Luk 21

Ji nkala nkunɛ ka nɔ

(Mak 12.41-44)

1Na Jisɔs jɔ bɔngɔ a nyenɛ na afang anɛ jɔ kagɛ ɛblɔgɔ gɔ ɛbkǝl ni bɔ kpejɔ kag gɔ ɛtakgɛ Ɛshɔwɔ, 2a tɔb nyenɛ nkala nkunɛ nɔ le nkpak tɔb kagɛ abɔnshishɔgɔ akpɔgɔ abal. 3A rɛ, “Ntɔng wan ɛlɔgɔlɔgɔ rɛ, nkala nkunɛ nɔa gɔ ɛkpak gɛ ɛbɛ ka shingɛ anɛ bagɔ kpɛk kpɛ. 4Teb anɛ bagɔ yege ɛblɔgɔ bɔ gɔ ɛblɔng nshɔl nyi bɔ kpenɔ ka; wɔ yɛ gɔ ɛkpak gɛ ɛbɛ, ka kpɛk kpɛ ji akpenɔ.”

Jisɔs bungɔ lagɛ ji lijɔl gɔ ɛshishɔng

(Matiyu 24.1,2; Mak 13.1,2)

5Atɔtɔnɔ Jisɔs bandige jɔ bungɔ lagɛ ɛtak gɛ Ɛshɔwɔ, na nɔbɔ nɔ ring na anɔba atal na ɛblɔgɔ ni bɔ ka Ɛshɔwɔ. Jisɔs kim bungɔ rɛ, 6“Nshɔl nyaa kpɛk kpɛ nyi wan nkpe nyenɛ, ngarɛ kpe bagɛ nyi ɛbtal atingatingɛ aa nim kpe komo na gɔ ntɛmɛ ɛbtal; atingatingɛ bɔ kpe gbolo tob gɔ ndi.”

7Bɔ kim babɛ Jisɔs rɛ, “Ntetebe, ngaranyi jiya lelem? Ɛjomaji le lim ji le teb nlinge rɛ ngarɛ ɛbring?”

8Jisɔs kim fangɛ rɛ, “Kono wan ɛkpo nɔngɔ bɔ kinim wan. Teb anɛ gbalɛgbalɛ kpe bagɛ gɔ mbing ɛnyamɛ rɛ, ‘Mɛ wɔ le Jisɔs, ngarɛ ɛbkabɛ.’ Kǝ tɔnɔ wan bɔ. 9Kǝfal wan nrɛ wog lagɛ ntah na ɛfigayɔ. Tɛb Nshɔl nyaa kpɛk kpɛ kpe tir gbɔmbang lim, wɔ nkalshi fufɔ nim gɔl ba.”

10A shɔrashi ntɔng rɛ, “Ɛbjabɛ lejɔ nɔg na ntɛm ɛjabɛ, ɛjabɛ ɛtol ajing lejɔ nɔg na ɛjabɛ ɛtol jigɔ. 11Ndi kpegbɔgɔ, gɔ kpɛk kpɛ aji anɛ kpe gbɔgɔ ajal, abi ayam kpe jɔlɔ gɔ kpɛk kpɛ aji; amɔngɔmɔngɔ nshɔl na nshɔl nyi kpe kaga anɛ ɛfalfal kpe tebe gɔ ɛbung. 12Wɔ tɛtɛ rɛ kpɛk kpɛ nshɔl nyaa bilim, bɔ kpa bɔbɔ, bɔ kaga ɛrɛm. Bɔ kpa fagɛ ka ba atoboɛshi gɔ ɛtak ji Aju kpejɔ wanɛ toma ngbakɔbɔ, bɔ kpa kɔgɔ biyimi gɔ ɛshimar atol na ba afile mfam, teb ɛshi ɛjamɛ. 13Ngarɛ nyaa nyi ɛle bɛl ɛyagɛ bung Nɔbɔ Ɛteb. 14Wɔ kɛkɛrɛ lagɛ nyɔ ɛlam bi akpe kɔgɔ tarɛ ɛna gɔ ɛshishɔng. 15Teb mɛ nkpa kagɛ alom na mgbɛrɛ nyi nɛ ɛjang ɛwa le kiya mal fabɛ. 16Ba nshɔjanɛ na ba nɛjanɛ na abinyen ɛbanɛ na akono ɛnyenɛ na atobanɛ bɔ kpe fagɛ wan ka, ɛgɔm ɛjanɛ jindige bɔ wol. 17Nɛ awɔngawɔngɔ kpa jangɛ teb ɛshi ɛjamɛ. 18Wɔ jɔl ɛblu na ating gɔ ga ɛshi nim tan. 19Yimi nkongonkongo nɔngɔ wɔ bɛl ɛbkpen.

