Yowani 10

Emuanyi we'mungere ne'mbuli

1Era nyuma se'bi, Yesu era kuteta mbu: «Kubinali, nábabura kwa akaba emundu àngareka kurengera kwa lwisi lwe'chikali che'mbuli, si áneruka kwe'chi chikali, chasinda ánatowera'mo, muményaa kwo'yu mundu àli mwisi. Kanji chìri chihumusi. 2Si ola wàrengere kwa lwisi yeke, i'mungere we'mbuli. 3Rero oyola, i'emulanzi énde áboorera elwisi.

«Na mango emungere énde âmaala embuli sai, unao-unao sánamumenyera kwa murenge wai. Iwénde wâmaala chira mbuli mwe'sina lyai, kanji iwénde wánaulusa'si era butala. 4Mango énde ába era àulusaa esi mbuli soshi era butala, énde áhondorera'si, nasi sánamukulikira bushi sera sitúla sikomere emurenge wai. 5Sìtangakulikira ola sìteshi chiro na hicha. Si sénde sámuhaa, bushi sìteshi emurenge wai.»

6Yesu áishiraa ebandu oyu muanyi, si chiro bakámenya bya ábaa áhonda kuteta.

Yesu i'mungere mubuya

7Yesu era kwire ábabura kanji mbu: «Kubinali, nábabura kwa nyono nyìri nga lwisi lwe'chikali che'mbuli. 8Si ebanji boshi ba bábahaa era muhondo sanyi, beke bábaa besi, kanji bihumusi. Bushi no'ku, embuli siténdee sômva emyasi yabo. 9Kanji nyono nyi lwisi. Ola wànyirengere'ko, kuika anánunulibwe. Oyola, yeke àli nga mbuli era ingénde yáuluka mwa chikali, na yábona ebwaasi, kanji yánahuba kwêngirira'mo. 10Emwisi énde áika bushi na kwîba, na kwîta, na kukumbya. Si nyono, nyeke naíkire chasiya ebandu bàbone ekalamo. Na'ku kalamo, banákaate kanangana mwa ndanda sabo.

11«Kanji nyono nyi mungere mubuya. Emungere mubuya énde êmerera kwâna ekalamo kai bushi ne'mbuli sai. 12Si ola wákorera elwêmbo, oyola àtatúla mungere wa kanangana. Chiro ne'mbuli sìtatula sai. Na mango énde álola kwa lushibwabwa lwàbahire, unao-unao ánamika embuli, na áchihaira. Chasinda, walushibwabwa ánatabalira'si, na áhandabanya ebuso boshi. 13Oyu mungere énde áira bacha, bushi olu lwêmbo lwai lu anátula àlaire'ko oshâo, si àtatúla àlaire kwa mbuli.

14«Nyono nyi mungere mubuya. Nyitúla nyìshi embuli sanyi, nasi sitúla sinyîshi, 15ngo'kwa Tata nai atúla anányishi, no'kwa nyinátula nyimwîshi. Kanji esi mbuli sanyi, nânyire ekalamo kanyi mira bushi nasi. 16Nyéte na sinji mbuli sanyi, sa sìtatula mwe'chine chikali. Esera nasi, binyěmire nyisírete, nasi sínde sômva emurenge wanyi. Chasinda, soshi síbe mu'buso buuma, siáte na mungere muuma.

17«Tata atúla ànyisimire ngachi, bushi nèmerere kwâna ekalamo kanyi, chasiya nyihúbe kukabona. 18Kutali ola ùngaala kunyinyaa'ko. Si nyeine, nânyire'ko kwa kuhonda kwanyi. Nyéte ebuashi bwe'kuchana nyǐchibwe, nyéte ne'bwe'kuhuba kubona ekalamo. Rero, echera chi Tata ányiburaa mbu nyiíraa.»

