Yowani 8

Yesu ábabalira echihungukasi

1Era nyuma se'bi, Yesu era kuya kwa ndulungu ye'Miseituni. 2Ábere mwe'i mishangya lumbuli-mbuli, era kuya kanji mwa Luhu lwa Ongo*. Ebandu boshi ba bábaa bàli aola, mango bábaa bera bachífundaa ofu nai, era kwékala na átangirisa ábakangirisa.

3Mwo'lu, ebakangirisi be'Mwaso*, ne'Bafarisayo* bera kureta mukasi muuma ola wásimbwaa mwa lusingi. Bera kumwemanza era muhondo se'bandu boshi, 4na bábura Yesu mbu: «Mukangirisi! Ono mukasi asímbirwe mwa lusingi. 5Mwa Mwaso* wetu, Musa átuburaa mbu ebakasi ba bàli nga'bano, túndaa twêta'bo mwa kubahutanga emakoi. Rero nao, kute ku wàtechire?»

6Báburaa Yesu bacha, bushi bábaa báhonda bamúteye mwasi, bàbone echinwa cha bàngemangira'ko mwa kumusitaka.

Si Yesu era kwínamirira, na átangirisa áanjika ne'mutoke kwa chitaka. 7Na mango báendekeraa bámubusa, era kwénamuka na ábabura mbu: «Ola ùtafuraa kuira bibi mu mwabo, i'ùbaa mubere kuhuta ono mukasi ekoi.»

8Kanji era kwínamirira na áendekera áanjika kwa chitaka.

9Abu bandu bômvire bacha, bera kutenga aola muuma-muuma, kutengera kwa bangumwa tanga, kuikira kwa banji bandu. Ola mukasi yeine oshâo iwánashibaa aola, eménze era muhondo sa Yesu.

10Yesu kanji era kwénamuka, na ámubusa mbu: «E mama! Abu bera kukusitaka, ngai u'bàli? Kutáli chiro na muuma mubo ola wakúchinjibusise?» 11Nai mbu: «Nânga Enawetu! Kutáli!»

Yesu kukwera kumubura mbu: «Anabe nanyi, ndákuchinjibusa. Rero, wera ùngaenda, si kutengera lwarero, si ùtachiira bibi kanji.»]

Yesu iwárechire ebulangare mwa butala

12Yesu era kubura ebandu kanji mbu: «Nyono, nyi bulangare bwe'butala. Ola ungányikulikira, àngabona ebulangare bwa bwénde bwáreta ekalamo. Mwa bacha, atákachiende mwa musimya chiro na hicha.»

13Bushi no'ku, eBafarisayo* bera kumubusa mbu: «Era! Kute weine uwénjire wáteta era luulu sao? Rero, ebi wénjire wáteta bìtali bya kanangana.»

14Yesu nai mbu: «Chiro angaba mbu nénjire náteta era luulu sanyi nyeine, ebi nénjire náteta bináli bya kanangana, bushi nyìshi era nátengaa, nyìshi ne'ra náya. Si mwabo, era nátengaa, ne'ra náya, mùteshi'yi.

15«Mwabo mwénde mwáchinjibusa ebanji kukulikana ne'mianyisa ye'bandu. Si nyono, ndénjire náchinjibusa mundu asibya. 16Si akaba nyingénjire náchinjibusa ebandu, nyeke nyingénjire náchinjibusa'bo mwa myasi ye'kanangana, bushi atá nyeine nyi nyitúla, si tutúla ala'uma na Tata ola wányitumaa. 17Anabe no'mwa mwaso wenyu, si bitúla byǎnjikirwe mbu akaba bandu babiri bàngateta era luulu sa mwasi murebe ola beine bàchiloreraa'ko, oyola i'utúla we'kanangana! 18Bushi no'ku, nyono nénjire náteta era luulu sanyi nyeine na Tata ola wányitumaa, nai énjire ánateta era luulu sanyi.»

19Bera kwire bámubusa mbu: «Oyu Eho, ngai u'nai atúla?» Nai mbu: «Mwabo, mùtanyîshi, Tata nai mùtanamwishi! Bushi akaba mùnganyimenyire, nai mùnganamumenyire.»

20Ei myasi yoshi, Yesu átetaa'i, mango ábaa ákangirisa ebandu mwa chibua che'Luhu lwa Ongo*, ofu ne'sanduku ye'kutulira mwe'mitulo*. Si kutáli chiro na mundu asibya ola wámusimbaa, bushi echihangi chai chábaa chìtasa kuika.