Jisɔs bungɔ lagɛ na bɔ kpe rangɛ Jɛrushɛlɛm

(Matiyu 24.15-21; Mak 13.14-19)

20“Ɔji rɛ nyen na ashɔja mishingɛ Jɛrushɛlɛm kag, ɔwɔ ale gbɛrɛ rɛ ngarɛ ɛbring nyi bɔ miba ɛbrangɛ Jɛrushɛlɛm. 21Ɔwɔ anɛ ba le gɔ Judiya le bɛ tam gɔ awɔng, anɛ ba le gɔ nla ɛjabɛ le tam na, wɔ ba ki le gɔ nla ɛjabɛ nimkpɛ yɛl. 22Teb lijɔl ‘Ɛfong Ɛrɛm’ bi kpɛk kpɛ nshɔl nyi nwɛr Ɛshɔwɔ bungɔ nɔ kpe lime. 23Lijɔl ɛbe ngarɛ ka abǝkal ba le gɔ ala na ba kpee abɔn gɔ abɔ! Teb njɛnɛ ɛrɛm nyi kpe bagɛ ka ɛying bi Ɛshɔwɔ kpe kagɛ. 24Anɛ bandige bɔ kpe wolo bɔ gɔ akangkang, bandige bɔ kpe bɔbɔ bɔ tam na ba gɔ ɛbjabɛ kpɛk kpɛ na anɛ ba agbakɔbɔ. Anɛ ba ki le Aju kpe nyedɛ Jɛrushɛlɛm gɔ ata tɛtɛ ngarabɔ mal.

Mɔn a Nlolom kpe bagɛ

(Matiyu 24.29-31; Mak 13.24-27)

25“Ajɛnɛ nshɔl kpe lime gɔ njol, na ɛbarɛka, na gɔ alɔnlɔ. Ɛbjabɛ kpɛk kpɛ gɔ ɛying kpe jɔbɔ na ɛrogo ɛbɔga alab na ɛfrɛ alab kpe kime gɔ aya. 26Anɛ kpe gbɔgɔ nkuu gɔ ɛfalfal na bɔ kpe babɛ ji kpe bagɛ gɔ ɛying, teb ajingajingɛ ji le gɔ ɛbung kpe gbɔgɔ. 27Ɔwɔ Mɔna Nlolom kpe bagɛ gɔ ɛbɔkɔg na ɛkɔ jɛ na njijɔg ɛblobo. 28Nshɔl nyaa kpɛk kpɛ rɛkime ɛlime, tam yimi wɔ tab ɛshi gɔ rɔ, teb ɛbladɛ ɛna ɛkabɛ.”

Ɛbkpele ni le lagɛ ɛte fig

(Matiyu 24.32-35; Mak 13.28-31)

29Ɔwɔ Jisɔs tobo ɛbganɛ nyaa tɔng bɔ rɛ: “Bɔngɔ ɛte fig, na nte nyigɔ kpɛk kpɛ. 30Nrɛ nyen na mikime ɛnyɔnɔ, nkpe gbɛrɛ rɛ ɛlom yagɛ shɛ. 31Nɔwɔ fufɔ, nrɛ nyen na nshɔl nyaa mikime, nkpe gbɛrɛ rɛ Ɛtol Ɛshɔwɔ ɛkabɛ.

32“Nɔngɔ mɛ ntɔng wan ɛlɔgɔlɔgɔ rɛ, anɛ kpɛk kpɛ ba le anu nim kpɔ mal tɛtɛ nshɔl nyaa lim. 33Ɛbung na ndi kpe tanɛ, wɔ alom ɛnyamɛ nim tir tan.

Fomo rɛ war babɛ

34“Konokpo nɔngɔ a kǝ rangɛ ngarɛ jɔ kɛrɛ lagɛ ɛlɛgɛ na ɛwɔgɔ na ɛfigayɔ gɔ ɛbkpen, tɔgɔ jɔl nɔ ɛfong biɔ kpa 35gbɛdɛ na ɛkpɔg. Teb kpe bagɛ ka anɛ kpɛk kpɛ ba le gɔ ɛying jiya. 36Konokpo wɔ jɔ kag ɛrɔ kpɛk kpɛ ngarɛ, nɔngɔ wɔ bɛl ɛkɔ mal shing gɔ nshɔl nyaa nyi kpe lime gɔji alemal yimi gɔ ɛshimar Mɔna Nlolom.”

37Jisɔs jɔ tebe ɛfong abɔngabɔngɔ gɔ ɛtak gɛ Ɛshɔwɔ, ngarɛ ɛgon, atam gɔ ɛwɔngɔ Olifes shɔng kang gɔ. 38Fonfo brɛbrɛ anɛ kpɛk kpɛ jɔ jɛ gɔ ɛtak gɛ Ɛshɔwɔ shɔng wongo atong kayɛ.

Currently Selected:

Luk 21: NBP

Highlight

Copy