Yowani 5

Yesu álamya echirema kwa chitomu che'Betesaita

1Era nyuma se'bi, Yesu era kwérukira mwa musi we'Yerusalemu, áye kwa lusuku lukulu lwe'Bayuta. 2Mwo'yu musi, mwábaa mutúla chitomu chiuma cha béndee bérika mwa Chieburaniya mbu: «Betesaita.» Echi chitomu, chitúla ofu ne'chiso cha chérikirwe mbu: «Chiso cha mbuli.» Kanji echi chitomu, chitúla chìsungwirwe na bisusu bitano. 3Mwe'bi bisusu, mwábaa mùli balwala banene bàchilambikirange kwa mikeka. Mubo, mwábaa mùli bauta, na ba baremere ebihando, na ba bábaa bàremere enungo. [Abu balwala, béndee bálinjira emeshi me'chitomu malíngitanyisibwe, 4bushi malaika* muuma wa Ongo ábaa énjire ândaalira mumo chira chihangi na álingitanya'mo. Mwa kuba era àmalingitanyaa, emulwala ola wéndee wátangira kwândaalira'mo, iwéndee wánalama emalwala mai moshi.]

5Kwe'chi chitomu, kwábaa kuli mundu muuma ola wábaa wamála myaka mahatu na munane álibuka ne'bulwala. 6Mango Yesu ámulolaa'ko àli kwa mukeka, era kumenyerera kwa àmala suku sinene álibuka no'bu bulwala. Bushi no'ku, era kumubusa mbu: «Ewashe! Wáhonda uláme?» 7Nai mbu: «eWaliya! Mango emeshi me'chitomu ménde málingitanyisibwa nyeke nénde náina emundu ola ùnganyândaasisa mumo. Na mango nénde náereka kwândalira'mo, unao-unao unji mundu ánanyitangira.» 8Yesu kukwera kumubura mbu: «Bàtukaa utóle emukeka wao unáende.»

9Unao-unao, ola mulwala kuna kulama, kuna kutola emukeka wai, na átangirisa áenda. Rero, elusuku ebyera byábaa, lwábaa lusuku lwa Sabato*. 10Bushi no'ku, eBayuta bera kubura oyu mundu wálamisibwaa mbu: «Era! Si lwarero lùli lusuku lwa Sabato*, ne'Mwaso* wetu àtemerere mbu wěkaa oyu mukeka wao!» 11Nai mbu: «Ola wànyilamyaa, iwànyiburaa mbu nyitólaa emukeka wanyi nyináende.»

12Chasinda, abu Bayuta bera kuhuba kumubusa mbu: «Ola wakúburaa mbu utólaa emukeka wao, unáende i'nde?» 13Si oyu mundu, atámenyaa nde iwàmulamise, bushi Yesu ábaa era àereraa mwa luamba lwe'bandu ba bábaa bàli aola.

14Era nyuma se'bi, Yesu era kubuana ola mundu mwa Luhu lwa Ongo*. Era kumubura mbu: «E mwira wanyi! Si uséne kwa walámire! Rero, si ùtachiereresaa wáira mabi, ungésha kulola ku malio ma marenzise ma wabáa wéte.»

15Oyu mundu, era kutenga aola na áya kubura ba Bayuta mbu Yesu iwàmulamyaa. 16Rero bushi Yesu áiraa ei myasi elusuku lwe'Sabato*, eBayuta bera kutangirisa bámulibusa. 17Si Yesu era kubabura mbu: «Tata, kukola ku anáchiri ákola kuikira lwarero. Rero, nanyi kukola ku nánakola.»

18Bushi no'ku, abu Bayuta bera kuhonda enjira soshi se'kwîta Yesu. Byábaa bacha, atá bushi ne'kutatunda elusuku lwe'Sabato* oshâo, si bushi kanji éndee áchiringamanya na Ongo mwa kunde áchitonga mbu Ongo atúla Eshe.

Ebuashi bwe'Mwana wa Ongo

19Chasinda, Yesu era kuhuba kubura abu Bayuta mbu: «Kubinali, nábabura kwa nyono nyi Mwana wa Ongo, kutáli kandu kasibya ka nyìngaala kuira kwa kuhonda kwanyi nyeine. Si bya nyiséne kwa Tata áira, bi nanyi nénjire nánaira. Bushi choshi cha Tata énde áira, chi nanyi nyi Mwana wai nénjire nánaira. 20Oku Tata atúla ànyisimire nyi Mwana wai, énde ányilosa byoshi bye'nde áira. Kanji àchiri akányilosa na myasi inene kurenza ene muséne'ko, kuikira kwa chihangi mukásanwa busese. 21Rero ngo'kwa Tata énde ômwola ebafu, na báhuba kuba bauma-uma, kuno'ku ku nyi Mwana wai nanyi, nyingêresa ekalamo ba nyisímire kwêresa'ko. 22Kanji kutáli chiro na mundu asibya ola Tata áchinjibusise, si ebuashi boshi bwe'kuchinjibusa ebandu, nyono nyi Mwana wai nyi êresise'bo mira, 23chasiya ebandu boshi bénde bányitunda, ngo'kwa batúla banámutunjire. Bushi no'ku, ola ùtanyitunjire nyi Mwana, eri àtatunjire na Tata bushi iwányitumaa.

