Luk 20

Ofii Zisɔs fɛsɛ ɛyana ɛna isime

1Ife ɛmɔ, Zisɔs âlɛ kɛ ogbendi wʉ Ɛcaa iyɛ Ofilikpamɛ. Alɛ kɛ iteena vɛnʉl, avɔla vo kpaa ɔtɛlɛ wʉsɛɛ wʉ Ofilikpamɛ. Ndalɛsɛ âlɛ kɛ iteena, vakʉ vɛ ɔsala Ofilikpamɛ, nɛ vɛnʉl vɛ otee obe, zwaŋ nɛ vakʉ vedivi ɔva-kaŋɛ nɔnʉn ala, 2“Ɔnda alɛ we? Ɔnda ana we ɛyana ala wʉ̃yele vɛnalɛvɛ yee?”

3Agɔl navo ala, “De nɛ mɛ́mbaa man mɛ́fii anu. 4Ɛyana iyɛ Zɔnɛ abaptaisa vɛnʉl îsime kɛlɛ kɛ nɛ Ofilikpamɛ aka kɛ nɛ vɛnʉl vayɛmavɛ? Vɔlʉ nini mɛ!”

5Ɔtɔw ɛkaŋɛ iyee vovo ala, “Ikil yɛ sɛvɔl asu ala, ‘Kɛlɛ kɛ nɛ Ofilikpamɛ,’ nɛ áfii asu ala, kâyel naa ɛnɛ sɛlɛ-gɔlʉ ɔtɛlɛ ɔna ga? 6Kpa ikil yɛ sɛkaŋɛ asu ala, ‘Kɛlɛ kɛ nɛ vɛnʉl vayɛmavɛ,’ nɛ vɛnʉl vee omwem ɔ́ta yɛva asu kɛ agon, kici yɛ ôtes ŋgɛ-ŋgɛ ala Zɔnɛ alɛ-lɛ kɛ ɔnʉl wʉ ɔtɔwa kici yɛ Ofilikpamɛ.”

7Asɔ ɔgɔl nɔnʉn ala, “Sɛ̂cil ga.”

8Saŋ Zisɔs akaŋɛ navo ala, “Asɔ ɛmɛ kpaa, mávɔl anu fɛsɛ ɛyana iyɛ mɛyele vɛnalɛvɛ yee isime ga.”

Ɔnʉl wʉ ɔfɛnda nɛ vɛnʉl vɛ oyele okie ɔfaalɛ

9Saŋ Zisɔs afiil kɛ nɛ ɛyɛŋgɛ iyɛ ɛnʉlʉ, atɛfa vo ɛkan yee, “Ɔnʉl ɔmɔ alɛ-lɔ ɔfɛnda wʉ aduŋgu ayɛ oyele mɛsɔlʉmʉ. Ana vɛnʉl vedivi vɛ oyele okie ɔfaalɛ, saŋ amʉwa ozindi. Aca kini anyʉmʉ isim. 10Wʉ kâbi wʉ ɔvɔŋga aduŋgu, asimi tɛma ɔnʉl ɔna wʉ ɔtʉmʉ ala, ɔ̃na ɔn ana aduŋgu. Kpa vɛnʉl vɛ okie ɔfaalɛ vɔɔ ɔkɔl nyɛmbɛlɛ ɔnʉl wɔɔ, saŋ ɔkʉŋgʉsʉ ɔn avovo. 11Asɔ atɛma pe ɔnʉl wʉ ɔtʉmʉ wudi. Ɔwɔɔ kpaa, ɔkɔl nyɛmbɛlɛ ɔn, oyel ɔn icwe, saŋ ɔkʉŋgʉsʉ ɔn avovo. 12Kpa ade ga, akɛ-tɛma pe ɔnʉl wʉ ɔtʉmʉ wudi. Ɔwɔɔ kpaa okes ɔn avavɛ, saŋ osimi ɔn kɛ ɔfɛnda, ɔta kɔ.

13“Saŋ ɔnʉl wʉ alɛ nɛ ɔfɛnda wɔɔ afii ɔmɛnɛ ɔna ala, ‘Aŋgiee máyel naa? Mátɛma wanɛ wamɛ wʉ mɛteŋg. Ikil yidi, ɔn titi nɛ ɔ́cia.’

14“Kpa ɔkambɛlɛ wʉ ɔ̂ta asi kɛ ɔn, ɔkaŋɛ nɛ valindi ala, ‘Owee titi ɛnɛ ife áya ɔwaŋgɛ wee. Sáyɛva ɔn, ndalɛsɛ sásaŋ nɔnʉnʉ.’ 15Asɔ otimbe sime nɔnʉn kɛ ɔfɛnda, ɔyɛva ɔn.”

Zisɔs afii vo ala, “Ini ŋgɛghɛghɛ ɛnɛ nɛ̂tes anu ala ɔnʉl wʉ alɛ nɛ ɔfɛnda wɔɔ áyel nɛ vɛnʉl vɛ okie ɔfaalɛ vɔɔ? 16Mávɔl anu, áva-yɛva vɛnʉl vɛ okie ɔfaalɛ vɔɔ, nɛ ána ɔfɛnda wɔɔ kɛ nɛ vɛnʉl vedivi.”

