Nuk 24

Nɛnyimi ka nɛku

1Ka kɛ ɛfrusu wiri wiri ka mgbɔghamba ɛfo ka asɛ, abakaa ba amu ka ɛnam ka nsɔnɔ nɛsan yi abɔɔ atoŋo. 2Ára yɛ si ami biŋi netan ni ɛbɨno ɛnam, 3ka nden yi animɛ ka ɛnam, arɛ kpɛyɛ ɛku Jisɛs. 4Ɛsika atere na atub ɛku Jisɛs ji arɛ kpɛyɛ, ára yɛɛ anɛ abaa ba ayɔbɔ abɔ́ ya ayɨgha wusi nsan ka ayim akpere abɔɔ. 5Ka ɛkub, abakaa ba ára jibɛ bɛsi ka nse, ka abanom ba atɔ abɔɔ si “Ɛgbɔnaŋ ka ɛsɛbɛ nɛa mber ka ɛbɨŋɔ akuanɛ? 6Jisɛs mfa arem; ami nyimi ka nɛku! Ba gbɔnter ji atɔ war ka nden yi yɛ akpɨgha áre ka nɨrɛ ka Ganini: 7‘Atere abɔɔ ji Jisɛs arɨgha si asighi sighi, mɔanɛ yɔ Ɛsɔwɔ akɨno akɛ ba ane abibi afɛm, akoɛ ka ɛte, ka ɛnumu afo asaa yɛ afɛnɛ anyimi.’ ” 8Ka abakaa ba agbɔntera ntɔrɔ yi Jisɛs atɔ́ abɔɔ.

9Nden yi abakaa ba ami tam ka ɛnam akru, atɔrɔ kpakpa ji abɔɔ ayɛ afɨna yɨghɔyɔk atɔ asɔgba Jisɛs wobo ka ɛwi ba asaa, ka anɛ ba ajɔnɔ fa. 10Abakaa ba atɔrɔ nsɔn nyi atɔ asɔgba Jisɛs ajɔ́nɔ Meri Magdanin, Joana, Meri ji nnyɛ Jems, ka abakaa baga ba atɨma jɔn ka abɔɔ. 11Ka asɔgba árɛ tama ji abakaa ba atɔ abɔɔ, atubsi ɛka bi ɛjɔnɔ na nkɛmɛkɛmɛ ka atɔŋ abɔɔ. 12Pita kantiŋ yɔ atama ayimi abɛ amu ka ɛnam. Nden yi asi ka ɛnam, yɛ akuku afɛɛ si ayɛ ɛku Jisɛs ka ára yɛɛ ajaa mbɔɔ ya akɔ afuɛ ka nɔŋ kantiŋ, yɛ atam afɛnɛ ka nɔghɔ nɛtere ji ɛwɛmɛ.

Ka mbaa Emaus

13Ka ɛfobi fobi, asogba abaa ára mu ka ma njibɛ ji abɨŋi si Emaus ji ɛre main ɛssima ɔruna ka Jɛrusanɛm. 14Árag ka atɛm atub nsɔn yi ɛmi ru ka ɛjibɛ. 15Ɛsika ara tub ɛka na ka atɛm, Jisɛs mfɔnɔ ama kɔŋɔ abɔɔ ara jɛnnɛ ka abɔɔ; 16ka ánem abɔɔ yárɛ reŋe.

17Jisɛs abɔmɔ abɔɔ si “Ɛrigha jɛɛ ka ɛjennɛ ɛmughu?”

Abɔɔ asa ayimi, ajibɛ ɛsika ɛkubumfom ka ɛkpɔghɔsi. 18Nnɛ ɛwi ka ɛbɔŋɔ abɔɔ yɔ ane si Kɨnopas, abɔmɛ si “Wɔ kantiŋ yɔ ɔre njɛnannɛ ka Jɛrusanɛm yɔ arɛ gbɛrɛ nsɔn yi ɛmi wɛmɛ ka ɛjibɛ ka afo ya asiŋisiŋ?”

