Luk 21

Ekab yi Minkai ekud

(Mak 12:41-44)

1Nyining Jisɔs arob mmɛd ka we arɔ nkeri befang bi bane ali langang bekab ebibɔ wa nkpokpo yu alangag bekab. 2Erɔng we arɔ mikpakpak minkai ekud alang nkeked bakpoga afai ma kɔpa. 3We arɔ, “Me nsidi nyɔ ekonekon, mikpakpak minkai ekud wufa alang aking bane bawag feb. 4Bane bafa feb aken bekab ebibɔ nkeri bɔ afanging; ka we yi bɔkpak obu we alang feb yi ka we akwenag wa oyi.”

Bɔjɔgi bu ekung yi Ɔsɔwɔ yi boreng bu nkurikuri nten

(Mat 24:1-2; Mak 13:1-2)

5Nyining yi ebe ba ali nyedag Jisɔs ali chodag abangang nju yu Ɔsɔwɔ nkeri aloning yi yi benɔbanɔba bi bara erɔng yi bekab bi aken Ɔsɔwɔ. Jisɔs atɔ bɔ arɔ, 6“Wa yi nyɔ ɔrɔ fa, nten ting aba yu ndinda yud ahɔ cha chɔrang wa esɔ yi num; kpe yun ting arob yu wa nsi.”

7Bɔ abeb we arɔ, “Minkɔkɔi, icha nten nggom bifa betɛbag? Ka ye yi enɔngɔ kɛmi ndeng yu atɔngag arɔ bi benɔngɔba ɔtɛb?”

8We abɔri arɔ: “Mɔnag anyɔng akan bori nyɔ. Da jugijugi ting aba wa mpi ama, arɔ, ‘Me nle we,’ ka, ‘Nten ale kped.’ Ka kan nyedi bɔ. 9Ebu nyɔ alawog abangang minra yi nɔnganɔnga kan re anyɔng. Nggom bifa beranen kpa betɛb, ka nkurikuri ahɔba ebuyid.”

10Nyining we atɔ bɔ arɔ: “Mpam ting anɔg yi num mpam, minen ting anɔg yi num minen. 11Be ting bekɛmi etingitingi enyingang yi nsisi yi ɔgba yi bekɔn wa bekpen belibeli, erɔng nggom bi botig yi betɛm bi boreng bi berun esɔ.

12“Ka bifa feb betɛb, bɔ ting akɔ nyɔ aseni nyɔ. Bɔ ting ajog nyɔ ake wa boju bu efugi bu bane ba Ju ka alang nyɔ wa mgbakɔbɔ. Bɔ anɔngɔba yi nyɔ boso bu balen yi bɔ ba ale ɔsa, ka feb wantagi mpi ama. 13Ka nyɔ ting nyɔ okun nten yufa nyɔ osidi bane abangang me. 14Ka lem anyɔng boted obuna nyɔ kan yang ka nten asi abangang nkeri nyɔ ting ɔtang lɔ. 15Da me ting nke nyɔ balem yi ɔmanyum wu bane ba ojing abina ahɔga nyɔ ka erɔng ahɔtang yi nyɔ ɔchɔdag. 16Ka banyen yi bansi, mbɔn banyen bakani yi banine, ba nyɔ orun yi bɔ yi erong ting achɔ nyɔ, ka bɔ ting awoi ebe abina. 17Kpeicha mine ting ajing nyɔ wantag ama. 18Ka ntingting ndi yu eri eya kpeyud ahɔlɛm. 19Lami bako akori, da nyɔ ting ɔnyangi lɔ.

20“Nten yu nyɔ ɔlarɔ banɔgag ba bera agbai Jerusalim afari, nyining nyɔ ting ɔmai ɔrɔ ejɔgang eyi ele kped. 21Nyining nungi ba ale Judia are achag bopup, nungi ba ale wa mpam yu ntɔ atɛb efi, ka nungi bɔ ba ale efi akantisɛm wa mpam yu ntɔ. 22Da yifa ele nten yu esenang ekɛmag feb nkeri yi amarɔ ɔseng. 23Nsɔn akɛmag lan wa ndu ayia yi bakani ba bala yi banyen ba mbɔn anyinang ayabag babei! Bayig ting ati wa nsisi yufa yi bɔsangang bu nted bu Ɔsɔwɔ yi bane bafa. 24Ting awoi bɔ yi ekangkang erɔng ting akun bɔ ala bɔgbakɔbɔ achag feb bɔpam. Bane ba akan sid bane ba Ju ting achem Jerusalim tata nten oyubɔ akuri.

25“Boreng bu akanbɔ rɔ ting bɔkɛmi wa nsoi, ofeng yi bodonando. Wa nsisi yufa, bɔpam ting bɔkɛmi botigbotig yi mbura wantag yu ekpenang yi egbugang yi baya ma ntɔ. 26Bane ting ached wantagi botig, ekerang yi nkeri nggon yu boso anɔngɔ kɛmi da nggom bi esɔ bi bekerag ewereng ting benyingi. 27Wa nten ayua bɔ ting arɔ Mmɔn wu Mine abag wa esɔ mmbuta yi ɔsa yi etɛm eyob yi ejeg. 28Wa nten yu nggom bifa bela to ɔtɛb, lo anyɔng belag, tam anyɔng beri ebina esɔ, wantagi enyangang eyina ele kped.”

29We asidi bɔ bokobi bufa arɔ, “Mmɔn anyɔng erere yi fig yi mindere mawag feb. 30Bela gbɔdi begwigwe, nyɔ ɔrɔag yi nyɔ bafɔni ka nyɔ ɔmai nyɔ ɔrɔ olom ole kped. 31Kpe ala, ebu nyɔ ɔla rɔ nggom bifa betɛbag, nyɔ ɔmai arɔ Bɔlen bu Ɔsɔwɔ bole kped.

32“Ekonekon me nsidi nyɔ, nggon yufa ahɔ king tata nggom bifa feb betɛb. 33Esɔ yi nsisi ting eking, ka balem angama ahɔ king.

34“Mmag anyɔng beke ebina, efefa boted obuna bɔcharag bɔkerag abangang bali ma befɔg, ebumag barog yi bayang ma ekwen, ka epo ayia ekan bu we bamud ala ntam. 35Epo ayia ting ekpɔgi bane feb ba ale wa nggon. 36Babag anyɔng kpɔgkpɔgi nten, ka soag anyɔng nsɔm nkeri nyɔ ɔmanag ɔsem feb bi enɔngɔ bɔtɛb, ka nyɔ ɔman ɔlami boso bu Mmɔn wu Mine.”

37Kpeicha epo Jisɔs ali kɔag wa etengebam yi nju yu Ɔsɔwɔ, ka eko kpeyin we aloag achag aka kɛmi wa mpɔp yu ayenag yu arɔ Mpɔp yu Olif yi boru, 38ka yi epopo bane feb abag wa nju yu Ɔsɔwɔ aba wog we.

Currently Selected:

Luk 21: NBB

Highlight

Copy