Yohane 12

Maria sraa Yesu Ngo

(Mateo 26:6-13; Marko 14:3-9)

1 # Yoh 11:1; 11:43 Afei aka nnansia na Twam he aduru he, Yesu baa Betania, baabi a na Lasaro a Yesu nyane no firii awufoɔ mu he te he. 2Bɛtoo Yesu pono hɔ. Marta someeɛ, na Lasaro deɛ na ɔka bɛ a na bɛ ne no te adidipono he ho. 3#Luk 7:38 Na Maria faa ngo hwamhwam krɔgyee a na ne boɔ bɛyɛ nkariboɔ baako de bɛsraa Yesu nane ase, na ɔde ne tinwii popaeɛ. Na ne hwam hyɛɛ fie hɔ ma. 4Nso, Yuda Iskariot, asuafoɔ he mu baako a na oobeyi no ama he kaa sɛ, 5“Ɛɛne nti ne bɛantɔno saa ngo hwamhwam yi annye sika a ɔbɛyɛ afe baako akatua amfa amma ahiafoɔ?” 6#Luk 8:3 (Nso ɔnyɛ sɛ ɔdwene ahiafoɔ ho nti ne ɔkaa saa, na mmom na ɔyɛ korɔmfoɔ, na sika adaka he ya ne nkyɛne, na ɔtaa yi sika a bɛde gu mu he bi.) 7Yesu kaa sɛ, “Honyaa no, na ɔde yei asie ama me sie da. 8#Deut 15:11 Ahiafoɔ deɛ, bɛya ho nkyɛne daa, na me deɛ honnya me daa.”

Bɛbɔɔ Lasaro ho pɔ sɛ bebeku no

9Na afei Yudafoɔ nnipakuo kɛseɛ bi huu sɛ ɔya hɔ, na bɛbaa hɔ. Ɔnyɛ Yesu nko nti, na mmom bɛbaa sɛ bɛɛbɛpɛ Lasaro a wanyane afiri wuom he ahwɛ. 10Nti asɔfoɔ mpanyimfoɔ he bɔɔ pɔ sɛ bebeku Lasaro nso, 11efiri sɛ ɔno nti ne Yudafoɔ bebree kɔɔ hɔ na bɛgyee Yesu diiɛ.

Yesu wuraa Yerusalem Nkunimdie so

(Mateo 21:1-11; Marko 11:1-10; Luka 19:29-40)

12Adeɛ kyeɛ he, nnipakuo pii a na bɛaba afahyɛ he asɛ he tee sɛ Yesu ɔɔba Yerusalem he, 13#Dwom 118:25-26 bɛfaa berɛɛ, na befiri adi sɛ beekohyia no, na bɛteaam sɛ, “Hosiana! Nhyira ne deɛ ɔɔba Awurade dini mu— Israel hene he!”

14 # Sak 9:9 Na berɛ a Yesu huu afunumu ba bi he, ɔtenaa ne so, sɛnea bɛatwerɛ sɛ:

15“Sion babaa, nsuro.

Hwɛ, wo hene ɔɔba,

ɔte afunumu ba so!”

16Nso n’asuafoɔ he ante yeinom ase saa berɛ he; na Nyankopɔn hyɛɛ Yesu animuonyam akyi he ne bɛkae sɛ bɛatwerɛ yeinom afa ne ho, na bɛayɔ nea bɛatwerɛ he nyinaa ama no. 17Na nnipakuo a na bɛya hɔ berɛ a ɔfrɛɛ Lasaro firii adakamena mu na onyane no firi wuom he kɔɔ so dii adanseɛ. 18Ɔnam sɛ bɛtee sɛ wayɔ saa nsɛnkyerɛnne yi nti, nnipakuo he kohyiaa no. 19#Yoh 11:48 Farisifoɔ he keka kyerɛɛ bɛ ho bɛ ho sɛ, Honhu sɛ hontumi nyɔ no hwee. Hwɛ! Wiase atu di n’akyi.

Helafoɔ pɛɛ sɛ bebehu Yesu

20Na Helafoɔ bi ka bɛ a bɛbaa sɛ bɛɛbɛsom afahyɛ he ase he ho. 21#Yoh 1:45 Nti yeinom baa Filipo a na ofiri Betsaida a ɔya Galilea he nkyɛne, na befirii aseɛ srɛɛ no sɛ, “Owura, yɛpɛ sɛ yehu Yesu.” 22Filipo kɔka kyerɛɛ Andreo, na Andreo ne Filipo kɔka kyerɛɛ Yesu. 23Yesu buaa sɛ, “Berɛ he aduru sɛ bɛhyɛ Nipa Ba he animuonyam. 24#Rom 14:9 Meeka akyerɛ ho nɔkorem paa sɛ, sɛ ayuo ba baako antɔ fam anwu a, ɔdasoaa yɛ ba baako; nso sɛ owu a ɔsõ mma bebree. 25#Mat 10:39; Luk 17:33 Deɛ ɔdɔ ne nkwa he, obefiri ne nsa; na deɛ ɔtane ne nkwa wiase ha yi bɛkora no akɔ daa nkwam. 26#Yoh 14:3; 17:24 Sɛ bi yɛ me somfoɔ a ma no nni m’akyi, na baabi a meya he, hɔ ne me somfoɔ bɛba; na sɛ bi som me a, m’Agya bedi no ni.

