Lukas 23

Yesus fesi Pilatus nanga Herodes

Mat 27:1-2,11-14; Mrk 15:1-5; Yoh 18:28-38

1Ne a heri grupu opo, dan den tyari Yesus go na fesi Pilatus.#23:1 Den Romeinisma ben poti Pilatus leki granman fu tiri Yudea.

2Dan den bigin kragi En taki: “Un kon si taki a man disi e drai a ede fu a pipel fu unu. A e taigi den taki den no mus pai a grankownu lantimoni èn taki na En na a Mesias, a Kownu.” 3Dan Pilatus aksi En taki: “Na Yu na a Kownu fu den Dyusma?” Yesus piki en taki: “Na leki fa yu taki.” 4Dan Pilatus taigi den prenspari priester nanga a bigi grupu sma drape taki: “Mi no feni no wan sani na a man disi fu strafu En.” 5Ma den tan hori doro taki: “A e sutu faya gi a folku ini heri Yudea nanga a leri fu En. A bigin na Galilea, dan now A doro te dya.” 6Di Pilatus yere san den taki, a aksi efu a man disi na fu Galilea. 7Dan di a kon ferstan taki A kmopo na ini a kontren pe Herodes ben abi fu taki, a seni En go na en. A pisten dati Herodes ben de na Yerusalem.

8Di Herodes si Yesus a ben breiti srefsrefi, bika wan heri pisten kba a ben wani si En. A ben yere fu En, èn a ben angri fu Yesus sori en wan marki. 9Herodes aksi Yesus wan lo sani, ma Yesus no piki en noti. 10Den prenspari priester nanga den sabiman fu Gado wèt ben tnapu e kragi Yesus fayafaya. 11Dan Herodes nanga den srudati fu en, bigin broko Yesus saka èn den teki En leki spot'popki. A weri wan moi krosi gi En, dan a seni En go baka na Pilatus. 12A srefi dei dati, Herodes nanga Pilatus tron mati. Ma fosi dati den ben e libi leki feyanti nanga densrefi.

Yesus kisi a dedestrafu

Mat 27:15-26; Mrk 15:6-15; Yoh 18:39—19:16

13Dan now Pilatus kari den prenspari priester, a folku nanga den edeman fu a folku kon makandra. A taigi den taki: 14“Un tyari a man disi kon na mi tak' A e drai a folku ede. Ma luku, let' na un fesi mi aksi En, ma mi no feni noti fu den sani san un e taki fu En. 15Herodes srefi no feni noti, bika a seni En kon baka gi wi. Luku, A no du noti fu A mus dede. 16Dat'ede mi o wipi En, dan mi o lusu En.” 17Pilatus taki dati bika tapu a Paskafesa, a ben mus lusu wan straf'man gi den.#23:17 Wantu manuscript no abi vers 17. 18Ma den sma bari leki wan man taki: “Puru En na un tapu! Lusu Barabas gi unu!” 19Den ben sroto a man disi fu wan dyugudyugu ini a foto, èn fu di a ben kiri wan sma. 20Dan fu di Pilatus ben wani lusu Yesus, a taki baka nanga den sma. 21Ma den ben e bari taki: “Spikri En na wan kroisi! Spikri En na wan kroisi!” 22Pilatus taki a di fu dri leisi nanga den. A aksi den taki: “Ma sortu ogri a man disi du? Mi no feni noti fu meki taki A mus dede. Dat'ede mi o wipi En, dan mi o lusu En.” 23Ma den sma ben e tan bari bun tranga tak' den mus spikri En na wan kroisi. Te fu kba a ben abi fu yere den. 24Dan Pilatus teki a besroiti fu gi den san den wani. 25A lusu a man san den ben wani, di ben sroto fu wan dyugudyugu èn fu di a ben kiri wan sma. Dan a gi Yesus abra fu den du nanga En san den wani.

Den e tyari Yesus go na a kroisi

Mat 27:32; Mrk 15:21; Yoh 19:17

26Di den e tyari Yesus gwe, den grabu wan man Simon fu a foto Sirena, di ben kmopo na boiti e kon. Dan den poti a kroisi tapu en skowru fu a tyari en na Yesus baka. 27Wan bun bigi grupu fu a folku ben e waka baka Yesus. Ini a grupu yu ben abi furu umasma, di ben e sari èn di ben e krei fu En ede. 28Ma Yesus drai taigi den taki: “Uma fu Yerusalem, un no krei fu Mi ede, ma un krei gi unsrefi nanga den pikin fu unu. 29Bika wan ten o kon pe sma o taki: ‘Den uma di no man kisi pikin, nanga den wan di no kisi pikin ete, abi koloku. Èn den uma di noiti gi pikin bobi, abi koloku tu.’ 30Dan den sma o bigin taigi den bergi taki: ‘Fadon na un tapu!’ Den o taigi den pikin bergi taki: ‘Kibri unu!’ #Hos 10:8; Kon na krin 6:16 31Bika efu na disi den e du nanga a lala udu, san den sa du nanga a drei udu dan?”

