SAN MARCOS 9

1Chashnallatac Jesusca:

—Taita Dios imatapish ruhuaclla cashcahuan mandacucta ricungacamanmi, maijan caipi caccunaca manarac huañunguichic. Chaica chashnatacmi canga— nirca.

Jesusca shuctac laya ricurishcamanta

(Mt 17.1-13; Lc 9.28-36)

2Jesusca chashna nishca sucta punzha q'uipami Pedrotapish, Jacobotapish, Juantapish paicunallata pushashpa, shuc jatun urcuman rirca. Chaipimi paicuna ricucucpi, Jesusca shuctac laya tucurca. 3Pai churashcapish yuraclla, jagan nicucmi tucurca. Cai pachapica mashnata alli tacshashpapish, chashna yuracllataca pi mana tacshanchu. 4Chaipica Eliastapish, Moisestapish Jesushuan parlanacuctami paipac yachacuccunaca ricurca. 5Shina ricushpami, Pedroca Jesustaca:

—Yachachic, allitami caiman shamushcanchic. Cunanca quimsa chucllacunatami ruhuashun ninchic, shuctaca canman, shuctaca Moisesman, shuctaca Eliasman— nirca.

6Chai yachacuccunaca munai manchaihuan cashpami, Pedroca pai imata rimacushcatapish mana yacharca. 7Shina rimacucpimi p'uyu llandushpa, paicunataca ñapish quillparca. Chai p'uyu ucumanta shuc rimashca uyarishpaca:

—Caimi ñuca c'uyashca Churi. Pai ima nishcata uyanguichic— nirca.

8Chashna uyaricucllapitac, yachacuccuna tucui muyundicta ricushpaca, pitapish mana ricurcacunachu, Jesusllatami chaipi cacta ricurcacuna.

9Chai urcumanta urai cutimushpaca, Jesusca chai quimsa yachacuccunataca:

—Cancuna cunan ricushcataca, pacta piman huillanguichicman. Huañushcacunapuramanta Runa Tucungapac shamushca*f** ñuca causarishca q'uipaca, huillanguichiclla— nirca.

10Shina nishcataca cazushpami, pimanpish mana huillarcacuna, ashtahuanpish paicunapura parlanacushpami:

—‘Huañushcacunapuramanta causarina’ nishpaca, ¿imatashi nisha ninga?— nishpa tapunacurcacuna. 11Chashna parlanacushpami Jesusmanca:

—¿Ima nishpatac mandashcacunata yachachiccunaca: ‘Ñaupa huillac Eliasracmi shamunga’ nincunayari?— nishpa tapurcacuna.

12Shina tapucpimi, Jesusca paicunataca:

—Ari, tucuita allichingapacca Eliasracmi shamuna can. Shinallatacmi Dios quillcachishcapica: ‘Runa Tucungapac shamushca ñucataca mana ricunachishpa llaquichingacunami’ nicun. 13Ashtahuanpish cancunaman huillanimi: Eliasca ñami shamurca. Paitaca Dios quillcachishcapi nishca shinami p'iñashpa, munashcata ruhuarcacuna— nirca.

Supai japishca huambrata Jesús alliyachishcamanta

(Mt 17.14-20; Lc 9.37-43)

14Jesusca caishuc saquirishca yachacuccunapacman cutimushpaca, paicunata achca gentecuna muyushpa shayacuctami ricurca. Chai yachacuccunahuanca, mandashcacunata yachachiccunami rimaricurcacuna. 15Chai tucui gentecuna Jesús shamucucta ricushpaca, mai cushicushpami “allillachu cangui” ningapac paipacman callpamurcacuna. 16Shina shamucpi Jesusca:

—¿Imatatac paicunahuanca rimarinacucunguichic?— nishpa tapurca.

