Mataafa Uumata 14

Akka Apraami Lootin pahe

1Sitiiyyi Amraafeeli nuqusa piita Paapilooni, Aryoki nuqusa piita Eli'asaari, Kadorla'omeri nuqusa piita Elaami, Tiidi'ali'iw nuqusa piita Kooyemi. 2Ishootta ka nuqusa piita Sodoomi Pera'i ka nuqusa piita a Kamora Piirsha'i ka nuqusa piita Shiini'ipi Ataama ka nuqusa piita Sepooymi Shemeperi ka nuqusa piita Pela'i isase So'ari kidammitto oli torpen. 3Sene piisa naaba Sidiimi a Pakateeta sookitta kidammittooti oli mina de'en ka eeyye oli torpen. 4Ka para kudanka lakki Kadorla'omeri' piddamen ka a kudanka sessattati tiiten.

5Para kudanka afrattatiiyyi, Kadorla'omeri ka nuqussa isha olli ca ka de'en ka pora Astaarooti Qarnaaymi kidammo oppa orra Rafaaymi' puten ka pora Haami kidammo oppa orra Suusi puten ka pora Shaawwe Qiryataaymmi kidammo oppa orra Eemi puten. 6Ka irrootase xaaysho Etoomi kidammitto'e orra Hoori puten ka haka piitase Elfaaraani koommayta kapa kittooti kamma daanen. 7Ka amma tiitaawenew ka piitase Eynimiishpooti qaades kidammitto opa de'en ka piita Amaaleqi piisa ka orrase a Amoora piita Hasasooni taamaari kalo puten.

8Nuqusa a Sodoomi ka nuqusa a Kamoora ka nuqusa a Daama ka nuqusa a Sapooymi ka nuqusa a Pela'i ise So'ari kidammitto ollin naaba Sidiimi karopa oranna sooken. 9Nuqussosen ken, nuqussa afur opa Kadorla'omeri nuqusa piita Elaami ka Tiidi'ali'iw, nuqusa piita Kooyemi Kaamraafeli nuqusa piita Paapilooni, Aryoki nuqusa piita Elasaari torpen. 10Nabase a Sidimi kara xoori, poollowwa lekaya ca; nuqusa a Sodoomi isho a Kamoora ete qahanaaneeyye, poollowwosen karopa sehen; nuqussasene sessa kela hase ka qinda irroota opa qahen. 11Ikka oori wa orra Sodoomi isho a Kamoora' qapa piisa poojen ka damtaaysho kuli saren ka tawen. 12Piita Sodoomitiiyyi, inna inna opa Apraami Looti ka horeetaadi kuli poojen ka ishin tawen.

13Ma xoori nama takka orannappa qahe ka de'e ka Apraami Ipurittaseti' lele. Isha sitiiyyi aftaareta namase a Amoori Mamre kidammo kapa kala. Mamre ka hellaasso Eshkooli ka Aneri akkima orannaappa oli qaarqaarane'e Apraami olli kodeeta qapan. 14Apraami ete akka inna innassoti' poojamen dakayeeyye, hamiyya tikaadi kara dalade ka oranna torpa kaye, nama dippa sessa ka kudanka sette qeede ka nuqussasene afur torpa'e, haka Taaniti kamma xopta dawe. 15Ka orrase' xaadi a oranna oppa qoote ka orxayaadi ollin halkeette nyaapase qara' mud kiden ka torpen; ete puteneeyye, haka piitase Tamaasqooyye kara qutattati kitto ka Hoopa kidammittooti'i kamma daanen. 16Ka horeetase a poojen piisa qara katen ka inna innaassoti Looti ka waadi a poojame piisa ka iskatta ka orra poojame piisa oorshen.

Malkesedeqi akka Apraami'i sake

17Apraami ete Kadorla'omeri isho nuqussasene olli ca pute ka tiitaaweeyye, nuqusa a Sodoomi isha mina'e mina aanayta naabase a nuqusa “Shaawehi” kidammo opa de'e. 18Nuqusa Saalemi malkesedeqi qeesitta Waaqase kutta kuli ka Apraami' damta ka taadeta wayneetaatin de'e. 19Ka Apraami' sake ka kide,

“Waaqase kutta piita ka moonta uume

a Apraami' sako.

20Waaqase kutta paarkaaladdaatti qara' putayma ke' daashe, a kalataysamo.”

Apraami ka poojetase piisa qaraayye, harka kudan oppaayye, takka qara qeede ka malkesedeqi' daashe. #Ip 7:1-10

21Nuqusa Sodoomi i'Apraami kide, “Orriyyo patta ana' daashe ma, wa poojetoppa oorisse piisa teyyado.”

22Apraami ka ishi oorshe ka kide, “Inna! Waaqase kutta piita ka moonta uume, a sede ana qara dawro; 23akka atti a kiinini'i, ‘Ana Apraami teyantayshe’ malla xaynaata taaki teepa xopaan hidannaane nefo an ke qara an teyyado. 24Semmalla wa hellaa ana olli de'e damane maliiyyi anti issi'i we takkan nefo an teyyado; ma xoori moottadaayyo a ana olli awle Aneri ka Eshkooli ka Mamre a qeetaaysho' teyyaden.”

Currently Selected:

Mataafa Uumata 14: MaQu

Highlight

Copy