Nuk 23

1Ka ɛbɔŋɔ ji ɛtam, amu ka Jisɛs ka mfoa Panet. 2Ka ajam nɛbibi atɔrɔ anɨghɛ, arag si, “Ɛmi yɛ si mannom nyɔ asɛbɛ ɛfegheayɔ akɛ ɛjibɛ. Árɛ sɛb si anɛ akɛ Mfɨne Ɛjibɛ akpugha mfam, afɛnɛ arag si yɛ áre Kɨras, nton.” 3Ka Panet abɔmɔ Jisɛs si, “Wɔ rɛ ntona ba Jus?”

“Wɔ ɔrɨgha na”, Jisɛs akpɛɛ.

4Ka Panet atɔ atona ba ɛjɔɔ Ɛsɔwɔ ka ɛbɔŋɔ, “Ndɛyɛ ɛjighi jiku ji mannom nyɔ agbɔɔ.”

5“Ka ayimi ka aja ya akpaa anɛghɛ si nɛkpɨne ɛnɛ jam ka Judiya ɛrɛ ɛtɔŋɔ anɛ ɛsika abɨgha ka ɛfegheayɔ ka ɛjibɛ ka ami ba ka ji mfa.”

6Ɛsika Panet ayɔghɔ na, abɔmɔ ana Jisɛs aruu Ganini 7Nden yi agbɛrɛ si ɛja ji Jisɛs aru ɛre ka nɛyɔ Ɛrɔd, atoɛ akɛ Ɛrɔd, yɔ atɨma jɔn ka Jɛrusanɛm ka nden nyi.

8Nden yi Ɛrɔd ayɛ Jisɛs, netem ɛyɛbɛ yɛbɛ atubsi mba ami rab yi ara sɛbɛ si ayiɛ. Ára ter si Jisɛs amiɛ na yɛ ane nsɔnɔ ndeŋe atubsi ayɔghɔ abembem nsɔn atubɛ. 9Ɛrɔd abɔmɛ abembem abɔmɔ, ka Jisɛs jiku yarɛkpɛɛ. 10Atona ba ɛjɔɔ Ɛsɔwɔ ka Ba akpɨna ajighi ajɔnɔ fa, abiba atɔrɔ anɨghɛ. Ɛrɔd ka asɔja ayɛ anyiɛ afɨna atɔŋɔ ayɔghɛ. 11Nden yi Ɛrɔd ka anɛ ba akpakaŋ abɛ amiɛ yɔbɔ nsɔn ɛnyɛ nna ka nton, ka afɨna atoɛ akɛ Panet. 12Jam ka ɛfo bi Ɛrɔd ka Panet akɔnɔ ajɔn ka atɛm, atubsi ɛyɨghɔ yɨghɔ ajɔnɔ ka ɛjiŋ.

13Panet abiŋ atona ba ɛjɔɔ Ɛsɔwɔ, aton ka anɛ kpakpa, 14atɔ abɔɔ si, “War ɛba ka nnɛ nyɔ ɛma kɛm si ara kpine anɛ ebibia nsɔn yi ɛne abɔɔ anɔk ka ɛjibɛ. Mmiɛ bɔmɔ abɔmɔ ka ɛsiamar ɛjɨrɛ ka ndɛyɛ ɛjighi jiku ji agbɔɔ. 15Ɛrɔd titi árɛ yɛ ɛbibi jiku yi sɛrɛ ka afɨna atoɛ akɛ war; ɛbrina nnɔbɔnɔbɔ, árɛ nem jiku ji ɛne nnɛ áyonɛ. 16Ka mkpi tɔ amɔbɛ ka nsighɛ abɔ. 17(Ɛjɔnɔ nɛyɔ Mfɨne Ɛjibɛ si ayighi nea mgbakɔbɔ ɛwi asighi abɔɔ ka ɛyighi Nɛfɔrɔ jiku jiku.)”