17Chashna tapucpi, chai gentecunapuramanta shuc runaca Jesusta cashna nirca:

—Yachachic, ñuca churitami cambacman pushamurcani. Paitaca supai japishpami, upayachishpa charicun. 18Chai supaimi maipipish japishpa, pambaman urmachinlla. Shina urmachicpica, shimiman puscuta shitashpa, quirucunapish canirishpa, mana cuyurishpami tigrashpa saquirin. Ñami cambac yachacuccunamanca, ‘supaita llucchishpa cachashpa cuichic’ nishpa mañarcani. Shina nicpipish, paicunaca mana pudircacunachu— nirca.

19Shina nicpi Jesusca:

—¡Aij, mana cric millai gentecunalla! Cancunahuanca, ¿maicamantac yachachishpa causacushalla? ¿Maicamantac cancunahuanca llaquita apacushalla? Huambrata caiman apamuichic— nirca.

20Ña apamucpi Jesusta supai ricushpaca, chai huambrataca chucchuchishpami pambaman urmachirca. Shinallatac huambraca shimiman puscuta shitashpami singurca. 21Chashna tucucpi, Jesusca huambrapac taitataca:

—¿Ima pachamantatac huambraca cashna canyari?— nishpa tapurca.

Shina tapucpi taitaca:

—Huahuamanta pachami cashna causan. 22Shinallatac tauca cutinmi supaica huañuchisha nishpa ninapish, yacupish urmachicunlla. Can ima shina allichi pudishpaca, ñucanchicta llaquishpa ayudaiyari— nirca.

23Shina nicpimi Jesusca:

—¿Canca ima nishpatac ‘ima shinapish allichi pudishpaca’ ninguiyari? Maijanpish tucui shunguhuan crishpaca, imatapish ruhuai pudinguichicmi— nirca.

24Shina nicpimi, chai huambrapac taitaca caparishpa:

—Ari, crinimi. ¡Tucui shunguhuan ashtahuan cringapac ayudai!— nirca.

25Achca gentecuna jundarimucta ricushpami, Jesusca chai supaitaca:

—¡Mana uyac, upata ruhuac supai, ñucami cantaca cai huambramanta llucshi nini! ¡Ama cutin paipi yaicunguichu!— nishpa, sinchita rimarca.

26Jesús chashna rimacpica, supaica caparishpa, huambrata chucchuchishpa llucshirca. Shina llucshicpimi, chai huambraca huañushca shina pambapi saquirirca. Chashna saquiricta ricushpami gentecunaca:

—Ña huañunmi— ninacurcacuna.

27Chashna ninacucpipish, Jesús maquimanta japishpa jatarichicpica, chai huambraca alliyashpa shayarircallami.

28Chai q'uipami Jesusca shuc huasiman yaicurca. Chaipimi paipac yachacuccunaca:

—¿Ima nishpatac ñucanchicca chai supaitaca mana llucchishpa cachai pudircanchic?— nishpa, paillaman tapurcacuna.

29Chashna tapucpi Jesusca:

—Chai shina supaicunataca ayunashpa, Diosman mañashpallami llucchishpa cachai pudinchic— nirca.

“Ñucataca huañuchingacunami” nishpa,

Jesús cutin huillashcamanta

(Mt 17.22-23; Lc 9.43-45)

30Chaimanta llucshishpaca, Galilea llactatami rircacuna. “Ñucanchicca caita ricushcataca, pipish ama yachashca canman” nishpami, Jesusca yuyacurca. 31Chaipica: “Runa Tucungapac shamushca*f** ñucataca runacunaman japichingacunami. Paicunami ñucataca huañuchingacuna. Chashna huañuchicpipish, quimsa punzhapica causarishallami” nishpa, paipac yachacuccunaman yachachicushcamantami, chashnaca yuyacurca.

32Paicunaca imamanta chashna nicushcatapish mana entendircacunachu. Chashna mana entendishpapish, manchashpami mana tapurcacuna.

