SAN MATEO 18
18
“¿Maijanshi ashtahuan alli canchic?” ninacushcamanta
(Mr 9.33-37; Lc 9.46)
1Chai pachallatacmi yachacuccuna Jesuspacman cuchuyashpaca:
—Jahua pacha Taita Dios mandacucpica, ¿maijanshi ashtahuan alli nishca canchic?— nishpa tapunacurcacuna.
2Chashna nicpi Jesusca shuc huahuata c'ayashpa, paicunapac ñaupapi churashpami:
3—Cancunaca huahuacuna yuyaita japicuc shina, mushuc yuyaita mana japishpaca, jahua pacha Taita Dios mandacucmanca mana yaicunguichicchu. Chaica chashnatacmi canga. 4Maijanpish yangalla tucushpa cai huahua shina cacmi, jahua pacha Taita Dios mandacucpica tucuimanta yalli alli nishcaca canga. 5Maijanpish ñuca shutipi shuc huahuata chasquicca, cai huahuata shina ñucatami chasquin.
Juchapi mana urmachina cashcamanta
(Mr 9.42-48; Lc 17.1-2)
6Maijanpish cai uchilla huahua shina ñucata c'aticcunata juchapi urmachictaca, shuc jatun cutana rumita cungapi huatashpa, jatun cucha chaupipi shitanami ashtahuan alli canman. 7Cai pachapica, imapish juchapi urmachic munaicunaca tiyangallatacmi. Shina cacpipish maijanpish juchapi urmachicca, ¡aij, imachari tucunga!
8Chaimanta cambac maqui, cambac chaqui ima juchapi urmachisha nicpica, p'itishpa shitangui. Ishcai chaquindic, ishcai maquindic mana huañuc ninapi shitashca canapac randica, chulla chaquilla, chulla maquilla jahua pachapi causangapac yaicunami canmanca ashtahuan alli canga. 9Shinallatac cambac ñahui ima juchapi urmachisha nicpica, llucchishpa shitai. Ishcai ñahuindic ucu pacha ninapi shitashca canapac randica, chulla ñahuilla jahua pachapi causangapac yaicunami canmanca ashtahuan alli canga.
Chingarishca ovejamanta Jesús chimbapurashpa parlashcamanta
(Lc 15.3-7)
10Pacta cai uchilla huahua shinacunata ‘imapac mana valinchu’ nishpa p'iñanguichicman. Ñucaca cashnami nini: Paicunata ricuracuc angelcunaca tucui causaipimi, jahua pacha ñuca Taitapac ñaupapi causacuncuna. 11Runa Tucungapac shamushca*f** ñucaca, juchapi chingarishcacunata quishpichingapacmi shamurcani. 12Shuc runa pasac ovejata michicushpa, shuc ovejata chingachishpaca, ¿imatashi ruhuanman? ¿Manachu iscun chunga iscunta michina urcupi saquishpa mashcagrinman? 13Ña tarishpaca, mana chingarishca iscun chunga iscun ovejamanta yallimi cushicunman. Chaica chashnatacmi can. 14Chashnallatacmi jahua pachapi cac cancunapac Taitapish, cai uchilla huahua shinacunataca shucllapish ama chingarichun munan.
Ima shina shuccunahuan alli tucuna cashcamanta
(Lc 17.3)
15Maijanpish criccunapurapi canta ima mana allita ruhuacpica, pai ima mana alli ruhuashcata ricuchishpa, paillahuan allichingui. Chashna can rimashcata uyashpa alli tucucpica, canca cutinllatacmi paitaca Diospacman tigrachishcangui. 16Can rimashcata mana uyacpica, shucta cashpa, ishcaita cashpa pushashpa ringui. Chashna cacpica ishcai cashpa, quimsa cashpa rishpa uyaccunami, imata cashpapish chashnatac cashcata huillangacuna. 17Chashna paicunata manallatac uyacpica, tandanacushca criccunaman huillangui. Paicunatapish mana uyacpica, Diosta mana cazucta shina, Roma*f** llactaman impuestota japicta shina charinguichic. 18Cai pachapi cancuna allimi nishcaca, jahua pachapipish alli nishcallatacmi canga. Shinallatac cai pachapi cancuna mana allichu nishcaca, jahua pachapipish mana alli nishcallatacmi canga. Chaica chashnatacmi canga. 19Caitapish ninimi: Maijan cancunamanta ishcai tucushpa, shuc yuyailla Taita Diosman cai pachapi imata ruhuachun mañacpica, jahua pachapi cac ñuca Taitaca ruhuangallami. 20Maipimi ishcaillapish, quimsallapish ñuca shutipi tandanacushca canguichic, chaipimi ñucaca cani— nirca.
21Chaimanta Pedroca Jesuspacman shamushpaca:
—Apunchic Jesús, ¿mashna cutincamantac ñucata mana allita ruhuactaca perdonasha? ¿Canchis cutincamanchu perdonasha?— nishpa tapurca.
22Shina nicpi Jesusca:
—Mana canchis cutinllachu perdonachun nini, ashtahuanpish canchis cutin canchis chunga yallihuanmi perdonachun nini.
Mana perdonasha nic runamanta Jesús chimbapurashpa
parlashcamanta
23Jahua pacha Taita Dios mandacucca, shuc llactata mandac paipac runacuna mashna debishcata tapungapac c'ayac shinami. 24Shina tapunata callaricpica, chunga huaranga talento*f** cullquita debic shuc runatami pushamurcacuna. 25Pai maimanta cutichinata mana charishcamantami, chai mandacca: ‘Huarmindic, huahuacunandic, tucui charishcacunandic c'atucpimi, debica pactanga’ nirca. 26Chaimantami chai debic runaca mandacpac ñaupapi cungurishpa: ‘Amito, ashallitota shuyai, ñuca debishcataca tucui cutichishallami’ nishpa, mailla mañarca. 27Shina nicpi, chai mandacca paita llaquishpami: ‘Shinashpaca saquilla, ama cutichichu’ nishpa cacharca.
28Shina cachacpi chai runa chaimanta rishpaca, paiman ashalla cullquita debic runahuan tupashpami: ‘¡Debita cutichi!’ nishpa, cungacarashpa sipi callarirca. 29Chashna ruhuacpi, chai ashalla cullquita debic runaca paipac ñaupapi cungurishpami: ‘Ashata shuyai, ñuca debishcataca tucui cutichishallami’ nishpa, mailla mañarca. 30Chashna mañacpipish, chai runaca mana uyarcachu, ashtahuanpish carcelpimi tucui debita cutichingacaman churarca.
31Caishuc runacuna chashna ruhuacta ricushpaca, mai llaquirishpami, tucui ima tucushcata mandacmanca huillagrircacuna. 32Chaita uyashpaca, chai mandacca chai debic runataca cutin c'ayachishpami: ‘Millai runa, can mailla mañacpica, achcata debishcatapish saquircanillami. 33Ñuca ima shinami llaquishpa canta saquircani, chashnallatac canpish canhuan puric runataca saquinalla carcangui’ 34nishpa p'iñarishpami, tucui debishcata cutichingacaman carcelpi llaquita apachun churachirca— nirca.
35Shinallatac Jesusca:
—Cancunapurapi shungumanta mana perdonanacucpica, jahua pachapi cac ñuca Taitapish, chashnallatacmi cancunataca ruhuanga— nirca.
Currently Selected:
SAN MATEO 18: QXR96
Highlight
Share
Copy
Want to have your highlights saved across all your devices? Sign up or sign in
Quichua Cañar Nuevo Testamento © United Bible Societies in Ecuador, 1996.
