Yowani 15

Yesu i'muchi we'musabibu we'kanangana

1«Nyono nyi muchi we'musabibu* we'kanangana, na Tata i'muinzi. 2Na akaba kuli etabi lya lìnyimerire'ko, si lìteka bifuma, kuika anáishe'li. Si lya lyénde lyêka ebifuma, lyeke énde álihabulira#15:2 Kuhabulira: Mwa Chikiriki kukuteta mbu kukomya. chasiya lyěke bifuma binene busese. 3Rero nenyu, emyasi era nénjire nábabura iyénjire yátuma mwákomisibwa*. 4Muéndekeraa kuba mwa ndanda sanyi, ngo'kwa nanyi nyitúla mwa ndanda senyu. Bushi etabi lye'musabibu*, lìtangaala kwéka bifuma lyeine, akaba litáli kwo'yu muchi we'musabibu*. Rero nenyu mùtangaala kwéka chiro na chifuma chisibya akaba mutáli mwa ndanda sanyi.

5«Nyono nyi muchi we'musabibu*, nenyu mu matabi. Ola wáendekera kuba mwa ndanda sanyi, nanyi nába mwa ndanda sai, oyola iwénde wêka bifuma binene. Si busira nyono, mùtangaala kuira kandu kasibya. 6Na akaba emundu àtangaéndekera kuba mwa ndanda sanyi, kuika anáumwe era butala. Aola, ánaba nge'tabi lya bàkabulaa, na lyôma. Ne'matabi ma mòmire, kumalunda-lunda ku bénde bámalunda-lunda, na bámauma mwa muliro, chasinda mánasirera.

7«Si akaba mùnganaendekera mwába mwa ndanda sanyi, ne'myasi yanyi yáendekera yába mwa michima yenyu, aola mwera mùnganema Tata choshi cha muhónjire, ànaberese'chi. 8Akaba mùngeka bifuma binene, Tata àngaya ngulu busese. Ne'chi chi chìngatuma mwámenyeka kanangana kwa munáli banafunzi* banyi.

9«Kwa Tata atúla ànyisimire, ku nanyi nyinátula nyibasimire. Rero mwe'i nzii yanyi, mu munáendekera kuba. 10Akaba mùngatunda emiomba* yanyi, mukánaendekera kuba mwe'i nzii yanyi, ngo'kwa nanyi nyitúla nyìtunjire emiomba* ya Tata, ne'kuendekera kuba mwa nzii yai. 11Ei myasi yoshi, nàbabwirire'i, chasiya elumoo lwanyi luéndekere kuba, kanji lunábe lunene busese.

12«Rero, emuomba* ola nàbêresise i'yono: Mundaa mwásimana, ngo'kwa nanyi nyitúla nyibasimire. 13Kutali mundu ola wète nzii inene kurenza ola wêmerera kwâna ekalamo kai bushi na bera bai. 14Rero, mwabo mùli bera banyi, akaba mùngaira bya nàbabwirire. 15Ndàngachiberika mbu mùli baanda, bushi emuanda àtamenya bya enawabo áira. Si mwabo, nera náběrika bera banyi. Bushi byoshi bya Tata ányikangaa, nenyu nàbalosise'bi mira. 16Mwabo atá mumwányilondolaa, si nyono nyínabalondolaa, nera kubabura mbu muéndaa, mwěke ne'bifuma bya bitákawe. Bushi no'ku, choshi cha mungénde mwéma Tata kwe'sina lyanyi, angénde ánaberesa'chi. 17Emuomba* nàbêresise i'yôno: Mundaa mwásimana.»

Ebandu bo'mwa butala bakáhomba ebanafunzi ba Yesu

18Kanji Yesu era kuteta mbu: «Akaba ebandu bo'mwa butala babáhombire, muményereraa kwa nyono nyi bátangiraa kuhomba. 19Akaba nenyu mùngabere bandu bo'muno butala, besha'mo bàngabasimire nga banyakabo. Si mwabo, nábalondwere mira ne'kubakula mwa kachi-kachi kabo. Rero echera chi chénde chátuma bábahomba, bushi mùtachitula nabo.

20«Mundaa mwákengera cha chinwa nabáburaa mbu: ‹Emuanda àtarenzise enawabo.› Rero, akaba bànyiribusaa kuika nenyu banábalibuse. Kanji akaba bàtundaa emyasi era néndee nákangirisa, kuika banátunde ne'yenyu. 21Bangénde bábalibusa bacha bushi nanyi, kanji bushi bàteshi ola wányitumaa. 22Akaba nyeine ndàikaa kuhambala nabo, bàtangaachire chibi chisibya. Si rero, bàtachete cha chìngatuma báchǎkana mbu batéte chibi.

23«Ola unyíhombire, eri àhombire na Tata. 24Akaba ndangénjire náira bisomerano mwa kachi-kachi kabo, bya bìtafuraa kuiribwa na unji mundu, bàtangaachire chibi. Si rero, beine bàchilorere kubi, si chiro bacha banáchiri bànyihombire, bánahomba na Tata. 25Si byàbere bacha, chasiya cha chinwa chibérere, cha chitúla chǎnjikirwe mwa mwaso wabo mbu: ‹Bányihomberaa buha.›»#15:25 Somaa Saburi 35:19; 69:5.

26Chasinjire Yesu kukwera kubabura mbu: «Nyingábatumira eMuchima we'kanangana, ola ukénde wábaasa. Oyola angátengera era mwa Tata. Na mango angáika, i'ukénde wáteta binene bya eshi era luulu sanyi. 27Anabe nenyu, mungénde mwáhambala bya mwìshi era luulu sanyi, bushi mu mutúla ala'uma nanyi kutengera endangiriso.»

Currently Selected:

Yowani 15: tbt

Highlight

Copy