Mataafa Uumata 12

Waaqa akka Apraami hale

1Yaahiwwe Apraami'i kide, “Piitaayshin ka daltaytaayti ka tika sanynyeetaayshina' diishe ka pora an anti ke akkino opa aane. #koda 7:2-3; Ip 11:8

2Anti samayta kutta'en ke koda ka ke' saka ka maxxaayti nefo kuttisha; akka nama saka' koddita.

3Orra ke' saknooti in saka;

ka a ke jiijno jiija;

ke malla orra piita qara co piisa ka saka akkada.” #kele 3:8

4Apraami ka akka Yaahiwwe ishi' kide mina'e, piita Kaaraaniti xa'e ka aane; sitiiyyi paraadi kunda tappa' ken; Looti' kuli ka isha olliiw aane. 5Apraami ka iskatteetaadi Soora ka inna innassoti Looti ka wa a qapane piisa ka orxaya piita Kaaraaniti isha kapa kala piisa qeede ka piita Kene'aani opa kalen. 6Apraami haka piita Sekemiti qoyrase aftaareta Moore kapa kaynooti'i piitase oppan tarpe. Sitiiyyi orra Kene'aani'i piitoose oppaayye kala. 7Yaahiwwe ka Apraami tura' issi akkishe ka kide, “Piisse are kitton sanynyeetaayti' daasha.” Isha ka Yaahiwwese isha tura akkaade'e, porose oppa pora a qara' kalisoota kalinnaan kode. #koda 7:5; kele 3:16 8Sekkammaayye irootase a Peti'eli qinda dumaata opa diishe ka Aayi qinda piirtota opa diishe ka artaasso kara' tukkana daapade ka eeyye' pora kalisoota Yaahiwwe' kode ka Yaahiwwe' sakatade. 9Apraami ka poroseti xa'e ka Nekepi opa#12:9 nekepi afa iprutinni “piita qinda tupattatin” kitto kideeta. aane.

Waaqa akka piita Kipsiti toola Apraamin pahe

10Sitiiyyi loota piita Kene'aani oppa' de'e; Apiraami ka lootase tura piita Kipsi opa paqe. 11Ete piita kipsi kapa kayeeyye, Soora'e kide, “Atti akka' paxaari in upa; 12orra Kipsi oton ke akkaayye, iskatteetaadi kida ka ana ishsha; ka ke teyyada. 13Semmalla akkan anti' paho'e, ikka ilta fayyatin ana tooyane'e, ‘An alawtaadi kide.’” #uuma 20:2; 26:7

14Apraami ete piita Kipsi kayeeyye, orrase a Kipsi iskatteetase' xaadi akka paxaari akke. 15Soora orra Ferooni kela koda koono kuli ka isheetta akke ka Feri'ooni tura isheeta peepe ka oori tika Fere'ooni opa isheetta qeede. 16Fere'ooni ka Soora malla kide ka kaharra ka lo'alla ka harrewwa ka kaalla ka orxaya a hamiyya ka a iskatta kuli Apraami xasassa' daashe.

17Yaahiwwe' xoori Apraami isho Soora malla kide ka Fere'ooni ka nama tikaadi kara kalo piisa qara erkannaata qeede. 18Fere'ooni ka Apraami hale ka ishi' kide, “Ata atta ana koote? Ka maana malla akka iskatteetaayti koddite ana' lela diisse? 19Maana'e' kiite, ‘Isheetta alawtiyyo’ anti ka allu isheetta hemitta dikade? Ma amma iskatteetaayti sede are kittooy, teyyado ka alle' aane.” 20Fere'ooni ka orxayaadi ajaje ka kide, “Isha ka iskatteetaadi ka horeetaadi piisa piisse oppaayye alle' keessa.”

Currently Selected:

Mataafa Uumata 12: MaQu

Highlight

Copy