19“Bɨgha nsɔn?” Yɛ abɔmɔ.

“Atub Jisɛs ya aru ka Nasarɛt,” abɔɔ akpɛɛ. “Ájɔnɔ ɛsɔgba Ɛsɔwɔ yɔ abɛnɛ nɛyɔ ka ntɔrɔ ka jiku ji ane ka ámar Ɛsɔwɔ ka anɛ kpakpa. 20Ka ɛsika atona ba ɛjɔɔ Ɛsɔwɔ abrɛ ka aton ɛjibɛ atonɛ akɛ si ayon, akoɛ ka ɛte njaŋ ɛnɛ; 21ka war ɛkɨnoamar si yɛ ya abaa si ama nagha Isrɛn. Ji ɛga bib maŋ ɛre si mfɛm nyi aru ɛnɛ afo asaa. 22Ka kpɛnɛ fa, abakaa abrɛ bantiŋi ami nem bɛji ɛkpɔ war. Ámu ka ɛnam ka ɛfrusi nji 23ka arɛ yɛ ɛku ɛjɛ. Ábá ama tɔ war si ayɛ bɛsɔna-ateb Ɛsɔwɔ nna wusi ka amɨranjo ba arɨgha si Jisɛs áre mber. 24Ka atɛm bantiŋi amu ka ɛnam afɨna ayɛ kanakan ka abakaa arɨgha, ka abɔɔ arɛ yɛɛ Jisɛs.”

25Jisɛs atɔ abɔɔ, “Nnaŋ ka war ɛrɛ gbɔnter ɛkɨnoamar ka kpakpa nsɔn yi asɔgba Ɛsɔwɔ arɨgha! 26Ɛ́rɛjɔn si Kɨras atɔghɔ yɛ nɛyiri ka ɛtiŋitiŋi kasɔŋ anam ka negam ɛnɛ?” 27Ka jam ka Mosis ka asɔgba Ɛsɔwɔ kpakpa, Jisɛs ajibi atɔ abɔɔ ɛsika ntɔrɔ Ɛsɔwɔ kpakpa arɨgha atubɛ. 28Ɛsika Jisɛs ka asɔgba ayɛ akpere ɛjibɛ ji ara mughu, Jisɛs anem na wusi yɛ asiŋisiŋ. 29Ka abɔɔ agɔrɛ ka ɛtiŋitiŋi si, “Jɔn ka nɨrɛ si nɛgo ɛkpisi; ɛfo ɛkpi kan,” Ka Jisɛs atɔɔŋɔ ama sɨnɛ ka abɔɔ.

30Nden yi yɛ ajɔnɔ si anɛ ɛjonɛnɛghɛ ka abɔɔ, yɛ aton brɛd, akak njɔm akak Ɛsɔwɔ sam, akɨbɛ, ajam nɛkɛ abɔɔ. 31Ka ámar ajibi abɔɔ áreŋɛ, ka yɛ átara asig abɔɔ. 32Áfɨna abɔmɔ atɛm si, “Ɛrɛyɛ ka netem ɛrɛ ɛkoro war ɛsika ara jɛn ajibi ntɔrɔ Ɛsɔwɔ ya ayɛnɛ atɔ war ka mbaa?” 33Átam frifri afɛnɛ ka Jɛrusanɛm. Ama kɔŋɔ asɔgba wobo ka ɛwi kpɛnɛ ka anɛ baga ba agba ka mfo bi 34árɨgha si, “Ɛre ka ɛdidɨghɛ! Ntaa ami nyimi ka nɛku atɔŋɔ Samon ɛsika ára re maŋ ka nekpen.” 35Anɛ ba abaa atɨma atɔ anɛ ji ɛru ka mbaa ka ɛsika abɔɔ agbɛrɛ Jisɛs nden yi akɨbɛ bred.

