Luk 20

Ɛkɔ Jisɔs

1Ɛfong abɔng na Jisɔs jɔ teb anɛ jɔ fɛrɛ bung anɔbɔ alom gɔ ɛtak gɛ Ɛshɔwɔ, ntoboɛshi a njɔmanjɔm Ɛshɔwɔ na batetebe ajang a Mosis, na ba bungɔ nfam, ba bǝkperɛ.

2Bɔ rɛ, “Tɔng war, ɛkɔ aji akpe nɔ ji akpe lime nshɔl nyaa? Nyenɛ wɔ ka ɛkɔ?”

3Jisɔs kim fangɛ bɔ rɛ, “Ntɔb bab wan mbabɛ. Tɔngim wan: 4Ɛwɔngɔ anɛ alab ji Jɔn lɔng gɔ ji Ɛshɔwɔ afi lɔng gɔ ɛlitak ga anɛ?” 5Bɔ kpo ɛju bɛl tɔɔbɔ na atɛm rɛ, “Ɛle tɔngɛ rɛ, ‘Lɔng gɔ ji Ɛshɔwɔ,’ Akpe babɛ war rɛ, ‘Jɛn ji wangɛ ɛki tamɛ tu Jɔn?’ 6Wɔ ɛle tɔngɛ rɛ, ‘Lɔng gɔ ɛlitak anɛ,’ Anɛ kpɛk kpɛ kpe tobo war atal wol, teb bɔ kɛrɛ rɛ Jɔn ntinge ateb Ɛshɔwɔ wɔ.”

7Ɔwɔ bɔ kimawɛ fangɛ rɛ, “War ɛnyim ɛji ji lɔng nɔ.”

8Jisɔs kim tɔngɔ bɔ rɛ, “Nim tɔb tɔng wan ɛji ji ɛkɔ ji nkpe lime nshɔl nyaa lɔng nɔ.”

Ɛbganɛ ni le lagɛ nɛ nɔ yamɛ nɛ ndi ɛgbɛ

(Matiyu 21.33-46; Mak 12.1-12)

9Jisɔs tobo ɛbganɛ niya tɔng anɛ rɛ: “Bɛlɛ nlolom awɔng nɔ bamɛ ɛgbɛ, yamɛ ka anɛ tam ɛbjɛn gɔ ɛjabɛ jindige gɔ nnya gbalɛgbalɛ. 10Ɔji ngara nkpagɛ ɛgbɛ ringe nɔ, a tom njoo ɛnye tu nɛ nɔ ayamɛ ɛgbɛ rɛ a shɔng kɔ mbaga nshɔl ɛnye. Nɛ nɔ yamɛ ɛgbɛ file njoo du tomɛ akrɛ abɔ abɔ. 11A kpe tom njoo nɔndige, bɔ kpe file nɔ du nɔbɔnɔbɔ shɔnɛ tomɛ akrɛ abɔ abɔ. 12A kpe tom nɔndige gɔ tɔnɔ anɛ ara, bɔ lime nshɔl tɔngɛ yegɛ gɔ ɛgbɛ.

13“Ɔwɔ nfɔnɔ ɛgbɛ kim tɔngɔ rɛ, ‘Nlelim rɛnan? Nle tom mɔnɔwamɛ, nɔ kpejɔ kɔrɔm; nyindige bɔ kpe kpono.’

14“Ɔji nɛ nɔ yamɛ ɛgbɛ nyenɛ nɔ, bɔ bɛl tɔɔbɔ na atɛm rɛ, ‘Nlɛgɛ ɛbku ɛgbɛ wɔ a, Nɔngɔ war wolɛ, nɔngɔ ji ɛgbɛ jiya le jɔl ɛjarɛ.’ 15Ɔwɔ bɔ tɔngɛ lɔng awɔ gɔ ɛgbɛ wolɛ.

“Jisɔs kim fɛrɛ bab bɔ rɛ anu, ɛjom aji nfɔnɔ ɛgbɛ nlelim bɔ? 16A kpe bagɛ bǝwol anɛ ba ayamɛ bɔ ɛgbɛ fagɛ ɛgbɛ ka anɛ bandige.”