Den spikri Yesus na a kroisi

Mat 27:33-44; Mrk 15:22-32; Yoh 19:17-24

32Makandra nanga Yesus, den ben tyari tu abani gwe fu go kiri.

33Di den doro na a presi san den e kari Dede-ede,#23:33 Ini a tongo fu den Romeinisma, den ben kari en: Kalfari. den spikri Yesus na a kroisi. Den spikri den tu abani na wan kroisi tu: wan na En let'anu sei, èn a trawan na En kruktu-anu sei. 34Dan Yesus taki: “P'pa, gi den pardon, bika den no sabi san den e du.” Dan den hari a lot fu prati En krosi. #Psa 22:19 35A folku ben tnapu e luku, èn den edeman fu den ben teki En meki spotu. Den taki: “A ben yepi trawan. We, meki A yepi Ensrefi efu En na a Mesias, efu En na a Wan di Gado teki fu du En wani!” #Psa 22:8 36Den srudati teki En leki spot'popki tu. Den waka kon na En, dan den gi En swa win fu A dringi. #Psa 69:22 37Dan den taki: “Efu Yu na a Kownu fu den Dyusma, yepi Yusrefi!” 38Den ben skrifi poti na En edesei: “Disi na a Kownu fu den Dyusma.” 39Wan fu den abani di ben anga na a kroisi, afrontu En taki: “A no Yu na a Mesias? We, yepi Yusrefi, dan Yu yepi unu tu!” 40Ma a trawan bari en taki: “Yu no e frede Gado, no? Yu kisi a srefi strafu leki En. 41A strafu san un kisi fiti unu, bika disi na a paiman fu san un ben du. Ma a Man disi no du no wan ogri.” 42Dan a abani taki: “Yesus, memre mi te Yu teki Yu presi leki Kownu.”#23:42 Un kan puru a pisi disi so tu: Yesus, memre mi te Yu e kon leki Kownu. 43Yesus piki en taki: “Fu tru Mi e taigi yu: Tide srefi yu sa de nanga Mi na Paradeis.”

A dede fu Yesus

Mat 27:45-56; Mrk 15:33-41; Yoh 19:28-30

44Twarfu yuru ten so a heri kondre kon dungru te leki dri yuru bakadina, 45bika a son ben kon dungru. Dan a garden ini a santa presi priti na tu. #Eks 26:31-33 46Dan Yesus bari nanga tranga sten taki: “P'pa, na ini Yu anu Mi e poti Mi yeye.” Di Yesus taki dati, En bro koti. #Psa 31:6 47Di a kapten fu den srudati si san psa, a gi Gado glori. A taki: “Fu tru, a Man disi ben de wan bun sma.” 48A bigi grupu sma di ben kon fu luku a sani disi, drai go baka na oso di den si san psa. Den ben naki densrefi tapu den borsu fu sori taki den e sari. 49Ala den sma di ben sabi Yesus, ben tnapu farawe e luku san e psa, so tu den uma di ben waka kmopo fu Galilea kon nanga En. #Luk 8:2-3

Den beri Yesus

Mat 27:57-61; Mrk 15:42-47; Yoh 19:38-42

50Yu ben abi wan man Yosef di ben de wan fu den memre fu a grankrutu fu den Dyusma. A ben de wan bun sma èn a ben libi bun ini Gado ai. 51A no ben agri nanga a besroiti san den ben teki èn nanga san den ben du. A man disi ben kmoto fu a Dyu foto Arimatea, èn a ben angri fu a ten doro pe Gado o tiri libisma. 52A go na Pilatus, dan a aksi en a dedeskin fu Yesus. 53Baka di a puru en na a kroisi, a domru en na ini wan linnen krosi, dan a poti en na ini wan grebi san den ben diki ini a bergiskin. Noiti ete wan sma ben beri drape. 54A ben de a dei di den Dyusma ben e meki ala sani klari gi a sabatdei di ben o bigin. 55Den uma di ben kmopo nanga Yesus na Galilea, waka baka Yosef. Den si a grebi èn fa Yosef poti a dedeskin didon na ini. 56Dan den drai go baka na oso èn den poti mirre nanga tra spesrei klari. Ma tapu a sabatdei den rostu soleki fa a wèt e taki. #Eks 20:10; Deu 5:14

Currently Selected:

Lukas 23: SB16

Highlight

Copy