Yesu kaa ne wuo ho asɛm

27 # Mat 26:38 “Afei me kra ho yera no. Na mmɛ ne menka? ‘Agya, gye mefiri dɔno yi mu’? Daabi! Yei nti ne saa mmerɛ yi ato me. 28Agya, hyɛ wo dini animuonyam.” Na afei nne bi firi soro baeɛ sɛ, “Maahyɛ no animuonyam dada, na mɛhyɛ no animuonyam bio.” 29Na nnipakuo a begyina hɔ na bɛteeɛ he kaa sɛ, “Agradaa abom.” Binom nso kaa sɛ, “Bɔfoɔ akasa akyerɛ no.” 30#Yoh 11:42 Yesu kaa sɛ, “Ɔnyɛ me nti ne nne yi baeɛ, na mmom ho ntia. 31#Yoh 14:30; 16:11; Luk 10:18 Afei ne beebebu wiase atɛne; afei ne beebetu wiase sodifoɔ afiri hɔ. 32#Yoh 8:28 Na me deɛ, sɛ bɛma me so firi wiase a, mɛtwe nnipa bebree aba me nkyɛne.” 33Ɔkaa yei de kyerɛɛ wuo ko a na oobewu. 34#Dwom 110:4; Dan 7:14 Nti nnipakuo he buaa no sɛ, “Yɛte firi mmara he mu sɛ, Kristo he ya hɔ daa. Afei mmɛ nti ne wooka sɛ otwa sɛ bɛma Nipa Ba he so? Hwane ne Nipa Ba he?” 35#Yoh 8:12; 11:10 Yesu ka kyerɛɛ bɛ sɛ, “Hann he bɛtena ho nkyɛne kakra. Howɔ hann he, honante na sum anni ho so. Na deɛ ɔnante sum mu he nnim baabi a meekɔ. 36#Efe 5:8 Howɔ hann he yi, honye hann he nni, na hoayɛ hann he mma.”

Nnipa he annyeanie

Na Yesu kaa yei wieeɛ he, ofirii hɔ kohintaeɛ. 37Ewom sɛ na waayɔ nsɛnkyerɛnne pii bɛ anim deɛ, nso bɛannye no anni. 38#Yes 53:1; Rom 10:16 Yei siiɛ sɛ asɛm a diyifoɔ Yesaia kaeɛ he bɛbam sɛ: “Awurade, hwane ne agye yɛ asɛm adi, na hwane ne bɛayi Awurade abasa akyerɛ no?” 39#Yes 6:9-10; Mat 13:14-15 Deɛ ntia bɛantumi annye anni ne sɛ Yesaia kaa bio sɛ,

40“Wafira bɛ ani

na waama bɛ akoma ayɛ dene,

sɛnea ɔbɛyɛ na bɛmmfa bɛ ani nnhu,

na bɛ akoma ante aseɛ na bɛansakra

na mansa bɛ yadeɛ.”

41 # Yes 6:1 Yesaia kaa yeinom, efiri sɛ ohuu n’animuonyam, na ɔkaa ne ho asɛm. 42#Yoh 9:22 Yei nyinaa akyi he, mpanyimfoɔ he mu pii nso gyee no diiɛ; nso Farisifoɔ he nti bɛanka sɛnea ɔbɛyɛ na bentu bɛ mfiri hyiadane he mu, 43#Yoh 5:44 efiri sɛ bɛpɛ nnipa animuonyam kyɛne Nyankopɔn animuonyam mpo.

Yesu Nkyerɛkyerɛ Tɔfabɔ

44Afei Yesu teaam dendene sɛ, “Deɛ ɔgye me di he, ɔnyɛ menko ne ɔgye me di, na mmom nea ɔsomaa me he nso. 45#Yoh 14:9 Na nea ohu me he hu deɛ ɔsomaa me he nso. 46#Yoh 12:35 Maaba wiase sɛ hann, na biaa a ɔgye me di he antena sum mu. 47#Yoh 3:17; Luk 9:56 Na sɛ bi te m’asɛm na onni so a, me deɛ memmu no atɛne efiri sɛ mamma sɛ meebebu wiase atɛne, na mmom mebaa sɛ meebɛgye wiase nkwa. 48Nea ɔpo me na ɔnnye me nsɛm he wɔ temmufoɔ baako. Nsɛm a maka heaa ne bebu no atɛne da a odi akyire he mu, 49efiri sɛ me deɛ ɔnyɛ mene mehyɛɛ me ho kasaeɛ, na Agya he a ɔsomaa me he ne hyɛɛ me nea menka ne sɛnea menkasa. 50Na menim sɛ n’ahyɛdeɛ yɛ daa nkwa. Nti deɛ maka he, sɛnea Agya he aka akyerɛ me he, saa ne meka.”

Currently Selected:

Yohane 12: BBTP

Highlight

Copy