Yowani 7

Banyakabo Yesu nabo bàtamwemerera

1Era nyuma se'bi, Yesu era kuya kusungula mwa chio che'Kalilaya. Atáhondaa kurenga mwa che'Yuteya, bushi ebakulu-kulu be'Bayuta be'yi, bábaa báhonda enjira ye'kumwita.

2Mango elusuku lukulu lwe'Bayuta lwa lwěrikirwe mbu lusuku lukulu lwe'Bitala #7:2 Somaa Balawi 23:34; Bukengere 16:13. lwábaa lùli ofu kuika, 3banyakabo Yesu bera kumubura mbu: «Uténgaa anola, úye eYuteya ebanafunzi* bao, nabo bàchilorere kwa bisomerano bya wénjire wáira. 4Bushi ola wáhonda àmenyeke mwa bandu, bitěmire énde áira emulimo wai mwa bubisho-bisho. Rero nao, oku wénjire wákola emirimo era ìri nge'i, uyáa kuchilosa changanama era muhondo se'bandu boshi.» 5Abu banyakabo bátetaa bacha, bushi nabo bábaa bàtatula bàmwêmerere mwa michima yabo.

6Bushi no'ku, Yesu era kubabura mbu: «Ebihangi bya bikomire ku nyono, bìtasa kuika. Si mubeke ebihangi byoshi binátula bikomire! 7Mwabo, ebandu bo'mwa butala bàtangabahomba. Si nyeke bànyihombire mira, bushi nénjire nábatabula kwe'myanya yabo ìri ibi. 8Bushi no'ku, mwabo muyáa kwa lusuku lukulu, si nyono ndáfura kuya'ko. Bushi ebihangi bya bìkomire ku nyono, bìtasa kuika.»

9Mango Yesu ábaa era amálaa kuteta ei myasi, era kuchishibira eKalilaya.

Yesu áya kwa lusuku lukulu lwe'Bitala

10Mango banyakabo bábaa bera bàchiumaa báya kwa lusuku lukulu, nai era kuya'yi. Si áyaa'yi kwa bubisho-bisho, busira kuchilosa changanama kwa bandu. 11Mwo'lu lusuku lukulu, eBayuta bábaa básungula-sungula bámuhonda. Bera kunde bábusirisa mbu: «Ola mulume, ngai u'àli?»

12Ebandu ba bábaa bèhwire aola, bábaa báenzanya ebwaka mwa byooo era luulu sa Yesu. Bauma bábaa bénjire báteta mbu: «Atúla mundu mubuya.» Si ebanji beke mbu: «Bisha byenyu! Si énjire êngeera ebandu!»

13Si mwa kuteta era luulu sai, kutábaa chiro na mundu ola wáereresaa áteta changanama, bushi bábaa bôbaa ebakulu-kulu be'Bayuta.

14Mango ebandu bábaa bera bàli mwa kachi-kachi ke'si suku sikulu, Yesu era kuya mwa Luhu lwa Ongo*, na átangirisa ákangirisa'bo. 15Abu bakulu-kulu be'Bayuta, mwa kunômva kwa ákangirisa, bera kusanwa busese. Bera kutangirisa báteta mbu: «Ewashe! Ene myasi yoshi, kute ono mundu ámenyaa'i, no'ku átarengire ku masomo?»

16Yesu era kubǎkula mbu: «Ene myasi nénjire nábakangirisa, ìtatengire era mwanyi, si ìtengire era mwo'la wányitumaa. 17No'la ùngahonda kumenyerera akaba ei myasi nénjire nákangirisa ìtengire era mwa Ongo, nesi ìri ya kuchitonga kwanyi, byěmire ábe ola ùsimire kuira ekuhonda kwa Ongo. 18Ola wáteta era luulu sai yeine, énde ába áchihondera etunda lyai yeine. Si ola wáhonda etunda lyo'la wámutumaa, oyola yeke iwénde wáteta emyasi ye'kanangana. Kanji mwa ndanda sai mùtatula butebanyi busibya.

19«Si Musa áberesaa eMwaso*! Si chiro bacha, kutáli chiro na muuma mu mwabo ola wénde wátunda'o. Rero, chi chera chátuma mwáhonda kunyita?»

20Olu luamba lwe'bandu lwera kumwǎkula mbu: «Wàhwabirwe! Nde iwáhonda kukwita?»

21Yesu nai mbu: «Chisomerano chiuma chi nanáiraa oshâo, chera kutuma muboshi mwásanwa. 22Si oku Musa ábarekeraa emuomba* we'kunde mwámonya ebana benyu be'busana, mwabo mwera mwénjire mwánamonya'bo ne'lusuku lwe'Sabato*. (Si kanangana, oyu muomba* atátengaa era mwa Musa, si era mwa bahokulu benyu.) 23Rero, akaba mùngamonya emwana elusuku lwe'Sabato*, chasiya mutúnde oyu muomba* wa Musa, chi chera chátuma mwányisibukira bushi nalámyaa emundu elusuku lwe'Sabato*? 24Bushi no'ku, murékaa kunde mwáchinjibusa ebanji mwa kunabalola'ko oshâo, si mundaa mwábachinjibusa kwa njira ye'kanangana.»

Ebandu báchibusa akaba Yesu i'na Kirisito

25Chasinda, bandu bauma bo'mwa musi we'Yerusalemu, bera kutangirisa bábusanya mbu: «Ewashe! Ono mundu, kasi atá ibáhonda kwîta? 26Rero, kute kwe'njire áteta changanama nabo batánamubusa chiro na mwasi asibya? Abunya ebakulu-kulu betu baményire kanangana kwa i'na Kirisito*! 27Ono mundu, twìshi era átengera. Si mango Kirisito* yeke akábaha, kutáli ola ukámenya era akába átengera.»

