Yowani 4

Yesu áhambala ne'Musamariya-kasi

1Mwe'si suku, eBafarisayo* bera kûmva emwasi kwa Yesu yeke énjire ábona banafunzi* banene kurenza Yowani, énjire ánabatisa'bo. 2(Si chiro bacha, Yesu yeine ábaa àtenjire ábatisa abu bandu, si ebanafunzi* bai bu bábaa bénjire bábatisa'bo.)

3Mango Yesu ômvaa kwo'yu mwasi, era kwire átenga eYuteya, na áhuba kanji eKalilaya. 4Mwa kuya'yi, byera kumwěma àrengere tanga mwa chio che'Samariya.

5Chasinda, era kuika ku kamusi kauma kwo'mwa chio che'Samariya, ka bénde bérika mbu Sikari. Aku ke'musi, katúla ofu ne'hwa lya Yakobo êresaa muala wai Yosefu.#4:5 Somaa Ndangiriso 33:19. 6Mwe'chi chisiki, Yakobo áchimaa mu'chitomu. Yesu áikire kwe'chi chitomu, era kwíkala kwa musike sachi bushi ábaa atámire busese. Kanji sábaa sáhonda kuba saa ndatu sa mushi. 7-8Mwe'chi chihangi, ebanafunzi* bai bábaa bera bayáa mwa musi kuula ebiryo.

Kwe'chi chitomu, kwera kuika Musamariya-kasi muuma áya kufoma. Yesu ámulolire'ko, era kumubura mbu: «Unyêresaa kwa meshi nyímwe.» 9Oyu mukasi nai mbu: «Ewashe! Woyo u'Muyuta, nanyi nyi Musamariya-kasi, kute ùngananyěma meshi me'kumwa?» Átetaa bacha, bushi eBayuta bábaa bàtalira ala'uma ne'Basamariya*.

10Yesu nai mbu: «Akaba ùngamenyire elwêmbo lwa Ongo énde âna, kanji akaba ùngamenyire ola wákwěma emeshi, u'ùngamwemire'mo, nai àngakwêresise emeshi ma ménde máreta ekalamo.»

11Ola mukasi nai mbu: «eWaliya, si utéte chikai cha kufoma'mo, na mwe'chine chitomu, emeshi màli era mubi busese! Rero, amu meshi ma ménde máreta ekalamo, ngai yi'ungére wámakula? 12Chine chitomu, hokulu wetu Yakobo iwátweresaa'chi. Kanji yeine ala'uma ne'bana bai, ne'bifuana byai bámwaa kwa meshi machi. Rero, woyo wáanyisa mbu uwera ùrenzise Yakobo?» 13Yesu nai mbu: «Chira mundu woshi ola wénde wámwa kwa mano meshi, àchiri akáfa châmi, 14si ola wàmwere kwa meshi ma nyingámweresa, yeke atákachife châmi chiro na hicha. Bushi amu meshi, mangába nga shokororo mwa ndanda sai, na mu mangámweresa ekalamo ke'suku ne'mango.» 15Oyu mukasi, era kubura Yesu mbu: «eWaliya! Unyêresaa kwa'mu meshi, chasiya sindachífaa châmi. Aola, ndákachiike kwe'chine chitomu kufoma emeshi kanji.»

16Yesu kukwera kumubura mbu: «Uyáa kwâmala ebalo, ubáhe nai anola.» 17Ola mukasi mbu: «Si ndatúsa mulume!» Yesu era kumubura mbu: «Ekuteta kwa ùtatusa mulume, wǎkwire kubuya, 18bushi wàba na balume batano, no'yu ùli nai lwarero chiro atá ne'ba wao. Rero ebi wàtechire, bináli bya kanangana.»

19Chasinda, oyu mukasi era kwire ábura Yesu mbu: «eWaliya! Nalólire mira kwa unáli murebi*. 20Bahokulu betu bábaa bénjire bêrera Ongo kwe'ne ndulungu. Si mu Bayuta mubeke, mwénde mwáteta mbu twěmire kunde twáya kwêrera Ongo eYerusalemu.» 21Yesu nai mbu: «E mama! Ene myasi nákubura iwěmereraa: mwa suku sěshire, ábe kwe'ne ndulungu nesi eYerusalemu, atá yi'mukénde mwêrera Tata. 22Mu Basamariya*, mwénde mwêra bya mùteshi. Si tu Bayuta, tubeke twénde twêra bya twìshi, bushi ebununusi ku tubano ku butúla bushokire.

23«Si esuku sěshire, saíkire na mira, ba bénde bêra Tata kanangana, bangénde bámwera kwa njira ye'Muchima Mubuya-buya no'mwa myasi ye'kanangana. mwabacha, ba bàli nga'bo, bu Tata áhonda. 24Rero, oku Ongo atúla Muchima Mubuya-buya, byěmire ne'bandu ba bénde bámwera, bàmwêre kurengera eMuchima Mubuya-buya, no'mwa myasi ye'kanangana.»

25Oyu mukasi, era kubura Yesu mbu: «Nyono nyìshi kwa Masiya*, ola bénde bérika mbu Kirisito*, achíri akábaha. Na mango akáika, mu mango akátubura ei myasi yoshi.» 26Yesu nai mbu: «Rero oyu wâmana i'nyono nyi náhambala nao!»

Basamariya banene bémerera Yesu

27Mwe'chi chihangi chine'chi, ba banafunzi* ba Yesu bera kufuluka era báyaa mwa musi. Bámubuanyire áhambala no'yu mukasi, bera kusanwa busese. Si kutábaa chiro na muuma mubo, ola wáereresa ámubusa mbu chiye chi áhonda, nesi chi chátuma áhambala no'yu mukasi.