Jisɛs atɨŋɔ ɛnɛ ka nji asɔgba abɛ

36Ɛsika asɔgba akpɨgha righarak atubɛ, Jisɛs mfɔnɔ abru ayimi ka ɛbɔŋɔ abɔɔ ka atɔ aboɔɔ si, “Nɛna ɛjɔn ɛkɛ war.”

37Mfom akub abɔɔ atubsi atere si ara yɛ nkuannɛ. 38Ka yɛ atɔ abɔɔ, “Mfom akubu war jɛ, ka ɛgbɔnaŋ ka ɛre ejo mfab ka ntem ɛnirɛ? 39Ba sɛŋɛ abɔ ka ajaa ayɨŋa. Mmefɔnɔ yɔ! Ba kɔmɔm abɔɔ war ɛyɛ; nkuannɛ arɨma bɛnɛ bɛji ka akab, ka mmɛ mkpekpe.”

40Nden yi yɛ ami tɔ abɔɔ nsɔn nyi, atɨŋɔ abɔɔ abɔ ka ajaa ayɛ. 41Ɛyɛbɛ netem ka ɛkpɔghɔ bɛji ji abɔɔ afɛnɛ ɛne abɔɔ áwaŋa nɛtama si yɛ yɔ, ka yɛ ára bɔmɔ abɔɔ sio “Ɛkpekpe ɛjonɛnɛghɛ ji ɛnɛghɛ mfa?” 42Abɔɔ akɛɛ nnya anab yi anáa, 43yɛ ataba anɛ́ ka ɛsiamar abɔɔ.

44Jisɛs atɔɔ abɔɔ, “Ji nna ji ntɔ war ka nden yi njɔnɔ ka nɨrɛ: Kpakpa nsɔn yi ayɛnɛ atubum ka nwɛr ajighi Mosis, Asɔgba Ɛsɔwɔ ka Nɛkɨgha Ɛsɔwɔ ɛwɛmɛ wɛmɛ.”

45Ka anem mfom ajibi abɔɔ agbɛrɛ Ntɔrɔ Ɛsɔwɔ yi awɛr nnya arɨgha. 46Afɛnɛ atɔ abɔɔ si “Ji ayɛnɛ ji nna: Kɨras ayɛ nɛyiri ka anyimi ajɔn ka nekpen ka nɛwɛmɛ nɛwɛmɛ ka ɛnumu afo asaa, 47ka ɛyaŋa nekpen ka nɛtɨmɛ asig war ka abibi afɛm yɔ ájɔ́nɔ ntɔra nɛkpɨne ka mbiŋ ɛyɛ atɔ ɛyiŋ jam ka Jɛrusanɛm. 48War asɔgba ɛmi yɛɛ ji ɛwɛmɛ kasɔŋ ɛtam ɛtɔ anɛ. 49Nkpi ma ntom Nɛfɛb Ɛsɔwɔ ni Nsɔjiŋa#24:49 árɨgha si akɛ war; ka ba tɨghɔ jɔn ka nna ɛjibɛ tɛtɛ Ɛsɔwɔ akɛ war nɛyɔ.”

Ákɔ Jisɛs amu ka bɛsɔ

50Ka nden yi aru ka abɔɔ ka Jɛrusanɛm ama si ka Bɛtani#24:50, Jisɛs atab abɔɔ abába ka bɛsɔ akak njɔm anara abɔɔ. 51Ɛsika anara abɔɔ na, atam asig abɔɔ ka nɛyɔ Ɛsɔwɔ ɛsɔnɛ ɛmu ka bɛsɔ. 52Asɔgba ayɛ ajɨbɛ bɛsi akɛɛ ka afɛnɛ amu ka Jɛrusanɛm ka ɛbembem ɛyɛbɛ netem. 53Ama jɔn ka njoa Ɛsɔwɔ ákarɛ nden noden yiku.

Currently Selected:

Nuk 24: NDD-011

Highlight

Copy