18Ka anɛ kpakpa abeŋe si “Ba sɔŋ ka nnɛ yɔ mfa! Ba sighi Barabas abɔɔ ɛkɛ war!” 19(Akɨgha Barabas ka mgbakɔbɔ atubsi ajɔnɔ ka ɛbɔŋɔ anɛ ba anɔghɔ ka ɛjibɛ ɛnem nnɛ akpɔ).

20Atubsi ásɛbɛ si asighi Jisɛs abɔɔ, Panet akpɛ gɔrɔ abɔɔ. 21Ka arɛgɔɔ nɛbeŋe si “Ba koɛ! Ba koɛ!”

22Ka ɛnumu mkpɛnɛ ɛsaa, yɛ abɔmɔ abɔɔ si “Ɛgbɔnaŋ? Mannom nyɔ agbɔ bɨgha ɛjighi? Ndɛyɛ ji ɛsɛrɛ ɛyonɛ. Ka mkpiɛ mɔb ka nsighɛ abɔ.”

23Ka ára gaa beŋebeŋe gbogbo si akoɛ ka ɛte ɛnem Panet arɛ kpɛma atɛn. 24Ka ɛkɨna njam, Panet anem ka abɔɔ asɛbɛ. 25Ásɨghi nnea mgbakɔbɔ abɔ yɔ abɔɔ asɛbɛ ɛjɔn ga si akɛ agbɨghagbɨgha ka ɛjibɛ ɛnem nnɛ akpɔ, ka atɛmɛ Jisɛs akɛ abɔɔ si akom ka ɛte.

Akom Jisɛs ka ɛte

26Ɛsika asɔja ára mu ka Jisɛs, akɔɔŋɔ mannom ɛwi yɔ abɨŋi si Samon yɔ aru Sirin, ára mu Jɛrusanɛm, aneɛ asɔn ɛte ajaŋ atɔɔŋɔ Jisɛs ka njam. 27Abembem anɛ atɔŋɔ Jisɛs ɛsika ara muna ka nɛ, abere ka akaghɛ. 28Jisɛs akpeghe atɔ abɔɔ si, “Abakaa Jɛrusanɛm, ba krɛ mmɛ kpɛbere; ba bere bɛji ɛbrɛ ka abɔɔ brɛ. 29Atubsi nden arɨgha bɨgha yi ɛrigha si, ‘Ɛnɔbɔ ka abakaa ba áre agum, nna ya árɛ wɛn mmɔ ka abɛn ya mmɔ árɛ yaab!’ ” 30Ka nden nyi,

“Atɔɔ atakpa bɛgon si, ‘Gbɔ nyɛghɛ war!’

Afɨna atɔ abra bɛgon si, ‘Bɨno war!’ ”

31“Ka ánem mmɛ nna yɔ nde ɛte mber, ane war naŋ ba ɛre nkpaku ɛte ji ɛmi kpɔ ɛyom?”

32Ɛsika amu ka Jisɛs, atɨma mu ka abanom abaa ba ane abibia nsɔn si ama yon. 33Nden yi asi ka mfom bi abɨŋi si Ɛkpɨgha ɛsi, akom Jisɛs fa, ka abibi anɛ ba, ɛwi ka mgbaŋa ɛbonom, yɔga ka ɛbɔ biŋ ka. 34Jisɛs akak njɔm si, “Nsɔjɨŋa, tam fa sɨghi abɔɔ, si anyim ji ára ne.” Ka atub nɛfaŋa kasɔŋ agbɛrɛ ɛsika abaŋa ábɔɔ ayɛ.

35Anɛ agbaa fa ára yɛɛ, aton ayɔɔghɛ. Afɨna arag, “Si yɛ anaagha anɛ baga, atɨma naagha ninɛ arena áre Kɨras, nne yɔ Ɛsɔwɔ akɨno.”

36Asɔja atima ayɔɔghɛ. Átɔɔnɔ anuna amɔm akɛɛ si awɔ 37ka atɔɛ “Ɛrena si wɔ ɔre ntona ba Jus, nagha bɛji ɛba.”

