Luk 16
16
Ɛbganɛ ni le lagɛ nkpora nshɔl
1Jisɔs tobo ɛbganɛ niya tɔng atɔtɔnɔ ɛbɛ rɛ: “Bɛlɛ ɛfangɛ nɛ ajing nɔ bɛlɛ ɛtinge nɛ nɔ jɔ kpor nshɔl ɛnye. Ɛfong abɔng bɔ kim tɔngɔ ɛfangɛ nɛ jiɔ rɛ nɛ nɔ kpejɔ nkpor nshɔl ɛnye kpe fadɛ akpɔgɔ ɛnye. 2Ɔwɔ a lɔngɛ kag gɔ njo babɛ rɛ, ‘Ɛjomaji aa ji nkpe wogo laga? Kɔ awɛr ɛnya bitebim na akpefile nshɔl ɛnyamɛ, teb anim kpɛgɛ jɔl nkpora nshɔl ɛwamɛ.’ 3Nkpora nshɔl kime ɛmumɛ ntangtang rɛ, ‘Anu lelem rɛran? Nshɔjamɛ njo yagim tarɛ ɛbtom. Mɛ ga nkongim nyi le bam ɛgbɛ, wɔ ndɔn kpim file rɛ jɔ lɛmnlɛmɛ. 4Nyinyi ji lelem, nɔngɔ ntɔgɔ kpɛ bɛl ɛbtom niya, anɛ le gberim kag gɔ ntak a bɔ.’
5“Ɔwɔ a lɔngɔ nɛ awɔngawɔngɔ nɔ kpe ndɛnjo mbɔng jɔ bab bɔ. A bab mgbɔgambang a nɛ rɛ, ‘Akpe nshɔjamɛ njo mbɔng a jɛn?’ 6Nɛ a mbɔng fangɛ rɛ, ‘Nkpeyɛ mbɔng a nshang aking atalalon,’ Nkpora nshɔl kimawɛ tɔng rɛ, ‘Kɔ nwɛr a mbɔng ɛnya, kingking, wɔ jina rɛdɛ jɔl atala abal ɛwobo.’
7“Ɔwɔ a babɛ ɛtɔnɔ nɛ rɛ, ‘Wɔ fufɔ akpe mbɔng a jɛn?’ A fangɛ rɛ, ‘Nkpeyɛ mbɔng a mgbɔjɔg arashi ɛgɔr ɛlon.’ A tɔb tɔngɛ rɛ, ‘Kɔ nwɛr a mbɔng ɛnya wɔ yɛlɛ ɛgɔr atalani.’
8“Ndɛnjo fɛr gamɛ nkpora nshɔl ɛwɛ ɛno teb alem na nɛ nɔ kpe ɛshi. Teb anɛ ba ɛying ji anu kpe ɛkonokpo na bɔ kpe lime nshɔlabɔ shingɛ na anɛ ba le ka Ɛshɔwɔ.”
9Ntɔng wan, kɔ nshɔl ɛying wɔ bɔng atɛm ka ɛna, nɔngɔ atɔgɔ kpɛ bɛl, bɔ le gbera kag gɔ ɛjiji alijɔl gɔ nkalkal.
10Nɛ awɔngawɔngɔ nɔ malɛ file mɔnshishigɔ nɔ bɔ kayɛ nɔ kpe tɔb mal file njijɔg, wɔ nɛ awɔngawɔngɔ nɔ ki mal file mɔnshishigɔ nim tɔb mal file njijɔg. 11Rɛjɔl rɛ animal file afang ɛying jiya, nyenɛ wɔ le ka atinge afang? 12Wɔ rɛjɔl rɛya animal babɛ nshɔl nyi nɛ nɔndige nyenɛ wɔ le ka nshɔl nyi nya? 13“Nɛ awɔngawɔngɔ lim nɔ le lɔgɔ ba ndɛnjo abal arɛlim nɔ. Ale jang awɔng nɔgɔ kɔra, ɔ lega lɔgɔ awɔng nɔbɔnɔbɔ shingɛ nɔgɔ. Anim mal lɔgɔ Ɛshɔwɔ fɛrɛ lɔgɔ akpɔgɔ.”
Alomo Jisɔs nyandige
(Matiyu 11.12-13; 5.31-32; Mak 10.11-12)
14Ɔji Afarasi wogo nshɔl nyaa kpɛk kpɛ, bɔ jɔ wɔlɔ na Jisɔs, teb ɛbkɔrɔ akpɔgɔ. 15Jisɔs kim tɔngɔ bɔ rɛ, “Wan ba le anɛ ba kpejɔ kɔ ɛnanɛ na atinge anɛ gɔ ɛshimar anɛ bandige, wɔ Ɛshɔwɔ kpe gbɛrɛ ntem ɛnyanɛ. Teb nshɔl nyi wan kɔ na njɛn ɛjom gɔ ɛshimar Ɛshɔwɔ ɛjomjom lɔngim.
