SAN MARCOS 8

Chuscu huaranga yalli gentecunaman Jesús carashcamanta

(Mt 15.32-39)

1Chai punzhacunapica, achca gentecunami Jesuspacman tandanacurcacuna. Paicunaca ima micunallatapish chaipica mana charircacunachu. Chaimantami Jesusca paipac yachacuccunata c'ayashpaca:

2—Cai tucui gentecunami ñucahuanca ña quimsa punzhata caipi cancuna. Paicunaca ima micunallatapish mana charinchu, chaimanta llaquinayanmi. 3Achcacunami caru llactacunamanta shamushcacuna. Paicunaman mana carashpa huasiman cachacpica, yarcaihuan ñahui amsayashpa ñanpi urmangacunami— nirca.

4Shina nicpi yachacuccunaca:

—Cai tucui gentecunaman carangapacca, ¿maipitac micunataca tarishunyari? Caipica pipish mana causanchu— nishpa tapurcacuna.

5Shina nicpi Jesusca:

—Cancunaca, ¿mashna tandatatac charinguichic?— nishpa tapurca.

Shina tapucpimi paipac yachacuccunaca:

—Canchis tandallatami charinchic— nircacuna.

6Shina nicpi Jesusca chai tucui gentecunataca:

—Chai pambapi tiyarichic— nishpami mandarca.

Ña tiyaricpica, Jesusca chai canchis tandata japishpa, Taita Diosta pagui nishpa mañarca. Chai tandataca chaupishpa chaupishpami, tucuiman carachun paipac yachacuccunaman curca. Paicunaca tucui gentecunamanmi cararcacuna. 7Shinallatac paipac yachacuccunaca asha pescadocunatapish charircacunami. Chai pescadocunamantapish Taita Diosta pagui nishpa mañashpami:

—Caicunatapish caraichic— nishpa, Jesusca paipac yachacuccunamanca curca.

8Shina caracpi, chai gentecunaca mana nictami micurcacuna. Paicuna mana micui pudishpa puchuchishcataca, canchis taza jundatami paipac yachacuccunaca tandarcacuna. 9Chai micuccunaca, c'aricunallami chuscu huaranga shina carca. Jesusca paicunaman chashna carashpaca, “caya minchacaman” nishpami cacharca. 10Chai q'uipami, Jesusca paipac yachacuccunandic canoapi tiyarishpa, Dalmanuta llactaman rirca.

Fariseocuna pi mana ruhuaipacta ruhuachun nishcamanta

(Mt 16.1-4; Lc 12.54-56)

11Chai q'uipami fariseocuna*f** shamushpaca, Jesushuan rimari callarircacuna. Ima mana allita nicpica, juchanchina yuyaihuanmi:

—Jahua pachamanta Taita Dios cachashca cashpaca, pi mana ruhuaipacta ruhuashpa ricuchiyari— nircacuna.

12Shina nicpica, Jesusca shungu ucumanta llaquirishpami:

—Cunan punzha causaccunaca, ¿ima nishpatac Taita Dios cachashcata ricungapacca, pi mana ruhuaipactarac ruhuashpa ricuchichun nincunayari? Paicunaca pi mana ruhuaipacta ricushun nishpapish, manatac ricungacunachu, chashnami canga— nirca.

13Shina nishpami, Jesusca fariseocunata chaillapi saquishpa, cutinllatac canoapi tiyarishpa chimbanicman rirca.

Fariseocuna yachachishcaca levadura shina cashcamanta

(Mt 16.5-12)

14Jesuspac yachacuccunaca tandacunata apanata cungarishpami, shuclla tandata apashca canoapi rishca carca. 15Jesusca paipac yachacuccunata cunashpaca:

—Uyaichic, fariseocunapac*f** shinallatac Herodespac levadurataca, pacta chasquinguichicman— nirca.

16Chashna nicpi yachacuccunaca:

—Tandata mana apamushcamantami, paica chashna nicunga— ninacurcacuna.

17Chashna ninacucta yachashpami Jesusca:

—¿Ima nishpatac ‘tandataca manamari apamushcanchic’ nishpa, chai yuyailla canguichic? ¿Manaracchu entendinguichic? ¿Manaracchu alli yuyaita japinguichic? Cancunapac shunguca, ¿chairac sinchiracchu? 18Ñahuita charishpapish, ¿manachu ricunguichic? Rinrita charishpapish, ¿manachu uyanguichic? ¿Manachu yuyaringuichic? 19Pichca tandata pichca huaranga runacunaman ñuca caracpica, chai mana micui pudishpa puchuchishcataca, ¿mashna taza jundatatac tandarcanguichic?— nirca.

Chashna tapucpica:

—Chunga ishcai tazata— nirca.

Shinallatac Jesusca:

20—Shinallatac canchis tandata chuscu huaranga runacunaman ñuca caracpica, chai mana micui pudishpa puchuchishcataca, ¿mashna taza jundatatac tandarcanguichic?— nicpica,

—Canchis taza jundata— nircacuna.

