SAN MARCOS 7

“Mana alli yuyaicunami juchayucta ruhuan” nishcamanta

(Mt 15.1-20)

1Chai q'uipami fariseocunapish,*f** mandashcacunata maijan yachachiccunapish Jesuspacman tandanacumurcacuna. Chai yachachiccunaca Jerusalén pueblomantami shamushca carcacuna. 2Chai runacunaca Jesuspac maijan yachacuccuna maquita mana jahuashpa micucucta ricushpami: “Chai yachacuccunaca ‘maquita jahuashpami micuna’ nishpa mandashcata mana cazushpami, chashna micuncuna” nishpa juchanchircacuna. 3(Fariseocunapish, tucui israelcunapish*f** ñaupa taitacuna yachachishcata c'atishcamantaca, paicunapac maquita jahuashpallami micuccuna carca. 4Chashnallatac micunata randishpa cutimushpapish, maquita mana jahuashpaca, mana micuccunachu carca. Shinallatac shuctac yachachishcacunatapish pactachiccunami carca. Shina cashpami vasocunatapish, jarrocunatapish, platocunatapish jahuaccuna, shinallatac camacunatapish tacshaccuna carca). 5Chashna ruhuaccuna cashpami fariseocunapish, mandashcacunata yachachiccunapish Jesusta tapushpaca:

—Ñucanchic ñaupa taitacunaca: ‘Maquita jahuashpami micuna canguichic’ nishcami. Cutin cambac yachacuccunaca, ¿ima nishpatac chashna nishcataca mana cazushpa, maquita mana jahuashpa micuncuna?— nircacuna.

6Shina tapucpimi, Jesusca paicunata cashna nirca:

—¡Cancunaca mishqui shimi, jayac shungucunami canguichic! Diosmanta ñaupa huillac Isaías cancunamanta quillcashpaca, allillatatacmi cashna nishca:

“Cai gentecunaca jahua shimillahuanmi

ñucataca alli nincuna.

Ashtahuanpish paicunapac shunguca

ñucamanta carupimi.

7Paicunaca ñucata alli ningapac tandanacushpapish,

yangallami tandanacuncuna.

Shinallatac paicuna yachachishpapish,

runacuna yachachishcallatami yachachincuna” nishcami.

8Chashna ruhuashpami, cancunaca Taita Dios mandashcacunata saquishpa, runacuna yachachishcallata c'aticunguichic— nirca.

9Shina nishpami, Jesusca caitapish nirca:

—Taita Dios mandashcacunataca yangata ruhuashpami, cancunapac ñaupa taitacuna yachachishcallata cazunguichic. 10Moisés mandashpaca: ‘Cambac taita mamata c'uyangui. Maijanpish taita mamata mana alli nictaca, huañuchishcami canga’ nishcami. 11Ashtahuanpish cancunaca: ‘Taita mama imata mañacpica, “ñuca ima charishcacunaca Corbán nishcallami. Chaimanta imahuan mana ayudai pudinichu” ’ niccunami canguichic. (Corbán nishpaca: ‘Taita Diosman cunami’ nisha ninmi). 12Chashna yachachishpami, taita mamaman imata cuchunca mana saquinguichic. 13Chashna cashpami, Taita Dios mandashcacunata yangata ruhuashpa, cancunapac munaillata caishuc chaishuc yachachinacunguichic. Ima ashtahuan shuc chashna layacunatapish ruhuaccunami canguichic— nirca.

14Shina nishpami, tucui chaipi cac gentecunata c'ayashpa Jesusca:

—Tucui mashna caita uyashpa, alli entendichic: 15Imapish shimita yaicucca mana juchayucta ruhuanchu, ashtahuanpish shungu ucumanta llucshic mana alli yuyaicunami juchayuctaca ruhuan. 16Rinrita chariccunaca, cai ñuca huillashcata alli uyaichic— nirca.

17Chai tucui gentecunata saquishpa, Jesús huasiman yaicucpica, paipac yachacuccunaca:

— Can ñacalla parlacushca ima nisha nishcataca, ¿manachu alli yachachinguiman?— nishpa tapurcacuna.

18Shina tapucpimi, Jesusca paicunataca:

—Cancunapish ñuca huillacushca ima nisha nishcataca, ¿manaracchu entendinguichic? Ima micunapish shimita yaicucca mana juchayucta ruhuactaca, ¿manachu entendinguichic? 19Imapish shimita yaicucca shunguman mana yaicushpami, huicsallaman yaicun. Q'uipamanca llucshinllami— nirca.

