Yohane 13

Yesu hohoroo n’asuafoɔ he nane ase

1Na afei Twam afahyɛ he oobeduru he, na Yesu nim sɛ berɛ he aduru sɛ oobefiri wiase akɔ Agya he nkyɛne. Na ɔdɔɔ ɔnoaa ne deɛ a na bɛya wiase he, na ɔdɔɔ bɛ de kosii awieeɛ. 2#Luk 22:3 Nti berɛ a na beebedi anwummerɛduane he, na bronsam de ahyɛ Simon ba Yuda Iskariot akomam dada sɛ onyi no ma. 3#Yoh 3:35; 16:28 Na esiane sɛ na Yesu nim sɛ Agya he de nnoɔma nyinaa ahyɛ ne nsa, na ofiri Nyankopɔn nkyɛne, na ɔɔkɔ Nyankopɔn hɔ nti, 4ɔsɔre firii aduane he ho yii n’ataadeɛ ngusoɔ guu hɔ. Afei ɔfaa bɔɔdoa de bɔɔ n’asenem. 5Ɔno akyi he ohwiee nsuo guu dwaresɛn mu, na ofiri aseɛ hohoroo asuafoɔ he nane ho. Na ɔde bɔɔdoa a ɔde bɔɔ n’asenem he popaa ho. 6Na oduruu Simon Petro so he, obisaa Yesu sɛ, “Awurade, wo ne woobɛhohoro me nane ase yi? 7Na Yesu buaa sɛ, “Nea meeyɔ yi wonte aseɛ seesei na akyire he wobɛte aseɛ.” 8Petro ka kyerɛɛ no sɛ, “Aa! Awurade, memma wonhohoro me nane ase.” Yesu buaa sɛ, “Sɛ manhohoro wo nane ase a wonni kyɛfa biaa me mu.” 9Simon Petro ka kyerɛɛ no sɛ, “Sɛ ɔte deɛ a, Awurade, ɔnyɛ me nane ase nkoaa, na me nsa ne meti nso ka ho!” 10#Yoh 15:3 Yesu ka kyerɛɛ no sɛ, “Nea woadware he nhia sɛ ɔbɛhohoro bio, na mmom ohia sɛ ohohoro ne nane ase, efiri sɛ, ne ho nyinaa afiri. Ho ho afiri nso ɔnyɛ ho nyinaa.” 11#Yoh 6:64; 6:70-71 Na onim nipa korɔ a obeyi no ama he, nti ne ɔkaa sɛ “Ɔnyɛ ho nyinaa ne ho ho afiri he.” 12Afei berɛ a ɔhohoroo bɛ nane ase wieeɛ a ɔhyɛɛ n’ataadeɛ ngusoɔ, na ɔkɔtenaa pono he ho bio he, obisaa bɛ sɛ, “Hoahu nea maayɔ ho yi? 13#Mat 23:8; 23:10Hofrɛ me Kyerɛkyerɛfoɔ ne Awurade, na ɔyɛ ne kwane so sɛ hoka saa, efiri sɛ meyɛ saa. 14#Luk 22:27Na sɛ me a meyɛ Awurade ne Kyerɛkyerɛfoɔ ahohoro ho nane ase a, hedeɛ na ɔsɛ sɛ ho nso ho mu biaa hohoro ne yɔnko nane ase. 15#Flp 2:5; Kol 3:13 Na maama ho nhwɛsoɔ sɛnea mayɔ ho he, ho nso honyɔ saa. 16#Mat 10:24 Meeka akyerɛ ho nɔkorem paa sɛ, akoa nsene ne wura, na saa ne somafoɔ nso nsene onii a ɔsomaa no he. 17#Mat 7:24 Sɛ honim yeinom na hoyɔ a, hoyɛ nhyira. 18#Dwom 41:9 Ɔnyɛ ho nyinaa ho asɛm ne meeka yi, me deɛ menim bɛ a maayi bɛ. Na mmom sɛnea ɔbɛyɛ a twerɛsɛm he bɛbam sɛ, ‘Nea me ne no bɔ kosua tafere he, ayi me ama ntia.’ 19Afei meeka akyerɛ ho nnɛ ansa na aba, sɛnea ɔbɛyɛ na sɛ onya ba a, hobɛgye adi sɛ mene no. 20#Mat 10:40 Meeka akyerɛ ho nɔkorem paa sɛ, nea ɔgye biaa a mesoma no he gye me nso. Saa nso ne nea ɔgye me nso gye nea ɔsomaa me he nso.”

