SAN MATEO 27

Pilatopac ñaupaman Jesusta apashcamanta

1Tutamanta ña pacarimucucpimi, curacunata mandac tucui curacunapish, israelcunata*f** cunac yuyaccunapish Jesusta ima shina huañuchinata yuyarinacurcacuna. 2Shina yuyaita japishpami, Jesusta huatashpa chai llactata mandachun Roma*f** llacta churashca mandac Pilatopacman aparcacuna.

Judas Iscariote huañushcamanta

3Jesusta ña huañuchigricucta yachashpami, pacalla japichic Judasca munai llaquirishpa, c'atushca quimsa chunga cullquitaca curacunata mandac curacunaman, shinallatac cunac yuyaccunaman cutichirca. 4Shina cutichishpaca:

—Manapish juchayuc runata huañuchichun japichishpaca, juchallishcanimi— nirca.

Chashna nicpi paicunaca:

—Chaica ñucanchicmanca, ¿imatac curinyari? Chaitaca canchari ricungui— nircacuna.

5Shina nicpimi, Judasca Diosman mañana huasi ucupi cullquita shitashpa, sipiringapac rirca. 6Curacunata mandac curacuna chai cullquita tandashpaca: “Cai cullquica, shuc runata huañuchingapac randishca cullquimi. Diosman cushca cullquita tandanapica, mana churanachu canchic” nircacuna. 7Shina yuyarinacushpaca, caru llactamanta shamuccuna huañucpi enterrangapac, mangata ruhuacpac allpata randishun nishpami yuyarinacurcacuna. 8Chaimantami chai randishca allpataca, cunancaman Yahuar Allpa nishpa c'ayancuna. 9Chashnami Diosmanta ñaupa huillac Jeremías huillashcaca pactarca. Chai huillashcapica:

“Quimsa chunga cullquitami japircacuna.

Chai cullquitami paimantaca,

israelcunaca cushun nishpa

yuyarinacushca carca.

10Ima shinami Taita Dios

ñucaman nishca shinallatacmi,

chaihuanca mangata ruhuacpac

allpata randircacuna” nishcami.

Pilatopac ñaupapi Jesusta juchanchishcamanta

(Mr 15.2-5; Lc 23.13-35; Jn 18.33-38)

11Mandac Pilatopac ñaupapi Jesús shayacucpimi Pilatoca:

—¿Canchu israelcunata*f** Jatun Mandac cangui?— nishpa tapurca.

Shina nicpi Jesusca:

—Ari, canllatac ña nishcanguimi— nirca.

12Curacunata mandac curacuna shinallatac cunac yuyaccuna juchanchicucpipish, Jesusca imata mana nircachu. 13Chaimantami Pilatoca:

—Canta cai tucuita juchanchicuctaca, ¿manachu uyangui?— nishpa tapurca.

14Shina nicpipish, Jesusca imata mana nircachu. Chaimantami Pilatoca munai mana amirirca.

Jesusta “huañunami cangui” nishcamanta

(Mr 15.6-20; Lc 23.13-25; Jn 18.38—19.16)

15Pascua*f** punzha chayacpi gentecuna munashca shuc prezuta cacharichun nishpa mañacpica, mandac Pilatoca cacharicllami carca. 16Chai punzhacunapica, tucui gentecuna mana alli nishca Barrabás runami prezu tiyacurca. 17Gentecuna tandanacumucpimi Pilatoca:

—Cai ishcaimantaca, ¿maijantatac cacharichun ninguichic? ¿Barrabasta? Mana cashpaca, ¿Quishpichic Cristo nishca Jesusta?— nishpa tapurca.

18Jesustaca allita ruhuac cashcamanta p'iñashpa apamushcatami, Pilatoca ña yacharca. 19Pilato pai mandanapi tiyacucpimi, paipac huarmica:

—Chai allita ruhuac runamantaca, shuc mancharinatami cunan tutaca muscurcani. Paitaca ama imata ruhuanguichu— nishpa, huillachun cacharca.

20Curacunata mandac curacunapish, cunac yuyaccunapish tucui gentecunamanmi: “Barrabastaca cacharichun, Jesustaca chacatachun ninguichic” nishpa, cunashca carca. 21Chaimanta Pilato cutin paicunaman tapushpaca:

—Cai ishcai runacunamantaca, ¿maijantatac cacharichun ninguichic?— nicpi paicunaca:

—Barrabastami cacharichun ninchic— nircacuna.

22Chaita uyashpa Pilatoca:

—Shinashpaca, Quishpichic Cristo nishca Jesustaca, ¿imatatac ruhuachun ninguichic?— nicpi paicunaca:

—¡Paitaca chacatailla!— nishpami, huaicashpa caparircacuna.

