SAN LUCAS 14

Ungushca runata Jesús alliyachishcamanta

1Chai q'uipami, samana punzhapi*f** Jesusca mandac fariseopac*f** huasipi micugrirca. Chaipi micucucpimi, caishuc fariseocunaca Jesusta ima shinapish juchanchingapac chapacurcacuna. 2Jesuspac ñaupapica, punguillichic ung:uihuan cac runami chaipi carca. 3Chai runata ricushpami, mandashcacunata yachachiccunatapish, fariseocunatapish Jesusca:

—Mandashcacunapi nishca shinaca, ¿samana punzhapi ungushcata alliyachinaca allichu canga? Mana cashpaca, ¿saquinallachu canga?— nishpa tapurca.

4Chashna tapucpi imata mana nicpica, Jesusca chai ungushca runataca tuparishpalla ña alliyachishpaca: “Rilla” nishpami cacharca. 5Chashna ruhuashca q'uipami, fariseocunataca:

—Maijan cancunapac shuc huahua cashpa, shuc huagra cashpapish jutcupi ucuyacpica, samana punzha cachunpish, ¿manachu llucchinguichicman?— nirca.

6Chashna nicpica, imata mana ni pudircacunachu.

Bodaman c'ayashcacunamanta Jesús chimbapurashpa parlashcamanta

7Chai micungapac c'ayashcacuna punta tiyarinata mashcashpa mizapi tiyaricucta ricushpami, Jesusca yuyaita japichun cashna nishpa parlarca: 8“Cazarana bodaman canta pi c'ayacpi rishpaca, punta alli nishcacuna tiyarinapica ama tiyaringuichu. Pacta canta atishpa ashtahuan alli nishca runa q'uipata chayamucpi, 9bodayuc shamushpa: ‘Caimanta anchuri, paitami caipica tiyachigrini’ ninman. Chashna nicpica, pingaihuanmi yangallacuna tiyarinapi tiyaringui. 10Ama chashna tucungapacca, canta bodaman c'ayacpi rishpaca, yangallacuna tiyarinapi tiyaringui. Chaimanta bodayuc shamushpa: ‘Uyai, cai ñaupaman tiyari, ari vidalla’ nicpica, canca tucui chaipi canhuan tiyacuccunapacpish alli nishcami cangui. 11Maijanpish ‘allimi cani’ nictaca, Taita Diosca ‘mana allichu cangui’ ningami. Shinallatac maijanpish ‘mana allichu cani’ nictaca, Taita Diosca ‘allimi cangui’ ningami” nirca.

12Shinallatac Jesusca chai micuiman c'ayac runatapish cashnami nirca:

—Ima micuiman c'ayashpapish, cambac alli ricsishcacunallata, huauquicunallata, cambac quiquin familiacunallata, cambac cuchullapi causac chayuccunallataca ama c'ayanguichu. Chaicunata c'ayacpica, paicunapish canta c'ayashpa, can carashcamantaca cutichingami. 13Ashtahuanpish shuc jatun micuita carangapac c'ayashpaca, huacchacunatapish, mana imata ruhuaipaccunatapish, suchucunatapish, ñahui mana ricuccunatapish c'ayangui. 14Chashna mana cutichishpa caraipaccunaman carashcamantaca, cushicunguimi. Shina ruhuacpimi, Dios alli nishcacuna causarimui punzhapica, Taita Diosca canmanca cutichinga— nirca.

Jatun micuihuan chimbapurashpa Jesús parlashcamanta

(Mt 22.1-10)

15Jesús chashna nicta uyashpaca, mizapi paihuan tiyacuccunapuramanta shucca:

—Pipish Taita Dios maipi mandacucpi micungapac chayacca cushicungami— nirca.