Yesu hyɛɛ ne Wuo ho Nkɔm

(Mateo 26:21-25; Marko 14:18-21; Luka 22:21-23)

21 # Yoh 12:27 Na Yesu kaa yei wieeɛ he, ne ho yeraa no ne honhom mu, na ɔpaem kaa sɛ, “Meeka akyerɛ ho nɔkorem paa sɛ, ho mu baako beyi me ama.” 22Na asuafoɔ he hwehwɛɛ bɛ ho bɛ ho anim a na benhu onii korɔ a ɔɔka ne ho asɛm he. 23#Yoh 19:26; 20:2; 21:7; 21:20 Na asuafoɔ he mu baako a Yesu dɔ no he twere Yesu kokom 24na Simon Petro bɔɔ n’ani kyerɛɛ no sɛ, omisa onii korɔ a ɔɔka ne ho asɛm he. 25Nti ɔpa tweree Yesu kokom bisaa no sɛ, “Awurade, ɔyɛ hwane a?” 26Yesu buaa sɛ, “Ɔno ne mede paanoo sini bɛbɔ ayowa mu ama no he.” Nti ɔde paanoo sini bɔɔ ayowa mu de kɔmaa Yuda, Simon Iskariot ba he. 27#Yoh 13:2 Ɔgyee paanoo sini he wieeɛ he, Satan bɛhyɛɛ ne mu. Na Yesu ka kyerɛɛ no sɛ, “Nea woobɛyɔ he, yɔ no ntɛntɛm.” 28Nso na bɛ a bɛte pono he ho he biaa nnim nea nti a ɔkaa saa kyerɛɛ no he. 29#Yoh 12:6 Esiane sɛ na Yuda ne kura bɛ sika adaka he nti, binom susuu sɛ na Yesu ɔɔka akyerɛ no sɛ, “Kɔtotɔ nnoɔma a yehia ma afahyɛ he” anaa ɔmfa bibi mma ahiafoɔ. 30Afei ɔgyee paanoo sini he, ntɛmaa na ofiri adi. Na ɔyɛ anadwo.

Ahyɛdeɛ foforɔ

31Nti ofirii adi he, Yesu kaa sɛ, “Afei bɛahyɛ Nipa Ba he animuonyam, na ɔno nti bɛahyɛ Nyankopɔn animuonyam. 32#Yoh 12:23; 17:1-5 Na Nyankopɔn ankasa bɛhyɛ no animuonyam, na ɔbɛhyɛ no animuonyam ntɛm. 33#Yoh 8:21 Mma nkumaa, mene ho ya hɔ mmerɛ tiaa bi. Hobɛhwehwɛ me, na sɛnea maka akyerɛ Yudafoɔ he sɛ, ‘Baabi a meekɔ hontumi mma hɔ he, saa ne seesei meeka akyerɛ ho nso.’ 34#Yoh 15:12-13; 15:17 Ahyɛdeɛ foforɔ ne mede ɔɔma ho sɛ, honnodɔ ho ho sɛnea medɔɔ ho he, saa ne ho nso honnodɔ ho ho ho ho. 35Sɛ hododɔ ho ho ho ho a, ɔno ne bɛma nnipa nyinaa ahu sɛ hoyɛ m’asuafoɔ ampa.”

Yesu hyɛɛ nkɔm sɛ Petro bɛpa no

(Mateo 26:33-35; Marko 14:29-31; Luka 22:31-34)

36 # Yoh 7:34; 21:18-19 Simon Petro bisaa no sɛ, “Awurade, hefa ne wookɔ?” Yesu buaa sɛ, “Baabi a meekɔ he wontumi nni m’akyi seesei, nso akyire yi wobedi m’akyi aba hɔ.” 37Petro ka kyerɛɛ no sɛ, “Awurade, mmɛ nti ne mentumi nni w’akyi seesei? Mede me nkwa bɛto hɔ ama wo.” 38Yesu buaa sɛ, “Wode wo nkwa bɛto hɔ ama me? Meeka akyerɛ wo nɔkorem paa sɛ, ansa na akokɔ bɛbɔno he, na woapa me mprɛnsa.

Currently Selected:

Yohane 13: BBTP

Highlight

Copy