Luk 19
19
Zisɔs nɛ Zakiyɔs
1Zisɔs abi fɛ Zeliko, awoo zaa fɛ ɔswaŋ wɔɔ. 2Ɔnʉl ɔmɔ alɛ fini wʉ agɔla ite ala Zakiyɔs. Âlɛ kɛ ɔkʉ wʉ vɛnʉl vɛ ɔgbaala ɔkpanɛvɛ fɛ ɛyaŋ iyɔɔ. Âlɛ nɛ ɔwaŋgɛ cɛŋ. 3Aliye ala, ɔn áyen otu ɔnʉlʉ wʉ Zisɔs alɛ, kpa abɛ ayen ɔn ga kici yɛ âlɛ kɛ ɔnʉl wʉ ɛtɛnd-ɛtɛnd nɛ kici yɛ ɛyɛŋgɛ iyɛ ɛnʉlʉ iyɛboona ɛ̂lɛ fini. 4Asɔ azowulu za kɛ isi, amɛnda kɛ agɛmba kici yɛ Zisɔs áwo kɛ ɛfanɛ ɛnayɔɔ.
5Wʉ Zisɔs âbi fɛ ɛtɛ kwɔɔ, ayen kɛ ago, saŋ akaŋɛ nɔnʉn ala, “Zakiyɔs, sile va ŋgʉlaŋ! Ɛnya wee máca kɛlɛ kɛ itimbe iyuwu keŋ-keŋ.” 6Asɔ asile va ŋgʉla-ŋgʉla, agbaal Zisɔs nɛ ɛsɛghanavɛ.
7Wʉ vɛnʉl omwem vɛ ɔlɛ fini ôyeni ase, ohee iyinena ala, “Zisɔs azaā wʉ áza-ca kɛ itimbe iyɛ ɔnʉl wʉ ayele ɛcɔcɔɔ.”
8Kpa Zakiyɔs amʉwa ɛsɛla, akaŋɛ nɛ Ɔkʉ ala, “Ɔkʉ, tambɛlɛ. Mákie ɔwaŋgɛ ɔwamɛ ici ɛfaalɛ, nɛ mɛ́na vɛnʉl vɛ ɛcianɛvɛ oci ɔmɔɔ. Ikil yɛ mɛlɛ-ya ɔmɔnɛmɔ ɔmanɛ mɛkalɛ, nɛ mɛ́kɔl ɔn ɛkambɛlɛ inyin.”
9Zisɔs akaŋɛ nɔnʉn ala, “Ɛnya wee, vɛnʉl vɛ fan itimbe iyee ɔgbaal ɛwalɛ, kici yɛ ɔnʉl wee ate ɔmɛnɛ ɔna ala abe-lɛ kɛlɛ wanɛ wʉ Abɛlaham. 10Kɛlɛ asɔ ɛnɛ ɛmɛ, Wanɛ wʉ Ɔnʉlʉ, mɛva kɛ iliyena nɛ ɛwalana vɛnʉl vɛ oyile kɛ ɛcɔcɔɔ ivo.”
Ɛkan yɛ ɛŋgɔl yɛ ɔyɛla ala mina
11Sɛ vɛnʉl ɔ̂lɛ ɛtambɛlana kɛ ɔmanɛ kɛɛ Zisɔs avɔl, atɛfa vo ɛkan. Ayel asɔ kici yɛ âlɛ ye kpʉmbɛlaŋ kɛ Zelusalem, vɛnʉl otes ala Ɔtʉlʉ vɛ Ofilikpamɛ avɛ ye kpʉmbɛlaŋ wʉ váva kɛ ɔkambɛlɛ ɔnawɔɔ. 12Akaŋɛ ala, “Ɔnʉl ɔmɔ alɛ-lɛ, asime kɛ ɔcʉmbʉlʉ wʉ vɛmɛfʉwa. Anyɛnda wʉ áza kɛ ɔtalɛ ɔmɔ kɛ ɛlɛmb, ndalɛsɛ váyel ɔn Mɛfʉwa, nɛ ákiil va kan ɔswaŋ ɔna. 13Asɔ ayɛla vɛnʉl ɔnavɛ vɛ ɔtʉmʉ likwoŋ, ana ɔmɔnɛmɔ ɛŋgɔl yɛ ɔyɛla ala mina yɛ ɛtav iseghi,#19:13 Mina ɔmɔɔ âlɛ azatʉmʉ wʉ ɔnʉlʉ ivolu ɛtaalɛ. saŋ akaŋɛ navo ala, ‘Yeli nini iseghi nɛ ɛŋgɔl yee kaka nɛ mɛ́kul.’
14“Kpa vɛnʉl ɔnavɛ vɛ ɔswaŋɛvɛ ɔcɔn ɔn. Asɔ ɔtɛma vɛnʉl kɛ izime ɛna ala, vo oliyē ala ãlɛ Mɛfʉwa ovo ga.
