Mataafa Uumata 17

Kodayteeta dawra qara muratta

1A Apraami para kunda sakali' sakali kayeeyye, Yaahiwwe isha tura akkaade ka kide, “Anti an Waaqa we piisa ettaninnooy, awta piisa ana ajajame ka dukaatan kallaado. 2Kodayteeta an otantiyyo ka a xaayti oppa' koda ka sanynyeetaayti kuli akata leksha. 3Apraami ka Waaqa' sakatade ka miinta piitan kaye. Waaqa ka ishi' kide, 4“Kodayteeta an ke olli kodado, atti aappa opa samayta lekayta'e' koddita. 5Qoota aappa opa samayta leka' koddito malla, awwe desa paayyatte maxxaayti Apraami in kidamo ma, Aprihaami kidama #17:5 aprihaami afa iprutinni “aappa opa orra leka” kideeta. Kidama. 6Sanynyeetaaytin koopsha, ikka samayta a leka koddita; nuqussa ka oppa sookan.

7“Otantiyyo isho a xaayti oppa'e ka a sanynyeetaayti ka xelta a deenitto piisa oppa'en haka paraparati kodayteetiyyo qaatisha. Sede nefo, ke ka sanynyeetaayti piisa'en Waaqa kodda. 8Piisse a Kene'aani a amma oppa' kalayta koddite piisa ke isho sanynyeetayti'in haka paraparati' daasha ka anti Waaqaaysho kodda.

9Waaqa ka Aprihaami' kideewwe, “Kodayteese a ana olli qapto, ke ka sanynyeetaayti haka paraparati' tooytaada. 10Kodayteeta a' pisanti tooytaattan, diirta piisa a dawra qara murado. #koda 7:8; Roomi 4:11 11Akka kodayteeta an olli tura qapno' milikkita koddito'e, dawra qara' solbata murattan. 12Inna diirta piisa oto daladaneeyye, kuyaata a settattati a dawra qara muramen. Orxaya tikaaytippa dalade ka karpishshadda a' lake piddatte kuli ka punu sanynyeetaayti in koddinin, piisa a dawra qara muraden. 13Diirta piisa a dawra qara murado; milikkitoose a kodayteetiyyo ka haka paraparati ishin quda caado. 14Diirta a dawra qara in murannin piisa, qoota kodayteetiyyo kamma dape malla, a orriyyo oppaayye alle' seeramo.

15Waaqa ka Aprihaami' kideewwe, “Awwe desa iskatteetaayti'i, “Soora” in kidan ma, “Saara” kide. 16In isheetta' saka ka akka inna kuli ke' xaayto' koda. Asu in isheetta' saka, ikka ayyaapa sawwa lekaati' koddita, nuqussa ka sanynyeetaadi oppa sookan.

17Aprihaami Waaqa' sakatatta'e miinta piitan kaye. Ka xosale ka iskaranxata kide, “Hela nama para dippa pire inna xaaya? Saara ka esse para kunda sakalattati inna xaaya ettanissa?” 18Ka Waaqa' kide, “Kadi Isma'eeliiw ana' kuttissa ikayta.”

19Waaqa ka kide, “Inna! assen, Saara asu dukaatanne inna diirta ke' xaayta. Maxxa innooseneti nefo, “Hisaaqi” #17:19 hisaaqi afa iprutinni, “ixosale” kideeta. Kiita anti ka kodayteeta haka paraparati kallaatto isha ka sanynyeetaadi olli kodada. 20Sede a qoota Isma'eeli desa kaassatte nefo, in dakaye. Isha nefo in saka ka leksha ka akata koopsha ka samayta kutta isha koda; saarra kudanka lakki ka ishoppa sookan. 21Ma xoori kodayteetiyyo innasene a Saara paraanna esse xaayta, Hisaaqi ollin kodada.” 22Waaqa ete Aprihaami olli torraade kammaayye, alle'e kapa tawe.

23Aprihaami ka kuyaasetiiyyiiw innaadi Isma'eeli ka orxaya tikaadippa dalade ka karpishshadda a piddade piisa, hella a diira a tikaadippa dalade piisa akka Waaqa isha ajaje mina'e, dawra qara ishootta' quure. 24Aprihaami a dawra qara muradeeyye, paraadi kunda sakali' sakal. 25Innaadi Isma'eeli'iw a dawra qara muradeeyye, paraadi kudanka sessa. 26Aprihaami ka innaadi Isma'eeli kuyyaata takka opa'ew dawra qara muraden. 27Orxaya tikoppa dalade ka karpishshadda a lake piddade, a diirta kodde piisa isha olliiw dawra qara muraden.

Currently Selected:

Mataafa Uumata 17: MaQu

Highlight

Copy