Yowani 6

Yesu álisa bandu byumbi bitano

(Mat 14:13-21; Mar 6:30-44; Luk 9:10-17)

1Era nyuma se'bi, Yesu era kutenga aola na áhabuka enyanja ye'Kalilaya. (Ei nyanja, i'bénde bérika kanji mbu nyanja ye'Tiberiya.) 2Bandu banene bera kumukulikira, bushi beine béndee báchilorera kwa bisomerano bye'ndée áira mwa kulamya ebalwala.

3Yesu era kwérukira kwa ndulungu na ekala'ko ala'uma ne'banafunzi* bai. 4Ne'lusuku lukulu lwe'Pasaka* ye'Bayuta lwábaa lùli ofu.

5Mango Yesu êmusaa emeho, era kulola ba bandu bamúkulikire banene. Bushi no'ku, era kubusa Firipo mbu: «Era Firipo! Ngai u'tùngaulira emikati era bano bandu boshi bàngalya?» 6Ábusaa bacha, bushi ábaa áhonda ǒmve kute Firipo angáakula. Si yeine ábaa àmenyire mira chângáira.

7Firipo nai mbu: «eWaliya! Chiro tùngaula mikati ya maana mabiri ma tinari,#6:7 Maana mabiri ma tinari: bwábaa buteya bwa mukosi àngakorera ku myesi ene. ìtangalumirira bano bandu boshi, kuikira kwa chihangi chira muuma mubo àbone chiro ne'kambesha.»

8Unji mwanafunzi* muuma wa Yesu, mbu i'Andereya, munyakabo Simoni Petero, nai era kuteta mbu: 9«Anola àli musana muuma ola wète mikati etano oshâo, era ikúnganyisibwe mwa shayiri.#6:9 Shayiri: Eshayiri nai inátula nga bulo. Éte ne'fi ebiri oshâo. Rero, bano bandu bangana bacha, bi biryo bìngabalumirire'bi?» 10Yesu nai mbu: «Mubúraa ebandu boshi běkale ala'shi.» Ebandu boshi bera kunékala, bushi aola ábaa àli bichi binene. Mwa'bu bandu, ebalume beine oshâo, bábaa bàngaika ku byumbi bitano.

11Chasinda, Yesu era kwire átola era mikati etano, era kutonga Ongo, na áyǎbiranga abu bandu. Se'fi nasi, era kubaábiranga'si, kukulikana no'kwa chira muuma ábaa ánahonda.

12Ábere abu bandu boshi bera beutaa, Yesu kukwera kubura ebanafunzi* bai mbu balúnda-lundaa ebiryo byoshi bya byèshibire, bingesha kufa buha. 13Chasinda, bera kutangirisa bálunda-lunda bya byáshibaa kwe'ra mikate etano era yábaa ikunganyisibwe mwa shayiri, byera kwêhusa bitonga ekumi na bibiri.

14Abu bandu, mango bálolaa kwe'chi chisomerano Yesu áiraa, bera kutangirisa báteta mbu: «Kubinali, ono mundu análi ola murebi* béndee báteta kwa akábaha muno butala!»

15Unao-unao, Yesu era kumenyerera kwa báhonda kumwemika kwa misi ábe mwami wabo. Bushi no'ku, era kwire átenga aola na áya kanji kwa ndulungu yeine.

Yesu álambaira kwa nyanja

(Mat 14:22-33; Mar 6:45-52)

16Ábere lwera luolo-olo, ebanafunzi* ba Yesu bera kwândaalira kanji kwa nyanja. 17Bera kwérukira mwa bwato, na bátangirisa báhabuka enyanja, báye mwa musi we'Kaperinaumu. Yesu ábaa àtasa kubabuana, no'ku ebutufu bwábaa bweríre mira.

18Rero, kwa meshi kwera kuchihuta kausi kasibu, emulaba era kwire ába kwa nyanja.

19Ábere ebanafunzi* bera bàhabukaa bilometere bìngaika ku bitano nesi ndatu, bera kulola ku Yesu era àli ofu ne'bwato, áenda álambaira kwa nyanja. Bushi no'ku, bera kwôbaa. 20Si Yesu era kubabura mbu: «Nyono ono, mùtobaaa!» 21Bera kuhonda bamwêke mwa bwato.

Si unao-unao, obu bwato bwábaa bwaíkire mira kwa musike se'nyanja, ala bábaa báya.

Ebandu báhonda Yesu

22Ábere mwe'i mishangya, ebandu ba báshibaa kwa unji mushirirya we'nyanja, bera kukengera kwa kasi bwato buuma oshâo bu bwábaa bunáli aola. Kanji bera kumenya kwa Yesu àtěrukiraa mwa bwato ala'uma ne'banafunzi* bai, si beine bu banáchiumaa.

23Mwo'lu, kwera kuulukira manji mato ma mábaa mátengera mwa musi we'Tiberiya. Amu mato, mera kuika ofu na'la abu bandu báliraa era mikati mango Enawetu ábaa era àtongaa Ongo bushi nai.

24Abu bandu bálolire kwa Yesu ne'banafunzi* bai bàtachiri aola, bera kwire bérukiranga mwa'mu mato báye kumuhondera eKaperinaumu.