Ɔji anɛ ba ajɔ bung na bɔ wogo nɔ, bɔ rɛ, “Ɛshɔwɔ nim tamɛ!”

17Jisɔs bɔngɔ bɔ shogoshogo kim babɛ bɔ rɛ, “Ɛjom aji ji nwɛr Ɛshɔwɔ bungɔ nɔ?

“ ‘Ɛbtal ni ba ashigɛ ɛtak tɛnɛ nɔ

Nunu ni mɔfɔgɔ ɛtak anu.’

18Nɛ awɔngawɔngɔ nɔ gbɔ komo gɔ ɛbtal nyiɔ kpe banɛ gɔ akuku; wɔ ɛbtal nyiɔ rɛfɛr gbɔ nyedɛ nɛ awɔngawɔngɔ kpɛ gɔgɔ ashingɛ ɛbugɔmbu.”

Mbabɛ nyi le lagɛ atakshi akɔgɔ

(Matiyu 22.15-22; Mak 12.13-17)

19Batetebe ajang a Mosis na atoboɛshi a bajɔmanjɔm Ɛshɔwɔ jɔ shɛbɛ rɛ bɔ bɔb Jisɔs gɔ ndoando nyiɔ, teb bɔ gbegbɛrɛ rɛ ɛbganɛ nyiɔ atobo lagɛ bɔ. Wɔ bɔ jɔ fala anɛ. 20Ɔwɔ bɔ jɔ shɛb ɛyagɛ ji bɔ lebɔb Jisɔs. Bɔ gono ashi anɛ ba jɔ lime na atinge anɛ, bɔ tom bɔ rɛ bɔ jɔ babɛ Jisɔs bɔbɛ a rɛ bung ɛbe ɛblom, nɔngɔ bɔ fagɛ ka ntoboɛshi nɔ kpe ɛkɔ gɔ Rom. 21Ɔwɔ anɛ ba bɔ tomo nɔ kim babɛ Jisɔs rɛ, “Ntetebe, war nyinyi rɛ ji akpe bungɔ fɛrɛ teb le gɔ ɛtinge mbang. War nyinyi rɛ anim bɔngɔ nɛ awɔngawɔngɔ gɔ ɛshimar, akpe tebe mbang Ɛshɔwɔ nyi ɛlɔgɔlɔgɔ. 22Tɔng war, njang ɛnayarɛ tetamɛ rɛ war kpee atakshi ka Sisa afi tamim?”

23Jisɔs gbegbɛrɛ awagɛ bɔ, ɔwɔ a tɔngɔ bɔ rɛ, 24“Tebim wan akpɔgɔ Roman. Nyenɛ wɔ mbing ɛnye na ɛshimar ɛbɛ le gɔ akpɔgɔ nyaa?” Bɔ fangɛ rɛ, “Sisa wɔ.”

25Jisɔs kim fangɛ bɔ rɛ, “Ka Sisa ji le ka Sisa, wɔ ka Ɛshɔwɔ ji le ka Ɛshɔwɔ.”

26Bɔ mɛ malim bɔb gɔ ɛshimar anɛ gɔ nshɔl nyi abungɔ nɔ, fɛr lamɛ bɔ anyar anyɔ bɔ bolo.

Ɛka lagɛ ɛnyamɛ gɔ ɛbku

(Matiyu 22.23-33; Mak 12.18-27)

27Asadusi nyandige, nya ki jɔ tamɛ rɛ nɛ kpejɔ fɛrɛ nyamɛ gɔ ɛbku ɔji amǝkpɔ, ba gɔ ji Jisɔs. 28Bǝ babɛ rɛ, “Ntetebe, Mosis yɛlɛ njang nyaa ka war rɛ, nlolom rɛ kpɔ tam nkal sha kǝ jɛl mɔn awɔngawɔngɔ, minyen ɛwɛ fɛrɛ kɔ nkal nɔ nɔngɔ ale jɛl mɔn nɔ le jɔl mɔn a nkunɛ. 29Bɛlɛ abinyen ashima banlom. Mgbɔgambang kɔ nkal kpɔ mɔn ajɛlim. 30Ɛtɔnɔ minyen 31na ɛkpe tɔnɔ anɛ ara minyen kpe kɔ nlikal nɔ, nɔwɔ bɔ anɛ ashima kpɛk kpɛ kɔ nlikal nɔ awɔngawuwɔngɔ bɔ kpɔ, abɔn bɔ jɛlim.