24«Kubinali, nábabura kwa ola ùngomva emyasi yanyi, na kwêmerera ola wányitumaa, oyola iukábona ekalamo ke'suku ne'mango. Kanji yeke atákachichinjibusibwe, si àfufumikire elufu na ábona ekalamo. 25Kanji kubinali, nábabura kwa elusuku lungáika, lwàikire na mira, lwa bafu bàngômva emurenge wanyi nyi Mwana wa Ongo. Na ba bàngômva'o bangábona ekalamo. 26Bushi ngo'kwa Tata atúsa ebuashi bwe'kwana aku kalamo, kuno'ku ku nanyi ányeresise nyi Mwana wai ebuashi bwe'kwâna'ko. 27Kanji ebuashi bwe'kuchinjibusa ebandu, nyono nyi Mwana wai nyi êresise'bo, bushi nyi Mwana we'Mundu*.

28«Mùtasanwaa bushi ne'ne'myasi, bushi ebihangi bingáika bya bandu boshi ba bàli mwa shinda, bangaômva kwa murenge wanyi, 29na bômwoka. Ba béndee báira emabuya mubo bangábona ekalamo. Si ba béndee báira emabi beke, kuchinjibusibwa ku bakáchinjibusibwa.»

Ebandu báteta era luulu se'buashi bwa Yesu

30«Nyono kutáli cha nyingáira kwa kuhonda kwanyi nyeine. Ne'kuchinjibusa ebandu nako, nénde nánaira'ko ngo'kwa Tata ànyibwirire. Bushi no'ku, obu buchinjibusi bwanyi bunátula bwa kanangana, bushi ndàira ekuhonda kwanyi, si nénde náira ekuhonda kwo'la wányitumaa.

31«Rero, akaba nyingénjire náteta era luulu sanyi nyeine, ei myasi nénjire náteta itangénjire yánaba ya kanangana. 32Si kuli unji ola wénjire wáteta emyasi era eshi era luulu sanyi, bushi nyinéshi kwe'i myasi ináli ya kanangana.

33«Anabe mango mwàtumaa ebandu era mwa Yowani#5:33 Anola bàhambere era luulu sa Yowani Mubatisayi. Somaa 1:19., emyasi era àtetaa era luulu sanyi yanábaa ya kanangana. 34Kuta kuteta mbu nyìlaire ku mundu ola wáteta era luulu sanyi, si nénjire nábabura ene myasi chasiya munúnulibwe. 35Yowani ábaa àli nga tara lya lyákorera chasiya lilómekere ebandu. No'bu bulangare bwai, mwabo mwera kunamoera'bo ku bihangi bieke oshâo. 36Si chiro bacha, nyéte inji myasi era yénjire yáteta era luulu sanyi. Ne'i myasi irenzise era Yowani átetaa. Bushi Tata ányibikire mwa mulimo mira chasiya nyimalirise'o. Ne'bya nénjire náira bi byénjire byálosa kanangana kwa iwánanyitumaa.

37«Rero oku Tata iwányitumaa, nai énjire ánateta era luulu sanyi kanangana. Si emurenge wai i'mùtafuraa kûmva'ko chiro ne'uma. Kanji mùtafuraa kulola kwa atúla ahúhire. 38Ne'Chinwa chai, chiténjire chásimika mwa michima yenyu, bushi muténjire mwányemerera mwa michima yenyu nyi átumaa. 39Mutúsa bushiru ngachi mwa kunde mwáchikangirisa eMaanjiko Mabuya-buya, bushi mwénde mwáanyisa mbu mwe'bi mu mungábonera ekalamo ke'suku ne'mango. Rero, muményereraa kwa amu Maanjiko Mabuya-buya, mu ménjire mateta era luulu sanyi! 40Si chiro bacha, muténjire mwáhonda kubaha era nyìri, mubóne ekalamo.

41«Nyono, ndáhonda mbu ebandu béndaa bányitonga. 42Si mwabo, nyitúla nyibêshi kubuya! Kanji nyìshi kwa mùtatula musimire Ongo. 43Nyono nàbahire kwe'sina lya Tata, si mwabo mutáhonda kunyihuukasa. Si akaba unji mundu iwàbahire kwe'sina lyai yeine, yeke kuika munámuhûkase. 44Mwabo mutúla musimire kunde mwêresanya etunda, si mùtahonda kubona etunda lya lyátenga era mwa Ongo yeine. Rero, kute mungáala kwêmerera mwa michima yenyu?

45«Mùtachichingaa mbu nyi nyingábasitaka era mwa Tata. Ola ungábasitaka àli Musa, bushi imutúla mulángalire! 46Akaba mutúla mwemérere Musa, nanyi mùngananyemerere, bushi emyasi era áanjikaa itúla ìtechire era luulu sanyi. 47Si akaba muténjire mwêmerera bya Musa áanjikaa, rero kute mungêmerera emyasi era nénjire náteta?»

Currently Selected:

Yowani 5: tbt

Highlight

Copy