28Mango Yesu ábaa anáchiri ákangirisa ebandu mwa chibuwa che'Luhu lwa Ongo*, era kuteta na murenge munene mbu: «Mwabo, mwénjire mwáteta mbu munyîshi, mwìshi ne'ra nátenga! Ndàbahire kwa buashi bwanyi nyeine, si ola wányitumaa atúla wa kanangana. Rero, mwabo mùtamwîshi. 29Si nyono nyeke, nyimwîshi kubuya bushi era mwai yi'nátengaa, kanji iwánanyitumaa.»

30Ebi Yesu átetaa, byera kutuma bauma mwa'bu bandu bahónde kumusimba si kutáli ola wámubikaa kwe'mino, bushi echihangi chai chábaa chìtasa kuika.

31Si mwo'lu luamba luno'lu, bandu banene, beke bera kumwemerera mwa michima yabo. Bera kutangirisa báteta mbu: «Mango Kirisito* akáika, mwìshi mbu akénde áira bisomerano binene kurenza bya ono mundu énjire áira?»

Ebakulu-kulu be'Bayuta bátuma ebalanzi báye kusimba Yesu

32Emyasi era bandu bábaa báteteresanga mwa byooo era luulu sa Yesu, eBafarisayo* nabo bera kûmva kui. Bushi no'ku, abu Bafarisayo* ala'uma ne'bakulu-kulu be'bakuhanyi* bera kwire bátuma ebalanzi báye kumusimba.

33Yesu era kuteta mbu: «Nyichíri ala'uma nenyu ku'suku sieke oshâo, chasinda nyingáfuluka era mwo'la wányitumaa. 34Rero, mwabo mungányihonda si mutáchinyilole'ko. Bushi ala nyingába nyìri, mùtangaala kuika'o.»

35Ebakulu-kulu be'Bayuta bômvire bacha, bera kutangirisa bábusanya mbu: «Ewashe! Ono mundu ngai u'angáya, kuikira tùtangachimulola'ko? Eri angáya era mwa banyaketu Bayuta ba báhandabanyire mwa Bakiriki, chasiya akángirise abu Bakiriki nabo? 36Kanji mango énjire áteta mbu tubano tungámuhonda, si tutáchimulole'ko, bushi tùtangaala kuika ala àngaba àli, kukwera kuteta kuto'ku?»

Emeshi ma ménde mâna ekalamo

37Elusuku lusinda lwe'si suku sikulu, lwera kuika. Olu lusuku, lu lwábaa lusuku lunene ku sirikabo. Mwo'lu, Yesu era kubatuka na átangirisa áteta na murenge munene mbu: «Akaba kuli mundu ola wáfa châmi, abáhaa ene nyìri, ámwe. 38Ola ùnganyêmerera mwa muchima wai, eshokororo se'meshi ma ménde mâna ekalamo singénde sáshoka mwa muchima wai, ngo'kwe'Maanjiko Mabuya-buya matúla màtechire.»

39Ei myasi Yesu ábaa áteta, yábaa era luulu se'Muchima Mubuya-buya, ola ba bangámwemerera bangábona. Rero, oku Ongo ábaa àtasa kwérusa Yesu mwe'tunda lyai, chi chátumaa ábaa àtasa kutuma eMuchima Mubuya-buya.

Ebandu nabo báberekana'mo bushi na Yesu

40Bauma mwa'bu bandu, mango bômvaa kwe'i myasi, bera kutangirisa báteta mbu: «Kubinali, ono mundu i'Murebi* twénde twálinjira!» 41Ebanji nabo mbu: «Ono mundu i'Kirisito*!»

Si ebanji, beke bera kuteta mbu: «Ewashe! eKalilaya nayi inganátenga Kirisito*? 42Si eMaanjiko Mabuya-buya matúla màtechire mbu Kirisito* mwa lubuto lwa mwami Tauti mu'akáshoka! No'mwa musi we'Betelehemu mu'akábuchirwa, na mu Tauti ábaa anátula!» 43Bushi no'ku, ba bandu kuna kuberekana'mo bushi na Yesu! 44Bauma mubo, bábaa bera báhonda bamúmine, si kutaba chiro na mundu asibya ola wámubikaa kwe'mino.

Ebakulu-kulu be'Bayuta nabo bánana kwêmerera Yesu

45Chasinda, ba balanzi bera kufuluka era mwa ba bakulu-kulu be'bakuhanyi*, na ba Bafarisayo*. Bera kubusa abu balanzi mbu: «Chi chatúmire mútareta Yesu?»

46Nabo mbu: «Aaye! Tùtafuraa kulola kwo'la wáteta ngo'yu mulume!»

47Abu Bafarisayo* bera kwire bábabusa mbu: «Era! Nenyu, anábengeere? 48Kutali chiro na mukulu-kulu muuma, nesi Mufarisayo* muuma, ola mwòmvaa mbu nai àmwêmerere? 49Aaye! Bano bandu bàli anola, beke bàtatula bèshi kute eMwaso* wa Musa atúla àtechire. Bàkomirwe shambyo!»

50Nikotemu, ola mulume wáikiraa Yesu, nai ábaa àli mwa'bu Bafarisayo*. Era kubusa bálikabo mbu: 51«Ewashe! eMwaso* wetu atúla emérere mbu túndaa twáchinjibusa emundu tùtasa na kumumvirisa, tùmenye cha àirire?»

52Nabo mbu: «Nao utúla mwesha Kalilaya? Uyáa kusoma eMaanjiko Mabuya-buya tanga, chasinda ungálola kwa eKalilaya itàfuraa kutenga murebi*!»

[ 53Chasinjire, chira mundu era kufuluka kwa wai.

Currently Selected:

Yowani 7: tbt

Highlight

Copy