Mataafa Uumata 13

Akka Apraami isho Looti olkela pasen

1Semmalla Apraami ka Kipsi kara sooke ka iskatteetaadi isho wa qapa piisa ka Looti kuli ollin piita Nekepi opa aanen. 2Apraami ka horeetaadi ka pirrewwa ka Warqewwaan akata teyantoode.

3Sekkammaayye, Nekepiiyyi xa'e ka qinda Peteli opa kotaane ka porase a oppa deyyo arta Peteli isho a Aayi kara' tukkana dishade. 4Ka pora qara' kalisoota kalissa' qupade oppa kaye ka porose oppa Yaahiwwe Waaqaysade.

5Lootise Apraami olli anno, kaharra ka horeeta ka tukkanna kuli qapa. 6Horeetaaysho' qoota dikke koopte ka pora oppa siksadan ka ishootta' qaje malla, ollin kallaatta ishootta in salle; 7sikmaya Apraami isho a Looti nefo ka oli peeqen; sitiiyyi orra Kene'aani ka orra Feriisa'e piitoose oppaayye kala.

8Semmalla Apraami ka Looti kide, “Ino an dala takkaay, artaayyo ka a xaayti ka arta sikmayaayyo ka a sikmayaatti kara'e, oto peqqa xaanaan in paxaaran; 9piita Ipalddiiy, kadan olikela pasna iweyyi; oton kara quta opa' teyyanniiyyi, anti kara kamma opan teyyada; oton ke kara kamma opa teyyanniiyyi, anti kara quta opa in teyyada.”

10Looti ete tooynooyye, piitase Kirra Yurtaanoosi kapan desa kitto akka piita pisha qapto koddite akke; a Yaahiwwe piita Sodoomi isho a Kamoora in patinnin turanne, piita qinda So'aritin kitto, ilaawumaadi akka dulase a Yaahiwwe Kenneti kidammo ka akka piita Kipsi mina pahata. #uuma 2:10 11Looti ka oori qinda piirtotatinni, piitase kirra Yurtaanoosi kapandesa kitto reexade ka oppopa kotaane ka oori olkela pasen. 12Apraami piita Kene'aani oppa'ew hase; Looti' xoori, palewwasene lakkaappa ca oppa'e kuti'e ka haka Sodoomiti pora kokkotaanni. 13Orra Sodoomi xoori akata neequmtan immakaade ka Yaahiwwe tura' juppootaaw kooni.

Apraami akka piita Keprooni opa aane

14Ete Apraami ka Looti oli kela pasen kammaayye, Yaahiwwe i'Apraami' kide, “Me isi kapandesa qinda pisa opa tooye; 15Piisse a akkinitto piisa ke ka sanynyeetayti in haka paraparati' daasha. #koda 7:5 16Sanynyeetaayti akka Tahayta kirra mina'en koda; akka Tahayta kirra dika' ettansammi in kinnin mina'e, sanynyeetaayti dikama in ettansamto. 17Piisse sanynyeetaayti in daashaay, oppa pora aane ka tooye.”

18Apraami ka tukkanaadi putade ka piita Keprooniti qoyra aftaareta Memre co kapa' daapade ka eeppa' pora qara' kalisoota Yaahiwwe' kalsho qupe.

Currently Selected:

Mataafa Uumata 13: MaQu

Highlight

Copy