21Yesu era kubura abu bandu kanji mbu: «Nyono, kuchiendera ku nyìri'mo. Na chiro angaba mbu mungányihonda, kufa ku mungánashiba mwáfira mwa bibi byenyu! Rero eyi nyingáya, mùtangaala kuika'yi.»

22Bushi no'ku, ebakulu-kulu be'Bayuta bera kwire bábusanya mbu: «Ono mundu àtechire mbu tùtangaala kuika era angáya, eri kuchikonola ku angáya kuchikonola?»

23Yesu nai mbu: «Mwabo, munáli bo'muno butala. Si nyono, ndàchiberere wo'muno butala, si nyichiberere wo'kwa nguba. 24Ne'chi chi chátumaa nábabura kwa mungáshiba mwáfira mwa bibi byenyu. Kubinali, mwe'bi bibi byenyu mu mungánafira akaba mùtemerere mwa michima yenyu kwa "Nyono Nyitúla'o."#8:24 Nyono Nyitúla'o: Lìri sina liuma mwa masina ma Ongo. Somaa Kutenga 3:14. »

25Chasinda, bera kumubusa mbu: «Woyo únde kasi?»

Yesu nai mbu: «Nyono nyi no'yu i'no'yu, ola nábaburaa kutengera mira. 26Nyéte myasi inene ya kubabura, kanji ya kubachinjibusa. Si ei myasi nénjire nábabura ináli era nômvaa era mwo'la wányitumaa. No'yu wányitumaa, atúla wa kanangana.»

27Abu bandu, chiro bákamenya kwa Yesu, era luulu se'She yi'ábaa ábahambalira. 28Bushi no'ku, Yesu era kubabura mbu: «Mango mungányěrusa kwa musaba nyi Mwana we'Mundu* mu mango mungére mwámenyerera kanangana kwa kasi nyono nyi no'yu. Kanji mungánamenyerera kwa kutáli kandu kasibya ka nénjire náira kwa kuhonda kwanyi nyeine. Si emyasi era nénjire náteta ináli era Tata ányikangirisaa. 29Ola wányitumaa atányirekerere chiro na hicha, si anátula ala'uma nanyi. Bushi esuku soshi, ekuhonda kwai ku nénde nánaira.»

30Ábere Yesu anáchiri áteta ei myasi, bandu banene kuna kumwemerera mwa michima yabo.

Yesu áenda ebwaka ne'Bayuta

31Chasinda, abu Bayuta ba bêmereraa, Yesu era kwire ábura'bo mbu: «Ene myasi nénjire nábakangirisa, mukénde mwátunda'i, eri munáli banafunzi* banyi kanangana. 32Mwa bacha, mungénde mwámenya emyasi ye'kanangana. Ne'i myasi ye'kanangana, i'ingábakula mwa bucha.»

33Nabo mbu: «Tubano, tutúla bo'mwa lubuto lwa Aburahamu, kanji tùtafuraa kuba tuungu* twa mundu asibya. Rero kute wénjire wáteta mbu tungátenga mwa bucha?» 34Nai mbu: «Kubinali, nábabura kwa chira mundu ola wénde wáira ebibi, i'unátula kaungu* ke'bi bibi.

35«Muményaa kwa ekaungu* katabera mwa nyumba ya enawabo esuku soshi. Si emwana wo'mwa nyumba, yeke énde ábera'mo esuku soshi. 36Bushi no'ku, akaba nyi Mwana nyìngabakula mwa bucha, eri mwanátengire'mo kanangana. 37Nyinéshi kubuya kwa mutúla bo'mwa lubuto lwa Aburahamu. Si chiro bacha, mwáhonda munyîte bushi mwanányire emyasi era nénjire nákangirisa. 38Nyono, bya nálolaa'ko mango nábaa nyìri na Tata, bi nénjire nábabura. Nenyu kuno'ku, bya mwômvaa era mwe'ho wenyu, bi nenyu mwénjire mwánaira.»

39Abu Bayuta bera kuteta mbu: «Tata i'Aburahamu.»

Yesu nai mbu: «Akaba mùngabere benyi Aburahamu, mungénjire mwáira bya nai éndee áira. 40Si lwarero mwáhonda kunyita, no'ku nàbabwirire mira emyasi ye'kanangana era nômvaa era mwa Ongo. Si Aburahamu yeke aténdee áira bacha! 41Mwabo, bya mwénde mwáira, bináli bya eho wenyu nai énde ánaira.»

