Mataafa Uumata 15

Kodeeta a Waaqa Apraami olli kodade

1Sekkammaayye, nessa Yaahiwwe keleshaatoppan Apraami' dakaade ka kide,

“Apraami, anan kontaleetaaytiiy, in fuuran. Waan ke loqsha nefo, akata kutti.”

2Apraami' xoori i'isha' kide, “Ata Poqallaayyo Waaqqo, anti umma inna an qapooy, maana ana' daassa? Ha namase a Tamaasqo Eli'eseri kidammo tikiyyo lehada. 3Qoota ana hellaa a' daannin malla, orxaytose tikiyyo oppa dalade ana lehada.” 4Sekkammaayye tin, nessase a Yaahiwwe ka Apraami' kide, “Inna a atti' xaayta'e ke lehada diisheey, orxaytaayti Eli'eseri ke in lehaado.” 5Ka oytaappopa isha sookshe ka ishi' kide, “Intoonno moontandela tooyyado ka hikka moonta' dike. Sanynyeetaayti toy, asse lekaattaay.” #Roomi 4:18; Ip 11:12

6Apraami ka Yaahiwwe amane; ikka hanqeelluma ishi' dikamte. #Roomi 4:3; kele 3:6; Yay 2:23

7Ka oori ishi' kide, “Yaahiwwese piitoose are kitto ke' daasha malla, piita Paapilooniti paleeta Uuri kara ke qeede ana.”

8Apraami' xoori ikide, “Poqallaayyo Yaahiwwe, piisse akka xayyo koddito maanannen upnaada?”

9Yaahiwwe ka ishi' kide, “Koromta ka pe'ata ka laaha a para sessa sessa pire ka napaala ka eleela qeede ka ana ishin xooye.” 10Apraami ka akka Waaqa ishi' kide mina'e, dehayshe. Ete horeetase sessa qaleeyye, lakki lakki'i oppa qoote ka olmina desa paka pakan xaaye. Xoori xampira appa in qoonne. 11Allitta ka so'asene dama' deeni; Apraami ka alle qara daanni.

12Ete letta dumteeyye, Apraami mukita kokkoka isha qape, letta ka tukkantaawte, fuura ka isha qapen. #Iyyo 4:13-14 13Yaahiwwe ka ishi' kide, “Sanynyeetaayti akka piita laayyo oppa para dippa afur kalayta koddito ka karpishshuma ka miiddamaan kallaatto upnaado. #sooka 1:1-14; koda 7:6 14Ma xoori anti samaytose karpishshuma ishootta piddo qara'en dapa mura, ishootta ka teyaanta a kuttatin piitoose kara sookan. #sooka 12:40-41; koda 7:7 15Atti' xoori irraakta ka pora fayyaatin tarpita, ikka nakaytan ke mookan. 16Xelta afrattati sanynyeetaayti piisse are kitto oppopa tiitaawta. Sede nefo wa malla asse eeyye' jarta, qoota Amoorata juppoota koda fulan kayatto malla.

17Ete halkeettaawteeyye, opaya apitta kisa' paho isho qayya arta so'asene qootameetiiyyi otantoppan tarpe. 18Sitiiyyi Yaahiwwe ka kodayteeta Apraami olli kodade ka kide, “Kirra Kipsiti paayyatte haka kirrase kutta Efraatiisi kidammo oorto'e, piisse are kitto sanynyeetayti'in daasha. #koda 7:5 19Piisse nefo, piita a Qenaata ka a Qenisaata ka a Qatmoonata 20ka a Hittaata ka a Fersaata ka a Rafayyaata 21ka a Amoorata ka a Keni'aaneta ka a Kerkesaata isho a Iyyapuusata'en ke' daasha.

Currently Selected:

Mataafa Uumata 15: MaQu

Highlight

Copy