21Chashna nicpi Jesusca:

—¿Chashna ruhuashca jahuachu manarac alli yuyaita japinguichic?— nirca.

Betsaida pueblopi ñahui mana ricuc runata Jesús alliyachishcamanta

22Chai q'uipami, Betsaida puebloman Jesusca paipac yachacuccunandic chayarca. Chaipica, shuc ñahui mana ricuc runata Jesuspacman pushamushpaca:

—Cambac maquihuan tuparishpa, alliyachishpa cuiyari— nishpami, mailla mañarcacuna.

23Shina nicpimi, Jesusca chai ñahui mana ricuc runataca maquimanta aisashpa, pueblomanta llucshishpa pusharca. Shina pushashpami, chai runapac ishcai ñahuipi t'ucata churarca. Shinallatac maquita paipac uma jahuapi churashpaca:

—¿Ñachu imallatapish ricungui?— nishpa tapurca.

24Chashna nicpi, chai ñahui mana ricuc runa ña ricui callarishpaca:

—Gentecunaca sacha yuracunaman ricchami ricurin. Shina cashpapish puricuncunami— nirca.

25Shina nicpi Jesusca cutin chai runapac ñahuipi maquita churacpica, ña alliyashpa, tucuita alli ricurcallami. 26Chashna alliyachishpami Jesusca:

—Cai puebloman ama yaicushpa, pimanpish ama huillashpa cambac huasiman rilla— nishpa cacharca.

Jesusta “Quishpichic Cristomi cangui” nishcamanta

(Mt 16.13-20; Lc 9.18-21)

27Chai q'uipami, Cesarea Filipo pueblo cuchulla llactacunaman Jesusca paipac yachacuccunandic ñanta ricurca. Chashna ricushpami, paipac yachacuccunamanca:

—Gentecunaca, ¿pi cashcatatac ñucataca yuyancuna?— nishpa tapurca.

28Chashna tapucpi paicunaca:

—Maijancunaca: ‘Bautizac Juanmi canga’ nincunami. Maijancunaca: ‘Diosmanta ñaupa huillac Eliasmi canga’ nincunami. Shuccunaca: ‘Diosmanta ñaupa huillaccunapuramanta maijan shucmi canga’ nincunami— nishpami huillarcacuna.

29Shina nicpi Jesusca:

—Cutin cancunaca ñucataca, ¿pi cashcatatac yuyanguichic?— nishpa tapurca.

Shina tapucpi Pedroca:

—Canca Taita Dios cachashca Quishpichic Cristomi cangui— nirca.

30Shina nicpica, Jesusca paipac yachacuccunataca:

—Ñuca pi cashcataca, pimanpish mana huillanachu canguichic— nirca.

“Ñucataca huañuchingacunami” nishpa, Jesús huillashcamanta

(Mt 16.21-28; Lc 9.22-27)

31Jesusca cashna nishpami, paipac yachacuccunamanca yachachi callarirca:

—Runa Tucungapac shamushca*f** ñucaca, achca llaquicunata apanami cani. Curacunata mandac curacunapish, cunac yuyaccunapish, mandashcacunata yachachiccunapish ñucataca manatac ricunachishpa huañuchingacunami. Shina huañuchicpipish, quimsa punzhapica causarishallami— nirca.

32Paipac yachacuccuna alli yachachunmi, chashna alli huillarca. Jesús chashna huillacpimi, Pedroca paillata c'ayashpa, ama chashna tucuchun nishpa rimarca. 33Ashtahuanpish Jesús tigrarishpa, paipac yachacuccunata ricushpa Pedrota p'iñarishpaca:

—¡Caimanta anchuri, Satanás!*f** Canca Taita Dios imata ruhuagricushcataca mana yachanguichu, ashtahuanpish gentecuna yuyashcallatami yuyacungui— nirca.

34Shina nishpami, Jesusca paipac yachacuccunatapish, caishuc gentecunatapish c'ayashpa cashna nirca:

—Maijanpish ñucata c'atisha nishpaca, quiquin causaita mana llaquishpa, cruzpi chacatashpa huañuna shina llaquita apana cashpapish, ñucataca c'atichunlla. 35Maijanpish quiquin causaita llaquicca chingaringami. Maijanpish ñucata c'atishpa, alli huillaita cazushcamanta quiquin causaita mana llaquicca quishpiringami. 36Maijanpish cai pachapi tucui imata charicyashpapish, huiñai causaita chingachishpaca, ¿ima allitac cangayari? 37Chashna charicyashpapish, huiñai causaitaca mana ima shina randi pudingachu. 38Maijanpish cai pachapi Diosta mana cazuc, juchayuc gentecunapac ñaupapi ñucamanta huillanata, shinallatac ñuca huillashcacunamantapish huillanata pingacpica, Runa Tucungapac shamushca*f** ñucapish ñuca Taitapac sumaimana achiclla cashcahuan, paipac sumac jucha illac angelcunahuan achicyachishpa cutimushpaca, chai pingacmantaca pingashami— nirca.

Currently Selected:

SAN MARCOS 8: QXR96

Highlight

Copy