Yesu i'mukati ola wénde wâna ekalamo

25Mango abu bandu bábuanaa Yesu kwa mushirirya we'nyanja, bera kumubusa mbu: «Mukangirisi! Mangochi waíkaa enera?»

26Nai mbu: «Kubinali, nábabura kwa mutányihonda bushi mwalólaa kwa bisomerano bya nàiraa. Si nyìshi kwa emikati era mwalyáa na mwêuta iyátuma mwányihonda bacha! 27Rero, muténdaa mwáchikorera ebiryo bya byénde byáamba, si mundaa mwákorera ebiryo bya byénde byêrisa, kanji binábaretere ekalamo ke'suku ne'mango. Ebyera byeke, bi biryo nyi Mwana we'Mundu* nyingáberesa. Bushi nyi Mwana we'Mundu*, Ongo Tata ányibikire kwe'kalorero mira ke'kulosa kwa atúla ànyilangalire.»

28Chasinda, bera kubusa Yesu mbu: «Rero, chi tuíraa, tukole emirimo era Ongo atúla asímire?» 29Nai mbu: «Emulimo ola Ongo áhonda i'yono: Munyêmereraa mwa michima yenyu nyono nyi yeine átumaa.»

30Bera kuhuba kumubusa mbu: «Chisomerano chichiye ùngaira netu mwa kulola ku'chi tukwêmerere? Rero, mwasi muchiye i'ùngaira? 31Bahokulu betu beke, mana #6:31 Amu mana, Ongo iwábaa wénjire wêresa'mo eBaisiraeli mwa buyeye, mábaa mahúhire nga mukati. mu béndee bálya mwa buyeye, kukulikana ngo'kwa Maanjiko Mabuya-buya matúla màtechire mbu: ‹Ábaa énjire áberesa emukati ola wátenga kwa nguba, chasiya bénde bálya'o.›#6:31 Somaa Kutenga 16:4; Saburi 78:24. »

32Yesu nai mbu: «Kubinali, nábabura kwa oyu mukati wéndee wátenga kwa nguba, atá Musa iwéndee wáberesa'o. Si emukati we'kunali, ola wátenga kwa nguba, Tata iwénjire wáberesa'o. 33Bushi oyu mukati Ongo énde êresa ebandu, análi nyono nyínatengire kwa nguba, chasiya nyirétere ebandu bo'mwa butala ekalamo.» 34Bushi no'ku, bera kwire bámubura mbu: «eWaliya! Oyu mukati, ùtangénde wátweresa'o esuku soshi!»

35Yesu kukwera kubabura mbu: «Nyono, nyi mukati we'kalamo. Akaba emundu àngabaha ene nyìri anányemerere mwa muchima wai, oyola atákachife businya, nesi châmi chiro na hicha.

36«Si ngo'kwa nanábaburaa: chiro angaba mwànyilolire'ko mira, si mùtanyêmerere mwa michima yenyu. 37Si chiro bacha, ebandu boshi ba Tata ányeresise, kuika bakánabaha era nyìri. Nabo, ndákabaume era butala chiro na hicha. 38Bushi cha chátumaa nátenga kwa nguba, kutábaa kuira ekuhonda kwanyi nyeine, si ekuhonda kwo'la wányitumaa. 39Ne'kuhonda kwo'yu wányitumaa, kuli kuteta mbu ndàesaa chiro na muuma mwa'ba ányeresise, si nyibômwole kwa lusuku lwe'businda. 40Kubinali, Tata ahónjire mbu chira mundu woshi ola ungányilola'ko nyi Mwana wai ne'kunyemerera mwa muchima wai, ábonaa ekalamo ke'suku ne'mango. Na kwa lusuku lwe'businda, nyikámwomola.»

41Rero bushi Yesu ábaa énjire áteta mbu i'mukati wátengaa kwa nguba, eBayuta bera kutangirisa kunde bámusibukira. 42Bera kwire bénde báteta mbu: «Ewashe! Ono mundu, kasi atá i'Yesu, mwenyi Yosefu? Si eshe na nyina tubêshi! Rero, kute era énjire áchitonga mbu kwa nguba ku átengaa?»

43Yesu era kubabura mbu: «Murékaa kunde mwásibukirana mwa kachi-kachi kenyu! 44Kutali ola ùngabaha ene nyìri, akaba Tata ola wányitumaa àtasa kumureta. No'la ùngabaha ene nyìri, nyikámwomola kwa lusuku lwe'businda.

45«Bushi bitúla byǎnjikirwe mwa bitabo bye'barebi* mbu: ‹Ebandu boshi, Ongo yeine i'ukábakangirisa.› #6:45 Somaa Isaya 54:13. Rero, chira mundu woshi ola wénde wômvirisa emyasi ya Tata, na kuitunda, oyola iwénde wábaha ene nyìri.

46«Ndàtechire mbu kuli mundu ola ùfuraa kulola ku Tata, kunyireka nyi nátengaa era atúla. Nyono nyeine oshâo nyi nera nyinámulorire'ko. 47Kubinali, nábabura kwa ola wànyêmerere mwa muchima wai, kuika ànábone ekalamo ke'suku ne'mango.