23Shina nicpi Pilatoca:

—¿Ima mana allitatac ruhuashcayari?— nishpa tapurca.

Shina nicpipish, paicunaca ashtahuanmi:

—¡Chacatailla!— nishpa caparircacuna.

24Tucui gentecuna mana uyashun nishpa, ashtahuan caparinacui callaricpimi, Pilatoca yacuta apac cachashpa, maquita jahuashpa:

—Cai runa huañushcaca cancuna jahuami canga, ashtahuanpish mana ñuca jahuaca— nirca.

25Shina nicpi paicunaca:

—Ari, pai huañushcaca ñucanchic jahua, ñucanchic huahuacunapac jahuami canga— nircacuna.

26Chashna nicpimi, Pilatoca Barrabasta cacharishpa, Jesustaca azutichishpa cruzpi chacatachun Roma*f** llactamanta soldadocunaman curca. 27Shina cucpimi, soldadocunaca Pilato mandashpa tiyana jatun ucuman Jesusta aparcacuna. Chaimanmi caishuc soldadocunataca, Jesuspac muyundicpi shayarichun c'ayarcacuna. 28Chaipimi soldadocunaca Jesuspac churanata surcuchishpa, amsa puca churanata p'achallichirca. 29Shinallatac casha angumanta ahuashca coronata umapi churachishpa, shuc tauna caspita alli maquiman charichishpami, nic tucushpalla paipac ñaupapi cungurishpa:

—Israelcunata*f** Jatun Mandac, canca allimari cangui— nircacuna.

30Chaimantaca t'ucashpami, paipac tauna caspillahuantac umapi huactarcacuna. 31Chai shina burlashpa asishca q'uipaca, amsa puca churanata surcuchishpami, paipac churanallatatac churachishpa, cruzpi chacatangapac aparcacuna.

Jesusta cruzpi chacatashcamanta

(Mr 15.21-32; Lc 23.26-43; Jn 19.17-27)

32Ña cruzpi chacatangapac ricushpaca, Cirene pueblomanta cac Simón runahuanmi tuparcacuna. Paimanmi Jesusta chacatana cruzta apachishpa rircacuna. 33Chaimantaca Gólgota nishca urcumanmi chayarcacuna. Gólgota nishcaca, Uma Tullu nisha ninmi. 34Chaipimi jayac-huan chapushca vinota ubiachishun nishpa curcacuna. Chashna ruhuacpi, Jesusca ashata mallishpa mana ubiasha nircachu.

35Ña Jesusta cruzpi chacatashca q'uipaca, paipac churanacunata japingapacmi suerteta ruhuarcacuna.#27.35 Shinallatac maijan quillcacunaca: “Chashna ruhuacpica, Diosmanta ñaupa huillaccuna huillashcami pactarca. Chai huillashcapica: ‘Ñuca churanacunataca chaupingacunami. Churanata japingapacca, suertetami ruhuangacuna’ nishcami” nishpami yapachincuna. 36Chai q'uipaca, soldadocunami cuidangapac chaillapitac tiyarircacuna. 37Jesusta chacatashca cruz jahuapica, imamanta huañuchishcata quillcashcatami churarcacuna. Chai quillcashcapica: “Caimi israelcunata Jatun Mandac Jesús” nishcami carca. 38Shinallatac Jesushuan pactami ishcai shuhua runacunatapish, shuctacca alli maquiman, shuctacca lluqui maquiman chacatarcacuna.

39Chaita ric gentecunaca umata cuyuchishpami:

40—Canca: ‘Diosman mañana huasita urmachishpapish, quimsa punzhapica cutin shayachishallami’ nircanguica. Can Diospac Churi cashpaca, ¡chacatashcamanta uricushpa, canllatac quishpiriyari!— nishpami c'amircacuna.

41Shinallatac curacunata mandac curacunapish, mandashcacunata yachachiccunapish, cunac yuyaccunapish chashnallatacmi burlashpa:

42—Shuccunataca quishpichircami. Cunan paillatacca mana quishpiri pudinchu. Israelcunata Jatun Mandac cashpaca, chacatashcamanta uricui, chashna uricucta ricushpaca ñucanchicpish crinchicmanmi. 43Paica: ‘Diospac Churimi cani’ nishpami, Dios yuyailla puricurca. Shina cacpica, Dios c'uyashpaca quishpichinmanmi— nircacuna.

44Jesushuan chacatashca cac shuhua runacunacamanmi paitaca c'amircacuna.

