SAN MATEO 28

Jesús causarishcamanta

(Mr 16.1-8; Lc 24.1-12; Jn 20.1-10)

1Samana punzha*f** cayandic domingo tutamanta manarac alli achicyacpimi, Magdala pueblomanta María caishuc Mariandic, Jesusta enterrashcata ricugrircacuna. 2Paicuna ña chayacucpimi, cungailla allpa ima mundota chucchurca. Chaica Taita Dios cachashca angelmi jahua pachamanta shamushpa, Jesusta enterrashcata huichcashca rumita anchuchishpa, chai rumi jahuallapitac tiyarirca. 3Chai angelca relampa shina achic nicuc, shinallatac paipac churanapish rasu shina yuranllami carca. 4Chaita ricushpami, soldadocunaca manchaihuan chucchushpa, huañushca shina saquirircacuna. 5Chai huarmicunataca angelca:

—Ama mancharichicchu. Cruzpi chacatashpa huañuchishca Jesusta mashcacushcataca yachanimi. 6Paica mana caipichu. Pai nishca shinallatac, ña causarircami. Shamuichic, paita maipi churashcapi ricunguichic. 7Cunanca utcashpa, paipac yachacuccunamanca: ‘Paica ñami huañushcacunapuramanta causarishca. Cunanca ñami Galilea llactaman cancunapac ñaupata rin. Chaipimi paita ricunguichic’ nishpa huillagrichic. Chaitami ñucaca cancunaman huillana carcani— nirca.

8Chaita uyashpaca, huarmicunaca manchaihuan cashpapish cushicushpami, utcashpa yachacuccunaman huillangapac rircacuna. 9Chashna ricucpimi, Jesusca paicunaman ricurishpa cungailla alabadurca. Chashna ricuricpica, huarmicunaca cushicushpami, Jesuspacman cuchuyashpa chaquipi ucllarishpa, “canca allimari cangui” nircacuna. 10Chashna ruhuacpica Jesusca:

—Ama mancharichicchu. Cunanca richic, ñucata c'atic huauquicunaman huillagrichic: ‘Galilea llactaman rishpa, chaipimi ñucataca ricunguichic’ ninmi, nigrichic— nirca.

Ima tucushcata soldadocuna huillashcamanta

11Huarmicuna huillangapac ringacamanca, Jesusta enterrashca jutcuta cuidac soldadocunapuramanta maijancuna Jerusalén puebloman rishpa, curacunata mandac curacunaman tucui imalla tucushcatami huillarcacuna. 12Chashna huillacpimi, curacunata mandac curacunaca, cunac yuyaccunahuan tandanacushpa parlanacurcacuna. Chaimantami soldadocunamanca achca cullquita cushpa, 13cashna nishpa yuyaita curcacuna:

—‘Ñucanchic suiñucucpimi, tuta paipac yachacuccuna shamushpa, cuerpotaca shuhuashcacuna’ ninguichic. 14Chaita mandac Pilato yachashpa, cancunata llaquichisha nicpica, ñucanchicmi ima shinapish paihuan parlashpa, cancunata llaquichichunca mana saquishun— nircacuna.

15Chashna soldadocuna cullquita japishpaca, paicuna nishca shinallatacmi nircacuna. Chashna nishcataca, cunan punzhacamanmi israelcunaca*f** parlanacuncuna.

Tucuiman huillachun Jesús mingashcamanta

(Mr 16.14-18; Lc 24.36-49; Jn 20.19-23)

16Chunga shuc yachacuccuna rishpaca, Jesús maiman tupachun nishca shinallatacmi, Galilea llactapi tiyac urcuman tuparcacuna. 17Jesusta chaipi ricushpaca, cungurishpami: “Canca allimari cangui” nircacuna. Shina cashpapish maijancunaca: “Mana paichu canga” nishpami yuyacurcacuna.

18Jesús paicunapacman cuchuyashpaca:

—Taita Diosca ñucataca, cai pachapi jahua pachapi tucui imatapish Mandactami ruhuarca. 19Chaimanta tucui cai pachapi causaccunapacman rishpa, ñuca yachacuccuna tucuchun yachachigrichic. Paicunataca Taita Diospac, paipac Churipac, Diospac Espiritupac shutipi bautizanguichic. 20Ñuca cancunaman mandashpa yachachishca shinallatac, paicunapish cazuchun yachachinguichic. Ñucaca cai pacha tucuringacamanmi, cancunahuanca casha— nirca.

Currently Selected:

SAN MATEO 28: QXR96

Highlight

Copy