Lukas 22

Yudas seri Yesus

Mat 26:1-5,14-16; Mrk 14:1-2,10-11; Yoh 11:45-53

1A fesa pe den e nyan brede san meki sondro dyesi, ben de krosbei. A fesa dati den e kari Paska. #Eks 12:1-27 2Den prenspari priester nanga den sabiman fu Gado wèt ben e suku wan fasi fu puru Yesus na pasi, bika den ben frede a folku. 3Dan Satan go na ini a ati fu Yudas di den ben e kari Iskariot tu. A ben de wan fu den twarfu man di ben e teki leri fu Yesus. 4Dan so Yudas go taki nanga den prenspari priester nanga den edeman fu den man di e hori wakti gi a tempel, fa a ben kan gi Yesus abra na ini den anu. 5Den ben breiti, èn den agri makandra fu pai en. 6Yudas ben feni en bun. Dan a bigin luru wan bun okasi fu gi Yesus abra na den, sondro tak' a folku sabi.

Ala sani seti fu nyan Paska

Mat 26:17-25; Mrk 14:12-21; Yoh 13:21-30

7So a fesa doro pe den ben e nyan brede san meki sondro dyesi. Dan tapu a dei di den ben mus srakti wan pikin skapu fu nyan Paska, 8Yesus seni Petrus nanga Yohanes fu go du wan sani gi En. A taki: “Un gwe go meki ala sani klari fu un kan nyan a Paska-nyanyan.” 9Den aksi En taki: “Masra, pe Yu wani fu un meki sani klari?” 10Yesus taigi den taki: “Arki. Te un go ini a foto, wan man di e tyari wan kroiki o kon miti unu. Un waka na en baka, go ini a oso pe a e go, 11dan un taigi a man di abi a oso taki: ‘A Meister seni aksi pe a kamra de pe A kan nyan Paska nanga den man di e teki leri fu En.’ 12Dan a man o sori unu wan bigi kamra na sodro, di abi ala sani kba. Drape un mus meki a Paska-nyanyan klari.” 13Na so Petrus nanga Yohanes gwe, èn ala sani waka soleki fa Yesus taki. Dan den meki a Paska-nyanyan klari.

A nyanyan fu memre Yesus

Mat 26:26-30; Mrk 14:22-26; 1Kor 11:23-25

14Di a yuru fu nyan a Paska-nyanyan doro, Yesus nanga den boskopuman fu En teki presi sei a tafra. 15Dan Yesus taigi den taki: “Mi ben angri sote fu nyan a Paska disi nanga unu, fosi Mi bigin nyan pina. 16Fu tru Mi e taigi un taki: Mi no o nyan Paska moro te leki a sani san Paska wani taki kon tru, te Gado o tiri libisma.” 17Dan Yesus teki wan kan, A taki Gado tangi, dan A taki: “Un teki en, dan un alamala dringi fu en. 18Bika Mi e taigi un taki: Bigin fu now Mi no o dringi win moro, te leki a ten doro pe Gado o tiri libisma.” 19Baka dati Yesus teki wan brede. Di A taki Gado tangi, A broko en, dan A gi den man di ben e teki leri fu En. A taki: “Disi na Mi skin, san Mi o gi abra fu un ede. Un mus tan du disi fu memre Mi.” 20Di den kba nyan, Yesus teki wan kan dan A taki: “A kan disi na a nyun ferbontu. A brudu fu Mi san o lon gi unu, o stampu a ferbontu disi. #Yer 31:31-34

21Ma un arki: A sma di o seri Mi, de dya nanga Mi na tafra. #Psa 41:10 22Bika a Manpikin fu Libisma sa dede leki fa a ben skrifi kba na fesi. Ma a man di seri En mus luku bun!” 23Dan den bigin aksi makandra sortu wan fu den sa du sowan sani.