16“Nwɛr ajang a Mosis na ba ayɛlɛ awɛr atinge ateb Ɛshɔwɔ jɔlɔ gɔ ɛkɔ tɛtɛ ngara nyi Jɔn nwɔngɔ anɛ alab. Tabɛ ɔ shɔngɔ, anɛ jɔ bungɔ anɔbɔ alom lagɛ ɛtol Ɛshɔwɔ, wɔ nɛ awɔngawɔngɔ jɔ nɔgɔ mbang ɛnye rɛ a yɛl. 17Le jɔl nkpɔdɔkpɔdɔ rɛ ɛbung na ndi tan rɛ ɛlom ating lɔng gɔ nwɛr Ɛshɔwɔ.
18“Nɛ awɔngawɔngɔ nɔ kamɛ nkal ɛwɛ shɔng kɔ nɔndigɛ abom ɛrɔbɔ, wɔ nlolom nɔ kɔ nkal nɔ nlom mɛkam atɔb bom ɛrɔbɔ.
Ɛbganɛ ni le lagɛ ɛfangɛ nɛ na Lasarɔs
19“Bɛlɛ ɛfangɛ nɛ ajing nɔ jɔ lebe atinge abɔmɔ jɔ li atinge nshɔl ɛfong abɔngabɔngɔ. 20Gɔ ɛgrɛgba ɛjɛ bɛlɛ nkpak anying nɔ jɔlɔ ɔ, nɔ bɛlɛ akpogolam kpɛk kpɛ ngɔbjing bɔ jɔ lɔngɛ rɛ Lasarɔs. 21Ajɔ shɛbɛ rɛ ali arɔrɔgɔ nshɔl nya jɔ fɔrɔ gɔ ɛkpokoro ɛfangɛ nɛ gbɔ. Ɛbua jɔ ba bǝ labɛ akpogolam.
22“Ɛfong abɔng bi Lasarɔs bǝ shing kpɔ balɔgɔ ɛbtom Ɛshɔwɔ rɔdɛ shɔng bom tɔb Ɛbraham. Ɛfangɛ nɛ tɔb bǝ shing kpɔ bɔ ramɛ. 23Atam gɔ ɛlolagon ɛji ji a jɔlɔ gɔ ɛrɛm, a tɔnɔ amar bɔngɔ gɔ rɔ nyen Ɛbraham gɔ dagɛdagɛ, na Lasarɔs gɔ gɛ jang. 24Ɔwɔ abinge gbogbo rɛ, ‘Nshɔ Ɛbraham, nɔngɔ mɛ nfila ndɔn wɔ tom Lasarɔs abidɛ ɛshi nyigɛbɔ ɛnye gɔ alab nangim ɛlege, teb nle gɔ nkongo ɛrɛm gɔ ɛbrɛ ngon.’
25“Ɛbraham kimawɛ fangɛ rɛ, ‘Mɔn, bomo rɛ ɔji a jɔlɔ gɔ ɛbkpen abɛlɛ kpɛk kpɛ anɔbɔ nshɔl, wɔ Lasarɔs bɛlɛ abi nshɔl. Anu a tɔb bɛl ɛyɛbɛbtem aa wɔ tɔb jɔl gɔ ɛrɛm. 26Shing nya sha, war na nanɛ bɔ kag mbog, nɔngɔ anɛ ba kpe shɛbɛ rɛ bɔ lɔng ba gɔ bɔ nim malɛ ba, wɔ awɔngawɔngɔ nɔ kpe tɔb shɛb rɛ a lɔng gɔ ba gɔ ɛgrɛ ɛji anim tɔb mal ba.’
27“Ɛfangɛ nɛ kim fangɛ rɛ, nshɔ, ‘Ma gbɔngɔ, tom Lasarɔs tu gɔ ɛtak gɛ nshɔjamɛ, 28teb mkpe abinyen alon ɔ, nɔngɔ a ka bɔ ɛrɛgɛ, bɔ kǝtɔb ba gɔ ji ɛrɛm biya.’
29“Ɛbraham kimawɛ fangɛ rɛ, ‘Bɔ kpe Mosis na ba atinge ateb Ɛshɔwɔ; nɔngɔ bɔ wongo atong ka bɔ.’
30“Ɛfangɛ nɛ rɛ, ‘Nɔ shang, Nshɔ Ɛbraham! Nɛ rɛlɔng gɔ ɛbjabɛ akunɛ shɔng tɔng bɔ, bɔ kpe gbɔgɔ ndɔn.’
31“Ɛbraham kim fangɛ rɛ, ‘Bɔ tɔgɔ wongo atong ka Mosis na ba atinge ateb Ɛshɔwɔ, bɔ nim tir tamɛ jɔlarɛ bɔ nyamɛ nɛ gɔ ɛbku bǝtɔng bɔ, bɔ nimtamɛ.’ ”
Currently Selected:
Luk 16: NBP
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
