesu álamya emuuta
1Mango Yesu ábaa árenga, era kulola ku mundu muuma ola wábutwaa àli muuta. 2Ebanafunzi* bai bera kumubusa mbu: «Mukangirisi! Nde'iwáíraa ebibi bya byátumaa ono mundu ábutwa àli muuta? Eri yeine, nesi ebasere bai?»
3Yesu nai mbu: «Ono mundu ábutwaa àli muuta, atá bushi na bibi byai, nesi bya basere bai. Si ábutwaa bacha, chasiya ebuashi bwa Ongo bulórekane'ko mwa kalamo kai. 4Twěmire kunde twákola emulimo wo'la wányitumaa mango buchíri busene, bushi ebutufu bwáhonda kwêra. Na mango bungába bweríre, kutáli mundu asibya ola ungáchiala kukola. 5Mango nyichíri muno butala, nyono nyi nàrechire mwe'bulangare.»
6Ábere Yesu era àtetaa ei myasi, era kuchira-chira ala'shi. Amu mate, era kumahowa mwa butaka na ábona bihoo bieke. Chasinda, era kwâka'bi kwa meho mo'yu muuta, 7na ámubura mbu: «Uyáa kwa chitomu cha Silowamu, wǒwe era buso.» Silowamu kukuteta mbu: Ola wátumirwe. Oyu muuta, era kunaya kwôwa, na áfuluka era álola.
8Ebalungu bai ala'uma, ne'ba béndee bálola kwa émeresa, bera kutangirisa báteta mbu: «Ewashe! Kasi atá ono mundu iwábaa wénjire wába wěkese, émeresa?» 9Bauma mbu: «Nechi! I'no'yu!» Ne'banji mbu: «Nânga! Atá i'yôyu! Si kumuhúha ku anámuhúhire.»
Si oyu mundu, yeine era kuteta mbu: «Nyono ono.»
10Bushi no'ku, bera kumubusa mbu: «Era! Kute emeho mao masíbukalaa kasi?» 11Nai mbu: «Ola mulume mbu i'Yesu iwahówaa bihoo bieke, na ányaka'bi kwa meho. Chasinda, era kunyibura mbu nyiyáa kwa chitomu cha Silowamu, nyǒwe era buso. Nera kunaya'ko, na nôwa. Ábere nera nòwaa, unao-unao nera kutangirisa nálola.» 12Bera kuhuba kumubusa mbu: «Oyu mulume, ngai u'àli?» Nai mbu: «Ndàngamenya.»
eBafarisayo bábusirisa emuuta ola wálamisibwaa
13Chasinda, abu bandu bera kwire bêka oyu mundu wábaa muuta era mwe'Bafarisayo*. 14Ne'lusuku Yesu áhowaa ebihoo ne'kusibula emeho mo'yu mundu, lwábaa lusuku lwa Sabato*. 15Bushi no'ku, eBafarisayo* nabo bera kumubusa mbu: «Era! Kute waíkiraa wálola?» Nai mbu: «Ànyâkaa twa bihoo kwa meho. Chasinda, nera kuya kwôwa era buso, rero nera nálola.»
16Bauma mwa'bu Bafarisayo* bera kuteta mbu: «Oyu mundu waíraa bacha, atátengaa era mwa Ongo, bushi àtenjire átunda elusuku lwe'Sabato*.»
Si ebanji beke bera kuteta mbu: «Emukosi we'mabi kute àngabona ebuashi bwe'kuíra bisomerano bya bìri nge'bi?» Bushi no'ku, ba Bafarisayo*, kuna kuberekana'mo.
17Chasinda, abu Bafarisayo* bera kubusa kanji oyu wábaa muuta mbu: «Woyo u'oyu mundu asíbula emeho. Rero nau, kute wàtechire era luulu sai?» Nai mbu: «Oyola àli murebi*!»
18Si abu bakulu-kulu be'Bayuta, chiro bákêmerera kwo'yu mundu ábaa atúla muuta, ola wera wálola. Bera kwire bêmerera mango bâmaalaa ebasere bai, 19ne'kubabusa mbu: «Eri onola análi emwana wenyu, ola mwénjire mwáteta mbu ábutwaa àli muuta? Na akaba kuno'ku, rero kute ku éraa álola?»