15“Kpa alɛ Mɛfʉwa. Wʉ âkiili va, ayɛla vɛnʉl ɔnavɛ vɛ ɔtʉmʉ vɛ alɛ-na vo ɛŋgɔl vɔɔ, ndalɛsɛ ɔn acil akasɛ ayɛ okol.
16“Ɔnʉl wʉ ɔtʉmʉ wʉ isi-isi ava-kaŋɛ ala, ‘Mɛfʉwa, mɛ̂kol pe aŋgɔlʉ ayɛ mina likwoŋ kɛ yɛ wʉlɛ-na mɛ yɔɔ.’
17“Mɛfʉwa akaŋɛ nɔnʉn ala, ‘Akafɛla o! Ɔnʉl wamɛ wʉ ɔtʉmʉ, wʉ̂yel sɛva. Wʉ̂bɛ wʉ̂kɔl vɛnalɛvɛ iyɛcɔɔ sɛva-sɛva asɔ, mána we ɛyana, nɛ wʉ́wand ɛswaŋɛ likwoŋ.’
18“Ɔnʉl wʉ ɔtʉmʉ wʉ ape, ava-kaŋɛ nɔnʉn ala, ‘Mɛfʉwa, mɛ̂kol pe vɛmina ɔtaŋɛn.’
19“Akaŋɛ nɔnʉn ala, ‘Owe, wand ɛswaŋɛ ɛtaŋɛn.’
20“Saŋ ɔnʉl wʉ ɔtʉmʉ wudi, ava-kaŋɛ nɔnʉn ala, ‘Mɛfʉwa, mina wuwu ɛnɛ alɛ wee. Mɛlɛ-kɔndʉ ɔn kɛ obeke ɛkʉndʉ, mɛ̂malɛ vɛl. 21Mɛlɛ-ciaa kici yɛ, wawʉ kɛlɛ ɔnʉl wʉtavana. Wʉyaā akasɛ fɛsɛ wʉka-swa otulu ga, wʉsɛndā kpaa fɛsɛ wʉka-lɔ ga.’
22“Mɛfʉwa agɔl nɔnʉn ala, ‘Owe, ɛzɔw yɛ ɔnʉlʉ! Mátune we kɛlɛ kɛ amʉ ayuwu ɛŋga. Wʉlɛ-cili wʉla mawʉ kɛ ɔnʉl wʉtavana, mɛyaā akasɛ fɛsɛ mɛka-swa otulu ga, mɛsɛndā fɛsɛ mɛka-lɔ ga. 23Ɛnɛ ini wʉlɛ-wa ɛŋgɔl ɛyamɛ kɛ ɔbaŋ ndalɛsɛ ɔkambɛlɛ wʉ mɛkiil, nɛ mɛ́gbaal ɛn nɛ ɔlʉwa ga?’
24“Saŋ akaŋɛ nɛ vɛnʉl vɛ ɔlɛ fini ala, ‘Gbaal nini mina wɔɔ kɛ avo ana, nɛ nɛ́na kɛ nɛ ɔnʉl wʉ alɛ navo likwoŋ.’
25“Ɔkaŋɛ nɔnʉn ala, ‘Mɛfʉwa, awʉ ye navo likwoŋ!’
26“Kpa Mɛfʉwa wɔɔ, agɔl navo ala, ‘Mɛvɔl anu mɛla, ɔnʉl ɔmɔnɛmɔ wʉ akol, vákɛ-na pe ɔn cɛŋ, kpa kɛ nɔnʉn wʉ akol ɔmanɛ ga, masɛ kɛ akol, nɛ ɔ́gbaal. 27Kpa va nini nɛ vɛnʉl vɛ ɔcɔn mɛ, vɛ oliye ala x-malɛɛ mɛfʉwa ovo ga vɔɔ, nɛ nɛ́va-sɔŋg vo fan isi kaŋgɛghɛ.’”
Zisɔs anyɔl kɛ Zelusalem ndalɛ Mɛfʉwa wʉboona
28Wʉ Zisɔs âvɔlʉ kule ɛkan yee, ambaa kɛ isi wʉ âyʉmwa zaa kɛ Zelusalem. 29Ndalɛsɛ âbii zaa kɛ ɔswaŋ wʉ Befage nɛ Betani, kɛ ɛkɔŋgʉ iyɛ Oliv, atɛma vɛnʉl vɛ oyeghe nɔnʉn ɔfaalɛ, akaŋɛ navo ala, 30“Za nini kɛ ɔswaŋ wʉ ɔlɛ kɛ isi kunughu wɔɔ. Ikil yɛ nɛnyɔl kini, náyen ndalɛsɛ ɔta zel ɔbɔŋʉ fini, wʉ ɔmɔnɛmɔ amɛnda man kɛ ɔn ga. Falɛ nini, nɛ nɛ́va nɔnʉn. 31Ikil yɛ ɔmɔnɛmɔ afii anu ala, ‘Kâyel naa ɛnɛ nɛfala ɔn?’ kaŋɛ nini anu ala, ‘Ɔkʉ aliyē ɔn.’”