32“Gɔ ɛbkrɔ ɛnɛ, nlikal nɔnu grɛ tɔb kpɔ. 33Gɔ ɛfong bi akunɛ kpe nyamɛ gɔ ɛbku, nyenɛ wɔ alijɔl nkalɛwɛ, ɔji abalɛ bɔ anɛ ashima kpɛk kpɛ?”

34Jisɔs kim fangɛ rɛ, “Anɛ ba ɛying ji anu kpe kɔgɔ akal, fɛrɛ jɔ ka anɛ gɔ mbal. 35Gɔ ɛying ji kpe bagɛ, anɛ ba fomo rɛ bɔ nyamɛ gɔ ɛbku nim kɔ akal, wɔ lim bɔ le ka anɛ gɔ mbal. 36Bɔ kpe jɔlɔ na alɔgɔ ɛbtom Ɛshɔwɔ, bɔ nim kpɛ kpɔ. Teb bɔ abɔnɔ Ɛshɔwɔ ba, ba fɛrɛ nyamɛ gɔ ɛbku. 37Wɔ Mosis ka ɛblingɛ rɛ akunɛ kpejɔ nyinyamɛ gɔ ɛbku. Gɔ nwɛr Ɛshɔwɔ nyi bungɔ lagɛ na ngon jɔ lul gɔ ɛkologbɛ, a rɛ Ntol ‘Ɛshɔwɔ Ɛbraham, Ɛshɔwɔ Isaak, na Ɛshɔwɔ Jɛkɔb.’ 38Yɛ Ɛshɔwɔ akunɛ shang. Yɛ le Ɛshɔwɔ anɛ ba mber, teb gɔ ɛshimar ɛbɛ anɛ nim jɔ kpɔ.”

39Batetebe ajang a Mosis bandige fangɛ rɛ, “Ntetebe, a bung nɔb.” 40Nɛ awɔngawɔngɔ ɔ kpɛm garɛ rɛ akpɛ babɛ mbabɛ.

Mɔn a nyenɛ wɔ le Krayis?

(Matiyu 22.41-46; Mak 12.35-37)

41Jisɔs kim babɛ bɔ rɛ, “Jɛn ji wangɛ bɔ le tɔng rɛ Krayis mɔn a Defid wɔ? 42Defid nfɔnɔ yɛlɛ gɔ nwɛr a Sam:

“ ‘Nshɔ Ɛshɔwɔ bungɔ tɔng nshɔjamɛ:

“Rɛ jim a gɔ jangɛ ɛbɔblom

43Tɛtɛ nlim anɛ ba ɛjang ɛba ɛte ɛkono ata ɛja.” ’

44Ntol a Defid kpejɔ lɔngɛ rɛ Nshɔ. Alelim rɛnan fɛrɛ jɔl mɔnɔwɛ?”

Jisɔs ka ɛbragɛ lagɛ Atetebe Ajang a Mosis

(Matiyu 23.1-36; Mak 12.38-40)

45Na anɛ kpɛk kpɛ jɔ wongo atong kayɛ, Jisɔs bungɔ tɔng batɔtɔnɔ ɛbɛ rɛ, 46“Kono wan ɛkpo lagɛ batetebe ajang a Mosis. Ba kpejɔ jɛn shingɛ na alabɛ ɛlamɛ, kpe shɛbɛ anɛ ba lekag bɔ nyɔ na ɛkpono gɔ arɛ; bɔ kpejɔ shɛb ɛtinge ɛte gɔ ɛtak ji Aju kpejɔ wanɛ na nji ɛlobo gɔ ɛbkak. 47Bɔ kpejɔ tarɛ ntak akal akunɛ, fɛrɛ jɔ kag nlaba mbang ɛrɔ. Nkin anɛ ba ɛrɛm bi bɔ kpe gbalɛ shing.”

Currently Selected:

Luk 20: NBP

Highlight

Copy