Jesús huañushcamanta

(Mr 15.33-41; Lc 23.44-49; Jn 18.28-30)

45Chaupi punzhamanta quimsa horas chishi tucungacamanmi, tucui cai pachaca amsayarca. 46Chai horasllatacmi Jesusca:

—Elí, Elí, ¿lama sabactani?— nishpa, sinchita caparirca. Cai nishcaca: “Ñuca Dios, ñuca Dios, ¿ima nishpatac ñucallata saquinguiyari?” nisha ninmi.

47Chashna caparicta maijan chaipi caccuna uyashpaca:

—Paica ñaupa huillac Eliastami c'ayacun— nircacuna.

48Jesús chashna caparicta uyashcahuanmi shuc runaca, esponjata apamungapac callparca. Chaitaca jayac vinopi satishpami, caspi puntapi churashpa, Jesús ubiachun shimiman chayachirca. 49Ashtahuanpish shuccunaca:

—Saqui, Eliasca quishpichingapac shamunchu imami, ricungapac— nircacuna.

50Jesusca cutinllatac sinchita caparishpa, paipac espirituta Diosman mingashpaca huañurcallami. 51Chai pachami Diosman mañana huasi ucupi jarcachishca liensoca, jahuamanta uraiman chaupita lliquirirca. Shinallatac allpa chucchucpi, jatun rumicunapish chictarircami. 52Shinallatac huañushcacuna enterrashca jutcucunapish pascarircami. Chashna pascaricpica, Diospaclla caccunaca achcacunami causarircacuna. 53Jesús causarishca q'uipaca chaicunaca Diospaclla cac Jerusalén pueblomanmi shamurcacuna. Chaipimi achca gentecuna ricurcacuna. 54Pasac soldadocunata mandacpish, paihuan cuidaccunapish allpa chucchucpi, shinallatac shuctac ima tucushcacunata ricushpapish, munai manchaihuan cashpami:

—Cai runaca Diospac Churitacmi cashca— nircacuna.

55Chaipica tauca huarmicunami carullamanta ricucurcacuna. Chai huarmicunaca Galilea llactamanta pachami Jesusta ayudashpa shamushca carcacuna. 56Paicunapurapica Magdala pueblomanta Mariapish, Jacobopac, Josepac mama Mariapish, shinallatac Zebedeopac churicunapac mamapish chaipimi carca.

Jesusta enterrashcamanta

(Mr 15.42-47; Lc 23.50-56; Jn 19.38-42)

57Chai punzha ña tutayamucucpica, Arimatea pueblomanta José chayuc runami shamurca. Paipish Jesusta c'aticmi carca. 58Chashna shamushpami, Joseca mandac Pilatopacman rishpa, Jesuspac cuerpota enterrangapac mañarca. Chashna mañacpica, Jesuspac cuerpota cuchun Pilatoca mandarcallami. 59Chashna cucpimi, Joseca Jesuspac cuerpotaca mushuc lienso pañuhuan pillurca. 60Chashna pillushpaca, mushuc cunanlla ruhuashca enterrana jutcupimi churarca. Chai jutcutaca Josellatacmi ruhuachishca carca. Chaipimi Jesuspac cuerpota churashpa, jatun rumihuan jarcashpa rirca. 61Chai jutcu ñaupapica Magdala pueblomanta Mariami, caishuc Mariandic saquirishpa tiyacurcacuna.

Jesusta enterrashca ñaupapi soldadocunata cuidachun

churashcamanta

62Allichirina punzha tucurishca q'uipa, cayandic samana punzhapimi curacunata mandac curacunapish, fariseocunapish*f** Pilatopacman rircacuna. 63Chaiman chayashpaca:

—Jatun mandaclla. Cai llullac runa causacushpaca: ‘Quimsa punzhapica causarishallami’ nishcatami yuyarinchic. 64Chaimanta pai enterrashca jutcuta quimsa punzhacaman cuidachun cachai, pacta yachacuccuna tuta shamushpa, paipac cuerpota shuhuanmancuna. Chashna shuhuashpaca: ‘Jesusca ñami causarishca’ nishpami, gentecunaman crichingacuna. Chashna ruhuashpacarin, punta llullashcata atishpami ashtahuan llullangacuna— nircacuna.

65Chashna nicpi Pilatoca:

—Caipimi, cai soldadocunata cachani. Paicunata pushashpa, ima shinapish alli alli cuidagrichic— nirca.

66Chashna rishpami, ama ima tucuchunca, chai jutcuta huichcashca rumita alli unanchishpa churarcacuna. Shinallatac soldadocunatapish, jutcuta cuidachunmi saquircacuna.

Currently Selected:

SAN MATEO 27: QXR96

Highlight

Copy