Mataafa Uumata 16

Dalatta Isima'eeli

1Iskatteeta Apraami Soora hella in xaayne. Isheetta orxayteeta a piita Kipsiti deete Akkaar kidammitto qapta. 2Soora ka Apraami' kiite, “Apraami! xayyo Yaahiwwe ixaaya ana dawreey, into orxayteese xayyo Akkaari olli muke; takka punu isheetta ana hellaa xaayaay. Apraami ka lelase a Soora ishi' lelte oppa' sale. 3Semmalla, Apraami ete piita Kene'aaniti para kudan kallaadeeyye, iskatteetaadi Soora Kipsitteetase Akkaari orxayteetaadi koddite qeette ka akka Apiraami iskatteeta koddito ishi' daasse. 4Apraami ka oori Akkaari olli muke, ikka inna hitte.

Akkaari' xoori ete akka inna qapto issi upnaatteeyye, Soorase ishetta mukinnito qara seesa paayyite ka puyatte. 5Soora ka oori Apraami' kiite, “Puyatamose an puyatammo, ke qara fadama. Orxayteetiyyo anaaw akka olli mukto'e, ke' daashe. Amma ikka ete akka inna hitte upnaatteeyye wetin ana in upnin. Ana isho keppaayye ayno akka dukaata qapo, a Yaahiwwe ino' farato.

6Apraami ka isheetta' kide, “Ipaxaari, isheetta orxayteetaayti ka harkaaytippaaw kittaay, akka ke' aakto koda i''ettanissa.” Soora ka oori Akkaarippa nyoorassa paayyite, ikka tura alle' patte.

7Erkampattoota Yaahiwwe ka koommaytoppa ela takka pora Asooripa anno kapa co kapa'e, Akkaari akkite. 8Ka ishetta' kite, “Akkaari orxayteeta Soora, ata ayshaayye' deeni? Ka ayshopa anni?” Isheetta ka oorisse ka kiite, “Soorase ana mukinnitto turan alle' panni.”

9Erkamppattootase a Yaahiwwe ka isheetta' kiite, “Soora kapopaaw tiitawe, ka wa ke' kiinitta piisa' ajajame.” 10Erkampattoota Yaahiwwe ka kiiteewwe, “Sanynyeetaaytin akata leksha, umma nama ishootta dika in ettansho.

11Innoosene a amma karitoppa qapta, inna diirta, akka xaayta.

Yaahiwwe ipooytaayti dakayeey,

maxxaadi Isma'eeli#16:11 isima'eeli afa Iprutinni, “Waaqa idakayni” kideeta. ishi' kiita ka haleeta.

12Isha' xoori akka pinanta' mina'e a xaadi qara' kallaada.

Ka a nama piisa toorro kodda,

nama piisa ka asseew isha toora.

Isha hellaasso piisa needdada ka xawwaati kallaada.”

13Akkaari ka issi' kiite, “Hela keeton Yaahiwwe a ana akkino akke ka amma ikkiti' ca?” Ka Yaahiwwese isheetta olli torraadeeti' kiite, “Elro'i.” Sede nefo, “Yaahiwwe ana akkino” kideeta. 14Semmalla elase, Qaadesi isho Paarediiyyi arta kara co, “Pi'er-lahay-ro'iy” kidame. Sede nefo, “Ela a Yaahiwwe a caattampayta” kideeta.

15Akkaari ka Apraami'i inna diirta' xaayte. Apraami innaseneti maxxa kode ka kide, “Isma'eeli.” #Kelaati 4:22 16A Akkaari Isma'eeli xaayteeyye, para Apraami kunda setteti' lehi.

Currently Selected:

Mataafa Uumata 16: MaQu

Highlight

Copy