20Nabo mbu: «Tuneshi kanangana kwa onola análi mwana wetu, kanji tunêshi kwa ábutwaa àli muuta. 21Si ekusibukala emeho kwai ku tùtangamenya kute kwabáa. Anabe no'la wàmusibulaa'mo, nai tùtanamwìshi. Rero, mumúbusaa yeine àbabalikisise emyasi yai. Si era mundu aséne!» 22Abu basere bai bátetaa bacha, bushi bábaa bôbaa abu bakulu-kulu be'Bayuta. Bushi ebakulu-kulu be'Bayuta bábaa bèmeresanyise mira mbu emundu ola ùngêmerera kwa Yesu i'Kirisito*, bangámubika era musike mwa bushenge* bwabo. 23Echera chi chátumaa ebasere bo'yu mundu báteta mbu bamúbusaa yeine, bushi era mundu aséne.
24Kanji, abu Bafarisayo* bera kuhuba kwâmaala oyu wábaa muuta ebwakabiri, na bámubura mbu: «Láisaa era muhondo sa Ongo! Oyu mundu, tubano twìshi kwa àli mukosi wa mabi!» 25Nai mbu: «Akaba àli mukosi wa mabi, nyono ndeshi. Si mwasi muuma ola nyìshi i'yono: nyono nabáa muuta, na lwarero nera nálola!» 26Bera kumubusa kanji mbu: «Chiye chi àkuiriraa? Na kute ku àkusibulaa emeho?»
27Nai mbu: «Nàbabwirire mira, si mutáhonda kûmva! Eri mwáhonda nyibábure kanji ei myasi i'ne'i? Ngaba nenyu mwáhonda múbe banafunzi* bai!»
28Unao-unao, abu Bafarisayo* bera kutangirisa bámukamba-kamba, na bámubura mbu: «Woyo u'mwanafunzi* wo'yu mundu, si tubano tùchitulira banafunzi* ba Musa! 29Oyu Musa yeke, twìshi kwa Ongo éndee áhambala nai. Si oyu mundu, tùteshi chiro ne'ra àulukirire.»
30Nai mbu: «Emyasi yenyu ìri ya kushishasa! Mùteshi era oyu mundu àulukiraa, no'ku ànyisibure emeho mira! 31Twìshi kubuya kwa Ongo àtomva ememo me'bandu be'mabi. Si énde ômva chira mundu ola utúla umútunjire, ne'kuira ekuhonda kwai. 32Kanji tùtafuraa kûmva chiro ne'uma mbu kuli ola wera usíbwire emeho mo'la wábutwaa àli muuta. 33Oyu mundu, akaba atátengaa era mwa Ongo, àtangaalire kuira chiro na kandu kasibya.»
34Nabo mbu: «Eri nao wáhonda kutukangirisa? Si mwa bibi mu wábutwaa!» Unao-unao, bera kwire bámukolokanya mwa bushenge* bwabo.
Ebuuta bo'mwa muchima
35Oyu mundu wábaa muuta, Yesu era kûmva emwasi kwa Bayuta bàmukolokanyise mwa bushenge* bwabo. Na mango Yesu ábuananaa nai, era kumubusa mbu: «Wèmerere eMwana we'Mundu*?»
36Nai mbu: «eWaliya! Oyu Mwana we'Mundu* i'nde kasi? Unyíburaa, nanyi nyimwêmerere mwa muchima wanyi!»
37Yesu nai mbu: «Wàmulorire'ko mira, bushi ono wáhambala nao, i'yôyu.»
38Ola mundu, kukwera kuteta mbu: «Enawetu, nemérere.» Chasinda, era kukoma emafi era muhondo sa Yesu, na ámwèra.
39Yesu era kuteta mbu: «Naíkire muno butala, nyiréte mwe'buchinjibusi. Kukuteta mbu, ebauta balóle, ne'ba báchiremba mbu bálola, bahúbe bauta.»
40Bafarisayo* bauma ba bábaa bàli aola, mango bômvaa kwe'i myasi ya Yesu, bera kumubusa mbu: «Era! Wáhonda kuteta mbu netu tunáli bauta?»
41Nai mbu: «Mùngabere bauta, mùtangaachire bibi. Si bushi mwénjire mwáchitonga mbu mwálola, chi chatúmire mwáendekera kuba mwa bibi.»
Currently Selected:
Yowani 9: tbt
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translators, Inc.
