SAN MATEO 23

Mandashcacunata yachachiccunata, shinallatac fariseocunata

Jesús rimashcamanta

(Mr 12.38-40; Lc 11.37-54; 20.45-47)

1Chai q'uipami gentecunamanpish, paipac yachacuccunamanpish Jesusca:

2—Mandashcacunata yachachiccunapish, fariseocunapish*f** ñaupa taita Moisés mandac cashca shinallatacmi mandancuna. 3Chaimanta cancunaca ima mandashcata yachachishpaca, cazushpa ruhuanatami canguichic. Ashtahuanpish ama paicuna ruhuacushcata c'atinguichicchu. Paicunaca mandashcacunata pactachinami nicushpapish, paicunallatacmi mana pactachincuna. 4Paicunaca maita mana pi aparipac llashacta apachic shinami, shuccunataca imatapish ruhuachunlla nincuna. Ashtahuanpish paicunaca dedollahuanpish mana tuparisha nic shinami, chaicunataca mana ruhuashun nincuna. 5Gentecuna paicunata Diosta yuyariccunami nichun nishpallami, imatapish ruhuancuna. Paicunaca frentepipish, rigrapipish Dios quillcachishcamanta llucchishpami, jatun apanapi apancuna. Shinallatac churanatapish, suni flecosyuc churanatami churarincuna. 6Paicunaca mai micuicunapipish, punta alli tiyarinapi tiyarinatami munancuna. Tandanacuna huasicunapi tiyarishpapish, allita mashcashpami tiyarinata munancuna. 7Shinallatac ñanpi tupac gentecunapish, tucui c'uyaihuan alabadushpa ‘yachachic’ nishpa c'ayachunmi munancuna.

8Ashtahuanpish cancunaca, shuclla Yachachictami charinguichic. Shinallatac huauquindiccunapura shinami canguichic. Chaimanta gentecuna ‘yachachic’ nishpa c'ayachunca, mana munanachu canguichic. 9Cancunapac taitaca, jahua pachapi tiyac Taita Diosmi. Chaimanta cai pachapica, pitapish ‘taitami’ nishpaca, mana ninachu canguichic. 10Shinallatac cancunata yachachicca, Quishpichic Cristomi. Chaimanta cancunata ‘yachachic’ nishpa c'ayachunca, mana munanachu canguichic. 11Cancunapuramanta maijanpish alli nishcaca, caishuccunata servic cachun. 12Maijanpish ‘allimi cani’ nictaca, mana allichu nishcami canga. Shinallatac ‘mana allichu cani’ nictaca, alli nishcami canga.

13Mishqui shimi, jayac shungu fariseocuna, mandashcacunata yachachiccunalla, ¡aij, imachari tucunguichic! Cancunami jahua pacha Taita Dios mandacucman gentecuna yaicunataca, huichcac shina jarcanguichic. Yaicunata munaccunatapish, yaicuchun mana saquinguichic. Shinashpami cancunallatacpish mana yaicunguichic.#23.13 Shinallatac maijan quillcacunaca versículo 14 tapish churancunami. Chaipica: “Mishqui shimi, jayac shungu fariseocuna, mandashcacunata yachachiccunalla, ¡aij, imachari tucunguichic! Cancunaca viuda huarmicunapac huasicunata quichuccunami canguichic. Chashna ruhuashpaca, unaicamanmi Taita Diosman mañac tucunguichic. Chaimantami cancunaca yallita llaquichishca canguichic” ninmi.

15Mishqui shimi, jayac shungu fariseocuna, mandashcacunata yachachiccunalla, ¡aij, imachari tucunguichic! Cancunaca shuc c'aticta charingapacllami yacucunata, mai caru llactacunata purishpa mashcanguichic. Chashna tarishpaca, cancunata yalli ucu pachaman rinalla cactami ashtahuan ruhuanguichic.

16Ñahui mana ricuc pushaccunalla, ¡aij, imachari tucunguichic! Cancunaca “ ‘Diosman mañana huasimantami nini’ nishpaca, ari nishpa mana pactachishpapish mana imachu” ninguichicmi. Shina cashpapish “ ‘Diosman mañana huasi ucupi tiyac curimantami nini’ nishpaca, imatapish pactachinami can” nishpami yachachinguichic. 17Ñahui mana ricuc yuyai illaccunalla, ¡Diosman mañana huasimi curitapish Diospacllata ruhuan! Chashna cacpica, ¿ima shinatac Diosman mañana huasipi tiyac curica, Diosman mañana huasitaca yalli alli cangayari? 18Shinallatac cancunaca: “ ‘Diosman mañana huasipi cac altarmantami nini’ nishpaca, ari nishpa mana pactachishpapish mana imachu” ninguichicmi. Shina cashpapish, “ ‘altarpi tiyacuc Diosman cushcamantami nini’ nishpami, imatapish pactachinami can” nishpa yachachinguichic. 19Ñahui mana ricuccunalla, ¡altarmi Diosman cushcatapish Diospacllata ruhuan! Chashna cacpica, ¿ima shinatac Diosman cushcaca, altartaca yalli alli cangayari?