Nabo mbu: «Tubano, tùtatula bana bo'mwa mbuwa. Tata muuma itunátusa oshâo. No'yu Tata i'Ongo!»

42Yesu nai mbu: «Akaba Ongo àngabere Eho wenyu, mùnganyisimire, bushi era mwai yi'nátengaa kwa kuika anola. Kanji ndàbahire kwa buashi bwanyi nyeine, si iwànyitumire. 43Na cha chénjire chátuma mútemerera kubuya emyasi era nénjire nábabura, análi bushi mutáhonda kuimenyerera oshâo.

44«Mwabo, eho wenyu i'Wamusimu*. Rero nenyu munáhonjire kunde mwáira ngo'kwa atúla asímire. Kutengera mira, oyu eho wenyu anátula mwîchi. Kanji àtaira myasi ya kanangana, bushi kutáli mwasi asibya wa kanangana ola utúla mwa muchima wai. Na mango énde ába áfula ebisha, emitetere yai inátula imuhúhire, bushi atúla mufusi wa bisha, kanji ánaba eshe we'bafusi be'bisha boshi. 45Si nyono, oku nénde náteta emyasi ye'kanangana, mùtanganyêmerera mwa michima yenyu! 46Nde mu mwabo ola ùngalosa ebibi bya nénjire náira? Na akaba myasi ya kanangana i'nénjire náteta chi chátuma mútanyêmerera? 47Ola ùli mundu wa Ongo, énde ômvirisa ne'myasi ya Ongo. Rero mwabo mùtanyûmvirisa, bushi mùtatula bandu bai.»

48Abu Bayuta bera kubura Yesu mbu: «Kasi mango twàtetaa mbu ùli Musamariya, no'kwa wasímbirwe na bihwasi, twabáa tunásinganyire!»

49Yesu nai mbu: «Nyono ndasímbirwe na bihwasi, si nénjire nátunda Tata! Si chiro bacha, kunyikena ku mwénjire mwánanyikena. 50Ndénjire náhonda engulu yanyi nyeine, si kuli ola wénjire wányihondera'i. No'yu, iwète ebuashi bwe'kuchinjibusa. 51Kubinali, nábabura kwa akaba emundu àngaéndekera kunde átunda echinwa chanyi, atákafe chiro na hicha.»

52Abu Bayuta kukwera kumubura mbu: «Rero, twérire twánachilorera kanangana kwa usímbirwe na bihwasi! Si Aburahamu áfire mira, ne'barebi, nabo si báfire mira. Si weke, wénjire wáteta mbu ola ungénde wátunda emyasi yao, yeke atákafe chiro na hicha! 53Woyo eri u'wera mukulu-kulu kurenza oyu hokulu wetu Aburahamu? Si áfire mira! Anabe ne'barebi nabo, si báfire mira! Rero woyo, wénjire wáchitola nga nde?»

54Yesu nai mbu: «Akaba nyìngachitonga nyeine, oku kuchitonga kwanyi, kutete mufa. Si Tata iwénjire wányitonga, na i'nenyu mwénjire mwáteta mbu i'Ongo wenyu! 55Mwabo mùtamwîshi, si nyeke nyi nyimwîshi! Rero, akaba nyìngatechire mbu ndàmwîshi, nanyi nyìngabere mufusi wa bisha kuuma nenyu. Si nyono nyimwîshi, kanji nénde nátunda ne'myasi yai. 56Oyu eho wenyu Aburahamu, éndee álangalira na lumoo lunene àlole kwa lusuku lwe'kubaha kwanyi. Na mango álulolaa'ko, era kumowa busese.»

57Chasinda, ba Bayuta bera kwire bamubusa mbu: «Era! Mangochi wálolaa ku Aburahamu, no'ku ùtasa kuata chiro na myaka matano?»

58Yesu nai mbu: «Kubinali, nábabura kwa mango Aburahamu ábaa àtasa kubuchibwa, nyono nyinátula'o.»

59Bushi no'ku, bera kutolanga emakoi bamúhutange'mo. Si Yesu era kuchibisha na átenga mwa chibua che'Luhu lwa Ongo*.

Currently Selected:

Yowani 8: tbt

Highlight

Copy