Luk 17
17
Jisɔs tebe lagɛ Abi afɛm na ɛbtamɛ ka
(Matiyu 18.6-7,21-22; Mak 9.42)
1Jisɔs bungɔ tɔng atɔtɔnɔ ɛbɛ rɛ: “Nshɔl nyi kpejɔ lim anɛ gbɔ yɛl gɔ abi afɛm kpetir lelem, wɔ ndɔn na nɛ awɔngawɔngɔ nɔ kpe lime jɔl. 2Le ga nɔb rɛ bɔ gayɛ kan ɛkpatal gɔ kang rɔ kag gɔ aya rɛ yɛ lim mɔnshishigɔ amɔnshɛ awɔng gbɔ yɛl gɔ abi afɛm. 3Babɛ ɛna wɔnfɔnɔ.
“Rɛjɔlarɛ minɛ ɛmalim ɛbe, nyamɛ, wɔ a rɛ fɛrɛ gbɔ ndɔn, tam kayɛ. 4Wɔ arɛ shɔda nkpɛlɛ ɛshima gɔ ɛfong fɛrɛ ba nkpɛlɛ ɛshima bǝtɔnga rɛ, ‘Titi tam kam.’ Tam kayɛ.”
Akpɛlɛ Jisɔs tɔngɛ rɛ alem bɔ bɛl ɛbtamɛ gbalɛgbalɛ
5Akpɛlɛ Jisɔs tɔngɛ rɛ Nshɔ, “Lim war ɛbɛl ɛbtamɛ gbalɛgbalɛ.”
6Nshɔ kim fangɛ rɛ, “Le rɛ nkpe ɛbtamɛ ni shɛ na amɔgɔ mustard, jɔnu nkpe tɔngɔ ɛte mulberry rɛ, ‘Wɔb ɛna shɔng jam gɔ aya!’ Tamɛ tu wan.
Mɔnanjo nɔ ki lɔng ɛshi gɔ mbang
7“Le nyi nɛ awɔng gɔ ɛblɔng ɛnanɛ kpe mɔnanjo nɔ kpe bamɛ ɛgbɛ fɛrɛ jɔ kpor ɛbol. Ɔji amikrɛ ɛgbɛ! Ale tɔngɛ tɔng rɛ ba bi jina li nshɔl a? 8Ee ale gayɛ tɔngɛ rɛ, ‘Lam nshɔl ɛgon ɛnyiamɛ kam, wɔ tɔgɔ ɛji shigim ntɔgɔ li fɛrɛ wɔ mal; akim tɔb li.’ 9Ale kǝkag mɔnanjo sham teb alem ji atɔngɛ rɛ alema? 10Nɔwɔ wan fufɔ, ɔji milim ɛjom ajingajingɛ ji Ɛshɔwɔ tɔngɔ wan rɛ nlim, nle tɔng rɛ, ‘War abɔnɔnjo ba kikpe ɛblobo ba; ɛlim ɛbtom ɛnarɛ.’ ”
Jisɔs lime anɛ ba abile awobo nɔb
11Na Jisɔs jɔ tam nyi Jɛrushɛlɛm, a shingɛ gɔ nkɔnkɔn a Samariya na Galili. 12Na ajɔ yɛl gɔ ɛjabɛ, anɛ awobo ba jɔ yam abile bǝkperɛ. Bɔ yimi dagɛdagɛ 13lɔngɛ gbogbo, “Nshɔ! Jisɔs! Nɔngɔ war fila ndɔn!”
14Ɔji Jisɔs nyenɛ bɔ, akim tɔngɔ bɔ rɛ, “Shɔng wan gɔ ji njɔmanjɔm Ɛshɔwɔ nshɔng tebɛ ɛnanɛ.” Na bɔ jɛ nɔ, bɔ nɔb ayam. 15Ɔji nɛ awɔng nɔ jɔ yam abile nyenɛ rɛ a nɔb, afɛrɛ, jɔ jige Ɛshɔwɔ gbogbo.
16A gbɔ nɔngɔ gɔ ata Jisɔs jɔ kagɛ sham. Nlolom nɔnu jɔlɔ nɛ a Samariya.
17Jisɔs kimawɛ bab rɛ, “Anɛ awobo shang njɔlɔ nɔa ba bɔ lime wan nɔba; anɛ ashim wobo bagɔ le gan? 18Jɛn ji wangɛ njɛnɛ nɔa wɔwɔ fɛrɛ nɔ bǝkag Ɛshɔwɔ sham?” 19Ɔwɔ Jisɔs kimawɛ tɔng rɛ, “Tam yimi wɔ shɔng; ɛbtamɛ ɛna ɛmalim a nɔb.”