Suma moro hei

Mat 20:25-28; Mrk 10:42-45

24Den man di ben e teki leri fu Yesus bigin krutu nanga makandra sortu wan fu den moro prenspari. #Mat 18:1; Mrk 9:34; Luk 9:46 25Dan Yesus taigi den taki: “Den kownu fu den folku e basi den, èn den wan di abi makti, den sma e kari: sma di e du bun gi a folku. #Mat 20:25-27 26Ma unu no mus de so. A moro prenspari sma na un mindri mus tyari ensrefi leki a moro pikinwan, èn a fesiman fu unu mus tyari ensrefi leki a sma di e dini trawan. #Mat 23:11; Mrk 9:35 27Suma moro prenspari? A sma di de na tafra, noso a sma di e poti a nyanyan tapu a tafra. Na a sma di de na tafra moro prenspari. Ma Mi de na un mindri leki a sma di e dini trawan. #Yoh 13:12-15

28Unu ben de ala ten nanga Mi di tesi ben miti Mi. 29Dan soleki fa Mi P'pa gi Mi a leti fu rigeri, na so Mi e gi unu a srefi leti tu. 30Unu o nyan èn dringi na Mi tafra te Mi sa rigeri leki Kownu, èn unu o sidon na tapu kownusturu fu tiri den twarfu lo fu Israel.”#22:30 Un kan puru a pisi disi so tu: fu krutu den twarfu lo fu Israel.#Mat 19:28

Petrus o taki tak' a no sabi Yesus

Mat 26:31-35; Mrk 14:27-31; Yoh 13:36-38

31Dan Yesus taki: “Simon, Simon, luku bun! Satan kisi primisi fu seki unu leki fa yu e wai graan, fu a kan tesi a bribi fu unu. 32Ma Mi begi gi yu fu yu no lasi bribi. Dan te yu drai kon baka na Mi, yu mus kraka den trawan.” 33Dan Petrus taigi Yesus taki: “Masra, mi de klar'klari fu go nanga Yu na ini straf'oso, èn fu dede srefi nanga Yu!” 34Ma Yesus taki: “Petrus, Mi e taigi yu taki: Fosi kakafowru bari tide, yu o taki dri leisi taki yu no sabi Mi.”

Yesus gi den rai

35Yesus aksi den taki: “Di Mi ben seni unu fu go panya a bun nyunsu, sondro fu un tyari moni, wan saka noso susu, un ben mankeri wan sani?” #Mat 10:9-10; Mrk 6:8-9; Luk 9:3; 10:4 Den piki taki: “Nono, un no ben mankeri noti.” 36Ne Yesus taki: “Ma now, a sma di abi moni mus tyari en, èn a mus tyari wan saka tu. A sma di no abi wan owru mus seri en dyakti fu bai wan. 37Bika a skrifi taki: ‘Den si en leki wan abani,’ èn Mi kan taigi unu taki na dati o psa nanga Mi. Bika san skrifi fu Mi musu psa.” #Yes 53:12 38Dan den man taigi En taki: “Masra, luku tu owru dyaso.” Yesus piki den taki: “A nofo!”

Yesus go begi na Getsemane

Mat 26:36-46; Mrk 14:32-42

39Yesus kmopo na ini Yerusalem, dan A go na a Oleifbergi, soleki fa A ben gwenti. Den man di ben e teki leri fu En go nanga En. 40Di Yesus doro drape A taigi den taki: “Un begi fu un no kon na ini tesi.” 41Dan Yesus kmopo na den mindri, go pikinso moro fara. A kindi na gron dan A begi taki: 42“P'pa, efu Yu wani, puru a kan disi na Mi fesi, meki Mi no nyan a pina disi. Ma a no san Mi wani, ma na san Yu wani musu psa.” 43Dan wan engel kmopo fu heimel kon na En fu gi En krakti. 44Yesus ben frede te fu dede, dan A bigin begi moro tranga èn a sweti fu En ben dropu na gron leki brudu.#22:44 Wantu manuscript no abi den vers 43 nanga 44. 45Di Yesus kba begi, A opo go na den man di ben e teki leri fu En, dan A si taki den fadon na sribi soso fa den ben sari. 46A aksi den taki: “Sanede un e sribi? Un opo, dan un begi fu un no kon na ini tesi.”

