SAN MATEO 22
22
Jesús bodamanta chimbapurashpa parlashcamanta
(Lc 14.15-24)
1Cutinllatacmi Jesusca, yuyaita japina parlohuan cashna nirca:
2—Jahua pacha Taita Dios mandacucca, shuc jatun mandac paipac churita cazarachicushpa, 3paipac serviccunata bodaman c'ayashcacunata c'ayac cachacpi, mana shamusha nic shinami. 4Mana shamusha nicpica, cutinllatacmi caishuc serviccunata cashna nishpa cacharca: ‘Jatun micuita ruhuangapacca, jatun huagracunatapish, shuctac huira animalcunatapish huañuchichun mandarcanimi. Ñami tucui allichishca. Chaimanta bodaman shamuichic nicunmi nigrichic’ nishpa cacharca.
5Chashna cutin c'ayacpipish, mana uyashpami maijancunaca chagraman rircacuna. Shinallatac maijancunaca c'atunamanmi rircacuna. 6Shinallatac shuccunaca, jatun mandac c'ayac cachashca serviccunataca japishpami, macashpa huañuchircacuna. 7Chashna ruhuacpimi, jatun mandacca munai p'iñarishpa, chai huañuchic runacunataca huañuchishpa, chai pueblota rupachichun soldadocunata mandashpa cacharca. 8Chai q'uipami jatun mandacca, paita serviccunataca: ‘Ñami bodaca tucui allichishca. C'ayashcacuna mana shamusha nishcamantaca, paicunallatacmi mana shamuipac cashcata ricuchincuna. 9Chaimanta cunan cancunaca mai ñancunaman llucshishpa, pipish ricuricta pushamuichic’ nishpa cacharca.
10Chashna cachacpi serviccunaca mai ñancunaman llucshishpa, pipish ricurictami alli cachun, mana alli cachun bodaman c'ayamurcacuna. Chashnami boda huasipica, gentecunaca jundarca. 11Chashna huasipi junda cacpimi, jatun mandac ucuman yaicushpaca, mana bodapi churarina churanata churashca runata ricurca. 12Chaita ricushpaca: ‘Uyai. ¿Ima nishpatac canca mana bodapi churarina churanata churashca caipica cangui?’ nirca. Chashna nicpi chai runaca upallami carca. 13Chaimantami jatun mandacca miza allichiccunata cashna nirca: ‘Cai runataca chaqui maquita huatashpa, canzhaman llucchishpa purapi shitaichic. Chaipica huacaihuan quiru canirinami tiyan’ nirca. 14Cai parlo nishca shinallatac c'ayashcacunaca achcami, acllashcacunaca ashallami— nishpami, Jesusca yachachirca.
“¿Impuestotaca paganachu canchic?” nishpa,
Jesusman tapushcamanta
(Mr 12.13-17; Lc 20.20-26)
15Chai q'uipami fariseocunaca,*f** Jesusman imata tapucpi ima mana allita nicpica juchanchishun nishpa, tandanacushpa yuyarircacuna. 16Chashna yuyarishpami, paicunapac yachacuccunapuramanta, shinallatac mandac Herodespac runacunapuramanta tapuchun cacharcacuna. Shina cachacpi tapuccuna rishpaca:
—Yachachiclla. Canca imapish cashcallatami yachachingui, shinallatac Taita Dios munashca shina causachunpish, allimi yachachingui. Canca pitapish mana manchashpa, mana piman tucushpa yachachic cashcatami yachanchic. 17Chaimantami cashna tapuc shamunchic: Roma*f** llactata jatun mandac Cesarman*f** impuestotaca paganaca, ¿mandashcapi nishca shinaca alli canga? Mana cashpaca, ¿manachu alli canga?— nishpa tapurcacuna.
18Shina tapucpi Jesusca, paicuna mana alli yuyaihuan tapuc shamushcata yachashpami paicunataca:
—Mishqui shimi jayac shungucuna, ¿ima nishpatac ñucataca pandachishun nicunguichic? 19Impuestota pagana cullquita ricuchichic— nicpica, shuc denario*f** cullquitami ricuchircacuna.
20Chashna ricuchicpi Jesusca:
—Cai cullquipica, ¿pipac ñahuitac, shinallatac pipac shutitac tiyacun?— nishpa tapurca.
21Chashna tapucpimi paicunaca:
—Jatun mandac Cesarpacmi— nircacuna.
Shina nicpi Jesusca:
—Shinashpaca jatun mandac Cesarpac cashcataca, jatun mandac Cesarllamantac cuichic, shinallatac Diospac cashcataca, Diosllamantac cuichic— nirca.
22Chaita uyashpaca, mana amirishpami upalla rircacunalla.