48«Nyono, nyi mukati we'kalamo. 49Abu bahokulu benyu, chiro àngaba mbu béndee bálya emana mwa buyeye*, kufa ku béndee bánafanga. 50Si oyu mukati wátengaa kwa nguba, weke akaba emundu àngalya'o, atákafe chiro na hicha. 51Rero oyu mukati we'kalamo ola wátengaa kwa nguba, àli nyono. Akaba emundu àngalya'o, àngaata ekalamo ke'suku ne'mango. Kanji oyu mukati nyingêresa ebandu, àli emubiri wanyi. No'yu mubiri, nyingâna'o chasiya ebandu bo'mwa butala babóne ekalamo.»

52Bushi no'ku, abu Bayuta kuna kutangirisa báenzanya ebwaka busese. Bera kuteta mbu: «Ono mundu, kute àngatwêresa emubiri wai mbu itwiraa twálya?»

53Yesu kukwera kubabura mbu: «Kubinali, nábabura kwa akaba mùtangalya emubiri wanyi nyi Mwana we'Mundu*, na kumwa emikira yanyi, mùtangabona ekalamo ke'suku ne'mango. 54Ola wálya emubiri wanyi, na kumwa emikira yanyi, oyola yeke iwète aku kalamo. No'yu, i'nyikwômola kwa lusuku lwe'businda. 55Bushi emubiri wanyi, bináli biryo bya kanangana, ne'mikira yanyi nai, bináli bya kumwa bya kanangana. 56Bushi no'ku, ola ùngalya kwa mubiri wanyi, na kumwa kwa mikira yanyi, oyola i'ungába mwa buuma nanyi, nanyi nánaba mwa buuma nai.

57«Tata iwányitumaa atúla muuma-uma, nanyi nyìri muuma-uma kwa buashi bwai. Rero kuno'ku ku ola wálya kwa mubiri wanyi nai, angánaba muuma-uma kwa buashi bwanyi. 58Nyono nyi mukati wátengaa kwa nguba. No'yu mukati weke, atáli ngo'la bahokulu benyu béndee bálya mwa buyeye* ne'kunde báfanga. Si ono mukati, ola ùngalya'o, yeke angábona ekalamo ke'suku ne'mango.»

59Ei myasi yoshi, Yesu átetaa'i mango ábaa ákangirisa ebandu mwa bushenge bwe'Bayuta*, mwa musi we'Kaperinaumu.

Banene mwa banafunzi ba Yesu bámureka

60Mango ebanafunzi* ba Yesu nabo bômvaa kwe'i myasi, banene mubo bera kutangirisa báteta mbu: «Aaye! Ene myasi ìkoochire busese! Kutali ola ùngaala kwêmerera'i.»

61Unao-unao, Yesu era kumenyerera kwa abu banafunzi* bai bénjire básibuka bushi ne'bi. Bushi no'ku, era kwire ábabusa mbu: «Ene myasi, yabálumire kwa muchima? 62Rero, kute ku bingába mango mungálola kwa nyi Mwana we'Mundu* nérukira kanji era nábaa nyitúla?

63«Muményereraa kwe'mundu yeine àtangachialira kandu. Si eMuchima Mubuya-buya iwénde wâna ekalamo. Ei myasi nàbabwirire, iri ye'Muchima Mubuya-buya, kanji iyénde yâna ekalamo.

64«Si chiro bacha, bauma mu mwabo bàtanasa kunyemerera mwa michima yabo.» Yesu átetaa bacha bushi ábaa anêshi kutengera mira ba bábaa bàtasa kumwemerera. Kanji ábaa anêshi no'la ukámurenganya.

65Yesu era kuhuba kuteta mbu: «Echera chi chátumaa nábabura kwa kutáli ola ùngabaha ene nyìri, akaba atá Tata iwàmwêresise obu buashi.»

66Rero, kutengera amu mango, banene mwa banafunzi* bai bera kumureka na báchienderanga. Chiro bákende bánachimukulikira. 67Bushi no'ku, Yesu era kwire ábusa endumwa* sai ekumi ne'biri mbu: «Ewashe! Nenyu mwa kunyireka mu munáli?»

68Simoni Petero era kumwǎkula mbu: «Enawetu, era mwande yi tùngachiya kanji? Si woyo, u'wète emyasi era yénde yâna ekalamo ke'suku ne'mango! 69Tubano twemérere mira, kanji tunêshi kanangana kwa woyo una Mubuya-buya, ola Ongo átumire.»

70Yesu nai mbu: «Ewashe! Si nyono nyeine nyinábalondolaa kwa munáli ekumi na babiri! Si chiro bacha, muuma mu mwabo àli musimu!»

71Yesu átetaa bacha bushi na Yuta, mwenyi Simoni Isikariyota. Oyu Yuta, chiro àngaba mbu ábaa muuma mwa ndumwa* ekumi ne'biri sa Yesu, si iwábaa ungánamurenganya.

Currently Selected:

Yowani 6: tbt

Highlight

Copy