28Unao-unao, ola mukasi kuna kureka ereya lyai aola, na áfuluka mwa musi. Era kuya kubura ebandu mbu: 29«Ebêtu! Mubáhaa mulóle kwo'la wanyíbwirire byoshi bya naíraa. Ono mundu, àtanganaba i'Kirisito*?» 30Bushi no'ku, abu bandu bera kutenganga mwa musi na báya era Yesu ábaa àli.

31Mwe'chi chihangi, ebanafunzi* ba Yesu bera kumwěma busese mbu: «Mukangirisi! Ùngatangire kulya!» 32Si era kubǎkula mbu: «Nyéte ebiryo bye'kulya, si mwabo mùtabîshi!» 33Bômvire bacha, bera kutangirisa bábusanya mbu: «Ewashe! Eri kuli mundu ola wamúreterere ebiryo mira?» 34Yesu era kubabura mbu: «Ebiryo byanyi, kuli kuira ekuhonda kwo'la wányitumaa na kumalirisa emulimo ola ányeresaa. 35Si mu mwénde mwáteta mbu: ‹Myesi ene oshâo ye'myaka yénde yánaira mwa chitaka na twáishebula.› Si nyono, chechine chi nábabura: musúngusaa emeho mwe'hwa! Emyaka yeríre mira, kushebula'i ku kwanashiba. 36Ola wáshebula, àbonyire elwêmbo lwai. Kanji kulunda ku énjire ánalunda-lunda ebandu nga myaka babóne ekalamo ke'suku ne'mango. Rero aola, emuinzi no'la wáshebula bánamoera ala'uma. 37Kubinali kwa bénde báteta mbu: ‹Muuma énde áinga, ne'unji ánashebula.› 38Rero nenyu, nabátumaa kuya kushebula emyaka era mùtakoreraa. Ei myaka, banji bandu bu báshikiraa'i endubano, si mwabo mu mwera mwálya emutoloke we'tamo lyabo.»

39Mwo'yu musi we'Sikari, emyasi era oyu mukasi átetaa yera kutuma Basamariya* banene bêmerera Yesu mwa michima yabo. Bushi ábaburaa mbu: «Ono mundu anyíbwirire mira byoshi bya nàiraa.»

40Mango abu Basamariya* bábaa bera baíkaa ala Yesu ábaa àli, bera kumwěma busese mbu abéraa ala'uma nabo. Era kwire ámala suku ebiri eyera. 41Rero bushi ne'myasi era Yesu yeine ábaa áteta, banji bandu banene nabo, bera kumwemerera mwa michima yabo. 42Bera kubura oyu mukasi mbu: «Atá emyasi watúburaa yeine oshâo iyatúmire twámwemerera. Si twàmwêmerere bushi twàchûmvirire tubeine emyasi yai. Kanji tunêshi kanangana kwo'no mundu, i'na Mununusi* we'butala.»

Yesu álamya mwana wa mukungu muuma

43Mango Yesu ábaa era àmalaa esi suku ebiri, era kutenga mwo'yu musi na áya eKalilaya. 44Byábaa bacha, bushi yeine ábaa àtechire mira kwe'murebi* àteresibwa etunda mwa chio chabo.

45Mango Yesu áikaa eKalilaya, besha'yi bera kumuhuukasa kubuya. Bushi nabo mango báyaa eYerusalemu kwa lusuku lukulu lwe'Pasaka*, báchiloreraa kwa myasi yoshi era áiraa'yi.

46Chasinda, Yesu era kuhuba kanji mwa musi we'Kana, mwa chio che'Kalilaya. Mwo'yu musi, mu ábindulaa emeshi kuba tifai. Omola, mwábaa mutúla mukungu muuma wa mwami. Oyu mukungu, muala wai ábaa álakira mwa musi we'Kaperinaumu.

47Oyu mukungu, mango ômvaa kwa Yesu aíkire eKalilaya mira, átengera eYuteya era kuya era ábaa àli. Era kumwěma busese mbu ǎndaliraa eKaperinaumu, áye kulamya muala wai, bushi ábaa áhonda kutowa emuchima.

48Yesu kukwera kumubura mbu: «Mwabo mùtemerera, mutasa kulola ku'bisomerano!» 49Oyu mukungu nai mbu: «Enawetu! Wǎndaliraa ala mwanyi, kuno emwana wanyi àtasa kutowa emuchima.» 50Yesu nai mbu: «Fùlukaa kwa wao, emwana wao alámire mira.»

Oyu mukungu, era kwêmerera emyasi era Yesu àmuburaa. Chasinda, era kuchiuma. 51Ábere anáchiri mwa njira ândalira kwa wai, ebakosi bai bera kubaha kumulinjira na bámubura mbu: «Waliya! Emwana alámire mira!» 52Era kubabusa mbu: «Era! Emwana alámaa mu'bihangi bichiye?» Nabo mbu: «Alámaa ehushira mwe'olo, mwa saa erinda se'mushi.»

53Unao-unao, eshe wo'yu mwana era kukengera kwa mwe'chi chihangi mu Yesu anámuburaa mbu emwana wai alámire. Bushi no'ku, yeine ala'uma na besha mwa mwai boshi, bera kwêmerera Yesu mwa michima yabo.

54Echera chi chábaa chisomerano cha kabiri cha Yesu áiraa eKalilaya mango ábaa era àtengaa eYuteya.

Currently Selected:

Yowani 4: tbt

Highlight

Copy