Den grabu Yesus

Mat 26:47-56; Mrk 14:43-50; Yoh 18:3-11

47Yesus no ben kba taki ete, di wan bigi grupu sma doro. Yudas, wan fu den twarfu man di ben e teki leri fu Yesus, ben e waka na den fesi. A waka kon na Yesus fu gi En wan bosi. 48Ma Yesus aksi en taki: “Yudas, nanga wan bosi yu e seri a Manpikin fu Libisma?” 49Di den man di ben de nanga Yesus si san ben o psa, den taki: “Masra, un mus teki un owru feti nanga den?” 50Dan wan fu den kapu a let'sei yesi puru fu a knekti fu a granpriester. 51Ma Yesus taki: “A nofo!” A fasi a yesi fu a man, dan a man kon betre. 52Yesus taigi den prenspari priester, den edeman fu den man di e hori wakti gi a tempel, nanga den fesiman fu a folku di kon fu grabu En taki: “Un kon nanga tiki nanga owru, neleki un kon teki wan bigi ogriman. 53Ala dei Mi ben de nanga unu ini a tempel, ma un no grabu Mi. Ma disi na a yuru fu unu, pe a makti fu dungru e rigeri.” #Luk 19:47; 21:37

Petrus taki a no sabi Yesus

Mat 26:57-58,69-75; Mrk 14:53-54,66-72; Yoh 18:12-18,25-27

54Dan den grabu Yesus, tyari En go na a oso fu a granpriester. Petrus ben e waka fara na den baka e kon. 55Dan den man meki wan faya mindrisei fu a dyari, den go sidon nanga makandra èn Petrus go sidon na den mindri. 56Dan wan uma di ben wroko drape, si Petrus sidon sei a faya. A luku Petrus bun, dan a taki: “A man disi ben de nanga Yesus tu.” 57Ma Petrus lei taki: “Uma, mi no sabi En!” 58Wan syatu pisten baka dati, wan tra sma si Petrus, dan a taki: “Yu na wan fu den man di ben e teki leri fu En tu.” Ma Petrus taki: “No, a no mi!” 59Baka wan yuru so, wan tra man ben hori nomonomo e taki: “A tru. A man disi ben de nanga En tu, bika en na fu Galilea.” 60Ma Petrus piki taki: “No, mi no sabi san yu e taki!” A srefi momenti di Petrus ben e taki, wan kakafowru bari. 61Dan Masra drai luku Petrus. Ne Petrus memre taki Masra ben taigi en taki: “Fosi kakafowru bari tide, yu o taki dri leisi taki yu no sabi Mi.” 62Dan Petrus go na dorosei, dan a bari wan krei.

Yesus go na fesi krutu

Mat 26:59-68; Mrk 14:55-65; Yoh 18:19-24

63Den man di ben hori wakti gi Yesus, teki En leki spot'popki, èn den naki En. 64Den tapu En ai nanga wan krosi, dan den taigi En taki: “Sori unu tak' Yu na wan profeiti. Taigi unu suma naki Yu.” 65Dan den taki wan lo tra sani fu afrontu Yesus.

66Di dei opo, a grankrutu fu den Dyusma kon makandra, sobun den prenspari priester nanga den sabiman fu Gado wèt. Den tyari Yesus go na fesi den man disi, 67dan den taigi En taki: “Efu Yu na a Mesias, taigi un dan!” A piki den taki: “Awinsi Mi taigi unu, un no o bribi. 68Èn awinsi Mi aksi un wan sani, un no o piki. 69Ma bigin fu now, a Manpikin fu Libisma o sidon na a let'anu sei fu Gado di abi Makti.” 70Dan den man aksi En taki: “Na Yu na a Manpikin fu Gado dan?” Yesus piki taki: “Na unu srefi e taki tak' Mi na En.” 71Dan den man taki: “Un no abi kotoigi fanowdu moro. Un srefi yere san A taki nanga En eigi mofo!”

Currently Selected:

Lukas 22: SB16

Highlight

Copy