20Chaimanta maijanpish imata ruhuangapac ‘cai altarmantami nini’ nishpaca, mana chai altarllamantachu nin, ashtahuanpish chai altarmantapish, shinallatac tucui chaipi tiyacucmantapishmi nin. 21Shinallatac maijanpish imata ruhuangapac ‘Diosman mañana huasimantami nini’ nishpaca, mana Diosman mañana huasillamantachu nin, ashtahuanpish chai huasipi causac Diosmantapishmi nin. 22Shinallatac maijanpish imata ruhuangapac ‘jahua pachamantami nini’ nishpaca, mana jahua pachallamantachu nin, ashtahuanpish Taita Dios mandashpa tiyarinamantapish, shinallatac Taita Diosmantapishmi nin.

23Mishqui shimi, jayac shungu fariseocuna, mandashcacunata yachachiccunalla, ¡aij, imachari tucunguichic! Cancunaca mentatapish, anistapish, cominotapish pasacmanta chungata cuccunami canguichic. Chashna cashpapish Moisés mandashcacunapi ashtahuan ruhuana cashcata yachachishcataca, mana cazunguichicchu. Chaipica cashcata ruhuachun, llaquic cachun, Diosta cric cachun ninmi. Cancunaca cai mandashcacunataca Diosman cunata mana saquishpami, ashtahuan pactachina canguichic. 24Ñahui mana ricuc pushaccuna, cancunaca micunamanta uchilla chuspita anchuchishpa micushpapish, jatun camellotaca*f** mana anchuchishpa millpuc shinami, ashtahuan pactachina mandashcacunataca mana pactachishpa, maijancunallata pactachinguichic.

25Mishqui shimi, jayac shungu fariseocuna, mandashcacunata yachachiccunalla, ¡aij, imachari tucunguichic! Cancunaca vasota, platota jahuallata jahuaccunami canguichic. Shina cashpami, ucutaca shuhuana yuyai, charicyana yuyai junda canguichic. 26Ñahui mana ricuc fariseocunalla, ¡vasotapish, platotapish ucutarac jahuaichic! Shina ruhuacpimi, jahuapish chuya saquiringa.

27Mishqui shimi, jayac shungu fariseocuna, mandashcacunata yachachiccunalla, ¡aij, imachari tucunguichic! Cancunaca huañushcacunata enterrashca jutcu shinami, jahuallataca sumaimana allichishca, ucutaca huañushca tullucuna imapish mana allicuna, ashnacuc shina canguichic. 28Chashna cashpami, gentecunapac ricuipica cashcata ruhuaccuna shina ricuringuichic, ashtahuanpish ucu shungupica llullana yuyai, imapish shuctac mana alli mapa yuyaicuna junda canguichic.

29Mishqui shimi, jayac shungu fariseocuna, mandashcacunata yachachiccunalla, ¡aij, imachari tucunguichic! Cancunaca Diosmanta ñaupa huillaccunata enterrashca bovedacunatapish, cashcata ruhuac ñaupa gentecuna huañushcata yuyaringapac ruhuashca pircacunatapish allichishpa, alli niccunami canguichic. 30Shina ruhuashpaca: ‘Ñaupa taitacuna causai punzhacunapi ñucanchic causacushca cashpaca, Diosmanta ñaupa huillaccunataca mana huañuchinchicmanchu carcanchic’ ninguichicmi. 31Chashna nishpaca, cancunallatacmi Diosmanta ñaupa huillaccunata huañuchiccunapac huahuacuna cashcataca huillacunguichic. 32Cancunapac ñaupa taitacuna imata ruhuacushcataca, ¡cunan punzhapipish ruhuashpa tucuchichicyari! 33Cancunaca culebra shina millaicunapac huahuacuna cashpami, cancunapish culebra shina millaicuna canguichic. Chashna cashpaca, ¡maitatac ucu pacha ninaman shitashca canamantaca quishpiringuichicyari!

34Chaimantami Diosmanta huillaccunatapish, alli yachaccunatapish, shinallatac yachachiccunatapish cachagrini. Chashna cachacpipish, cancunaca maijancunataca chacatashpa huañuchinguichicmi. Maijancunataca tandanacuna huasicunapimi macashpa, pueblo pueblota llaquichishpa puringuichic. 35Chashna cashcata ruhuac gentecunata huañuchishcamantaca, cancunatami Taita Diosca llaquichinga. Abelta huañuchishca yahuarmanta callarishpa, Berequiaspac churi Zacariasta huañuchishca yahuarcamanmi, cancunataca taripashpa llaquichinga. Zacariastaca, Diosman mañana huasi ucupi tiyac altar ladopimi huañuchircacuna. 36Tucui chai mana allita ruhuashcamantaca, cunan punzhapi causac gentecunatami Taita Diosca llaquichinga. Chaica chashnatacmi canga.

Jerusalén pueblopi causaccunata llaquishpa,

Jesús huacashcamanta

37¡Aij, Jerusalenpi causaccunalla! Diosmanta ñaupa huillaccunata huañuchiccunami canguichic. Shinallatac Diosmanta huillachun cachashcacunatapish, rumicunahuan shitaccunami canguichic. Cancunataca tauca cutinmi mama huallpa huahuacunata c'uyashpa ucllac shina, tandachisha nircani. Chashna tandachisha nicucpipish, cancunaca mana uyarcanguichicchu. 38Chaimantami cancunapac huasica shitashca saquiringa. 39Cancunamanca ninimi: Cunanmanta pacha Taita Dios cachashca ñuca cutimucpi ‘allimari cangui’ ningacaman, ñucataca manatac ricunguichicchu— nirca.

Currently Selected:

SAN MATEO 23: QXR96

Highlight

Copy