32Vɛnʉl vɛ atɛma obeza-kol ɔn kɛ ndalɛsɛ âvɔlʉ vo. 33Ndalɛsɛ ɔ̂lɛ ɛfalana ɔbɔŋʉ ɔnawɔɔ, vɛnʉl vɛ ɔlɛ nɔnʉn ofii vo ala, “Kâyel naa ɛnɛ nɛfala ɔbɔŋʉ wɔɔ?”
34Ɔkaŋɛ navo ala, “Ɔkʉ aliyē ɔn.”
35Asɔ ɔva nɔnʉn kan nɛ Zisɔs, ɔtal akʉndʉ avo kɛ ɔbɔŋʉ ɔnawɔɔ, saŋ Zisɔs amɛnda caal kɛ ɔn. 36Ndalɛsɛ âzende zaa nɔnʉn, vɛnʉl ofonde tala akʉndʉ avo ayɛ kan ago kɛ ɔwa, sɛ vácivili Zisɔs.
37Wʉ âbi kpʉmbɛlaŋ fɛ isisini wʉ Ɛkɔŋgʉ iyɛ Oliv, ɛyɛŋgɛ iyɛ vɛnʉl vɛ oyeghe nɔnʉn imem ihee ɛsɛghana. Ocivile Ofilikpamɛ nɛ iweli, kici yɛ ɛnalɛvɛ yɛciaanavɛ ɛyʉlʉ vimem yɛ ôyeni, 38ala,
“Vicowenavɛ vɛ̃lɛ kɛ nɛ Mɛfʉwa wʉboona, wʉ ava kɛ ite iyɛ Ɔkʉ Ofilikpamɛ.”
“Makun ãlɛ vɛnʉl nɛ Ofilikpamɛ kɛ ɔtalɛ-atʉlʉ, nɛ icivili ɛ̃lɛ nɛ Ofilikpamɛ.”
39Vɛ Falasi vedivi ɔlɛ kɛ ɛyɛŋgɛ iyɛ ɛnʉlʉ. Ɔkaŋɛ nɛ Zisɔs ala, “Ɔkʉnʉl, lʉwa nɛ vɛnʉl vɛ oyeghe nawe, nɛ ɔ́caal sweŋ.”
40Zisɔs agɔl navo ala, “Cioow! Mákʉnda vo ga, kici yɛ oyelē kɛ ɔmanɛ kagel-gel. Masɛ ɔŋgwa sweŋ, nɛ agonu ayɛ kan ɔwa ayee nɛ áhee icivilena mɛ nɛ iweli.”
41Ndalɛsɛ Zisɔs âbi kpʉmbɛlaŋ kɛ Zelusalem, wʉ âyeni kini, alia kɛ ɔswaŋ ɔnawɔɔ. 42Ala, “Anu vɛnʉl vɛ Zelusalem, ãlɛ ndalɛ nɛ̃cili ɛnya wee ɔmanɛ kɛɛ áva anu nɛ makun, kpa aŋgiee wee nábɛ nɛ́cil ko ga. 43Afe ayɛ kɛ ɛvaana kɛ nɛ anu, wʉ vɛnʉl vɛ ɔcɔna anu váfɛnɛ vitumuvu yɛnɔŋganavɛ ɛtavɛ, nɛ ɔ́gambɛlɛ wa anu kɛ atɛŋatɛŋɛ. Saŋ nɛ óhee ɛnyɛlana anu kɛ aziŋgili amemi. 44Vánɛsa yɛva anu omwem, nɛ ósend cɔ ɔswaŋɛ owunu. Vásɛɛl masɛ igonu ɛmɔɔ icoolena kɛ olindi ga, kici yɛ nɛlɛ-cili mɛva wʉ Ofilikpamɛ kɛ nɛ anu ga.”
Zisɔs atɛna iseghi kɛ Ɛca
45Wʉ Zisɔs ânyɔlʉ kɛ ogbendi wʉ Ɛcaa, ahee ɛkʉŋgʉsana vɛnʉl vɛ ɔsiaa vɛnalɛvɛ kini. 46Akaŋɛ navo ala, “Ɔ̂saŋgɛ kɛ oŋgwe wʉ Ofilikpamɛ ala, ‘Itimbe ɛyamɛ ɛ́lɛ kɛlɛ itimbe iyɛ mɛveli,’#19:46 Azaya 56:7. kpa nɛyel ɛn ikiil kɛ ‘itimbe iyɛ vayiv.’#19:46 Zelemaya 7:11.”
47Atee kɛ ogbendi wʉ Ɛcaa ife ɛmɔnɛmɔ. Vakʉ vɛ ɔsala Ofilikpamɛ, nɛ vɛnʉl vɛ otee obe, nɛ vakʉ vedivi kɛ imbule yɛ vɛ Zu, oliye ɔwaa wʉ váyɛva ɔn. 48Kpa ɔmɔ akol ɔwaa ga, kici yɛ vɛnʉl omwem ɔ̂lɛ ɛtambɛlana kɛ vɛnalɛvɛ yɛ âtee.
Currently Selected:
Luk 19: Iceve-Maci
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