Ɔkambɛlɛ wʉ vɛnʉl vɔɔ ɔ̂ŋgwa asɔ, okoo ala, “Eey! Ofilikpamɛ x-wagɔla ga!”

17Zisɔs agel vo omwem kɛ isi, saŋ akaŋɛ navo ala, “Ikil yɛ nɛtes asɔ, kâyel naa ɛnɛ ɔsaŋgɛ ala,

“‘Igonu iyɛ vɛnʉl vɛ ɔmaa ɔsɛɛl iyɔɔ,

ɛnɛ ɛlɛ iyɛ kɛ inu-itimbe’#20:17 Oŋgwe wʉ Aciamɛ 118:22.?

18Ɔmɔnɛmɔ wʉ agba kɛ igonu iyɔɔ, nɛ áciavɛl, kpa ɔmɔnɛmɔ wʉ igonu iyɔɔ ɛgba ɔn, nɛ ɛ́gɔ ɔn.”

19Ikil yɛ Zisɔs âmasɛ ɛkan yee, vɛnʉl vɛ otee obe nɛ vakʉ vɛ ɔsala Ofilikpamɛ, olii ɔwaa wʉ vákɔl ɔn ɛpʉmb, kici yɛ ocil ala atɔwa kavo, kpa ɔciaa vɛnʉl vɛ ɔlɛ fini.

Akɛ gel-gel wʉ sáta ɔkpanɛvɛ kɛ nɛ Mɛfʉwa wʉboona?

20Wʉ sɛ ɔ̂za isi iliyena ɔwaa wʉ vákɔl ɔn, ɔtɛma vɛnʉl nyaghɛghɛ vɛ ɔ̂za ndalɛ vɛnʉl vagel-gel. Asɔ ɔvɛl asi kɛ ɔn dili, oliye vákɔl ɔn ɛmʉ, nɛ ɔ́na ɔn kɛ avo ayɛ mɛfʉwa, ndalɛsɛ átune ɔn. 21Asɔ vɛnʉl vɛ ɔtɛma ofii ɔn ala, “Ɔkʉnʉl, sɛ̂cil asu ala, ɔmanɛmanɛ kɛɛ wʉvɔl nɛ kɛɛ wʉte akɛ kɛlɛ gel-gel. Sɛ̂cil kpaa asu ala wʉvɔlā ɔmanɛ nɛ wʉcia isi ga, wʉkaŋā kacɛb ndalɛsɛ Ofilikpamɛ olii. 22Vɔlʉ asu, akɛ gel-gel wʉ sáta ɔkpanɛvɛ kɛ nɛ Mɛfʉwa wʉboona kɛ ɛyaŋ iyɛ Loma?”#20:22 Vɛ Loma ɔlɛ-yɛla Mɛfʉwa ovo wʉboona ala Siza.

23Kpa sɛ Zisɔs âcili ye ayʉmʉ avo, avɔl navo ala, 24“Te nini mɛ ɛŋgɔl yɛ nɛtaa ɔkpanɛvɛ. Isighi nɛ ite iyɛ ɔnda ɛlɛ fini?”

Saŋ ɔgɔl nɔnʉn ala, “Kɛ Mɛfʉwa wʉboona.”

25Zisɔs akaŋɛ navo ala, “Asɔ nɛ nɛ́na kɛ nɛ Mɛfʉwa, kɛɛ alɛ kɛɛ Mɛfʉwa, kpa kɛɛ alɛ kɛɛ Ofilikpamɛ nɛ nɛ́na Ofilikpamɛ.”

26Asɔ ɔmɔ abɛ ɔkɔl ɔn kɛ ɛnalɛ yɛ akaŋɛ kɛ asi ayɛ vɛnʉl ga. Kpa ɔyaaŋɛ kɛ ɔmanɛ kɛɛ âvɔlʉ vo, ɔsaŋ sweŋ.