19Ei myasi ya Yesu, yera kutuma eBayuta báberekana'mo kanji. 20Banene mubo bera kunde báteta mbu: «Aaye! Ono mundu asímbirwe na chihwasi! Kubinali, asíreire! Rero, chi chátuma muchiri mwámuteya ematwi?» 21Si ebanji beke mbu: «Bisha byenyu! Ei myasi ìtangatetwa no'la usímbirwe ne'bihwasi. Kanji ebihwasi bìtangaala kulamya emeho me'muuta!»

eBayuta bánana Yesu

22Mwa musi we'Yerusalemu, elusuku lukulu lwe'Kukengera ekwemera eLuhu lwa Ongo* #10:22 Mwa Bayuta, elusuku lukulu lwe'Kukengera ekwemera eLuhu lwa Ongo*, lwéndee lwába eYerusalemu mango emwesi we'kumi nê'biri éndee ába áhonda kuwa. lwera kuika. Kanji olu lusuku lwáikaa mwa suku se'mbeo. 23Mwe'bi bihangi, Yesu ábaa árenga mwa Luhu lwa Ongo*, mwa chisusu cha bénde bérika mbu: Chisusu cha Solomono. 24Unao-unao, eBayuta bera kumusungula na bátangirisa bámubusa mbu: «Ukánaendekera kunde wátusungulisa ebwenge kuikira mangochi? Rero, akaba woyo una Kirisito*, utúburaa changanama!»

25Yesu nai mbu: «Nàbabwirire mira, si muténjire mwányemerera! Ebisomerano bya nénjire náira kwa buashi bwa Tata, nabi byénjire byánalosa nyono nyìri nde. 26Si mwabo, muténjire mwányemerera mwa michima yenyu, bushi mùtatula bo'mwa mbuli sanyi. 27Embuli sanyi sénde sômva emurenge wanyi. Nyitúla nyisîshi kubuya, nasi kunyikulikira ku sénde sánanyikulikira. 28Nyono nyi nénde nêresa'si ekalamo ke'suku ne'mango. Sitákaere chiro na hicha, kanji kutáli chiro na mundu asibya ola ùngaala kunyikula'si mwa mino. 29Tata iwányeresaa'si, i'mukulu-kulu kurenza boshi. Rero, kutáli ola ùngaala kumunyaa chiro na kandu. 30Nyono na Tata, tunáli muuma.»

31Bushi no'ku, eBayuta bera kuhuba kutolanga emakoi bàmuumange'mo. 32Si Yesu era kwire ábabura mbu: «Nàbalosise myasi ibuya inene kwa buashi bwa Tata. Rero mwe'i myasi, úye mui ola ùngatuma mwányiumanga emakoi?» 33Nabo mbu: «Tutákuumanga'mo mbu bushi kuli mabuya ma waírire. Si twákuuumanga'mo bushi woyo wénjire wákamba Ongo. Kute u'wìshi kwa unáli mundu, wera ùngachiira Ongo?»

34Yesu nai mbu: «Si bitúla byǎnjikirwe mwa Mwaso* wenyu mbu Ongo átetaa kwa mutúla baongo!#10:34 Somaa Saburi 82:6. 35Kanji tunátula twìshi kwa kutáli chinwa chisibya cha chìngaokolwa kwa Maanjiko Mabuya-buya. Rero, ba Ongo éndee érika mbu baongo, bàli ba echi Chinwa chai cháikiraa. 36Nyono ekuteta mbu nyìri Mwana wa Ongo, chi chìnganatuma mwáteta mbu nàmukambire, no'ku ányilondwere mira, ne'kunyituma muno butala? 37Rero akaba emirimo era nákola ìtakulikene ne'kuhonda kwa Tata, mùtanyemereraa mwa michima yenyu. 38Si kuno nera náikola, mwiree mwêmerera bushi nai, chiro angaba mbu nyono muténjire mwányemerera. Aola, mwera mungámenyerera kanangana kwa Tata àli mwa ndanda sanyi, nanyi nánaba mwa ndanda sai.»

39Abu Bayuta bera kuhonda bamíne Yesu kanji, si era kubafufumuka.

40Chasinda, Yesu era kuya kanji kwa unji mushirirya we'Yorotani, ala Yowani éndee ábatisisa ebandu. Era kubera'o. 41Bandu banene bera kumuikira, bera kunde báteta mbu: «Chiro angaba mbu Yowani atáiraa chiro na chisomerano chisibya, si emyasi yoshi era éndee áteta era luulu so'no mundu, yánabaa ya kanangana.» 42Mwe'chi chisiki, bandu banene bera kwire bêmerera Yesu mwa michima yabo.

Currently Selected:

Yowani 10: tbt

Highlight

Copy