Chashna nishpaca, ima micunatapish micunallami nishpami, Jesusca yachachirca. 20Paillatacmi caitapish nirca:

—Shungu ucumanta llucshic, mana alli yuyaicunami juchayuctaca ruhuan. 21Shungu ucumanta millai yuyaicuna llucshicpimi, cazarashca jahua shuc-huan huacllirinacuncuna, manarac cazarashca cashpapish huacllirinacuncuna, huañuchincuna, 22shuhuancuna, yallita charicyana yuyailla cancuna, pitapish llaquichincuna, umancuna, pingai illacpish tucuncuna, shuccuna ama charichun nishpa munancuna, imatapish llullashpa purincuna, quiquinlla alli cashcata yuyancuna, yuyai illacpish tucuncuna. 23Tucui cai millai yuyaicuna shungumanta llucshishpami, juchayuctaca ruhuan— nirca.

Sirofenicia huarmi crishcamanta

(Mt 15.21-28)

24Chai llactamanta rishpaca Tiro llacta, Sidón llactamanmi Jesusca chayarca. Chai llactapica, caiman shamushcataca pipish ama yachashca cachunmi, shuc huasiman yaicurca. Chashna cacpipish gentecunaca Jesús maipi cashcata yachac chayarcacunallatacmi. 25Chaimantami ñapish shuc huarmica Jesús chaipi cacta yachashpa, paipac ñaupaman shamushpaca cungurircalla. Chai huarmica supai japishca shuc huarmi huambratami charirca. 26Chai huarmica Sirofenicia llactapimi causarca. Paica mana israelcunapuramantachu*f** carca. Chai huarmica:

—Ñuca huahuamanta supaita llucchishpa cachashpa cui— nishpami, Jesusmanca mailla mañarca.

27Shina nicpi Jesusca chimbapurashpa parlashpaca:

—Saqui, huahuacunarac micuchun. Huahuacuna micucucta quichushpa, allquitocunaman caranaca mana allichu— nirca.

28Shina nicpi chai huarmica:

—Ari, Apunchic Jesús. Shina cacpipish allquitocunaca huahuacuna micucushpa urmachishcataca micunllami— nirca.

29Shina nicpimi, Jesusca cashna nirca:

—Canca allitami nishcangui. Cambac huahuamantaca, supaica ñami llucshirca. Cunanca huasiman rilla— nishpami cacharca.

30Shina nicpi huasiman rishpaca, paipac huambra ña alli tucushca camapi siricuctami ricurca. Supaica chai huambramantaca ñami llucshishca carca.

Jesusca shuc rinri mana uyac,

c'allu huatarishca runata alliyachishcamanta

31Jesusca Tiro llactamanta cutimushpaca, Sidón llactata rishpa, Decápolis llactata shamushpami, Galilea jatun cuchaman chayamurca. 32Jesús chaipi cacpimi, rinripish mana uyac, shimipish huatarishca runata paipacman pushamushpaca:

—Cai runapac uma jahuapi cambac maquita churashpa, alliyachishpa cui— nishpa mañarcacuna.

33Chashna mañacpimi, Jesusca chaipi cac gentecunamanta chai runallata ashata caruyachishpa, paipac c'allupi t'ucata churashpa, ishcai rinricunapi dedocunata satirca. 34Chashna ruhuashpami, Jesusca jahua pachata huichailla ricushpa, shungupi llaquirishpa:

—¡Efata!— nirca. “Efata” nishpaca: “Pascari” nisha ninmi.

35Chashna nicpica, chai runapac rinricunaca alliyashpa pascarircallami. Huatarishca c'allupish alli tucucpi, ña alli rimarcallami. 36Chashna alliyachishpaca Jesusca:

—Pacta piman huillanguichicman— nishpami, gentecunataca cutin cutin nirca.

Chashna nishcapish, paicunaca ashtahuanmi pimanpish parlashpa purircacuna. 37Chashna parlacpica, tucui mashna munai mancharishpami: “Paica tucuitami allita ruhuan. Rinri mana uyaccunatapish uyachin, shimi mana rimaccunatapish rimachinmi” nircacuna.

Currently Selected:

SAN MARCOS 7: QXR96

Highlight

Copy