Yowani 14

Yesu i'njira ye'kuya era mwa Tata

1Yesu era kubura ebanafunzi* bai mbu: «Muténdaa mwáchiribusa mwa michima yenyu. Mundaa mwêmerera Ongo, nanyi mwánende mwányemerera mwa michima yenyu. 2Mwa nyumba ya Tata, mutúla bisiki binene. Akaba bìtangabere bacha, ndàngababwirire mbu náya kubakunganyisa echisiki cha mukábera'mo. 3Na akaba nyingáya kubakunganyisa chi, nyikáhuba kubaha nyibátole, chasiya echisiki cha nyikába'mo, nenyu múbe muchi. 4Ne'yi nyingáya, mwìshi enjira ye'kuya'yi.»

5Mwo'lu, Tomasi era kubusa Yesu mbu: «Enawetu, si eyi ungáya, tubeke tùteshi'yi! Rero, enjira ye'kuya'yi, kute tungére twáimenya?» 6Yesu nai mbu: «Nyono nyi njira, kanji nyi kanangana, kanji nyi kalamo! Kutali ola ùngaala kuika era mwa Tata, busira kunyirèngera'ko. 7Akaba mùnganyimenyire, mùngamenyire na Tata. Rero, kutengera lwarero mwàmumenyire, mwanámulolire'ko!»

8Firipo nai era kubura Yesu mbu: «Enawetu, ùtulósaa Tata, chasiya emichima yetu ibámbatale mwa bula.» 9Yesu nai mbu: «Era Firipo! Si suku sinene sine nyìri ala'uma nenyu, ùtanafuraa kunyimenyerera kuikira lwarero? Ola wànyilolire'ko, eri àlolire na ku Tata! Rero, kute uchíri wáteta kanji mbu nyìbalosaa Tata? 10Woyo ùtemerere kwa nyitúla mwa ndanda sa Tata, na Tata mwa ndanda sanyi?

«Bushi no'ku, emyasi era nénjire nábabura, ìtatenganyire nanyi nyeine, si Tata ola utúla mwa ndanda sanyi, iwénjire wákola emirimo yai. 11Ene myasi nàbabwirie kwa nyitúla mwa ndanda sa Tata na Tata mwa ndanda sanyi, mwěmereraa'i. Nesi mulúmbaa mwànyêmerere kukulikana na bya nénjire náira.

12«Kubinali, nábabura kwa ola unyêmerere woshi, nai angénde ánaira bya nénjire náira. Kanji yeke, angénde áira na binene kurenza bya nénjire náira, bushi nera náya era mwa Tata. 13Kanji byoshi bya mungénde mwéma kwe'sina lyanyi, nyingénde nánabiira, chasiya Tata énde áya ngulu kunyirengera nyi Mwana wai. 14Kubinali, choshi cha mungénde mwányěma kwe'sina lyanyi, nyingénde nánabairira'chi.

Yesu álaanya endumwa sai eMuchima Mubuya-buya

15«Akaba mutúla munyisimire, mungénde mwátunda ne'miomba* yanyi. 16Nanyi, nyingéma Tata abêrese eunji ola ungénde wábaasa, na kuendekera kuba ala'uma nenyu esuku soshi. 17Oyola, i'Muchima we'kanangana. Ebandu bo'mwa butala, bàtangaala kumuhuukasa, bushi bàtatula bàmusene'ko, kanji bàtatula bàmwîshi. Si mwabo, mumwîshi bushi atúla ala'uma nenyu, kanji akánalinda anátula mwa ndanda senyu.

18«Ndábareke nga fusi, si nyikábaha kanji ene mùli. 19Era nyuma sa suku sieke, ebandu bo'muno butala batáchinyilole'ko, si mwabo mubeke mungénde mwányilola'ko. Rero, bushi nyìri muuma-uma, nenyu mungánaba bauma-uma. 20Mwe'si suku, mu mungére mwámenyerera kanangana kwa nyitúla mwa ndanda sa Tata, nenyu mwa ndanda sanyi, nanyi mwa ndanda senyu.

21«Ola wèmerere emiomba* yanyi, na kunde átunda'i, oyola i'ùnyisimire. Ola unyísimire, i'Tata nai angásima ngachi. Nanyi, nyingánamusima, kanji nyikénde náchilosa kui.»

22Mwo'lu, Yuta (si atá Yuta Isikariyota) era kubusa Yesu mbu: «Enawetu, chi chìngatuma ku tubano ku ungánachilosa oshâo, si utáchilose kwa banji bandu bo'muno butala?» 23Yesu nai mbu: «Akaba emundu ànyisimire, kuika anátunde emyasi yanyi. Oyu mundu, Tata angámusima, aola nyono na Tata tungáya kubera ala'uma nai. 24Si ola ùtanyisimire yeke, emyasi yanyi nai àtanganaitunda. Ne'ne myasi nábabura, itá yanyi nyeine, si ìri ya Tata ola wányitumaa.

25«Ei myasi yoshi, nàbabwirire'i, kuno nyichíri ala'uma nenyu. 26Si kwe'sina lyanyi ku Tata àngábatumira eMuchima Mubuya-buya. No'yu Muchima Mubuya-buya i'ungénde wábaasa, na kunde ábakangirisa byoshi. Na chira mwasi woshi nábaburaa, akénde ánabakengesa'o.

27«Nàbarekere ebôlo. No'bu bôlo, nyínabêresise'bo. Kanji butáli ngo'bwa bandu bo'muno butala bénde bâna. Bushi no'ku, muténdaa mwáchichiribusa mwa michima yenyu, nesi mwáchobaa. 28Si mòmvire kwa nábabura kwa nyingáenda, no'kwa nyingáfuluka kanji ene mùli. Rero akaba mwabáa munyisimire, mùngamoire mwa kûmva kwa nyingáya era mwa Tata, bushi i'mukulu-kulu ku nyono. 29Ei myasi yoshi, nàbabwirire'i era muhondo íbe, chasiya mango ingáberera, munyêmerere mwa michima yenyu. 30Ndáchihambale nenyu inji myasi inene, bushi emwami wo'buno butala àbahire. Si chiro bacha, atéte buashi busibya ku nyono. 31Si byěmire ebandu bo'mwa butala baménye kwa nyitúla nyisímire Tata, na bya ányitumaa, bi nénjire nánaira.

«Rero, mubatukaa tuténge anola.»

Currently Selected:

Yowani 14: tbt

Highlight

Copy