16Chashna nicpi, Jesusca cashnami parlarca: “Shuc runami jatun micuita ruhuagricushpa, achcacunata c'ayarca. 17Ña micunalla cacpimi, paita servic runataca: ‘Ñami tucui allichishca, shamuichic nigri’ nishpa cacharca. 18Chashna c'ayachun cachacpica, caita chaita ninacushpami, mana shamushun nircacuna. Shucca: ‘ “Cunanllami allpata randircani. Chaitami ricungapac ricuni. Chaimantami mana shamui pudini ninmi” nigrishpa cui’ nirca. 19Cutin shucca: ‘ “Ñucaca pichca yunta huagracunatami randircani. Chai randishca huagracunatami yugushpa ricugricuni. Chaimantami mana shamui pudini ninmi” nigrishpa cui’ nirca. 20Cutin shucca: ‘ “Ñucaca cunanllami cazararcani. Chaimantami mana shamui pudini ninmi” nigrishpa cui’ nirca.

21Chashna ninacucpica, chai amo cachashca runa cutimushpaca, paicuna ima nishcatami amoman huillarca. Chashna huillacpica, amoca munai p'iñarishpami: ‘Shinashpaca, cunantac rilla. Plazacunapi, pueblo ñancunapi puricuc huacchacunatapish, mana imata ruhuaipaccunatapish, suchucunatapish, ñahui mana ricuccunatapish pushamugri’ nishpa cacharca. 22Amota servic runa ña tucui pushamushca q'uipaca: ‘Amito, ñami can mandashca shina pushamushcani. Shina cacpipish ucupica manarac jundanchu’ nirca. 23Chashna nicpi amoca: ‘Shinashpaca mai ñancunatapish purishpa, imallata mañashpa chaipi tiyacuccunacaman pushamushpa, ima shinapish ñuca huasipica jundachi. 24Cancunaman ninimi: Ñaupaman c'ayashcacunaca, shucllapish manatac cai ñuca micuitaca micungacunachu’ ” nirca.

Cristota c'atingapacca, imatapish saquishpa c'atina cashcamanta

(Mt 10.37-38)

25Jesusca paihuan ricuc achca gentecunata ricushpaca: 26“Maijan ñucata c'atisha nishpaca, taita mamata, huarmita, huahuacunata, huauquicunata, panicunata, paipac quiquin causaitapish yallita llaquicca, mana ñuca yachacuc cai pudinchu. 27Maijanpish cruzpi chacatashca huañuna shina llaquita apana cashpapish ñucata mana c'atishpaca, mana ñuca yachacucchu canga. 28¿Manachu maijan cancuna huasita shayachisha nishpaca: ‘¿Cullquica pactangachu, manachu pactanga?’ nishpami, puntaca alli yuyaringuichicman? 29Mana chashna alli yuyarishcamanta huasichinata callarishpalla saquicpica, shuccuna chaita ricushpaca, burlashpa asinmancunami. 30Shina burlashpaca: ‘Cai runaca manapish tucuchingapacmi huasitaca shayachinata callarishca’ ninmancunami. 31Shinallatac maijan llactata mandacpish, shuc llactata mandac-huan macanacusha nishpaca, paipac chunga huaranga soldadocunallahuan cashpa, caishuc mandacca ishcai chunga huaranga soldadocunahuan shamucucpica, manarac macanacushpami yuyarinman. 32Mana macanacuipac cashpaca, caishuc mandac manarac chayamucpimi: ‘Mana macanacusha ninichu. Macanacunapac randica, alli tucunacushunlla’ nishpami, huillaccunata cachanman. 33Chashnallatac maijan cancunapish tucui charishcacunata mana saquishpaca, mana ñuca yachacuccuna cai pudinguichicchu.

Cachi ima shina cashcata Jesús huillashcamanta

(Mt 5.13; Mr 9.50)

34Cachica allimi. Chashna cashpapish gamuyashpaca, ¿imapac allichu canman? 35Allpapi shitangapacpish, huanupi churangapacpish mana alli canmanchu. Rinrita chariccunaca, cai ñuca nishcacunataca alli uyaichic” nirca.

Currently Selected:

SAN LUCAS 14: QXR96

Highlight

Copy