Ɛtol Ɛshɔwɔ kpebagɛ
(Matiyu 24.23-28,37-41)
20Afarasi nyandige kim babɛ Jisɔs rɛ ngara nyi Ɛtol Ɛshɔwɔ kpebagɛ? Jisɔs kim fangɛ bɔ rɛ, “Ɛtol Ɛshɔwɔ nim bagɛ na ɛjom ji akpɛnyenɛ gɔ amar. 21Nɛ lim nɔ le tɔng rɛ, ‘Nyen jinu a,’ Afi ‘Nyen jinu ɔ,’ Teb rɛ Ɛtol Ɛshɔwɔ le gɔ ɛganɛ ɛwɔ.”
22Jisɔs kim bungɔ tɔng atɔtɔnɔ ɛbɛ rɛ, “Ngarɛ kpe bagɛ nyi nle jɔ shɛb rɛ nu nyen ɛfong abɔng bi Mɔna Nlolom jɔlɔ nɔ na nanɛ, wɔ nim tir nyen. 23Anɛ kpe tɔngɔ wan rɛ, ‘Nyen yɛ ɔ!’ ‘Nyen yɛ a!’ Kǝ tɔnɔ bɔ lɔng jɔ shɛb. 24Ɛfong bi Mɔna Nlolom kpejɔlɔ na ɛmangɛdo kpejɔ nyalɛ gɔ ɛbung bɔmɔ gɔ ɛjang bǝga ring gɔ jang bǝgɔ. 25Wɔ gɔ ngbɔga mbang akpetɔgɔ nyen ɛrɛm gɔ nshɔl gbalɛ gbalɛ anɛ ba njini niya fɛrɛ tɛnɛ.
26“Na jɔlɔ gɔ ngara Nɔa nɔwɔ le tɔb jɔl gɔ ngara Mɔna Nlolom. 27Anɛ jɔ li wɔgɔ, balɛbal fɛrɛ jɔ ka atɛm gɔ mbal tɛtɛ Nɔa yɛl gɔ ɛgbang. Nyɛl ba bǝrangɛ bɔ kpɛk kpɛ. 28Nɔwɔ jɔlɔ gɔ ngara lot. Anɛ jɔ li, wɔgɔ gono nshɔl fɛrɛ jɔ gongɔ, bamɛ ɛbgbɛ fɛrɛ jɔ shi ntak. 29Gɔ ɛfong bi Lot tamɛ Sodɔm sha, ngon na akal lɔng gɔ rɔ bǝkeme wol bɔ anɛ kpɛk kpɛ. 30Nɔwɔ le jɔl gɔ ɛfong bi Mɔna Nlolom kpe bagɛ.
31“Gɔ ɛfong biyɔ nɛ awɔngawɔngɔ nɔ kon gɔ ɛbolo ɛtak ɛjɛ na nshɔl ɛnye gɔ atang akǝkpɛ badɛ shɔng tab ɛjom ajingajingɛ. Tɔb le nɔ, ka nɛ nɔ jɛ ɛgbɛ akǝkpɛ fɛrɛ nyi ɛtak. 32Bomo nkala Lot! 33Nɛ awɔngawɔngɔ nɔ shɛbɛ rɛ akoro ɛbkpen ɛnɛ kpɛ tanɛ; wɔ nɛ awɔngawɔngɔ nɔ tanɛ ɛbkpen ɛnɛ akpe koro na. 34Nɔngɔ mɛ tɔnga rɛ, atu nya anɛ abal kpe nɔngɔ gɔ ɛgodo ajing. Bɔ kpe rɔdɔ nɛ awɔng tam awɔ, nɔgɔ sha. 35Abǝkal abal le jɔ gɔg nshɔl: bɔ kpe rɔdɔ awɔng tam awɔ, awɔng sha.” 36Anɛ abal lijɔ lim ɛbtom gɔ ɛgbɛ bɔ kpe rɔdɔ awɔng tam awɔ, awɔng sha.
37Batɔtɔnɔ ɛbɛ kimawɛ bab rɛ, “Nshɔ jiya kpe lime gan?”
Jisɔs kim fangɛ rɛ, “Ɛji ajingajingɛ ji ɛku nɛ nɔng nɔ, ɔwɔ ntɛrɛ kpe gbagɛ ɛkan.”
Currently Selected:
Luk 17: NBP
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