Vɛnʉl vɛ ôkwo ye vákɛ-sime kɛ ikund

27Vɛnʉl vedivi vɛ osime imbule yɛ Sadusi, ɔva kɛ nɔnʉn. Vɛnʉl vee ôtes ala ɔnʉl akwo, nɛ áma-sime kɛ ikund ga. 28Ofii ala, “Ɔkʉ, Mosis alɛ-na asu obe ala ikil yɛ wanɛŋgwan wʉ ɔnʉlʉ akwo, ɛnɛ asɛɛl okeyi wʉ âmalɛ wanɛ ga, nɛ ɔnʉl wɔɔ áyɔs okeyi wʉ wanɛŋgwan ɔna keŋ, ndalɛsɛ ámal ɔn wanɛ wʉ ácaal ite ɛna.#20:28 Obe akaŋɛ kɛ Deut 25:5-6 ala, ikil yɛ ɔnʉl ayɔs okeyi saŋ okwo, nɛ wanɛŋgwan áyɔs, nɛ ácile acile ndalɛ kɛ iyeli ɛyasɛ ga. 29Aŋgiee, sɛtɛŋɛ asu ala ɔvɔnɛŋgwanɛ ɔlɛ-lɛ ɔtaŋɛnɔfaalɛ. Wʉ isi ayɔs okeyi, kpa akwo wʉ âmalɛ wanɛ ga. 30Wʉ ape ayɔs okeyi wʉ wanɛŋgwan ɔna, ɔn kpaa akwo. 31Saŋ wʉ akɛ-pe wɔɔ ayɔs ɔn, amal wanɛ ga. Kɛlɛ asɔ ɛnɛ kâyeli za kɛ navo omwem ɔtaŋɛnɔfaalɛ. Okwo sɛɛl okeyi wee, amal wanɛ ga. 32Kɛ ɛmasana, okeyi wee ɛŋga kpaa akwo. 33Asɔ vɔlʉ asu: ife yɛ osime kɛ ikund, nɛ álɛ kɛ okeyi wʉ ɔnda, kici yɛ vo omwem ɔlɛ-yɔsʉ ye ɔn fan ɔtalɛ wee?”

34Zisɔs avɔl vo ala, “Vɛnʉl vɛ fan ɔtalɛ wee ɔyɔsā valindi. 35Kpa vɛnʉl vɛ ɔkɛma vɛ vásimi vo kɛ ikund, nɛ ɔ́nyɔl kɛ ɔtalɛ wʉ ɔ́va, ɔmɔ áyɔs ga, 36nɛ ɔmɔ áma-kwo kpem ga, kici yɛ avɛ aŋgiee kɛ ndalɛ vɔzɛnda-gbalgbal. Avɛ aŋgiee kɛ ɔvɔnʉ vɛ Ofilikpamɛ, kici yɛ ôsime kɛ ikund. 37Kpa mɛvɔl anu mɛla, vɛnʉl vakwoonavɛ vásime kɛ ikund keŋ. Mosis ɛŋga ate asɔ fɛsɛ ɛtɛghɛ kɛɛ ɛmaŋga: ayɛla Ɔkʉ Ofilikpamɛ ala, ‘Ofilikpamɛ wʉ Abɛlaham, wʉ Azik nɛ wʉ Ziakɔb,’ wʉ Abɛlaham, Azik, nɛ Ziakɔb ɔlɛ-kwo ye tɛla-tɛla. 38Asɔ awʉ kɛlɛ Ofilikpamɛ wʉ vɛnʉl vakwoonavɛ ga, kpa kɛlɛ wʉ vɛnʉl vayɛmavɛ, kici yɛ vo omwem avɛ ɔyɛma kɛ nɔnʉnʉ.”

39Saŋ vɛnʉl vɛ otee obe vedivi vɛ ɔlɛ fini, ɔgɔl nɔnʉn ala, “Ɔkʉnʉl, wʉkaŋɛ gel-gel.” 40Ɛyʉlʉ ɛcia vo kaka. Ɔmɔ ama-fii pe ɔn ɔtɔɔmba wudi ga.

Klais kɛ ɔnda?

41Zisɔs afii vo ala, “Kâyel naa ɛnɛ vɛnʉl ɔkaŋā ala Klais kɛlɛ wanɛ wʉ Devit? 42Devit ɔn ɛŋga alɛ-saŋgɛ kɛ oŋgwe wʉ Aciamɛ ala,

“‘Ɔkʉ Ofilikpamɛ ɔkaŋɛ nɛ Ɔkʉ wamɛ ala,

“Caal fan nɛ ɛkwavɛ kɛ ovo kaŋgɛghɛ kɛɛ ayana,

43kaka nɛ mɛ́wa vɛnʉl vɛ ɔcɔna we kɛ ikovo iyuwu.”’

44“Devit ayɛla ɔn ala, ‘Ɔkʉ wamɛ.’ Asɔ kâyel naa sɛnɛ Klais áva-lɛ wanɛ ɔna?”

Kɔl nini ayʉmʉ nɛ vɛnʉl vɛ otee obe

45Ndalɛsɛ vɛnʉl omwem ɔtambɛla, Zisɔs afiil kɛ nɛ vɛnʉl vɛ oyeghe nɔnʉn, akaŋɛ ala, 46“Kɔl nini ayʉmʉ nɛ vɛnʉl vɛ otee obe. Kasɛvā vo izendena nɛ akʉndʉ ayazeem nɛ izendena kɛ ise ndalɛsɛ vɛnʉl vátɛfa vo ndalɛ vakʉ ɛnʉlʉ. Oliyē ɛcaalana kɛ ici iyɛ vakʉ kɛ aca ayɛ vɛ Zu nɛ kɛ atuŋunu. 47Kpa ɔyaā oke-kusevi ɔvala kɛ ɔmanɛmanɛ kɛɛ okol. Ovelē kpaa mɛveli vanelenavɛ kɛ izil. Kici yɛ asɔ, ivo ɛcian íbo nɛ ífo.”

Currently Selected:

Luk 20: Iceve-Maci

Highlight

Copy