“¿Maijanshi ashtahuan alli canchic?” ninacushcamanta

(Mt 18.1-5; Lc 9.46-48)

33Jesusca Capernaum pueblomanmi chayarca. Chaiman chayashpaca, ña huasipi cashpami, Jesusca paipac yachacuccunataca:

—Cancunaca, ¿imatatac ñanpica rimanacushpa shamucurcanguichic?— nishpa tapurca.

34Shina tapucpica: “¿Maijanshi ashtahuan alli canchic?” nishpa ñanpi rimanacushcamantami, upalla saquirircacuna. 35Chaimantami Jesús tiyarishpa, paipac chunga ishcai yachacuccunata c'ayashpaca:

—Cancunapuramanta maijanpish ashtahuan punta alli nishca canata munashpaca, tucuimanta yalli yangalla tucushpami, tucuita servina canguichic— nirca.

36Shina nishpami, shuc huahuata paicunapac chaupiman churashpa, chai huahuata Jesús marcashpaca:

37—Maijanpish ñuca shutipi shuc huahuata cai huahuata shina chasquicca, ñucatami chasquin. Shina chasquishpaca, mana ñucallatachu chasquin, ashtahuanpish ñucata cachac Taitatapish chasquinmi— nirca.

“Ñucanchicta mana p'iñacca, ñucanchichuan alli cashcatami

ricuchin” nishcamanta

(Mt 10.42; Lc 9.49-50)

38Shina nicpi Juanca:

—Yachachic, cambac shutipimi shuc runaca gentecunamanta supaicunata llucchishpa cachacucta ricurcanchic. Paica mana ñucanchicpuramanta cacpimi, ‘ama chashna ruhuaichu’ nishpa jarcarcanchic— nirca.

39Chashna nicpi Jesusca:

—Ama jarcanguichicchu, saquichiclla. Maijanpish ñuca shutipi pi mana ruhuaipacta ruhuashpaca, ñucataca mana allichu nishpaca mana rimangachu. 40Maijanpish ñucanchicta mana p'iñacca, ñucanchichuan alli cashcatami ricuchin. 41Cancunaca Quishpichic Cristota c'aticcuna cashcamanta maijanpish cancunaman shuc vaso yacullatapish cucmanca, Taita Diosca japina cashcataca cungami. Chaica chashnatacmi— nirca.

Juchapi mana urmachina cashcamanta

(Mt 18.6-9; Lc 17.1-2)

42Maijanpish cai uchillacuna shina ñucata criccunata ama c'atichun nishpa pandachictaca, jatun cutana rumita paipac cungapi huatashpa, jatun cuchapi shitanami ashtahuan alli canman. 43Chaimanta cambac maqui ima juchapi urmachisha nicpica, p'itishpa shitangui. Ishcai maquindic ucu pacha mana huañuc ninaman rinapac randica, shuclla maquihuan jahua pachapi causangapac yaicunami canmanca ashtahuan alli canga. 44Ucu pachapica c'urucunapish mana huañunchu, ninapish huiñaita rupacunllami. 45Chashnallatac cambac chaqui ima juchaman apasha nicpica, p'itishpa shitangui. Ishcai chaquindic ucu pachapi shitashca canapac randica, shuclla chaquihuan jahua pachapi causangapac yaicunami canmanca ashtahuan alli canga. 46Ucu pachapica c'urucunapish mana huañunchu, ninapish huiñaita rupacunllami. 47Chashnallatac cambac ñahui ima juchapi urmachisha nicpica, surcushpa shitangui. Ishcai ñahuindic ucu pachapi shitashca canapac randica, Taita Dios mandacucmanca shuclla ñahuihuan yaicunami canmanca ashtahuan alli canga. 48Ucu pachapica c'urucunapish mana huañunchu, ninapish huiñaita rupacunllami.

49Tucuimi ninahuan chuyayachishca canga. 50Cachica allimi. Chashna cashpapish gamuyashpaca, ¿ima shinatac cutinca alli canga? Cancunaca caishuc chaishuchuan sumacta causashpa, cachi shina caichic— nirca.

Currently Selected:

SAN MARCOS 9: QXR96

Highlight

Copy