SAN MATEO 17

Jesús shuctac laya tucushpa ricurishcamanta

(Mr 9.2-13; Lc 9.28-36)

1Sucta punzha q'uipami, Jesusca Pedrotapish, huauquindicpura Jacobotapish, Juantapish pushashpa, shuc jatun urcuman rirca. 2Chaipimi Jesusca shuctac laya tucushpa, ñahuica inti shina jagan nicuc, churanaca luz shina yuranlla achicyachicuc paicunapac ñaupapi ricurirca. 3Chaipica ñaupa taita Moisespish, ñaupa huillac Eliaspish, Jesushuan parlanacucuctami ricurcacuna. 4Chaimantami Jesusta Pedroca:

—Apunchic Jesús, ñucanchicca allimi caiman shamushcanchic. Can munacpica, ñucaca quimsa chucllata ruhuasha nini, shuctaca canman, shuctaca Moisesman, shuctaca Eliasman— nirca.

5Pedro chashna nicucpiracmi, yuranlla p'uyu paicunataca quillparca. Chai p'uyu ucumanta shuc rimashca uyarishpaca:

—Caimi ñuca c'uyashca Churi. Paillami ñucataca cushichin. Pai ima nishcata uyanguichic— nirca.

6Yachacuccuna chaita uyashpaca, manchaihuanmi cumurishpa, allpacaman cumurircacuna. 7Shina mancharicucpi Jesús cuchuyashpa tuparishpaca:

—Jatarichic, ama mancharichicchu— nirca.

8Paicuna ña jatarishpa ricucpica, pi mana ricurircachu. Chaipica Jesusllami cashca carca.

9Jesús yachacuccunandic urcumanta cutishpaca:

—Cai cancuna ricushcataca, Runa Tucungapac shamushca*f** ñuca huañushpa, causaringacaman pacta piman huillanguichicman— nishpami mandarca.

10Chaimantami yachacuccuna Jesusman tapushpaca:

—¿Imamantatac mandashcacunata yachachiccunaca: ‘Eliasracmi shamunga’ nincunayari?— nircacuna.

11Shina nicpi Jesusca:

—Ari, Eliasracmi shamunga. Pai shamushpami, tucuita allichinga. 12Shina cacpipish ñucaca cashnami nini: Eliasca ñami shamurca. Chashna shamucpipish, paita mana ricsishpami p'iñashpa, paicuna munashcata ruhuarcacuna. Shinallatacmi Runa Tucungapac shamushca ñucapish, paicunapac maquipi llaquita apana cani— nirca.

13Jesús chashna nicpimi, yachacuccunaca Bautizac Juanmanta parlacushcata entendircacuna.

Supai japishca huambrata Jesús alliyachishcamanta

(Mr 9.14-29; Lc 9.37-43)

14Jesús paipac yachacuccunandic gentecunapacman shamucpica, shuc runa paipac ñaupaman shamushpa, cungurishpaca:

15—Apunchic Jesús, ñuca churita llaquiyari. Paica yuyaita chingachic ung:uihuanmi yacupi, ninapi urmashpa, munai llaquita apacunlla. 16Cambac yachacuccunapacmanca, ñami apamushpa ricuchircani, ashtahuanpish paicunaca mana alliyachi pudircacunachu— nirca.

17Chaimantami Jesusca:

—¡Aij, mana cric millai gentecunalla! ¿Ima punzhacamantac cancunamanca yachachishpa causacushalla? ¿Maicamanchari cancunahuanca llaquita apacushalla? Huambrata caiman apamuichic— nirca.

18Ña apamucpica, Jesusca sinchita rimashpami, chai huambramanta supaitaca llucchishpa cacharca. Chashna ruhuacpica, chai huambraca ña alli tucurcallami. 19Chai q'uipami yachacuccuna Jesuspacman cuchuyashpaca:

—¿Ima nishpatac ñucanchicca supaita mana llucchi pudircanchic?— nishpa, paillaman tapurcacuna.

20Shina nicpi Jesusca:

—Cancunaca ñucata mana tucui shunguhuan cric cashcamantami, mana llucchi pudircanguichic. Cancuna crishca shuc uchilla mostaza muyu shinallapish cacpica, cai urcuta ‘caimanta anchurishpa, chimbapi tiyarigri’ nicpica, anchurishpa chaipi tiyarigrinmanllami. Chai shina ashallatapish crishpaca, imapish ruhuanguichicmanmi. Chaica chashnatacmi can— nirca.#17.20 Shinallatac maijan quillcacunaca versículo 21 tapish churancunami. Chaipica: “Cai shina supaicunataca ayunashpa, Taita Diosman mañashpallami llucchina” ninmi.

Jesús pai huañuna cashcata cutin huillashcamanta

(Mr 9.30-32; Lc 9.43-45)

22Galilea llactata Jesús paipac yachacuccunahuan puricushpaca:

—Runa Tucungapac shamushca*f** ñucataca, runacunaman japichingacunami. 23Paicunami ñucataca huañuchingacuna. Shina huañuchicpipish, quimsa punzhapica causarishallami— nirca.

Chaita uyashpami, yachacuccunaca munai llaquirirca.

Diosman mañana huasimanta impuestota cushcamanta

24Jesús paipac yachacuccunandic Capernaum puebloman chayacpica, Diosman mañana huasimanta impuestota japiccuna Pedropacman chayarishpaca:

—Cancunapac yachachicca, ¿Diosman mañana huasimanta impuestota cunllachu?— nishpa tapurcacuna.

25Shina nicpi Pedroca:

—Ari, cunllami— nirca.

Chashna nishca q'uipa Pedro huasiman chayacpica, Jesusracmi Pedroman tapushpaca:

—¿Canca imatatac yuyangui, Simón? Cai pacha mandaccunaca, ¿paicuna mandashpa causaccunamantachu impuestotaca chasquincuna? Mana cashpaca, ¿carumanta shamuccunamantachu chasquincuna?— nirca.

26Shina nicpi Pedroca:

—Carumanta shamuccunallamantami chasquincuna— nirca.

Shina nicpi Jesusca:

—Shinashpaca, quiquin llactapi causaccunaca mana paganachu canchic. 27Ashtahuanpish impuestota japiccunata mana p'iñachingapacca, cuchaman ri. Chaiman chayashpaca, anzuelota shitangui. Maijan pescadoracmi japi tucun, chaipac shimipimi cullquita taringui. Chai cullquita apashpa, impuestota japiccunaman canmantapish, ñucamantapish cugringui— nirca.

Currently Selected:

SAN MATEO 17: QXR96

Highlight

Copy