Huañushcacuna causarinata mana criccuna Jesusman tapushcamanta
(Mr 12.18-27; Lc 20.27-40)
23Chai punzhallapitacmi, huañushcacuna causarinata mana cric maijan saduceocunaca*f** Jesusman cashna nishpa tapuc shamurcacuna:
24—Yachachic, ñaupa taita Moisés ñucanchicta mandashpaca: ‘Shuc runa manarac huahuata charishpa huañucpica, chai huañushcapac huauquillatac chai saquirishca viuda huarmihuan cazarashpa, huañushca huauquipac randi huahuata charichun’ nishcami. 25Ñucanchicpurapica, canchis huauquindicmi causarcacuna. Chai huauquindiccunamanta punta huauqui cazarashpaca, manarac huahuata charishpami huañurca. Saquiric q'uipa huauquimi chai huarmihuanca cazararca. 26Chashnallatacmi q'uipa huauquipish, ashtahuan q'uipa huauquipish tucurca. Tucui canchis huauquindiccunatacmi chashna tucurca. 27Chai tucui huañushca q'uipaca, chai huarmipish huañurcami. 28Chashna canchis huauquindiccunahuantac cazarashca cashcamantaca, huañushcacuna causarina punzhapica, ¿maijanpac huarmitac canga?— nircacuna.
29Chashna nicpi Jesusca:
—Cancunaca Dios quillcachishcapi ima nicushcatapish, Taita Dios imatapish ruhuaclla cashcatapish mana yachashpami, yalli pandaricunguichic. 30Huañushcacuna causarina punzhapica, c'aricunapish, huarmicunapish mana cazarangacunachu, ashtahuanpish paicunaca jahua pachapi cac angelcuna shinami cangacuna. 31Huañushcacuna causarinamanta Taita Dios cancunaman huillashcataca, ¿manachu ricushcanguichic? Pai huillashpaca: 32‘Ñucaca Abrahampac, Isaacpac, Jacobopac Diosmi cani’ nishcami. Taita Diosca mana huañushcacunapac Dioschu, ashtahuanpish causaccunapac Diosmi— nirca.
33Jesús chashna yachachishcata gentecuna uyashpaca, munai mana amirishpami saquirircacuna.
“¿Mandashcacunamanta maijantac ashtahuan yalli cazunaca?”
nishcamanta
(Mr 12.28-34)
34Saduceocunata*f** Jesús upallachishcata yachashpami, fariseocunaca*f** paicunapura tandanacurcacuna. 35Paicunapuramanta mandashcacunata shuc yachachicmi, Jesusta pandachingaraicu:
36—Yachachiclla, Moisés mandashcacunamantaca, ¿maijantac ashtahuan yalli cazunaca?— nishpa tapurca.
37Chashna tapucpi Jesusca:
—‘Canta Mandac Taita Diosta tucui shunguhuan, tucui almahuan, tucui yuyaihuan c'uyangui’ ninmi. 38Cai mandashcami tucuimanta yalli ashtahuan cazunaca. 39Q'uipa mandashcapish, chai shinallatacmi: ‘Can ima shinami c'uyaringui, chashnallatac shuccunatapish c'uyangui’ ninmi. 40Cai ishcai mandashcacunami Moisés mandashcacunamanta, shinallatac Diosmanta ñaupa huillaccuna huillashcamantapish callari shinaca can— nirca.
Cristoca mandac Davidtapish Mandac cashcamanta
(Mr 12.35-37; Lc 20.41-44)
41Fariseocuna*f** chaipi tandanacushca cacpiracmi Jesusca:
42—Quishpichic Cristoca, ¿pipac aillupura cashcatatac yuyanguichic?— nishpa tapucpi, paicunaca:
—Ñaupa mandac Davidpac aillupuramantami can— nircacuna.
43Chashna nicpi Jesusca:
—Shinashpaca, ¿ima nishpatac Davidllatac Diospac Espíritu yuyaita cucpica, Quishpichic Cristota ‘ñucata Mandac’ nirca? David huillashpaca:
44‘Mandac Taita Diosca
ñucata Mandactaca:
“Canta p'iñaccunata cambac chaqui
sarunapi churangacaman,
canca ñuca alli maquiman
tiyacuilla” ninmi’ nishcami.
45Davidllatac ‘ñucata Mandac’ nicpica, ¿ima shinatac Cristoca Davidpac aillupurallaca cangayari?— nirca.
46Jesús chashna nicpica, imata mana cutichircacunachu. Chai punzhamanta pachami pi ashtahuan imata mana tapurcacuna.
Currently Selected:
SAN MATEO 22: QXR96
Highlight
Share
Copy
Want to have your highlights saved across all your devices? Sign up or sign in
Quichua Cañar Nuevo Testamento © United Bible Societies in Ecuador, 1996.