38Ayɛnɛ ntɔrɔ ɛnyɛ ka bɛso ɛte ji akoɛ si NTONA JUS YƆ NNA. 39Nnea abibi afɛm ɛwii yɔ atɨma akom ka ɛte akpere Jisɛs anyiɛ si: “Wɔ saŋ ɔre Kɨras? Nagha bɛji ɛba ɔtɨma ɔnagha war!”

40Ka nne abibi afɛm yɔga ayama nea abibia nsɔn nyɔ si, “Wɔ Ɛsɔwɔ ɔrimɛ bɨghɛ atubsi ɛkpi kpɔ nɛku ni? 41Ára numu war ka ɛbibi ji ɛne, ka nnɛ nyɔ árɛ nem ɛbibi jiku.”

42Ka akpeghe arag si, “Jisɛs, gbɔnter ɛyɨŋa ɔmina ba ka nɛyɔ ɛton ɛba.”

43Ka Jisɛs akpɛɛ si, “Ntɔa ka ɛdidɨghɛ, ɛnɛ ɔjɔnɔ ka nɨŋa ka mfo ɛyɛbɛ netem ka Ɛsɔwɔ bi abiŋi si paradais.”

Nɛkuu Jisɛs

44Ka ɛjo nkaniŋka wobo ka ɛbaa, ɛjiŋi ɛbɨno kpakpa mfom tɛtɛ ɛsi nkaniŋka ɛsaa ka ɛfen, 45atubsi njon agɔɔ nɛyɨgha. Ka ɛkpighi njoa njɔm ɛya ka nji mbaa. 46Jisɛs abeŋe si, “Nsɔjɨŋa, mmi sighi ɛtughu ɛjɨŋa nkak ka abɔ aya.” Ɛsika arɨgha na, asɨrɛ.

47Maŋkogho ka ɛbɨŋɔ anɛ ba akpakaŋa Rom yɔ ajɔnɔ fa ayɛɛ nna ji ɛmi wɛmɛ, akar Ɛsɔwɔ arɨgha si “Ka ɛdidɨghɛ nnɛ nnyɔ ajɔnɔ ɛfɔfɔa nnɛ ka amar Ɛsɔwɔ.” 48Ɛsika anɛ kpakpa ba agbaa si ayɛ ji ɛru, ayɛ ji ɛwɛmɛ, ára kɨno abɔ ka ngaŋ asama ka ɛkpɔghɔsi. 49Ka anɛ ba agbɛrɛ nnɛ yɔ Jisɛs áre, kpɛnɛ ka abakaa ba atɔŋɛ jam ka Ganini, ayimi dɨghadɨgha ayɛɛ kpakpa ji ɛwɛmɛ.

Ɛsika asimɛ Jisɛs

50Ka mannom ɛwii ya ane si Josɛf, ɛtiŋi nnɛ yɔ ajɔno ka ɛbɨŋɔ abakoghoa Jus, 51ka árɛ tama ka ji ɛjibɛ ane Jisɛs. Aru ka ɛjibɛ ji abɨŋi si Arimatiya, ka Judiya, ara bri ɛton Ɛsɔwɔ si ɛba. 52Yɛ amu ka mfoa Panet ama bɔɛ si akɛɛ ɛku Jisɛs yɛ ama sam. 53Josɛf akɔ ɛku Jisɛs asɨnɛ, afuɛ ka ɛtiŋi mbɔɔ ka akak ka ɛnam bi asimɛ ka nkpanɛtan, ɛnam bi akɨgha tɔghɔ sam nnɛ yɔku. 54Ɛjɔnɔ ɛfo ɛtoŋa nsɔn anɨŋɔ ɛfo-ɛsiayɔ bi ɛkpi jam.

55Abakaa ba aba ka Jisɛs jam ka Ganini atɔŋɔ Josɛf ama yɛ ɛnam ka ɛsika yɛ aboó Jisɛs. 56Ka afɛnɛ ka bɛjo ama toŋo nsɔn ka akua nɛsan yi atama ɛku Jisɛs. Ka abɔɔ ásiayɔ ka ɛfo-ɛsiayɔ ɛsika ɛjighi ɛrɨgha.

Currently Selected:

Nuk 23: NDD-011

Highlight

Copy